იოანე მინჩხი: საგალობელი
პროექტი: ბიბლიოთეკა სკოლას
საგალობელი | ჰიმნი |
ნუმცა ვემსგავსებით, ჵ ძმანო, ხეთა მათ ზამთრისათა უნაყოფოთა, ფურცელ-დაცჳვნებულთა ბელეკონთა, რაჲთა არაჲ მოვიღოთ ჩუენ პატიჟი იგი უნაყოფოჲსა მის ლეღჳსაჲ, რომელი წყევით განაჴმო ქრისტემან, არამედ ნაყოფიერ ვიქმნნეთ! ვითარცა-რაჲ საჭურველი მფარველ ექმნის ჴორცთა ახოვნისათა დღესა ბრძოლისასა მახჳლისაგან - ეგრეთვე სცავს მარხვაჲ და ლოცვაჲ სულთა ჩუენთა მახჳლთაგან უხილავთა მტერთა მათ ბოროტთა უჩინოთაჲსა და განაწონებს გულთა მათთა. ვითარცა-რაჲ წყალმან ცეცხლი მოტყინარე დაშრიტის მეყსეულად და განაგრილის მჴურვალე მისი - ეგრეთვე წყაროჲ ცრემლთაჲ დაშრეტს ცოდვისა ალსა და განაგრილებს ყოველსა სიცხესა ჴორცთა მჴურვალებისასა, რომელნი ცრემლით ინანიან. ვინმცა მოსცა თავსა ჩემსა წყალი და თუალთა ჩემთა - წყაროჲ ცრემლთაჲ? და ესრეთ ვტიროდემცა დღე და ღამე ლმობიერად, გულსმოდგინედ წინაშე ღმრთისა, ნუუკუე გან-მცა-ვიბანე შეგინებული ესე გუამი ჩემი და განვაბრწყინვე სული ჩემი. დამიმონა მე ცოდვამან და არღარა ძალ-მიც ყოფად კეთილისა, რამეთუ თჳთ შევიპყარ თავი ჩემი, ვითარცა ტრედი, მახესა მას მტერისასა. გევედრები, ქრისტე მჴსნელო, იჴსენ საბრჴეთა მისთაგან სული ჩემი და განარინე სიკუდილისაგან.
|