კერძევაძე ელდარ
NPLG Wiki Dictionaries გვერდიდან
კერძევაძე ელდარ – (1942 – 1991), პოეტი. დაიბადა სოფელ საყარაულოში (თიანეთი). 1955 წლიდან ოჯახი გადმოსახლდა თბილისში და ელდარმა 1959 წელს დაამთავრა რკინიგზის #3 საშუალო სკოლა. სწავლა ჯერ პედაგოგიური ინსტიტუტის ფიზიკა-მათემატიკის ფაკულტეტზე განაგრძო (1959- 61 წწ), თუმცა მერე თსუ-ს ფილოლოგიის ფაკულტეტზე გადავიდა და 1969 წელს დაამთავრა. მისი პოეტური დებიუტი 1960 წელს შედგა, ლექსების პირველი წიგნი „მწვანე ქუჩა” კი გამოსცა 1970 წელს, რომელსაც მოჰყვა კიდევ 12 პოეტური კრებული (მათ შორისაა: „სინათლის ფრთები”, „ქარის ჩრდილები”, „ისევ თქვენთან ვარ”, „მახსოვს”, „თუკი ერთმანეთს გავუფრთხილდებით”, „სიყვარულია ეხლა მთავარი” და სხვა), თარგმნიდა უცხოური პოეზიის ნიმუშებსაც (ვაჰან ტერიანი, ალექსანდრ ბლოკი, მიხაილ ლერმონტოვი...).
- * * *
- შოთა ჩანტლაძე მესიზმრა წუხელ –
- კი არ მესიზმრა, ნამდვილად ვნახე...
- თავისი წიგნი მივართვი, ვუქე,
- სივრცეს გახედა მწუხარე სახით.
- ლაპარაკში ვერ ავიყოლიე,
- მხარზე გამხდარი შემახო ხელი.
- „ახლა თბილისში გამარონია...”
- თქვა და თვალებზე შევნიშნე ცრემლი.
- – მშვიდობით იყავ, ჩემო ძმობილო,
- ეს წიგნიც ჩემგან სახსოვრად გქონდეს...
- გაშალა მიწა, როგორც ლოგინი,
- და წაიფარა ვეება ლოდი.