ვარდელი კონსტანტინე
ვარდელი კონსტანტინე პეტრეს ძე - (15. V. 1939, ლენინგრადი), მევიოლინე, საქართველოს სახალხო არტისტი (1980), შოთა რუსთაველის სახელობის (1992) და ზ. ფალიაშვილის სახელობის (1971) პრემიების ლაურეატი. საქართველოს სახელმწიფო სიმებიანი კვარტეტის წევრი (1966-იდან). სიმებიანი კვარტეტების ლ. ვაინერის სახელობის საერთაშორისო კონკურსის ლაურეატი (1973, ბუდაპეშტი, კვარტეტის სხვა წევრებთან ერთად).
1963 დაამთავრა თბილისის კონსერვატორია (პროფ. ლ. შიუკაშვილის კლასი). 1963-66 სწავლობდა ასპირანტურაში. ჯერ კიდევ სტუდენტობის წლებში ეწეოდა აქტიურ საკონცერტო მოღვაწეობას. საქართველოს სიმებიან კვარტეტთან ერთად კონცერტებს მართავდა ყოფილ სსრკ ქალაქებსა და საზღვარგარეთის ქვეყნებში. ასრულებდა ქართველ, რუსულ და დასავლეთ ევროპელ კომპოზიტორთა ნაწარმოებებს. 1966-90 ეწეოდა პედაგოგიურ მოღვაწეობას თბილისის კონსერვატორიაში (1984-იდან პროფესორი). 1990-იდან გერმანიაში მონაწილეობდა (1997-მდე) ლ. ისაკაძის კამერულ ორკესტრში (I ვიოლინო). კონცერტებს მართავს საქართველოში სიმებიანი კვარტეტის შემადგენლობაში.
