შიგაწვის ძრავი
NPLG Wiki Dictionaries გვერდიდან
შიგაწვის ძრავი − თბური ძრავი, რომელშიც მიმდინარეობს საწვავის წვა და წვის შედეგად გამოყოფილი სითბოს გარდაქმნა მექანიკურ მუშაობაში. შიგაწვის ძრავი არის: დგუშიანი, აირტურბინიანი და სარაკეტო. საწვავის მიხედვით დგუშიანი ძრავები არის აირზე, მსუბუქ თხევად საწვავზე (ბენზინი, ნავთი), მძიმე თხევად საწვავზე (დიზელი) და ბინარულ (ორმაგ) საწვავზე მომუშავე; სამუშაო ციკლში ტაქტების რიცხვის მიხედვით რევერსიული ორ- და ოთხტაქტიანი. შიგაწვის ძრავი ფართოდ გამოიყენება მრეწველობაში, საავტომობილო, რკინიგზისა და წყლის ტრანსპორტზე, საგზაო-სამშენებლო მანქანებში და სხვ.