ბრიერი მორის
ბრიერი მორის — (1881-1960), ფრანგი მეცნიერი, აღმოსავლეთმცოდნე და ქართველოლოგი, განათლებით მათემატიკოსი. ქართული ენა ისწავლა პარიზში ცოცხალი აღმოსავლური ენების სკოლაში, სადაც 1926-1928 წწ. ისმენდა ნ. მარის ლექციებს. 1931 წ. პარიზში ნ. მარის თანაავტორობით ფრანგულ ენაზე გამოაქვეყნა ქართული ენის სახელმძღვანელო. 1936 წ. ეწვია თბილისს. 1957 წ. გამოაქვეყნა ვრცელი ნარკვევი „ქართული ქრისტიანული მწერლობა“, რომელიც კ. კეკელიძის „ქართული ლიიტერატურის ისტორიის“ პირველი ტომის გამოკრებილ თარგმანს წარმოადგენს. ბრიერს გამოცემული აქვს რამდენიმე ძველი ქართულ ტექსტი, მათ შორის „შატბერდის კრებულში“ შესული ტექსტები (1954). ამერიკელი ქართველოლოგის, რობერტ ბლეიკის, გარდაცვალების (1950) შემდეგ განაგრძო მუშაობა ძველი აღთქმის ქართულ ტექსტებზე, კერძოდ, წინასწარმეტყველთა წიგნებზე (გამოიცა პარიზში 1961 წ.). 25 წლის განმავლობაში ასწავლიდა ქართულ ენას პარიზის კათოლიკური ინსტიტუტის ძველი აღმოსავლური ენების და ცოცხალი აღმოსავლური ენების სკოლაში.
ლიტერატურა
- საქართველოს მართლმადიდებელი ეკლესიის ენციკლოპედიური ლექსიკონი, ე. გაბიძაშვილის რედ., თბ., 2007;
- ქართული საბჭოთა ენციკლოპედია, ტ. 2, თბ., 1977;
- შანიძე ა., პროფესორი მორის ბრიერი, „ლიტერატურული გაზეთი", 1960, №19.
