ეკონომიკური პოტენციალი
ეკონომიკური პოტენციალი - სახელმწიფოს შესაძლებლობები, დააკმაყოფილოს საზოგადოების მოთხოვნილება მატერიალურ დოვლათსა და მომსახურებაზე, უზრუნველყოს მისი სტაბილური და უსაფრთხო განვითარება. იგი განსაზღვრავს მატერიალური წარმოების მოცულობის დიდ ნაწილს, რომელსაც სახელმწიფომ მთელი თავისი ძალების და რესურსების მაქსიმალური გამოყენებით შეიძლება მიაღწიოს.
ეკონომიკური პოტენციალის სტრუქტურის შემადგენელი ნაწილია ადამიანური რესურსი, სახელმწიფო ტერიტორია, დაზვერილი და სამეურნეო ბრუნვაში მოქცეული ბუნებრივი, უწინარეს ყოვლისა, სანედლეულო და სათბობენერგეტიკული რესურსები, საწარმოო და არასაწარმოო ფონდები, სავალუტო-საფინანსო სისტემა, სახელმწიფო რეზერვები. რაოდენობრივი თვალსაზრისით, ეს კომპონენტები ფასდება ან ნატურალურ-ნივთიერი, ან ღირებულებითი (ფულადი) ფორმებით.
ეკონომიკური პოტენციალის ნაწილს,რომელიც სახელმწიფოს შეუძლია საჭიროების შემთხვევაში გამოიყენოს თავისი სამხედრო ორგანიზაციის შექმნისა და შენახვისთვის, მისი ფუნქციონირების უზრუნველყოფისთვის, შეადგენს სამხედრო-ეკონომიკური პოტენციალი. ეკონომიკური პოტენციალი სამხედრო პოტენციალის მატერიალურ საფუძვლად გვევლინება.
