ყარღანი
ყარღანი – (Salsola ericoides M. Bieb.); ოჯახი: ნაცარქათამასებრნი (Chenopodiaceae). 60 სმ-მდე სიმაღლის ბუჩქბალახია, ლეგა, შემოდგომაზე შავდება, ძლიერ დატოტვილი; ნორჩი ყლორტები მოკლე შებუსვითაა, უფრო ძველი ყლორტები კი შიშველია; ფოთლები მორიგეობითია, ხორცოვანი, ნახევრად ცილინდრული, ბლაგვი, მჯდომარე, შიშველი, დიდხანს რჩება ტოტებზე. ყვავილები თითო-თითოდაა განლაგებული თავთავისებურ ყვავილედებში, რომლებიც საერთო საგველაშია შეკრებილი; ყვავილსაფრის ნაკვთები შიშველია, ფართო სიფრიფანაკიდეებიანი, ხასიათდება მორუხო ფერის სიფრიფანა ფრთებით, რომელთაგან ორი თირკმლისებური მოყვანილობისაა, დანარჩენი – უკუკვერცხისებურიდან ხაზურამდე. ყვ. ნაყ. V-X. იზრდება მლაშობ, ქვიან ადგილებში, დაბლობებში და მთის ქვედა სარტყელში. კახეთში მისი ნახვა შესაძლებელია ვაშლოვანის დაცულ ტერიტორიაზე ასევე გავრცელებულია ქვემო ქართლში, თბილისის მიდამოებში.
