ხუროძე ვარლამ

ვარლამ ხუროძე

ხუროძე ვარლამ − (1883 – 1939), ფსევდონიმი − მალაქიაშვილი) ქართველი პოეტი, მწერალი, დრამატურგი, პუბლიცისტი, პედაგოგი. დაიბადა სოფელ მათხოჯში (ხონი). პირველი ლექსი გამოაქვეყნა 1903 წელს, პირველი მოთხრობა - 1904 წელს. მისი ლექსები, მოთხრობები, პიესები, რომანები, პედაგოგიკური და კრიტიკულ-პუბლიცისტური წერილები მეოცე საუკუნის 10-იანი წლებიდან იბეჭდებოდა ქართულ პრესაში. იყო ე. წ. დემოკრატიული მწერლობის მიმდევარი. მის რომანებსა და მოთხრობებში („სამნი“, „შოთა ბროლაძე“, „დათოვლილი გვირგვინი“, „ორი საფლავი“, „კეკელოს თავგადასავალი“, „ობლები“ და სხვა) წარმოდგენილია ქართველი გლეხობის მძიმე სოციალური მდგომარეობა, რევოლუციურ-განმათავისუფლებელი ბრძოლა.

პატარა სახლი

პატარა სახლი გახდა მსხვერპლი დიდი სახლების,

შესწირეს ქუჩის სილამაზეს და განახლებას,

იდგა ცხოვრების −

ამღვრეული ჟამის ფერხულში,

ბებერი იყო და სიძველის ქუდი ეხურა.

არადა, ერთ დროს მანაც, ალბათ, ქოხი შეცვალა,

ყავლი გავიდა და დარდისთვის ვიღას ეცალა,

იმ ქოხმაც, ალბათ, ჩალის ქოხი

შეცვალა ერთ დროს,

იმ ჩალის ქოხში სიმშვიდე და სინათლე ენთო...

კვლავ გაგრძელდება განახლების უგრძესი ჯაჭვი,

კვლავ დაინგრევა ბევრი სახლი

მარცხნივ და მარჯვნივ...

პატარა სახლი გახდა მსხვერპლი

დიდი სახლების,

შესწირეს ქუჩის სილამაზეს

და განახლებას,

ბერწმა სიბერემ მოუწია,

წლებმა იურჩეს,

ბებერ ხარივით მოაშორეს

მზეს და სილურჯეს.

პატარა სახლი გახდა მსხვერპლი

დიდი სახლების...

წყარო

ქართველი პოეტები (ენციკლოპედია)