ჩაწყობილა-ბაია
ჩაწყობილა-ბაია - (Ficaria calthifolia Rchb. = Ficaria verna subsp. Calthifolia [Rchb.] Nyman); ოჯახი: ბაიასებრნი (Ranunculaceae). მრავალწლიანი ბალახოვანი მცენარეა, 10-20 სმ სიმაღლის, სწორად მდგომი, მარტივი ან დატოტვილი, ერთყვავილიანი ღეროთი. ფოთლები კვერცხისებურ-გულისებურია, ფუძესთან ამონაკვეთით, კიდემთლიანი ან ოდნავ ბლაგვკბილა, ყვავილი კაშკაშა ყვითელია. ყვ. ნაყ. IV-V. მცენარე გავრცელებულია დაბლობიდან ტყის შუა სარტყლამდე, ტყეებში, ბუჩქნარებში, ტენიან ადგილებში. კახეთში ამ მცენარის ნახვა შესაძლებელია თელავისა და სოფელ შალაურის მიდამოებში, ლაგოდეხის ნაკრძალში. გავრცელებულია თითქმის მთელ საქართველოში.
წყარო
კახეთის რეგიონის მცენარეები – 400 სახეობის მცენარე და 402 ფოტო; სარკვევზე იმუშავა კახაბერ სუხიტაშვილმა; რედაქტორი მაია ახალკაცი, თბილისი 2016.
