გაგრა
გაგრა − ქალაქი საქართველოში, აფხაზეთის ავტონომიური რესპუბლიკის გაგრის მუნიციპალიტეტის ადმინისტრაციული ცენტრი.
გაგრა აფხაზეთის ერთ-ერთი მნიშვნელოვანი საკურორტო ცენტრია. იგი გაგრის ქედის სამხრეთ კალთაზე და გაგრის უბის ვიწრო სანაპირო ზოლში მდებარეობს. ზღვის დონიდან 7-50 მეტრზე, სოხუმიდან 80 კმ. შუა საუკუნეებში მას „გაგარი“ ეწოდებოდა. ეს სახელწოდება ძველ ქართულში „ხეობაში ვიწრო გასასვლელს“ ნიშნავს.
1904 წ. 25 დეკემბერს გაგრის კლიმატური სადგური სოხუმის ოკრუგიდან შავი ზღვის გუბერნიის სოჭის ოკრუგს გადაეცა. ამიერკავკასიის კომისარიატის 1917 წ. 7 დეკემბრის დადგენილებით გაგრის რაიონი სოხუმის ოკრუგის (ოლქის) შემადგენლობაში შევიდა. საქართველოს დემოკრატიული რესპუბლიკის დროს, 1919-1921 წლებში გაგრის მაზრის ადმინისტრაციული ცენტრია. 1932 წელს დაბა გაგრამ რაიონული დაქვემდებარების ქალაქის სტატუსი მიიღო. 1948 წელს დადგინდა მისი დაწერილობის ფორმა რუსულ ენაზე Гагра – Гагры-ს ნაცვლად. 1973 წელს რაიონული დაქვემდებარების ქალაქ გაგრას რესპუბლიკური დაქვემდებარების ქალაქის სტატუსი მიენიჭა (ხორავა, ჭანტურია, 2019: 68-69).
2008 წლის 23 ოქტომბრის ოკუპირებული ტერიტორიების შესახებ საქართველოს კანონის საფუძველზე, ტერიტორია ოკუპირებულია რუსეთის ფედერაციის სამხედრო აგრესიის შედეგად და დადგენილია ამ ტერიტორიების განსაკუთრებული სამართლებრივი რეჟიმი.
გაგრის ციხე-სიმაგრის ტერიტორიაზე დგას V-VI სს. სამეკლესიანი ბაზილიკა, რომელიც 1902 წელს განაახლეს. (ბერაძე თ., 2013: 4).
