საქართველოს ახალგაზრდა იურისტთა ასოციაცია იურისტების ნებაყოფლობითი გაერთიანებაა.

ჩვენ - იურისტის პროფესიული ღირსების დაცვისა და მომავლის ერთიანი ხედვა გვაერთიანებს.

ჩვენ მოწოდებული ვართ, ხელი შევუწყოთ ისეთი საქართველოს შენებას, სადაც საზოგადოება აქტიური და მაღალი სამართლებრივი კულტურის მქონეა; სადაც სახელმწიფო ინსტიტუტები გამჭვირვალე და ანგარიშვალდებულია; სადაც მოქმედებს კანონის უზენაესობა და სახელმწიფოს ძალაუფლება შეზღუდულია ადამიანის უფლებებით.

ჩვენ - მტკიცედ გვჯერა იმ ღირებულებების, რომლებზეც შეიქმნა ჩვენი ორგანიზაცია და ვემსახურებით მათ დამკვიდრებას.

საქართველოს ახალგაზრდა იურისტთა ასოციაცია ლიბერალურ ფასეულობებზე დაფუძნებული ორგანიზაციაა და ყველა თაობა თავის საქმიანობაში სწორედ ამ ფასეულობებით ხელმძღვანელობს.

ჩვენ გვმართავს:

ჩვენი დევიზი

კანონის უზენაესობა სამართლიანობისათვის

საიას ძირითადი სტრატეგიული ამოცანები

1. საზოგადოებაში სამართლებრივი ცნობიერების ამაღლება და კანონისადმი პატივისცემის დამკვიდრება;

2. ადამიანის უფლებების დაცვა, დაცვის მექანიზმების განვითარება და ხელმისაწვდომობის უზრუნველყოფა დისკრიმინაციის გარეშე;

3. ეფექტიანი, ანგარიშვალდებული და გამჭვირვალე მმართველობის ხელშეწყობა;

4. კვალიფიციური, უწყვეტი იურიდიული განათლება და პროფესიის განვითარება.

საიას სამუშაო მიდგომა

ჩვენი საქმიანობა ეფუძნება კანონის წინაშე თანასწორობას და დისკრიმინაციის აღმოფხვრისათვის ბრძოლას.

ჩვენ ვხელმძღვანელობთ კონსტრუქციული დიალოგის, თანამშრომლობისა და ჯანსაღი კრიტიკის პრინციპებით.

ჩვენი საქმიანობა სამ დონიან მოდელს ეფუძნება.

ჩვენ ვმოქმედებთ მთელი ქვეყნის მასშტაბით.

ჩვენი სტრატეგიული მიზნების მისაღწევად, ვთანამშრომლობთ სამოქალაქო საზოგადოების წარმომადგენლებთან.

ჩვენთვის მნიშვნელოვანია სწრაფი და კვალიფიციური მოქმედება, ხოლო, საჭიროების შემთხვევაში, სხვადასხვა პროფესიული ჯგუფისგან კვალიფიციური დახმარების მიღება.

ჩვენს საქმიანობაზე მზარდი მოთხოვნილების პირობებში, მუდმივად ვზრუნავთ ორგანიზაციულ განვითარებასა და მდგრადობის მიღწევაზე.

სტრატეგიული ამოცანა 1: საზოგადოებაში სამართლებრივი ცნობიერების ამაღლება და კანონისადმი პატივისცემის დამკვიდრება

ადამიანის უფლებების დარღვევის ფაქტებს, ხშირ შემთხვევაში, ადგილი აქვს დაბალი სამართლებრივი და სამოქალაქო ცნობიერების გამო. შესაბამისად, სამოქალაქო განათლება ჩვენთვის ტრადიციულ სტრატეგიულ მიმართულებას წარმოადგენს.

ჩვენ მოვიპოვეთ კარგი რეპუტაცია და საზოგადოების ნდობა, რაც მნიშვნელოვანი საწყისია მსგავსი პროექტების წარმატებისათვის. ჩვენი ფართომასშტაბიანი საინფორმაციო კამპანიების დაფარვის ზონა საკმაოდ დიდია, თუმცა, ასეთი კამპანიების ეფექტურობის ამაღლების მიზნით, მომავალში აქცენტი გაკეთდება იმგვარ მულტიპლიკატორებზე, რომლებიც გაზრდის საზოგადოებრივი ჯგუფების აზრის ფორმირებაზე გავლენის შესაძლებლობას. ამ მიმართულებით, განსაკუთრებული ყურადღება მიექცევა ინტეგრაციის დაბალი ხარისხის მქონე ჯგუფებს, მაგალითად, უმცირესობებს.

სტრატეგიული ქვეამოცანები:

1. კანონის წინაშე თანასწორობის, შემწყნარებლობის და კანონის უზენაესობის პოპულარიზაცია

2. საზოგადოების ინფორმირება სამართლებრივ საკითხებზე, მათ შორის, ადამიანის უფლებებსა და დაცვის მექანიზმებზე

შედეგები და ინდიკატორები

3. ინტეგრაციის დაბალი ხარისხის მქონე ჯგუფების სამართლებრივი მართლშეგნების ამაღლება

შედეგები და ინდიკატორები

4. საზოგადოებრივ აზრზე ზეგავლენის მქონე ჯგუფებისთვის, სამართლებრივ საკითხებთან დაკავშირებით, ინფორმაციის მიწოდება (მედია, საზოგადოებრივი ორგანიზაციები)

შედეგები და ინდიკატორები

სტრატეგიული ამოცანა 2: ადამიანის უფლებების დაცვა, დაცვის მექანიზმების განვითარება და ხელმისაწვდომობის უზრუნველყოფა

I. ადამიანის უფლებების დაცვა

საქართველოში ადამიანის უფლებების დაცვა კვლავაც პრობლემურ საკითხად რჩება. სასამართლო სისტემის გაუმართაობა და სისუსტე, დარღვეული უფლებების აღდგენისათვის ბრძოლაში მოქალაქეთა ინერტულობა და ხელისუფლების მიერ ადამიანის უფლებებისა და თავისუფლებების დაცვის ინტერესის მუდმივი იგნორირება ადასტურებს ამ მიმართულებით აქტიური მოქმედების აუცილებლობას.

ადამიანის უფლებათა დაცვისათვის ჩვენ ვმოქმედებთ როგორც პოლიტიკის ფორმირების დონეზე, ასევე, კერძო შემთხვევებზე, ქმედითი და სწრაფი რეაგირების სხვადასხვა საშუალებით. შესაბამისად, მთელ საქართველოში მუშაობს ჩვენი უფასო იურიდიული დახმარების სამსახური. საქართველოს ნებისმიერ მოქალაქეს შეუძლია, დაუყოვნებლივ მიიღოს კვალიფიციური იურიდიული ინფორმაცია სატელეფონო ან პირადი გასაუბრების მეშვეობით, ხოლო წინასწარ განსაზღვრული კრიტერიუმებით შერჩეულ მოქალაქეებს - იურიდიული კონსულტაცია და ადვოკატით მომსახურება სასამართლოსა და სახელმწიფო ორგანიზაციების წინაშე.

ჩვენი განსაკუთრებული ყურადღების საგანია იმ ადამიანების ან ჯგუფების ინტერესების დაცვა, რომელთა უფლებებიც დაირღვა სახელმწიფოს მხრიდან. ჩვენი იურიდიული მომსახურებით მოსარგებლენი არიან, აგრეთვე, ე.წ. მოწყვლადი ჯგუფები, მაგალითად, არასრულწლოვნები, ოჯახში ძალადობის ან ტრეფიკინგის მსხვერპლნი, უმცირესობათა წარმომადგენლები, პატიმრები და ა.შ.

სტრატეგიული ქვეამოცანები:

I.1. ადამიანის უფლებათა პრიორიტეტულობის უზრუნველყოფა სახელმწიფო პოლიტიკის შემუშავებისა და განხორციელების პროცესში

შედეგები და ინდიკატორები

I.2. სამოქალაქო საზოგადოებისა და საზოგადოებრივი აზრის მობილიზება ადამიანის უფლებათა დასაცავად, მათ შორის, საზოგადოებრივი კამპანიების ორგანიზება

შედეგები და ინდიკატორები

I.3. განსაკუთრებული საზოგადოებრივი მნიშვნელობის საქმეებზე სტრატეგიული სამართალწარმოება: ადამიანის უფლებათა დაცვის ევროპულ სასამართლოსა და საქართველოს საკონსტიტუციო სასამართლოში ისეთი საქმეების წარმოება, რომლებიც ხელს შეუწყობს კანონის მართებულად გამოყენების პრაქტიკის დამკვიდრებას

შედეგები და ინდიკატორები

I.4. იურიდიული დახმარება ადამიანის უფლებების დარღვევის ფაქტებზე

შედეგები და ინდიკატორები

I.5. იურიდიული დახმარება სხვადასხვა მოწყვლადი ჯგუფებისთვის (სიღარიბის ზღვარს ქვემოთ მყოფი პირები, ლტოლვილები, დევნილები, პატიმრები, უმცირესობათა წარმომადგენლები, ოჯახში ძალადობის მსხვერპლნი)

შედეგები და ინდიკატორები

II. დაცვის მექანიზმების განვითარება და ხელმისაწვდომობის უზრუნველყოფა

ჩვენ წლების მანძილზე აქტიურად ვმუშაობდით სახელმწიფოს იურიდიული დახმარების სისტემის შექმნაზე და რეალურ წარმატებებსაც მივაღწიეთ. ამჯერად, მნიშვნელოვანია, განხორციელდეს დაწყებული რეფორმების კონსოლიდაცია. ხოლო ჩვენი როლი, დახმარების, კონსულტაციების, გამოცდილების გაზიარების პარალელურად, რეფორმის მონიტორინგშიც უნდა გამოიკვეთოს.

ამასთანავე, ძალზე მნიშვნელოვანია ადამიანის უფლებებზე მომუშავე სხვა სახელმწიფო თუ საზოგადოებრივი ინსტიტუტების მხარდაჭერა და გაძლიერება, რაც მთლიანად ამ სისტემის მდგრადობას უზრუნველყოფს.

II.1. ადამიანის უფლებათა დაცვის სახელმწიფო და საზოგადოებრივი ინსტიტუტების გაძლიერება და მხარდაჭერა

შედეგები და ინდიკატორები

II.2. მონიტორინგის გზით, უფასო იურიდიული დახმარების სახელმწიფო სისტემის განვითარების ხელშეწყობა

შედეგები და ინდიკატორები

სტრატეგიული ამოცანა 3: ეფექტიანი, ანგარიშვალდებული და გამჭვირვალე მმართველობის ხელშეწყობა

ბოლო წლების განმავლობაში საქართველოში არაერთი რეფორმა დაიწყო და გატარდა. შემცირდა კორუფციის მასშტაბები, თუმცა, შესამჩნევია კორუფციის სახეცვლილება. ხშირია უფლებამოსილების გადამეტების ფაქტებიც. პოლიტიკური პროცესი უფრო და უფრო დახურული ხდება და მცირდება საზოგადოების თანამონაწილეობის შესაძლებლობა.

პრობლემები იქმნება საჯარო მოხელეთა დაბალი კვალიფიკაციისა და ხშირი როტაციის გამოც.

იმისათვის, რომ არ შესუსტდეს და არ დაკნინდეს დემოკრატიული პროცესი, ხელისუფლებას სჭირდება ჯანსაღი საზოგადოებრივი ოპონირება და მონიტორინგი. ამ მიმართულებით დღეს ბევრი არასამთავრობო ორგანიზაცია არ საქმიანობს. ქვეყანაში ანტიკორუფციული და გამჭვირვალე მმართველობის დამკვიდრებისათვის ბრძოლაში ლიდერთა შორის ვართ და მიგვაჩნია, რომ ჩვენი ფუნქციაა, ბიძგი მივცეთ და წავახალისოთ ხელისუფლების საზოგადოებრივი მონიტორინგი.

ჩვენი პოლიტიკა, ამ მხრივ, ეფუძნება პროფესიონალიზმსა და ექსპერტულ მიდგომას, რისთვისაც ძალიან მნიშვნელოვანია, მაღალკვალიფიციური ადამიანური რესურსის მობილიზება. შესაბამისად, საია ზრუნავს ასეთი კადრების მოძიებასა და განვითარებაზე.

ჩვენი ყურადღების მიღმა არც ევრო-ატლანტიკური ინტეგრაციის პროცესია და ვცდილობთ მუდმივი მონიტორინგითა და რეკომენდაციებით დავეხმაროთ სახელმწიფოს ნაკისრი ვალდებულებების ეფექტურ შესრულებაში. შესაბამისად, გავაგრძელებთ მუშაობას ევროპის სამეზობლო პოლიტიკის სამოქმედო გეგმის განხორციელების ეტაპზე მონიტორინგისა და მონაწილეობის კუთხით.

სტრატეგიული ქვეამოცანები:

1. ლიბერალურ ღირებულებებზე დაფუძნებული კონსტიტუციური წესრიგისა და კანონის უზენაესობის დამკვიდრების ხელშეწყობა

შედეგები და ინდიკატორები

2. ევრო-ატლანტიკური ინტეგრაციისთვის ხელშეწყობა

შედეგები და ინდიკატორები

3. სახელმწიფო პოლიტიკის შემუშავებისა და განხორციელებისას ანგარიშვალდებულებისა და გამჭვირვალობის პრინციპების პრიორიტეტულობისა და დაცვის უზრუნველყოფა

შედეგები და ინდიკატორები

4. ინფორმაციის თავისუფლების ინსტიტუციური გარანტიებისა და ხელმისაწვდომობის უზრუნველყოფა

შედეგები და ინდიკატორები

5. გადაწყვეტილების მიღების პროცესში მოქალაქეთა მონაწილეობის და, გადაწყვეტილების მიღებისას, კანონით დადგენილი პრინციპებისა და ნორმების დაცვის ხელშეწყობა

შედეგები და ინდიკატორები

6. საჯარო დაწესებულებების ანგარიშვალდებულების ამაღლების ხელშეწყობა და კორუფციის წინააღმდეგ ბრძოლა

შედეგები და ინდიკატორები

7. საჯარო მოსამსახურეთა სამართლებრივი განათლება

შედეგები და ინდიკატორები

სტრატეგიული ამოცანა 4: კვალიფიციური, უწყვეტი იურიდიული განათლება და პროფესიის განვითარება

სამართლებრივ სფეროში არსებულ პრობლემებს ისიც განაპირობებს, რომ ქვეყანაში კვალიფიციური და მაღალპროფესიული ეთიკის მქონე კადრების დეფიციტია. საია იურისტთა კავშირია და ჩვენი საქმიანობა მნიშვნელოვანწილად ეფუძნება პროფესიული კადრების მომზადებას.

სამწუხაროდ, არსებულ სასწავლებლებსა და სასწავლო გარემოში ვერ ხერხდება შესაბამისი ხარისხის განათლების უზრუნველყოფა, თუმცა, განათლების მიმდინარე რეფორმა უკეთესი პირობების შექმნის იმედს იძლევა.

ჩვენ სტრატეგიული მნიშვნელობის საქმედ მივიჩნევთ უმაღლესი იურიდიული და პროფესიული განათლების სტანდარტების განვითარებას და ამ მიმართულებით აქტიურ საქმიანობას გავაგრძელებთ.

საიაში მოქმედი იურიდიული განათლების ცენტრის საქმიანობა არაფორმალური განათლების კატეგორიას ეკუთვნის და ძირითადად მიმართულია სტუდენტებზე.

ფორმალური საგანმანათლებლო დაწესებულების დაარსებისათვის ბევრი ფაქტორის დაძლევაა საჭირო, როგორიცაა მატერიალურ-ტექნიკური ბაზის უზრუნველყოფა, იურიდიული ბიბლიოთეკის შემდგომი გაუმჯობესება, საგამომცემლო საქმიანობის სისტემიზაცია (კატალოგების შექმნა), საინფორმაციო ტექნოლოგიების დანერგვა და, რაც ყველაზე მნიშვნელოვანია, იმ პროფესიული რესურსის შენარჩუნება და კვალიფიკაციის ამაღლებაზე ზრუნვა, რომელიც ბოლო წლების მანძილზე ემსახურებოდა ახალგაზრდა იურისტების უწყვეტ იურიდიულ განათლებას.

იურისტთა დაბალ პროფესიულ განვითარებას განაპირობებს არა მხოლოდ განათლების ხარისხი, არამედ პროფესიის ეთიკური ნორმების არაადეკვატური გააზრება. როგორც პროფესიული გაერთიანება, ჩვენ აქტიურად ვმონაწილეობთ პროფესიული ეთიკის ნორმების სრულყოფის საქმეში.

იურიდიული განათლების სრულყოფისათვის გამოვლენილი სტრატეგიული ქვეამოცანები:

1. უმაღლესი იურიდიული განათლების თანამედროვე სტანდარტების შემუშავებისა და დამკვიდრებისათვის ხელშეწყობა

შედეგები და ინდიკატორები

2. იურიდიულ ლიტერატურასა და ინფორმაციაზე ხელმისაწვდომობის უზრუნველყოფა

შედეგები და ინდიკატორები

3. სტუდენტ იურისტთა პროფესიული უნარ-ჩვევების განვითარება, კვალიფიკაციის ამაღლება და სტუდენტების სასწავლო პროგრამებით უზრუნველყოფა

შედეგები და ინდიკატორები

4. უმაღლესი იურიდიული საგანმანათლებლო დაწესებულების დაფუძნება

შედეგები და ინდიკატორები

სტრატეგიული ქვეამოცანები პროფესიის განვითარებისათვის:

1. პროფესიული ეთიკის ნორმების სრულყოფა-დამკვიდრების ხელშეწყობა

შედეგები და ინდიკატორები

2. პროფესიული გაერთიანებების განვითარებისა და თანამშრომლობის ხელშეწყობა

შედეგები და ინდიკატორები

საქართველოს ახალგაზრდა იურისტთა ასოციაცია შეინარჩუნებს მომსახურებაზე ორიენტირებულ პროგრამებს (მაგალითად, იურიდიული კონსულტაცია). კიდევ უფრო გაძლიერდება სასამართლო წარმომადგენლობა. გაძლიერდება მონიტორინგის პროგრამები.

ლიბერალური ღირებულებებისა და სამართლებრივი სახელმწიფოს იდეის წარმატებული პოპულარიზაციის მიზნით, უფრო მეტად აქტუალური ხდება საზოგადოების კეთილგანწყობის არა მხოლოდ შენარჩუნება, არამედ გაძლიერება. შესაბამისად, მნიშვნელოვანია ჩვენი საქმიანობის შესახებ ცნობიერების ზრდაზე მუდმივი ზრუნვა, ასევე, სტრატეგიული პარტნიორების ძიება და კავშირების გაფართოება და გამყარება. მნიშვნელოვანია ქსელის განვითარება და გრძელვადიანი, კულტურულად თავსებადი პარტნიორების იდენტიფიცირება.

1. სტრატეგიული მენეჯმენტისა და ანგარიშგების დანერგვა

მიზანი: საიას შემუშავებული აქვს სტრატეგიული ანგარიშგების სისტემა, რომელიც ხელს უწყობს სტრატეგიის განხორციელებას, მის მონიტორინგს და შემდგომ განვითარებას.

საიამ შეიმუშავა 2007-2010 წლების სტრატეგიული დოკუმენტი, რომელიც ასახავს ორგანიზაციის მისიას, სამუშაო მიდგომებს, მთავარ მიმართულებებს, სტრატეგიულ ამოცანებს მიმართულებათა მიხედვით, მოსალოდნელ შედეგებს, რაოდენობრივ თუ ხარისხობრივ ინდიკატორებს. ასევე, დოკუმენტი წარმოაჩენს ორგანიზაციული განვითარების პრიორიტეტებსა და სამოქმედო გეგმას.

პროექტები კვლავ რჩება ორგანიზაციული მიზნების განხორციელების და დაფინანსების მთავარ საშუალებად, თუმცა, სტრატეგიული დოკუმენტის დამტკიცებით, ჩვენი სურვილია, უფრო მკვეთრად წარმოჩინდეს პრიორიტეტები, რომელთა მიღწევის შედეგად, გავზომავთ ორგანიზაციის მუშაობასა და ეფექტურობას.

ნაბიჯები

1. ადრესატების მიხედვით, ანგარიშის სახეების განსაზღვრა და ფორმატის დამტკიცება;

2. სხვადასხვა სახის ანგარიშების მომზადების პერიოდულობის განსაზღვრა;

3. სტრატეგიული დოკუმენტის გადასინჯვის პროცედურისა და ვადების განსაზღვრა.

2. ოპერაციული სტრუქტურის შემდგომი განვითარება

მიზანი: საიას ოპერაციული სტრუქტურა უზრუნველყოფს სტრატეგიულ მენეჯმენტს, პროგრამების უწყვეტობას და ხარისხს, ასევე კადრების პროფესიულ განვითარებას და დეცენტრალიზაციას.

დღევანდელი სტრუქტურა უთანაბრდება პროექტულ სტრუქტურას. ეს გარემოება გარკვეულ შეზღუდვებს აწესებს ორგანიზაციის მართვის განვითარების თვალსაზრისით. კერძოდ, რთულდება ორგანიზაციის სტრატეგიული მენეჯმენტი, შესაბამისად, ოპერაციული სტრუქტურა უფრო მეტად ცენტრალიზებულ სახეს ატარებს, რაც ართულებს ხარისხის კონტროლსა და კოორდინაციას.

ორგანიზაციის შემდგომი განვითარების მიზნით, მნიშვნელოვანია ვნელოვანია საიას მოქმედი ოპერაციული სტრუქტურის ალტერნატივის შექმნა.

ჩვენ გვაქვს სტრატეგიული მიმართულებები და, შესაბამისად, სტრატეგიული მენეჯმენტის სისტემის დანერგვის სურვილი.

ამასთანავე, მნიშვნელოვანია ფუნქციური განყოფილებების შემდგომი განვითარებაც (საზოგადოებასთან ურთიერთობა და კომუნიკაცია, გამომცემლობა).

ამ გარემოებების გათვალისწინებით, ოპერაციული სტრუქტურა შეიძლება იყოს უფრო მატრიცული ხასიათის. ასევე, არსებობს ე.წ. ქსელური სტრუქტურის მოდელი, სადაც ერთი „ქუდის“ ქვეშ ბევრი პარტნიორი ორგანიზაცია თანამშრომლობს. ქსელური სტრუქტურა შესაძლოა განიხილებოდეს რეგიონულ ორგანიზაციებთან და სასწავლო ცენტრთან/პროგრამასთან სტრუქტურული ურთიერთობების აწყობის პროცესში.

განახლებული სტრუქტურა უნდა პასუხობდეს შემდეგ მოთხოვნებს:

1. მეტი დეცენტრალიზაცია;

2. მენეჯმენტის შუა რგოლის განვითარება;

3. ხარისხის უზრუნველყოფა;

4. სწრაფი რეაგირების უნარი და ინოვაციების მიმართ ღიაობა.

2. რეგიონული ფოკუსი

მიზანი: ჩვენ გვაქვს რეგიონული განვითარების გრძელვადიანი ხედვა და ამ ხედვის განხორციელების სამოქმედო გეგმა.

ორგანიზაციის მიზანია, კვლავ გააფართოვოს გეოგრაფიული არეალი და, ამასთანავე, შეინარჩუნოს და განავითაროს დღევანდელი დანაყოფები. რეგიონული ოფისების ძირითად სამუშაო ფოკუსად რჩება: ადამიანის უფლებების დაცვა (კონსულტაცია და დახმარება), თვითმმართველობის განვითარების ხელშეწყობა და ადგილობრივი ხელისუფლების ორგანოებთან თანამშრომლობა, სამოქალაქო და სამართლებრივი განათლება.

ნაბიჯები

1. რეგიონების თანამშრომელთა სამუშაო შეხვედრების ორგანიზება და მათი ხედვების შეჯერება;

2. მენეჯმენტის ჯგუფის შეხვედრა და, მიღებული ინფორმაციის საფუძველზე, ალტერნატივების დამუშავება;

3. რეგიონების განვითარების გეგმის შედგენა და განხორციელება.

4. მონიტორინგის სისტემის განვითარება

მიზანი: საიაში ფუნქციონირებს მონიტორინგის სისტემა, რომელიც მოიცავს ყველა შესაბამისი მონაცემის შეგროვების, შენახვისა და ანალიზის ფაზებს და განსაზღვრავს ცალკეული მიმართულების მონიტორინგზე პასუხისმგებელ პირებს. იმავდროულად, საია ეფექტურად იყენებს თანამედროვე ტექნოლოგიის შესაძლებლობებს შიდა მონიტორინგისა და კომუნიკაციის სისტემის დახვეწაში.

ეს საკითხი მჭიდროდ უკავშირდება სტრუქტურის განვითარებას. მონიტორინგის სისტემა უნდა ასახავდეს, რომელი სტრუქტურული ერთეული რა საქმიანობის მონიტორინგზეა პასუხისმგებელი და, შესაბამისად, აღწერდეს, თუ რა საქმიანობას ეწევა ამ კუთხით. დაგეგმვის პროცესში გამოვლინდა მონაცემთა შეგროვების სისტემის დახვეწის და შიდა მონაცემთა ბაზის შექმნის საჭიროება. არ არსებობს ბენეფიციარებისგან შეფასების სისტემაც.

5. საზოგადოებასთან ურთიერთობისა და კომუნიკაციის შემდგომი პროფესიონალიზაცია

მიზანი: უზრუნველყოფილია სწრაფი რეაგირების საკომუნიკაციო სისტემა.

საიას ორგანიზაციული განვითარება და სტრატეგიის ეფექტური განხორციელება მნიშვნელოვანწილად უკავშირდება საზოგადოებასთან ურთიერთობის სისტემას. შესაბამისად, მნიშვნელოვანია ამ მიმართულების შემდგომი გაძლიერება. არსებობს ორი ალტერნატივა: მეტი „გარე სერვისი“ და მეორე, შიდა ძლიერი სტრუქტურის შექმნა.

კომუნიკაციის განყოფილება კომპლექსურად ახორციელებს მედიასთან და საზოგადოებასთან ურთიერთობისა და კომუნიკაციური კამპანიების მენეჯმენტს. ერთ-ერთ პრიორიტეტად ვლინდება საიას კადრების გადამზადება მედიასთან ურთიერთობისა და კომუნიკაციის უნარ-ჩვევებში.

6. ხარისხის მენეჯმენტი და უზრუნველყოფა

მიზანი: კრიტიკული სამუშაო ინსტრუქციების განსაზღვრა და აღწერა,

კადრების გადამზადება შესაბამისი უნარ-ჩვევების კუთხით (მონიტორინგი, მედიასთან ურთიერთობა, პროექტის მენეჯმენტი, ორგანიზაციული პოლიტიკა და სხვა).

ხარისხის მართვის სისტემის შექმნა გულისხმობს ხარისხის განმაპირობებელი პროცესებისა და რესურსების განსაზღვრას და მათ სწორ მენეჯმენტს, მაგალითად, რესურსების განვითარების დაგეგმვა, სამუშაო ინსტრუქციების შემუშავება და ა.შ.

ამ ეტაპზე ერთ-ერთ ყველაზე მგრძნობიარე, სტრატეგიულ პროდუქტად ვლინდება ანალიზი/მონიტორინგი. საია გეგმავს ანალიტიკური მონიტორინგის ანგარიშების დიდი მოცულობით მომზადებას. ამ საქმიანობას დასჭირდება შემდგომი სტანდარტიზაცია, რათა მოხდეს სამუშაოს როგორც დროული, ასევე ხარისხიანი შესრულება. საჭირო იქნება შესაბამისი კადრების იდენტიფიცირება და მათი გადამზადება.

7. ფონდების მოძიება, ფინანსები და ბიუჯეტი

მიზანი: საიას ფინანსური სისტემის შესაბამისობა ორგანიზაციულ სტრუქტურასა და სტრატეგიასთან, რომელიც უზრუნველყოფს ორგანიზაციული ბიუჯეტის შემუშავების და შევსების პროცედურას, იმავდროულად - ცალკეული პროექტების ეფექტურ ფინანსურ მენეჯმენტს.

საიას ჩამოყალიბებული აქვს ფონდების მოძიების გრძელვადიანი სტრატეგია.

ფინანსების მოზიდვის ერთადერთ მექანიზმად კვლავაც დონორთა მხარდაჭერა რჩება. შესაძლებელია ვივარაუდოთ, რომ ახლო და შუალედურ ვადებში სწორედ პროექტები იქნება ორგანიზაციული დაფინანსების წამყვანი და გადამწყვეტი საშუალება. ფონდების მოძიებისა და ფინანსების მართვის სტრატეგიის შემდგომი განვითარებისათვის მნიშვნელოვანია:

1. საიას რომელი სერვისები შეიძლება გახდეს ფასიანი და განფასების როგორი პოლიტიკა შეიძლება იქნეს შემოღებული;

2. ვინ არიან სტრატეგიული დონორები და პარტნიორობის რა გარანტიები არსებობს;

3. როგორი ფინანსური ურთიერთმიმართება უნდა არსებობდეს ცენტრსა და რეგიონს შორის;

4. რა მოცულობით და რამდენ ზედნადებ ხარჯს უნდა ფარავდეს ცალკეული პროექტი; როგორ მოხდება ორგანიზაციული და 5. პროექტული ბიუჯეტების კონტროლი და ადმინისტრირება.

ახალი ფინანსური სისტემა დიდწილად იქნება დამოკიდებული სტრუქტურულ გადაწყვეტილებებზე. თუმცა, აქვე უნდა აღინიშნოს, რომ არსებობს მნიშვნელოვანი უკუკავშირი.