ჯაფარიძე თამო

თამო ჯაფარიძე

ჯაფარიძე თამო (თამილა) – (1958), პოეტი. 1980 წელს დაამთავრა თსუ-ს ფილოლოგიის ფაკულტეტი. გამოცემული აქვს კრებულები: „გივერგილ“ და „ბიმურზელა“.

* * *

შენ მაინც იცი,

რა ერთგული ვარ და რა საბრალო,

როცა სამყარო მანგრევს,

როცა ვბრმავდები _ გეძებ,

შენ ღმერთივით თვალებს მიხელ,

ამბობ შემხედე!

ცა – დედამიწა – ეშაფოტი,

ჩამოეშვა ფიქრის ფანჯრებთან,

გული გაჩერდა, სისხლი გაქვავდა, –

შენ არ გათავდე...

მოლაპარაკე მგლების გუნდი

ხარბად ყლაპავს აპრილის თოვას..

ხარხარებს მგლობა –

ლურჯი აპრილი არასდროს მოვა!

სადაც ღმერთია, იქ ყოველთვის არის იუდა,

კიბე მივუდგი, მიწას შევწვდი

ფსკერზე – სიმართლე...

ვეღარ მივათრევ,

ვერ დავკემსე ფრთების ჯართი,

ვეღარ გავშალე, ვერ წავშალე

სველ ეტრატზე ოკეანე, _ ცრემლის სონეტი...

მოვედი, მიწა შემომყურებს იის თვალებით,

დუმს, იმოსება –

ჩემი ლამაზი გარდაცვალებით....

როგორ დაგტოვო!

არაფერს ვითხოვ,

ლექსის პური უნდა მამყოფო...

შენ მაინც იცი, შენ მაინც იცი, –

როცა მე და შენ მარტო ვრჩებით,

რა მატირებს, ჩემო სამშობლო...

წყარო

ქართველი პოეტები (ენციკლოპედია)