გაზაფხული
ვიშ, გაზაფხული მოდის მორთული, მოდის და მოაქვს ცით სიხარული. ამწვანდა მთები, ტყე და მინდვრები, ათასფრად ჰყვავის ბაღი და ზვრები. განახლებული, გაცოცხლებული ჰლხინობს და ჰსტკბება ყველა სულდგმული. ბეღურა იქ ჰმღერს, ბულბული აქ სტვენს, თვის მიჯნურ ვარდსა დაჰკვნესს და დაჰკვნესს. აგერ პეპელა ფრთააკრეფილი ყვავილს სწოწნს ნელა და თრთის ყვავილი. იქავ კურკურით, ჩუმის ჩურჩულით წყარო ჩამორბის ლხენით, ჩუხჩუხით. რარიგად ჰგიჟობს ბრწყინვალე წყარო, მიცურს და ჰხარობს: "ყინვით არ ვარო". ზამთრითა შეკრულს, წყალს დამონებულს ყინვა ადნება, მონებაც სწყდება. მიდის, აძლევს ბანს ქვეყნის გალობას და მით მადლს უხდის თავისუფლობას. ყველა ყვავდება, გველი ახლდება, რა ჰხედავს ტკბილ დღეს, გამოცოცხლდება, - და მარტო გული, ერთხელ მოკლული, არც აყვავდება, არც გაცოცხლდება! 1858-სა წელსა, 7-სა მარტსა, ს.-პეტერბურღი. |
გაზაფხული (ვიშ, გაზაფხული»...)
ხელნაწერი: U: ავტოგრაფი, კრებ. №108, გვ. 18 (B) ნაბეჭდი: თხზულებანი ილია ჭავჭავაძისა, I, ტფილისი, 1892, გვ. 25 (А). თარიღი: 1858 А; 1858-სა წელსა 7-სა მარტსა, ს. პეტერბურღი B. რადგანაც B ავტოგრაფი ვარიანტულად საკმაოდ განსხვავდება А ტექსტისაგან, ამიტომ ქვემოთ ვბეჭდავთ მას მთლიანად:
ეს გაზაფხული ქვეყანას დაჰფრენს ცით სიხარული. ყველა ახლდება, ნორჩ ყმაწვილივით რა არის ძილათ, ბულბული აქ სტვენს. თვის მიჯნურს ვარდსა დაჰკვნესს და დაჰკვნესს. ფრთააკრეფილი, ყვავილს სწოწნს ნელა და თრთის ყვავილი. ჩუმის ჩურჩურით, წყარო ჩამორბის ცელქათ, მურმურით. ბრწყინვალე წყარო, მიცურს და ხარობს: წყალს დამონებულს ყინვა ადნება, მონებაც სწყდება. ქვეყნის გალობას, ყველა ყვავდება, ყველა ახლდება, ხან დაბერდება, ჩემი, ბედკრული, არც აყვავდება,
ლექსი დავათარიღეთ ავტოგრაფის მიხედვით.
ი. ჭავჭავაძის თხზულებათა 1914 წლის გამოცემაში 1858 წლის 7 მარტით დათარიღებულია (სარჩევში, გვ. V) «გაზაფხულის» პირველი ვარიანტი (B), რომელიც ვარიანტების განყოფილებაშია დაბეჭდილი (გვ. 499-500), მეორე ვარიანტის (А) თარიღად კი (სარჩევშივე, გვ II.) მხოლოდ 1858 წელია მითითებული (ლექსის დაწერის თვის, რიცხვის და ადგილის აღუნიშვნელად); 1925-1951 წწ. გამოცემებში «7 მარტი, 1858 წ. პეტერბურგი» წარმოდგენილია ლექსის მეორე ვარიანტის თარიღად (პირველი ვარიანტი ამ გამოცემებში დაბეჭდილი არ არის). |