ფისჰარმონია

ფისჰარმონია – (ჰარმონიუმი (გერმ. Fisharmonium< ბერძ. physa-საბერველი და harmonia ჰარმონია), სასულე – კლავიშიანი საკრავი. შეიქმნა XIX ს. 10-იან წლებში. ფისჰარმონიის წინამორბედია ე. წ. ორგან-ექსპრესივი, რომელიც გააკეთა ფრანგმა გ. გრენიემ (1810). თანამედროვე ფისჰარმონია ფორმით მცირე ზომის პიანინოს წააგავს. აქვს ფორტეპიანოს კლავიატურა, 6-20 რეგისტრი, რომლებიც ირთვება გამოსაწევი ბერკეტებით. კლავიატურა იყოფა მარცხენა (c ₁-e ¹) და მარჯვენა (f ¹- c ⁴) ნახევრად. ჟღერს ფოლადის მოძრავი ენაკებიანი თითბრის ფირფიტების მეშვეობით, ენაკები ირხევა საბერველიდან მომდინარე ნაჭირხნი ჰაერით. ჰაერი საბერველში იტუმბება ფეხის პედლების მეშვეობით, ფისჰარმონიის ხმა წააგავს ორგანისას.

წყარო

მუსიკის ენციკლოპედიური ლექსიკონი