ლამაზა

ლამაზა

ლამაზა – (Silene compacta Fisch.); ოჯახი: მიხაკისებრნი (Caryophyllaceae). ერთ ან ორწლიანი ბალახოვანი მცენარეა. ხასიათდება მარტივი ან, იშვიათად, ზედა ნაწილში დატოტვილი 20-70 სმ სიმაღლის ღეროთი. ქვედა ფოთლები ნიჩბისებურია, ღეროსეული – კვერცხისებურ-ლანცეტა, მჯდომარე, ღერომხვევი. ყვავილედი კენწრულია, თავაკისებური ან ფარისებური. ყვავილი კაშკაშა მეწამული ფერისაა. ყვ. ნაყ. VI-VIII. მცენარე იზრდება დაბლობიდან მთის შუა სარტყლამდე: ტყის პირას, ღორღიან ადგილებზე, რიყნარებზე. კახეთში მისი ნახვა შესაძლებელია ყველგან. გავრცელებულია მთელ საქართველოში.

წყარო

კახეთის რეგიონის მცენარეები – 400 სახეობის მცენარე და 402 ფოტო; სარკვევზე იმუშავა კახაბერ სუხიტაშვილმა; რედაქტორი მაია ახალკაცი, თბილისი 2016.