ქურდიანი გრიგოლ

გრიგოლ ქურდიანი

ქურდიანი გრიგოლ (5.III.1873, სოფ. საგარეჯო - 14.VI.1957, თბილისი) - ქართველი ინჟინერი. საქართველოს ეროვნული საბჭოს წევრი (კანდიდატი?).

ბიოგრაფია

საშუალო განათლება თბილისის რეალურ სასწავლებელში მიიღო. 1898 წელს დაამთავრა ხარკოვის პოლიტექნიკური ინსტიტუტი. წლების განმავლობაში მუშაობდა სპილენძისა და ნავთობის მრეწველობაში ინჟინრად. იყო ქალაქ თბილისის მთავარი ინჟინერ-არქიტექტორი. ხელმძღვანელობდა თბილისისა და ქუთაისის წყალმომარაგების სისტემის რეკონსტრუქციასა და შექმნას.

1917 წელს მონაწილეობდა საქართველოს ეროვნული ყრილობის მუშაობაში. 1918 წლის 26 მაისს ხელი მოაწერა საქართველოს დამოუკიდებლობის აქტს. დამოუკიდებლობის გამოცხადების შემდეგ განახლებული ეროვნული საბჭო სრულად პარტიული სისტემით დაკომპლექტდა, რის შემდეგაც ეროვნული საბჭო დატოვა. 1918 წელს დააარსა ტექნიკური საზოგადოება. დამოუკიდებლობის პერიოდში ეწეოდა აქტიურ პროფესიულ საქმიანობას. კითხულობდა ლექციებს თბილისის სახელმწიფო უნივერსიტეტში.

საბჭოთა ოკუპაციის შემდეგ ცხოვრობდა საქართველოში. იყო თბილისის ქალაქის აღმასკომის მთავარი ინჟინერი. 1925 გერმანიაში წავიდა სასწავლებლად. მუშაობდა მტკვრის ნაპირების გამაგრებისა და ხიდების საკითხზე. აგრძელებდა პედაგოგიურ საქმიანობას თბილისის სახელმწიფო უნივერსიტეტში, სამხატვრო აკადემიასა და პოლიტექნიკურ ინსტიტუტში.

ირაკლი ირემაძე

ლიტერატურა

გ. შარაძე, ისტორიული რელიქვიების დაბრუნება, თბ., 2001.

წყარო

საქართველოს დემოკრატიული რესპუბლიკა (1918-1921) ენციკლოპედია-ლექსიკონი

იხილე აგრეთვე

გიგო ქურდიანი