შირიმშო

შირიმშო – საბავშვო თამაშობა. წარმომავლობა და თავდაპირველი მნიშვნელობა დაუდგენელია. ფიქსირებულია 1968 წელს სოფელ დიდაჭარაში და 1969 წელს – ვერხვნალში (ხულოს რ.).

წილისყრის შემდეგ ერთი მოთამაშე მიწაზე წვება, ფეხებს მაღლა აიშვერს და ფეხებზე თავშალს შემოახვევენ. პირს გაუკეთებენ, ხელში ჯოხებს მისცემენ და ზედ კაბას გადმოაცვამენ. ჯოხები ვითომ ხელებია. მერე მიუმღერებენ:

– შირიმშო! ესკერობა მოსულა,

ესკერს კრეფენ, მიჰყავანო,

შენი ქმარიც მიჰყავანო,

იტირე, იტირეო! –

ისიც გადაბრუნდება და ტირის. ან: შენი ქმარი არ მიჰყავანო! – და, -ჰა-პა -ჰა-ჰა! – გაიცინებს. 1969 წელს ჩაწერილი ტექსტი „რძალ–დედამთილიანის“ ციკლისაა ეუბნებიან, – დედამთილი გიკვდებაო! – იცინის, – გირჩებაო, – ტირის. თამაში სალაღობო შესაქცევარია.

ნ. ცქიტიშვილი

წყარო

ქართული ფოლკლორის ლექსიკონი: ნაწილი II