მჭედლიშვილი ივანე
ივანე მჭედლიშვილი – (1903, სოფ. კაკაბეთი, საგარეჯოს რ-ნი, – 1970, თბილისი), ქართული ხალხური სიმღერების შემსრულებელი და ლოტბარი. საქართველოს ხელოვნების დამსახურებული მოღვაწე (1951). ფლობდა უნიკალური ტემბრის ლამაზ კოლორიტულ ხმას, გამოირჩეოდა მაღალი საშემსრულებლო ოსტატობით, შესანიშნავად უკრავდა ფანდურზე. 1936 მ. ჩაირიცხა აღმ. საქ. სიმღერისა და ცეკვის ეთნოგრაფიულ ანსამბლში, რომელსაც სანდრო კავსაძე ხელმძღვანელობდა. 1937-იდან აყალიბებდა და ხელმძღვანელობდა საგუნდო კოლექტივებს.
1940 მ. ჩაირიცხა საქართველოს სიმღერისა და ცეკვის სახელმწიფო ანსამბლში სოლისტად. 7 წლის შემდეგ კი დანიშნეს ამავე ანსამბლის ლოტბარად. მან პირველად ააჟღერა მთელი რიგი ქართლ-კახური სიმღერები, რომლებიც დღემდეა რეპერტუარში. აღსანიშნავია მჭედლიშვილის როგორც სიმღერის შემკრებისა და აღმდგენელის მოღვაწეობა, ბევრი სიმღერა პირადად მის მიერ არის დამუშავებული: „კალოსპირული“, „წინწყარო“, „არხალალო“, „შენ ბიჭო ანაგურელო“ და სხვ.
მჭედლიშვილმა აღზარდა მთელი პლეადა მომღერლებისა მათ შორის ჰამლეტ გონაშვილი.
