შონბერგის დრამა მუსიკით ბედნიერი ხელი
შონბერგის დრამა მუსიკით „ბედნიერი ხელი“ – სრულიად განსხვავებულ, ახალი ტიპის მუსიკალურ თეატრს წარმოადგენს შონბერგის „ბედნიერი ხელი“ op.18. ესაა დრამა მუსიკით, თავისებური მუზიცირება სცენის მეშვეობით, სადაც მუსიკა, დრამა, განათება, ფერი, სცენოგრაფია, კოსტიუმები, ჟესტები ერთობლივად მოქმედებენ მსმენელზე და ქმნიან განვითარების ძირითად ღერძს. კომპოზიტორი წერს, რომ „ჟესტები, ფერი და სინათლე აქ ბგერების მსგავსადაა გააზრებული: მუსიკა მათი მეშვეობით იქმნება. სინათლის გრძლიობების და ფერების ბგერებისგან იქმნება მუსიკის მოტივების მსგავსი ფიგურები და სტრუქტურები“.
„ბედნიერი ხელისთვის“ დამახასიათებელია ირეალობა, თანმიმდევრული სიუჟეტური განვითარების უქონლობა, ვინაიდან ავტორი კონცენტრირებულია სიღრმისეულ სულიერ შინაარსზე, რომელიც ვერ გამოიხატება სიტყვებით. ამ თვისებებით „ბედნიერი ხელი“ უახლოვდება ვ. კანდინსკის სცენური კომპოზიციის იდეებს, მის ყვითელ ბგერას, რომელზეც მხატვარი 1909-12 წლებში მუშაობდა.
