მიგრაციის საერთაშორისო ორგანიზაცია (IOM) იზიარებს პრინციპს, რომ ჰუმანური და მოწესრიგებული მიგრაცია სარგებლობის მომტანია მიგრანტებსა და საზოგადოებისათვის.

IOM წარმოადგენს მთავრობათაშორისო ორგანოს და საერთაშორისო თანამეგობრობაში არსებული პარტნიორების საშუალებით ახორციელებს თავის საქმიანობას, რომელიც მიმართულია:

ყველა უფლება დაცულია. გამომცემლის წინასწარი წერილობითი თანხმობის გარეშე, დაუშვებელია ამ გამოცემის რომელიმე ნაწილის გამრავლება, საინფორმაციო სისტემაში შეყვანა ან გაგზავნა ნებისმიერი ფორმით ან საშუალებით, მათ შორის, ელექტრონული, მექანიკური, ფოტოკოპირებით, ჩაწერით ან რაიმე სხვა სახით. ავტორის მიერ გამოთქმული მოსაზრებები შეიძლება არ ემთხვეოდეს IOM-ის მოსაზრებებს და შეხედულებებს.

განათლებისა და მეცნიერების სამინისტროს საჯარო სამართლის იურიდიული პირი ეროვნული სასწავლო გეგმებისა და შეფასების ცენტრი, ითვალისწინებს რა ადამიანით ვაჭრობის (ტრეფიკინგის) წინააღმდეგ მთავრობის სამოქმედო გეგმის მოთხოვნებს, მიესალმება მიგრაციის საერთაშორისო ორგანიზაციასთან ერთად საქართველოს საჯარო სკოლების მოსწავლეებისათვის ამ თემაზე სასწავლო მასალის შექმნას.

ზოგადი განათლების ეროვნული მიზნების მიხედვით, მოზარდი უნდა აღიზარდოს მაღალზნეობრივ ღირებულებებზე, იცოდეს კანონის, ადამიანის ღირსებისა დაუფლებების პატივისცემა; შეძლოს საჭირო ინფორმაციის მოპოვება, პრობლემების გააზრება და სირთულეების გადაჭრის გზის დასახვა; უნდა იყოს პატრიოტი, დამოუკიდებელი, შემოქმედებითი, საკუთარი შესაძლებლობების მუდმივად განვითარების შემძლე, ინფორმირებული და ამ ცოდნის ადეკვატურად გამოყენების უნარის მქონე.

მხოლოდ ინფორმირებული, საკუთარ ცხოვრებაზე პასუხისმგებელი მოზარდი შეძლებს, გააცნობიეროს ის რეალობა, რაც შეიძლება ტრეფიკინგს მოყვეს.

სამწუხაროდ, თანამედროვე მონობად წოდებულ ამ მძიმე მოვლენას ჩვენმა ქვეყანამ გვერდი ვერ აუარა. შემაშფოთებელია ადამიანით ვაჭრობის (ტრეფიკინგის) დანაშაულის მასშტაბები და დაუნდობელი ფორმები კიდევ უფრო იმიტომაც, რომ მისი მსხვერპლი შეიძლება ბავშვი გახდეს.

წარმოდგენილი პუბლიკაცია, მასში გადმოცემული ნათლად გაშლილი ტრეფიკინგის თემა, საფრთხეების დროულად ამოცნობა, პრობლემისაგან თავის დაღწევის გზებისაშუალებას იძლევა მოზარდი ამ გლობალურ პრობლემისგან დაიცვა. მთავარია, რომ მოზარდებმა კარგად გაიაზრონ, თუ რა საფრთხე შეიძლება დაემუქროთ ტრეფიკინგის სახით და როგორ აიცილონიგი თავიდან. საჭიროების შემთხვევაში კი - ვის და როგორ მიმართონ დახმარებისათვის.

ვიმედოვნებთ, აქ მოცემული სპეციალურად შემუშავებული სასწავლო მასალა, ინტერაქტიული მეთოდებისა და ხერხების გამოყენებით შესძენს ჩვენს მოზარდებს იმ უნარ-ჩვევებს, რომლებიც მათ შემდგომ ცხოვრებაში სწორი არჩევანის გაკეთებასა და მყარი ნაბიჯების გადადგმაში დაეხმარებათ.

ნათია ჯოხაძე
ეროვნული სასწავლო გეგმებისა და შეფასების ცენტრის დირექტორი

ადამიანით ვაჭრობა (ტრეფიკინგი) განსაკუთრებით მძიმე დანაშაულთა კატეგორიას განეკუთვნება. იგი იწვევს უზენაესი ადამიანური ღირებულებების უხეშ დარღვევას - ადამიანების თავისუფლებისა და უფლებების შელახვას, სიცოცხლისა და ჯანმრთელობის ხელ ყოფას, იძულებით შრომას, მონობას ან მონობის მსგავს მდგომარეობაში ჩაყენებას, ადამიანის მიმართ ყოველგვარ ძალადობას, რაც ზიანს აყენებს მის სიცოცხლესა და ჯანმრთელობას.

ტერმინთა განმარტება

გადაბირება - ითვალისწინებს პირის შერჩევას ადამიანით ვაჭრობისათვის (ტრეფიკინგისათვის). შერჩეულ პირს სთავაზობენ დასაქმებას, კარგ ანაზღაურებას, ზოგჯერ ფიქტიურ ქორწინებასაც კი და სხვა.

უმწეო მდგომარეობა - მდგომარეობა, როდესაც ადამიანი სხვა ადამიანზე მატერიალურად ან სხვაგვარად არის დამოკიდებული; როდესაც ადამიანს არგააჩნია სხვა რეალური საშუალება, გარდა იმისა, რომ დაემორჩილოს მის მიმართ გამოყენებულ ძალადობას.

შანტაჟი - ადამიანის იძულება, შეასრულოს ან არ შეასრულოს რაიმე მოქმედება იმის შიშით, რომ მას ან მისი ოჯახის წევრებს მიადგება ზიანი სახელის გამტეხი ან სხვა საზიანო ცნობების გახმაურებით.

ექსპლუატაცია - ადამიანის გამოყენება იძულებითი შრომისათვის ან მომსახურებისათვის, მისი ჩაბმა დანაშაულებრივ ან სხვა ანტისაზოგადოებრივ ქმედებაში ან პროსტიტუციაში, მონობის მსგავს მდგომარეობაში ან მონობის თანამედროვე პირობებში ჩაყენება.

მონობის თანამედროვე პირობებში ჩაყენება - პირისათვის პირადობის დამადასტურებელი დოკუმენტების ჩამორთმევა; თავისუფალი გადაადგილების უფლების შეზღუდვა; ოჯახთანკავშირის, მათ შორის, მიმოწერისა და სატელეფონო კონტაქტების, აკრძალვა; კულტურული იზოლაცია; პატივისა და ღირსების შემლახველ პირობებში ან, ყოველგვარი ანაზღაურების გარეშე ან შეუსაბამო ანაზღაურებით მუშაობის იძულება.

ადამიანით ვაჭრობის (ტრეფიკინგის) მსხვერპლი - პირი, რომელსაც ადამიანით ვაჭრობის (ტრეფიკინგის) შედეგად მიადგა მორალური, ფიზიკური ან ქონებრივი ზიანი და რომელიც, საქართველოს კანონმდებლობით დადგენილი წესით, მიჩნეულია ადამიანით ვაჭრობის (ტრეფიკინგის) მსხვერპლად.

ჯგუფური სამუშაო

დაიყავით 3 ჯგუფად და წაიკითხეთ ქვემოთ მოცემული ისტორია. ადამიანით ვაჭრობის (ტრეფიკინგის) განმარტების მიხედვით და ტერმინების გამოყენებით:

ჩამოთვალეთ ადამიანის მიმართ განხორციელებული დანაშაულის ნიშნები.

განსაზღვრეთ, წარმოადგენს თუ არა ეს ისტორიები ადამიანით ვაჭრობის (ტრეფიკინგის) ფაქტებს? რატომ?

აირჩიეთ მომხსენებელი, რომელიც ჯგუფის ნამუშევარს წარმოადგენს კლასის წინაშე.

ჯგუფი I - ელენეს ისტორია

ათენში (საბერძნეთი) გამგზავრებას, ოჯახში ბავშვის მომვლელად მოწყობას და თვეში 800 ევროიან ხელფასს დაჰპირდა ელენეს ვინმე მადონა, რის სანაცვლოდაც წინასწარ 3000 ევრო გამოართვა. შეთანხმების თანახმად, მადონამ ელენე სხვა ქართველ ქალებთან ერთად, თურქეთში ჩაიყვანა და ნაცნობ მამაკაცს ჩააბარა, რომელმაც ისინი საბერძნეთის საზღვარზე ღამით გადაიყვანა.

ათენში ჩასულ ელენეს თანმხლებმა მამაკაცმა აუხსნა, რომ ოჯახში, სადაც მას უნდა ემუშავა, უკვე აეყვანათ ძიძა. სანაცვლოდ შესთავაზა თავისი ნაცნობების ოჯახში, სალონიკში გამგზავრება და იქ დასაქმება. ელენე დაუკავშირდა მადონას და აუხსნა მდგომარეობა. მადონამ დაუდასტურა, რომ შეეძლო გამგზავრებულიყო სალონიკში, სადაც მას დაასაქმებდნენ. სალონიკში ჩასულ ელენეს არავინ დახვედრია, მადონასთან ტელეფონით დაკავშირება სცადა, მაგრამ ამაოდ.

ჯგუფი II - გიორგის ისტორია

გიორგი უმუშევარი იყო. მეგობრისგან შეიტყო, რომ ვინმე ეთერი აგროვებდა ხალხს თურქეთში თხილის საკრეფად წასაყვანად. იგი შეხვდა ეთერს, რომელმაც უთხრა, რომ თხილის კრეფაში თვეში 400-500 აშშ დოლარს მიიღებდა გასამრჯელოდ. ასევე, შესთავაზა პასპორტისა და მგზავრობისათვის საჭირო თანხის სესხება, რომელსაც გიორგი მუშაობის დაწყების შემდეგ დაუბრუნებდა. საცხოვრებლითა და კვებით დამსაქმებელი უზრუნველყოფდა.

გიორგი დათანხმდა შეთავაზებულ პირობებს და ექვსკაციან ჯგუფთან ერთად, ეთერის თანხლებით, ავტობუსით გაემგზავრა თურქეთში. პირობისამებრ, ერთ-ერთ სოფელში მათ დახვდათ დამსაქმებელი.

ექვსივე მამაკაცი ჰიგიენურ პირობებს მოკლებულ ერთ პატარა ოთახში მოათავსეს, რომელშიც მხოლოდ საწოლები იდგა. მთელი დღის მანძილზე მათ ზედამხედველი აკონტროლებდა, რომ არ მომცდარიყვნენ და სულ ემუშავათ. დღეში მხოლოდ ერთხელ იკვებებოდნენ განსაზღვრული ულუფით. არ ჰქონდათ ტელეფონი და ვერ ახერხებდნენ ოჯახებთან დაკავშირებას, მუშაობდნენ საშინლად მძიმე და გაუსაძლის პირობებში. სამი თვის მანძილზე ასრულებდნენ ყოველგვარ სასოფლო-სამეურნეო სამუშაოს.

გიორგიმ დამსაქმებლისგან რამდენჯერმე მოითხოვა ანაზღაურება, მაგრამ იგი პოლიციაში დასმენით და დეპორტაციით დაემუქრა. გასამრჯელო ვერც სხვებმა მიიღეს. როცა გასამრჯელოს მიღების იმედი გადაეწურათ, ძალით წაართვეს ჩამორთმეული პასპორტები პატრონს და დიდი გაჭირვებით დაბრუნდნენ საქართველოში.

ჯგუფი III - გოჩას ისტორია

თბილისში, ნავთლუღის ბაზრის ტერიტორიაზე ომარი ვინმე გოჩას ქუთაისში დროებით სამუშაოზე მოწყობას შეჰპირდა. გოჩა დათანხმდა შეთავაზებას. ომარმა გოჩა გადაიყვანა ზემო აფხაზეთში, კოდორის ხეობის სოფელ საკენში, თავის საცხოვრებელ სახლში. ომარმა ბოსელში გამოკეტა გოჩა. იგი სისტემატური ცემითა და ჯანმრთელობისათვის საშიში ძალადობის გამოყენებით აიძულებდა გოჩას ყოველდღიურად, უსასყიდლოდ შეესრულებინა სხვადასხვა სახის ფიზიკური სამუშაო. სამუშაოს შესრულების შემდეგ ომარი კვლავ ბოსელში ამწყვდევდა გოჩას და მცირეოდენ საკვებს აძლევდა. გოჩამ ექვსჯერ სცადა გაქცევა, მაგრამ უშედეგოდ. ომარი იჭერდა მას და უკან აბრუნებდა. გოჩას ექსპლუატაცია 5 წლის მანძილზე გრძელდებოდა. იგი გაათავისუფლეს კოდორის ხეობაში ჩატარებული სპეციალური ოპერაციის შედეგად.

ადამიანით ვაჭრობის (ტრეფიკინგის) პროცესის სამი ფაზა

ადამიანით ვაჭრობა (ტრეფიკინგი) ადამიანის უფლებების უხეში დარღვევაა!

მუხლი3.

ყოველ ადამიანს აქვს სიცოცხლის, თავისუფლებისა და პირადი ხელშეუხებლობის უფლება.

მუხლი4.

არავინ უნდა იმყოფებოდეს მონობაში ან ძალმომრეობითი მორჩილების მდგომა რეობაში. ყველა სახის მონობა და მონათ ვაჭრობა აკრძალულია.

მუხლი5.

არავის მიმართ არ უნდა იქნას გამოყენებული წამება ან სასტიკი, არაადამიანური თუ მისი ღირსების დამამცირებელი მოპყრობა და სასჯელი.

ადამიანის უფლებათა საყოველთაო დეკლარაცია

XXI საუკუნის პირველ წლებში ადამიანის წინააღმდეგ მიმართული ამ უსასტიკესი დანაშაულის შესახებ შემუშავდა ორი მნიშვნელოვანი საერთაშორისო დოკუმენტი:

1. ტრანსნაციონალური ორგანიზებული დანაშაულის წინააღმდეგ გაერთიანებული ერების კონვენციის ოქმი „ადამიანით, განსაკუთრებით ქალებითა და ბავშვებით ვაჭრობის თავიდან აცილების, აღკვეთისა და დამნაშავეთა დასჯის შესახებ“ (ე.წ. პალერმოს ოქმი).

2. ადამიანით ვაჭრობის (ტრეფიკინგის) წინააღმდეგ ბრძოლის შესახებ ევროპის საბჭოს კონვენცია. საქართველო, როგორც ამ ორი დოკუმენტის განხორციელების მონაწილე მხარე, უზრუნველყოფს ქვეყანაში ადამიანით ვაჭრობის (ტრეფიკინგის) წინააღმდეგ ბრძოლის სისტემის შექმნას. კერძოდ:

2003 წელს საქართველოს სისხლის სამართლის კოდექსში შევიდა დამატებები, რომლის მიხედვით ადამიანით ვაჭრობას (ტრეფიკინგს) განსაკუთრებით მძიმე დანაშაულის კვალიფიკაცია მიენიჭა. ამჟამად კოდექსში გათვალისწინებულია სამი სხვადასხვა მუხლი ადამიანით ვაჭრობასთან (ტრეფიკინგთან) დაკავშირებით. მათ შორის, 1431 მუხლი ითვალისწინებს სასჯელს ზრდასრული ადამიანით ვაჭრობის (ტრეფიკინგის) შესახებ, 1432 მუხლი - არასრულწლოვნით ვაჭრობის (ტრეფიკინგის), ხოლო 1433 მუხლით განისაზღვრება სასჯელი ადამიანით ვაჭრობის (ტრეფიკინგის) მსხვერპლის მომსახურებით სარგებლობის შემთხვევაში. აქედან გამომდინარე, ზომები, რომელსაც ეს მუხლები ითვალისწინებს, სხვადასხვაა. ძალზედ მკაცრია კანონი უშუალოდ ადამიანით მოვაჭრეების მიმართ: 1431 მუხლის მიხედვით, სასჯელის მინიმალური ზომაა თავისუფლების აღკვეთა 7 წლით, მაქსიმალური - 20 წლით, 1432 მუხლის მიხედვით სასჯელის მინიმალური ზომაა 8 წლით თავისუფლების აღკვეთა, ხოლო მაქსიმალურით გათვალისწინებულია სამუდამო პატიმრობა.

2006 წელს საქართველოს პარლამენტმა მიიღო კანონი ადამიანით ვაჭრობის (ტრეფიკინგის) წინააღმდეგ ბრძოლის შესახებ, რომლის მიზანია:

მსხვერპლთა დაცვისა და დახმარების მიზნით, საქართველოში შექმნილია სახელმწიფო ფონდი და გახსნილია თავშესაფრები.

საქართველოში ადამიანით ვაჭრობის (ტრეფიკინგის) წინააღმდეგ ბრძოლა განსაზღვრულია ერთიანი ეროვნული სამოქმედო გეგმით.

ადამიანით ვაჭრობა (ტრეფიკინგი) ადამიანის უფლებათა დარღვევის ყველაზე სასტიკი გამოვლინებაა, რადგან ადამიანის სხვა მნიშვნელოვან უფლებებთან ერთად, ილახება მისი ძირითადი უფლება - იყოს თავისუფალი მონობისგან. 21-ე საუკუნის მონობად წოდებული ეს დანაშაული წარუშლელ დაღს ასვამს ნებისმიერ ადამიანს, რომელიც მისი მსხვერპლი გახდება.

ადამიანით ვაჭრობის (ტრეფიკინგის) პრობლემა აქტუალურია საქართველოშიც. საქართველო, ძირითადად, წარმოშობისა და ტრანზიტის სახელმწიფოა, საიდანაც ადამიანით ვაჭრობის (ტრეფიკინგის) მსხვერპლი, უმეტესად, გადაჰყავთ თურქეთში და არაბეთის გაერთიანებულ ემირატებში.

ჯგუფური სამუშაო

მითითება I ჯგუფისთვის:

შექმენით ადამიანით ვაჭრობის (ტრეფიკინგის) მსხვერპლი მამაკაცის პორტრეტი. მიუთითეთ მისი ასაკი, განათლება, პროფესია, ოჯახური მდგომარეობა, საცხოვრებელი ადგილი, ხასიათის თვისებები.

მითითება II ჯგუფისთვის:

შექმენით ადამიანით ვაჭრობის (ტრეფიკინგის) მსხვერპლი ქალის პორტრეტი. მიუთითეთ მისი ასაკი, განათლება, პროფესია, ოჯახური მდგომარეობა, საცხოვრებელი ადგილი, ხასიათის თვისებები.

მითითება III ჯგუფისთვის:

შექმენით ადამიანით ვაჭრობის (ტრეფიკინგის) მსხვერპლი ბავშვის პორტრეტი. მიუთითეთ მისი ასაკი, განათლება, ოჯახური მდგომარეობა, საცხოვრებელი ადგილი, ხასიათის თვისებები (გაითვალისწინეთ, რომ „ბავშვი“ ნიშნავს 18 წლამდე ასაკის პირს).

აირჩიეთ მომხსენებელი, რომელიც ჯგუფის ნამუშევარს წარადგენს კლასის წინაშე.

კითხვები დისკუსიისთვის:

ჯგუფური სამუშაო

მითითება I ჯგუფისთვის:

მომდევნო გვერდზე მოცემულ ფოტოსურათებზე ასახული ისტორია დაასრულეთ ამგვარად: ფირმაში მისული ქალი წარმატებულად გაივლის უცხოეთში გამგზავრებასთან დაკავშირებულ ყველა პროცედურას გამგზავრებამდე და დანიშნულების ქვეყანაშიც. აღწერეთ პროცესი.

მითითება II ჯგუფისთვის:

მომდევნო გვერდზე მოცემულ ფოტოსურათებზე ასახული ისტორია დაასრულეთ ამგვარად: ფირმაში მისული ქალი ვერ ახერხებს უცხოეთში გამგზავრებასთან დაკავშირებული პროცედურების წარმატებულად გავლას და ხდება ადამიანით ვაჭრობის (ტრეფიკინგის) მსხვერპლი. აღწერეთ პროცესი.

ადამიანით ვაჭრობის (ტრეფიკინგის) საფრთხე მკვეთრად დიდია ეკონომიკურად და სოციალურად დაუცველი ადამიანებისათვის, როგორც საკუთარ სამშობლოში, ასევე, ქვეყნისსაზღვრებს გარეთ. უმუშევრობა, განათლების დაბალი დონე და საზღვარგარეთ უკანონოდ დამკვიდრებისათვის მზადყოფნა, ბუნებრივია, ზრდის ადამიანით ვაჭრობის (ტრეფიკინგის) საფრთხეს. სწორედ, „კარგი ანაზღაურებისა“ და „უკეთესი ცხოვრების“, ასევე, სხვადასხვა სახის სამუშაოს შეთავაზებით გაჰყავთ ადამიანით მოვაჭრეებს ხალხი საზღვარგარეთ და ექსპლუატაციას უწევენ მათ.

მიგრაცია რთული და საპასუხისმგებლო ნაბიჯია. ვინც გადაწყვეტს, გადადგას ეს ნაბიჯი, კარგად უნდა გაეცნოს ყველა აუცილებელ წესს მისთვის საინტერესო ქვეყანაში შესვლის, ყოფნისა და, მიგრაციის მიზნებიდან გამომდინარე, სწავლის, მუშაობის, მუდმივად ცხოვრებისა და საკუთარი უფლებების დაცვის საშუალებების შესახებ. მნიშვნელოვანია დანიშნულების ქვეყნის ენის ცოდნა.

საზღვარგარეთ მუშაობა და სწავლა შესანიშნავი საშუალებაა როგორც ეკონომიკური მდგომარეობის გასაუმჯობესებლად, ასევე, ცოდნისა და უცხოური გამოცდილების შესაძენად. უნდა ვიცოდეთ, რომ ეს შესაძლებლობა ჩვენი ქვეყნის (ისევე, როგორც ევროკავშირის არაწევრისხვა სახელმწიფოების) ბევრი მოქალაქისთვის რთულად მოსაპოვებელია. სამწუხაროდ, საზღვარგარეთ გამგზავრების მსურველები არ იცნობენ კანონიერი მიგრაციის თუნდაც შეზღუდულ, მაგრამ მათთვის ხელმისაწვდომ შესაძლებლობას და, მეტწილად, უცხოეთში უკანონო გზებით ცდილობენ დამკვიდრებას, რაც გარკვეულ რისკთანაა დაკავშირებული.

რა საფრთხე ახლავს უკანონო მიგრაციას?

თვემდე გასვლის შემდეგ, მიგრანტები უკვე არღვევენ იმ ქვეყნის კანონებს, რომელშიც იმყოფებიან. თუ პოლიცია ან საიმიგრაციო სამსახური ეჭვს მიიტანს ან აღმოაჩენს, რომ პირი არალეგალურად იმყოფება მათი ქვეყნის ტერიტორიაზე, მას ქვეყნიდან გააძევებენ.

შესაძლებელია, საზღვარგარეთ უკანონოდ მყოფ მიგრანტებს, თავიანთი მდგომარეობიდან გამომდინარე, მოუხდეთ კრიმინალური სამყაროს წარმომადგენლებთან ურთიერთობა, რასაც ძლიერი ფსიქოლოგიური დატვირთვა ახლავს. ცხადია, ამისათვის ბევრი მიგრანტი მზად არ იქნება.

თუ უკანონო მიგრანტები სამუშაოს მაინც პოულობენ, დამქირავებელი მათთან კონტრაქტს არ აფორმებს (რადგან მათ პასპორტში ვიზა ტურისტულია, ამ ვიზით კი მუშაობის უფლება არა აქვთ) და უხდის გაცილებით ნაკლებს, ვიდრე მათ, ვინც კანონის საფუძველზე მუშაობენ (კერძოდ, საკუთარი ქვეყნის მოქალაქეებს და იმ პირებს, რომლებიც ფლობენ შრომითი საქმიანობისათვის საჭირო ოფიციალურ დოკუმენტს).

ხშირად დამქირავებელი ცდილობს დაიყოლიოს უკანონო მიგრანტი გამომუშავებული თანხის სამუშაოს სრული მოცულობით შესრულების შემდგომ ანაზღაურებაზე. უმეტეს შემთხვევაში, ეს დრო ემთხვევა ტურისტული ვიზის ვადის გასვლას. ამ დროისათვის მიგრანტი უკვე იმყოფება უკანონო მდგომარეობაში და შეიძლება დააპატიმრონ და ქვეყნიდან გააძევონ. ამიტომაც, მას ეშინია საჩივრით მიმართოს სამართალდამცავ ორგანოებს. დამქირავებელი, სარგებლობს რა ამ მდგომარეობით, უარს ამბობს გამომუშავებული თანხის ანაზღაურებაზე.

მსგავს სიტუაციაში მოხვედრილი ადამიანები რჩებიან ისე, რომ უკან დასაბრუნებელი ბილეთის ფულიც კი არ გააჩნიათ და იძულებულნი არიან, ეძებონ ნებისმიერი სახის სამსახური, ნებისმიერი ანაზღაურებით, ნებისმიერ დამსაქმებელთან. და სიტუაცია შეიძლება გამეორდეს...

ხდება ისეც, რომ დამსაქმებელი ვიზის მოქმედების ვადის გაგრძელების მოტივით უკანონო მიგრანტს პასპორტს ართმევს. ვიზის გაგრძელების იმედით, ადამიანი აგრძელებს მუშაობას, თუმცა, გარანტია იმისა, რომ პასპორტს დაუბრუნებენ და შრომას აუნაზღაურებენ, არ არსებობს.

უკანონო შრომითი მიგრანტები იოლი ნადავლია ადამიანით მოვაჭრეებისათვის. ისინი სარგებლობენ უკანონო მიგრანტების უცოდინარობით, გულუბრყვილობით და გამოუვალი მდგომარეობით.

გაითვალისწინე!

საზღვარგარეთ სამუშაოდ, სასწავლებლად, სტუმრად ან ტურისტად გამგ ზავრება შესანიშნავი საშუალებაა ეკონომიკური მდგომარეობის გასაუმჯობესებლად, ცოდნისა და უცხოური გამოცდილების შესაძენად. თუმცა, უნდა იცოდე, რომ საზღვარგარეთ გამგზავრება ბევრი წესისა და კანონის დაცვასთან არის დაკავშირებული. ეს კანონები, გამგზავრების მიზნებიდან გამომდინარე, სხვადასხვა ქვეყანაში სხვადასხვაგვარია.

რა უნდა იცოდე საზღვარგარეთ გამგზავრებამდე?

დამოუკიდებელი სამუშაო

შენ გადაწყვიტე საზღვარგარეთ სწავლის გაგრძელება ან მუშაობის დაწყება. მოიფიქრე და დაწერე ოთხი ძირითადი მოქმედება, რომელსაც განახორციელებ გამგზავრების წინ, რათა არ შეგექმნას პრობლემები.

თუ საზღვარგარეთ წასვლა გადაწყვიტე, დაიმახსოვრე და გააცანი სხვებსაც!

ბრმად არ ენდო განცხადებებს - „მუშაობა, სწავლა, სტაჟირება საზღვარგარეთ!“

ობიექტურად განსაზღვრე შენი შესაძლებლობა და დარწმუნდი შემოთავაზების სანდოობაში ძალიან მნიშვნელოვანია დანიშნულების ქვეყნის ენის ცოდნა.

ვიზის მისაღებად პირადად მიმართე დანიშნულების ქვეყნის საელჩოს!

არავის მისცე შენი პასპორტი და სხვა საბუთები!

გამოიჩინე წინდახედულება, მიიღე სანდო ინფორმაცია!

დარეკე ადამიანით ვაჭრობის (ტრეფიკინგის)მსხვერპლთა, დაზარალებულთა დაცვისა და დახმარების სახელმწიფო ფონდის ცხელ ხაზზე: 100 229

გაეცანი ვებ-გვერდს: http://www.informedmigration.ge