კლოპშტოკი ფრიდრიხ გოტლიბ
ფრიდრიხ გოტლიბ კლოპშტოკი − (გერმ. Friedrich Gottlieb Klopstock, 1724-1803), გერმანელი პოეტი და დრამატურგი. დაწერა დრამების ციკლი ბიბლიურ სიუჟეტებზე: „ადამის სიკვდილი“, „სოლომონი“, „დავითი“, სადაც გამოხატა იდეა ღმერთის წინაღდგომის შეუძლებლობისა, ადამიანის ცხოვრების წარმავლობისა და ცოდნის შეზღუდულობისა. შემდგომ ამისა შექმნა მეორე დრამატული ციკლი: „ბარდიტები“, რომელშიც შევიდა „გერმანის ბრძოლა“, „გერმანი და თავადები“, „გერმანის სიკვდილი“. ეს არის ძველი გერმანელების განმადიდებელი პატრიოტული ტრილოგია, სადაც ასახულია ხერუსკების ტომის ბელადის საგმირო საქმეები. მისი დრამების ტირანიასთან ბრძოლის მოტივებმა (გმირი წინ აღუდგება ჩაგვრას საიმპერატორო რომის მხრიდან) და თავისუფლებისმოყვარე სულისკვეთებამ, ახალგაზრდა ლესინგისა და „ქარიშხლისა და შეტევის“ მოძრაობის წარმომადგენელთა ყურადღება მიიპყრო. მაგრამ მისი პიესების სტატიკურობამ, გაწელილმა დიალოგებმა, პერსონაჟების მეტყველების მაღალფარდოვნებამ, შეუძლებელი გახადა ამ პიესების სცენური განხორციელება.
