საქართველოს კანონი

საქართველოს საგადასახადო კოდექსში დამატებებისა და ცვლილებების შეტანის შესახებ

მუხლი 1. საქართველოს საგადასახადო კოდექსში (საქართველოს საკანონმდებლო მაცნე, N41, 30.12.2004, მუხ. 200) შეტანილ იქნეს შემდეგი დამატებები და ცვლილებები:

1. მე-2 მუხლის მე-6 ნაწილს დაემატოს შემდეგი შინაარსის „გ¹“ ქვეპუნქტი:

„გ¹) კომერციული ბანკების ლიკვიდაციის თაობაზე დებულებებისა, რომელთა საქმიანობა რეგულირდება „კომერციული ბანკების საქმიანობის შესახებ“ საქართველოს კანონით;“.

2. მე-12 მუხლის:

ა) მე-12 ნაწილი ჩამოყალიბდეს შემდეგი რედაქციით: „12. პროცენტი - სავალო ვალდებულებებთან (გარდა საქონლის მიწოდებით ან/და მომსახურების გაწევით წარმოშობილი სავალო ვალდებულებებისა ან გარანტიით და თავდებობით ანდა სხვა ამგვარი ოპერაციებით წარმოქმნილი ვალდებულებებისა), მათ შორის, კრედიტებთან (სესხებთან), დეპოზიტებთან, ანაბრებთან, ობლიგაციებთან დაკავშირებული გადასახდელი, აგრეთვე დისკონტის სახით მიღებული შემოსავალი, საპენსიო დაზღვევის ხელშეკრულების მიხედვით მზღვეველის მიერ დაზღვეულისათვის გადახდილი სადაზღვევო ანაზღაურება (თანხა) ამ ანაზღაურების მისაღებად განხორციელებული სადაზღვევო შენატანების გამოკლებით და არასახელმწიფო საპენსიო ფონდიდან მიღებული პროცენტი.“;

ბ) 21-ე ნაწილი ჩამოყალიბდეს შემდეგი რედაქციით:

„21. უიმედო ვალი - საქონლის ან/და მომსახურების რეალიზაციის შედეგად გადასახადის გადამხდელის მიერ აღიარებული მოთხოვნა ან მისი ნაწილი, რომლის გადახდის ვადა გასულია და რომელიც არ იქნა ანაზღაურებული მიმდინარე საგადასახადო წლის ბოლომდე, ამასთანავე, არსებობს ერთ-ერთი შემდეგი დოკუმენტი:

ა) სასამართლოს კანონიერ ძალაში შესული გადაწყვეტილება მოთხოვნის დაკმაყოფილებაზე უარის თქმის შესახებ;

ბ) ცნობა სააღსრულებო დაწესებულებიდან სააღსრულებო ფურცლის აღსასრულებლად მიქცევის შედეგად მოვალისათვის სასამართლოს გადაწყვეტილებით კუთვნილი თანხის მიუღებლობის ან ნაწილობრივ მიღების თაობაზე;

გ) სასამართლოს კანონიერ ძალაში შესული განჩინება შესაბამისი პირის მიმართ გადახდისუუნარობის თაობაზე განცხადების წარმოებაში მიღების ან გაკოტრების საქმის წარმოების დაწყების ანდა რეაბილიტაციის დაწყების შესახებ, ამასთანავე, თუ მოსამართლის მიერ ამ კრედიტორის მოთხოვნა არ იქნა აღიარებული;

დ) ცნობა საგადასახადო ორგანოებიდან მოვალის სამეწარმეო რეესტრიდან ამოშლის თაობაზე.“;

გ) 36-ე ნაწილი ჩამოყალიბდეს შემდეგი რედაქციით:

„36. ძირითადი საშუალება - მატერიალური აქტივი, რომელსაც პირი იყენებს საქონლის წარმოების, საქონლის მიწოდების/მომსახურების გაწევის, იჯარით (მათ შორის, ლიზინგით) გადაცემის ან/და ადმინისტრაციული მიზნებისათვის და რომლის სასარგებლო გამოყენების ვადა ერთ წელზე მეტია.“;

დ) 47-ე ნაწილის შემდეგ დაემატოს შემდეგი შინაარსის 48-ე-51-ე ნაწილები:

„48. ბიოლოგიური აქტივი - ცხოველი ან მცენარე.

49. ახალასათვისებელი სასოფლო- სამეურნეო დანიშნულების მიწები:

ა) ყველა არასასოფლო-სამეურნეო სავარგული, რომელიც ტრანსფორმირდება (გადაიყვანება) სასოფლო-სამეურნეო სავარგულად. ასეთ მიწებს განეკუთვნება:

ა.ა) ყამირი მიწები;

ა.ბ) მელიორაციის (სარწყავი და დაშრობის) საშუალებით ასათვისებელი მიწები;

ა.გ) გაკაფვა-ამოძირკვის საშუალებით ასათვისებელი, ბუჩქნარით დაკავებული მიწები;

ა.დ) დატერასების საშუალებით ასათვისებელი ფერდობები;

ა.ე) წიაღისეულის მოპოვებისა და მშენებლობის დროს დარღვეული სარეკულტივაციო მიწები აგრობიოლოგიური პროდუქტიულობის აღდგენით;

ბ) დაბალინტენსიური სასოფლო-სამეურნეო სავარგულები, რომლებიც ტრანსფორმირდება (გადაიყვანება) მაღალინტენსიური სასოფლო-სამეურნეო დანიშნულების (სახნავი და მრავალწლიანი ნარგავებით დაკავებული) მიწების სავარგულად, დაჭაობებული და დამლაშებული მიწები.

50. შემოწმების მასალა - ამ კოდექსის 121-ე მუხლის შესაბამისად გადასახადების ან/და საგადასახადო სანქციების თანხების დარიცხვის ან არდარიცხვის შესახებ გადაწყვეტილების მიღებამდე ადმინისტრაციული წარმოების პროცესში შექმნილი დოკუმენტაცია (საგადასახადო შემოწმების აქტი, განხილვის ოქმი, დასკვნა, საგადასახადო ორგანოს უფლებამოსილი პირის მოხსენებითი ბარათი, გადასახადის გადამხდელის მიერ წარმოდგენილი წერილობითი ახსნა- განმარტება).

51. მნიშვნელოვანი ქონებით უზრუნველყოფილი პირი - „ფასიანი ქაღალდების ბაზრის შესახებ“ საქართველოს კანონით განსაზღვრული პირი.“.

3. მე-13 მუხლის:

ა) მე-2 ნაწილი ჩამოყალიბდეს შემდეგი რედაქციით:

„2. ეკონომიკურ საქმიანობას არ განეკუთვნება:

ა) სახელმწიფო ხელისუფლების, დამოუკიდებელი ეროვნული მარეგულირებელი და ადგილობრივი თვითმმართველობის ორგანოების საქმიანობა, რომელიც უშუალოდ არის დაკავშირებული მათთვის საქართველოს კანონმდებლობით მინიჭებული ფუნქციების შესრულებასთან, გარდა ხელშეკრულების საფუძველზე ფასიანი მომსახურების გაწევისა;

ბ) საქველმოქმედო საქმიანობა;

გ) რელიგიური საქმიანობა; დ) დაქირავებით მუშაობა;

ე) ფიზიკური პირის მიერ ფულადი სახსრების განთავსება ბანკებსა და სხვა საკრედიტო დაწესებულებებში დეპოზიტებსა და ანაბრებზე.“;

ბ) მე-3- მე-7 ნაწილები ამოღებულ იქნეს.

4. მე-18 მუხლის პირველი ნაწილის „პ“ ქვეპუნქტი ჩამოყალიბდეს შემდეგი რედაქციით:

„პ) ფინანსური ოპერაციები ან/და ფინანსური მომსახურება;“.

5. მე-19 მუხლი ჩამოყალიბდეს შემდეგი რედაქციით:

„მუხლი 19. ფინანსური ინსტრუმენტი, ფინანსური ოპერაცია და ფინანსური მომსახურება

1. ფინანსური ინსტრუმენტი არის ნებისმიერი გარიგება (ხელშეკრულება), რომელიც წარმოშობს როგორც ერთი პირის ფინანსურ აქტივს, ისე მეორე პირის ფინანსურ ვალდებულებას. იგი მოიცავს: ფულად სახსრებს (ნაღდი და უნაღდო ფორმით), სესხებს (კრედიტებს), სასესხო ვალდებულებებს, თამასუქებს და ფასიან ქაღალდებს, მათ შორის: კაპიტალში წილებს, აქციებს, ობლიგაციებს და ისეთ წარმოებულ ფასიან ქაღალდებს, როგორებიცაა: ოფციონი, ფიუჩერსი, ფორვარდი, სვოპი და ა. შ.. ფინანსური ინსტრუმენტი აგრეთვე მოიცავს ფულადი გამოსახვის მქონე, საქართველოს კანონმდებლობით დაშვებულ ნებისმიერ გარიგებას ან დაპირებას ორ სუბიექტს (კონტრაგენტს) შორის, თუ გარიგების ან დაპირების არსებობის პერიოდში მის ნებისმიერ ეტაპზე ამ გარიგების ან დაპირების შედეგად განხორციელდა საქონლის ან/და მომსახურების მიწოდება, გარდა ფინასური ოპერაციებისა და მომსახურების მიწოდებისა ამ ფინანსური ინსტრუმენტის მფლობელ სუბიექტებს შორის ან/და მესამე პირებისათვის/მესამე პირებისაგან. ასეთი მიწოდების მომენტიდან იგი აღარ ითვლება ფინანსურ ინსტრუმენტად.

2. ფინანსურ ოპერაციას განეკუთვნება:

ა) ყველა სახის ანგარიშის (მათ შორის, საანგარიშსწორებო, სადეპოზიტო, საბროკერო და ა. შ.) გახსნა, განკარგვა, დახურვა, აგრეთვე ნებისმიერი საგადამხდელო ინსტრუმენტით სარგებლობა, მათ შორის, კლირინგი და ანგარიშსწორება ნაღდი ან უნაღდო ფორმით (გარდა საინკასაციო მომსახურებისა);

ბ) ფინანსური ინსტრუმენტის მიმოქცევა და მიმოქცევასთან დაკავშირებული ოპერაციები ნაღდი და უნაღდო ფორმით და ნებისმიერი საგადამხდელო ინსტრუმენტით სარგებლობა;

გ) კრედიტის (სესხის) აღება/გაცემა/გადაცემა, სინდიცირება, სტრუქტურირება, მართვა და განკარგვა, მათ შორის, კრედიტის (სესხის) უზრუნველსაყოფად განხორციელებული ქმედებები (ქონების/აქტივის დაგირავება, საკრედიტო რისკის მესამე პირზე ნაწილობრივ ან მთლიანად გადაყიდვა, გარანტიების ან ანალოგიური შინაარსის ფინანსური ინსტრუმენტების გაცემა/დამოწმება/მართვა/განკარგვა ან ასეთი ინსტრუმენტის შეძენა/მის ბენეფიციარად ყოფნა), აგრეთვე კრედიტის (სესხის) მომსახურება (საპროცენტო სარგებლისა და ძირის გადახდა) და კრედიტზე (სესხზე) საპროცენტო სარგებლისა და კრედიტის (ძირის) დაფარვის მიღება, ასევე ფაქტორინგი;

დ) კაპიტალში წილის, აქციის, ობლიგაციის, სერტიფიკატების, თამასუქებისა და სხვა ფასიანი ქაღალდების გამოშვებასთან, შეძენასთან, მიმოქცევასთან და მიწოდებასთან (მათ შორის, მომავალში) დაკავშირებული ოპერაციები, მათ შორის, მათი მიმოქცევის უზრუნველყოფა;

ე) ფულადი სახსრების, ფასიანი ქაღალდების ან/და სხვა ფინანსური ინსტრუმენტების ემისია, მართვა (მათ შორის, საპენსიო და საინვესტიციო ფონდების ან დანაზოგთა სხვა კოლექტიური და ინდივიდუალური სქემების ფორმირება, მათში ფინანსური ინსტრუმენტების აკუმულირება), განკარგვა, განთავსება (მათ შორის, მესამე პირებთან, გარანტირებულ და არაგარანტირებულ საფუძველზე), ნომინალურ მფლობელობაში მიღება/გადაცემა, სესხება/გასესხება დროებით (რეპოს) საფუძველზე, ადმინისტრირება, მათ შორის, რეგისტრაცია (რეესტრის ფორმირება/წარმოება), გადაცემა, ბლოკირება/განბლოკვა, დატვირთვა/განტვირთვა, სხვა დეპოზიტარული (მათ შორის, სპეციალური დეპოზიტარის) და კასტოდიანური ოპერაციები (შენახვა და აღრიცხვის წარმოება), მათი სამართლიანი ღირებულების დადგენა;

ვ) ფინანსური ინსტრუმენტებით გარიგების პირობებისა და ანგარიშსწორების გარანტად (მათ შორის, მესამე მხარედ) გამოსვლა;

ზ) კორპორატიული ოპერაციები, კერძოდ, აქციების და კაპიტალში წილების დანაწევრება, კონსოლიდაცია, კაპიტალის გაზრდა/შემცირება (მათ შორის, კაპიტალის გაზრდაში მონაწილეობის უფლებების ემისია, შეძენა/გასხვისება და მიმოქცევა), ორი ან ორზე მეტი იურიდიული პირის შერწყმა/იურიდიული პირის ორ ან ორზე მეტ იურიდიულ პირად დაყოფა, ლიკვიდაცია, დივიდენდების დარიცხვასთან/აღრიცხვასთან და გადახდასთან დაკავშირებული მომსახურება (ფულადი ან კანონით დაშვებული ნებისმიერი სხვა ფორმით);

თ) დაზღვევა ან/და გადაზღვევა.

3. ფინანსურ მომსახურებას განეკუთვნება ფინანსურ ინსტრუმენტებთან ან/და ფინანსურ ოპერაციებთან დაკავშირებული მომსახურება.“.

6. მე-20 მუხლის მე-4 ნაწილის „ა“ ქვეპუნქტი ჩამოყალიბდეს შემდეგი რედაქციით:

„ა) სახელმწიფოსათვის ან/და ადგილობრივი თვითმმართველობისათვის აქტივების გამოტანა იმ საწარმოს კაპიტალიდან, რომლის წილის/აქციების 50 პროცენტზე მეტი სახელმწიფოს ან/და ადგილობრივი თვითმმართველობის საკუთრებაშია;“.

7. 24-ე მუხლის:

ა) პირველი ნაწილის:

ა.ა) „ბ“ ქვეპუნქტი ჩამოყალიბდეს შემდეგი რედაქციით:

„ბ) საქართველოს ტერიტორიაზე საქონლის მიწოდებით მიღებული შემოსავალი;“;

ა.ბ) „ბ“ ქვეპუნქტის შემდეგ დაემატოს შემდეგი შინაარსის „ბ¹“ ქვეპუნქტი:

„ბ¹) საქართველოში მომსახურების გაწევით მიღებული შემოსავალი. ამ მიზნით, თუ ამ მუხლით სხვა რამ არ არის გათვალისწინებული, მომსახურება საქართველოში გაწეულად ითვლება, თუ:

ბ¹.ა) მომსახურება ფაქტობრივად ხორციელდება საქართველოს ტერიტორიაზე;

ბ¹.ბ) მომსახურება დაკავშირებულია უშუალოდ უძრავ ქონებასთან, რომელიც მდებარეობს საქართველოში;

ბ¹.გ) მომსახურება დაკავშირებულია უშუალოდ მოძრავ ქონებასთან, რომელიც მდებარეობს საქართველოში;

ბ¹.დ) მომსახურება დაკავშირებულია საქართველოს რეზიდენტის მიერ გამოშვებულ ფასიან ქაღალდებთან;

ბ¹.ე) მომსახურების ფაქტობრივად გაწევის ადგილი არის საქართველო და მომსახურება ხორციელდება კულტურის, ხელოვნების, განათლების, ტურიზმის, დასვენების, ფიზიკური კულტურისა და სპორტის სფეროში;

ბ¹.ვ) მომსახურების გაწევა დაკავშირებულია ტვირთების გადატანასთან ან მგზავრთა გადაყვანასთან და ტრანსპორტირების დაწყებისა და დასრულების ადგილი არის საქართველო;

ბ¹.ზ) მომსახურების გამწევი და მომსახურების მიმღები სხვადასხვა სახელმწიფოში არიან და მომსახურების გამწევი საქართველოს რეზიდენტია, გარდა იმ შემთხვევისა, როდესაც მომსახურების გამწევის მიერ მომსახურების გაწევა ხორციელდება სხვა ქვეყანაში მისი მუდმივი დაწესებულების მეშვეობით, რომელიც ადასტურებს, რომ მომსახურების გამწევმა სხვა ქვეყანაში (გარდა საქართველოსი) გასწია მომსახურება;

ბ¹.თ) მომსახურების გამწევი და მომსახურების მიმღები სხვადასხვა სახელმწიფოში არიან და მომსახურების გამწევის მიერ მომსახურების გაწევა ხორციელდება საქართველოში მისი მუდმივი დაწესებულების, დაქირავებულის მეშვეობით ან სხვაგვარად (მათ შორის, მომსახურების გამწევის მიერ მომსახურების გაწევასთან დაკავშირებული ხარჯი გაწეულია საქართველოში, მიუხედავად მისი ფაქტობრივად გადახდის ადგილისა), რაც ადასტურებს, რომ მომსახურების გამწევმა საქართველოში გასწია მომსახურება;“;

ა.გ) „ე“ ქვეპუნქტი ჩამოყალიბდეს შემდეგი რედაქციით:

„ე) რეზიდენტი იურიდიული პირისაგან მიღებული დივიდენდები, რეზიდენტი იურიდიული პირის აქციის ან/და იურიდიულ პირში პარტნიორის წილის რეალიზაციით მიღებული შემოსავლები;“;

ა.დ) „ნ“ ქვეპუნქტი ჩამოყალიბდეს შემდეგი რედაქციით:

„ნ) რეზიდენტის მიერ ქონების რეალიზაციით მიღებული სხვა შემოსავალი, რომელიც არ არის დაკავშირებული ეკონომიკურ საქმიანობასთან;“;

ბ) მე-2 ნაწილის შემდეგ დაემატოს შემდეგი შინაარსის მე-3 ნაწილი:

„3. საქართველოში არსებული წყაროდან მიღებულ შემოსავალს არ განეკუთვნება საერთაშორისო ფინანსურ კომპანიებს შორის ფინანსური ოპერაციებიდან ან/და ფინანსური მომსახურებიდან მიღებული შემოსავალი.“.

8. 26¹ მუხლის მე-2 ნაწილი ჩამოყალიბდეს შემდეგი რედაქციით:

„2. საერთაშორისო ფინანსური კომპანიის მიერ საქართველოში არსებული წყაროდან ფინანსური ოპერაციის განხორციელების ან/და ფინანსური მომსახურების გაწევის შედეგად მიღებული შემოსავალი არ უნდა აღემატებოდეს ერთობლივი შემოსავლის 10 პროცენტს.“.

9. 262 მუხლის მე-3 ნაწილის „გ“ ქვეპუნქტი ჩამოყალიბდეს შემდეგი რედაქციით:

„გ) ამ საწარმომ განახორციელა სხვა ეკონომიკური საქმიანობა, გარდა თავისუფალ საწყობში ნებადართული საქმიანობისა.“.

10. 263 მუხლის მე-3 ნაწილის „დ.ბ“ ქვეპუნქტი ჩამოყალიბდეს შემდეგი რედაქციით:

„დ.ბ) ტრანსპორტის, კავშირგაბმულობის, წყალმომარაგების, კანალიზაციის, აუდიტორული ან/და საკონსულტაციო მომსახურებისა, ლიცენზირებული ფინანსური ინსტიტუტის მიერ ფინანსური ოპერაციების განხორციელებისა ან/და ფინანსური მომსახურების გაწევისა, საწვავის, საპოხის, ელექტროენერგიის ან/და ბუნებრივი აირის მიწოდებისა, აგრეთვე ძირითად საშუალებათა მიწოდებისა, მშენებლობისა, მონტაჟისა ან/და დადგმის მომსახურების გაწევისა;“.

11. 29-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. საქართველოში უცხოური საწარმოს ან არარეზიდენტი ფიზიკური პირის მუდმივ დაწესებულებად ითვლება განსაზღვრული ადგილი, რომლის გამოყენებით ეს პირი ნაწილობრივ ან მთლიანად ახორციელებს ეკონომიკურ საქმიანობას საქართველოში, რწმუნებული პირის საქმიანობის ჩათვლით, გარდა ამ მუხლის მე-6 და მე-13 ნაწილებით გათვალისწინებული შემთხვევებისა.“;

ბ) მე-2 ნაწილის „გ“ ქვეპუნქტი ჩამოყალიბდეს შემდეგი რედაქციით:

„გ) მუდმივი ბაზა, სადაც არარეზიდენტი ფიზიკური პირი ახორციელებს ეკონომიკურ საქმიანობას;“;

გ) მე-5 ნაწილი ჩამოყალიბდეს შემდეგი რედაქციით:

„5. თუ უცხოური საწარმო ან არარეზიდენტი ფიზიკური პირი ახორციელებს ეკონომიკურ საქმიანობას საქართველოში კანონმდებლობით განსაზღვრული პროფესიონალური სტატუსის მქონე შუამავლის, აგენტის ან ბროკერის მეშვეობით, რომელიც უფლებამოსილი არ არის აწარმოოს მოლაპარაკებები ან ხელი მოაწეროს ხელშეკრულებას ამ უცხოური საწარმოს ან არარეზიდენტი ფიზიკური პირის სახელით, მაშინ შუამავლის, აგენტის ან ბროკერის საქმიანობა არ წარმოშობს ამ უცხოური საწარმოს ან არარეზიდენტი ფიზიკური პირის მუდმივ დაწესებულებას საქართველოში.“;

დ) მე-12 ნაწილის შემდეგ დაემატოს შემდეგი შინაარსის მე-13 ნაწილი:

„13. უცხოური საწარმოს ან არარეზიდენტი ფიზიკური პირის მიერ საქართველოს ტერიტორიაზე ქონების მხოლოდ ლიზინგით, უზუფრუქტით, იჯარით, ქირით ან/და სხვა ამგვარი ფორმით გაცემა არ წარმოშობს ამ უცხოური საწარმოს ან არარეზიდენტი ფიზიკური პირის მუდმივ დაწესებულებას საქართველოში.“.

12. 34-ე მუხლს დაემატოს შემდეგი შინაარსის 5¹ ნაწილი:

„5¹. საქართველოს რეზიდენტობა, გარდა ამ მუხლის მე-2 ნაწილით განსაზღვრული შემთხვევისა, შეიძლება მიენიჭოს მნიშვნელოვანი ქონებით უზრუნველყოფილ პირს საქართველოს ფინანსთა და იუსტიციის მინისტრების მიერ განსაზღვრული წესითა და პირობებით.“.

13. 41-ე მუხლის მე-2 ნაწილის „ა“ ქვეპუნქტი ჩამოყალიბდეს შემდეგი რედაქციით:

„ა) საქართველოს საწარმოებმა, საქართველოს ორგანიზაციებმა და მეწარმე ფიზიკურმა პირებმა წარუდგინონ ინფორმაცია საქართველოს ფარგლებს გარეთ ბანკებსა და საბანკო ოპერაციების განმახორციელებელ სხვა ორგანიზაციებში საბანკო ანგარიშების (გარდა საანაბრო (ვადიანი) ანგარიშებისა) გახსნის შესახებ, ასეთი ანგარიშების გახსნიდან 5 სამუშაო დღის ვადაში;“.

14. 53-ე მუხლი ჩამოყალიბდეს შემდეგი რედაქციით:

„მუხლი 53. უფლებამოსილების დელეგირება

1. ცალკეული საკითხის გადაწყვეტისას საგადასახადო ორგანოს უფროსის მიერ შესაძლებელია საგადასახადო ორგანოს თანამშრომელზე დელეგირებულ იქნეს უფლებამოსილება.

2. საგადასახადო ორგანოს თანამშრომელს ეკრძალება საქართველოს კანონმდებლობით დადგენილი წესით მისთვის დაკისრებული ვალდებულების ან მინიჭებული უფლებამოსილების სხვა თანამშრომლისათვის გადაცემა.“.

15. 57-ე მუხლის მე-4 ნაწილი ჩამოყალიბდეს შემდეგი რედაქციით:

„4. საგადასახადო დეკლარაციაში/გაანგარიშებაში ჯამური საგადასახადო ვალდებულების თანხის გაანგარიშება ხდება სრულ ლარებში. ამ მიზნით საგადასახადო ვალდებულება 1 ლარამდე ნულდება.“.

16. IX თავის შემდეგ დაემატოს შემდეგი შინაარსის IX1 თავი:

„თავი IX¹. საომარი ან საგანგებო მდგომარეობის გამოცხადებისას განსაკუთრებული პირობების შემოღება

მუხლი 79¹. საომარი ან საგანგებო მდგომარეობის გამოცხადებისას განსაკუთრებული პირობების მოქმედების ვადა

1. საომარი ან საგანგებო მდგომარეობის გამოცხადებისას საქართველოს ფინანსთა მინისტრს შეუძლია გამოსცეს ბრძანება საქართველოს მთელ ტერიტორიაზე ან მის რომელიმე ნაწილში განსაკუთრებული პირობების შემოღების შესახებ. ბრძანებაში მიეთითება განსაკუთრებული პირობების მოქმედების ვადა, რომლის ხანგრძლივობა არ უნდა აღემატებოდეს 90 დღეს.

2. თუ განსაკუთრებული პირობების მოქმედების ვადა თავდაპირველად დაწესებული იყო 90 დღეზე ნაკლები ხნით, საქართველოს მთავრობის გადაწყვეტილების საფუძველზე ეს ვადა შეიძლება გაგრძელდეს 90 დღემდე. განსაკუთრებული პირობების მოქმედების ვადის 90 დღეზე მეტი ხნით გაგრძელება შესაძლებელია მხოლოდ საქართველოს მთავრობის გადაწყვეტილებით.

მუხლი 79². განსაკუთრებული პირობების მოქმედებისას საგადასახადო დეკლარაციის/გაანგარიშების წარდგენის გადავადება

1. განსაკუთრებული პირობების მოქმედებისას საქართველოს ფინანსთა მინისტრი უფლებამოსილია გააგრძელოს საგადასახადო დეკლარაციის/გაანგარიშების წარდგენის საქართველოს კანონმდებლობით გათვალისწინებული ვადები.

2. საგადასახადო დეკლარაციის/გაანგარიშების წარდგენის გადავადების შესახებ გადაწყვეტილების მიღების შემთხვევაში საქართველოს ფინანსთა მინისტრის ამ კოდექსის 79¹ მუხლის პირველი ნაწილით განსაზღვრული ბრძანება უნდა ითვალისწინებდეს საგადასახადო დეკლარაციის/გაანგარიშების წარდგენის გადავადების წესს, ფორმასა და პროცედურებს. ბრძანება უნდა მოიცავდეს:

ა) იმ გადასახადის გადამხდელთა განსაზღვრის პირობებს, რომლებიც აკმაყოფილებენ საგადასახადო დეკლარაციის/გაანგარიშების წარდგენის გადავადების კრიტერიუმებს;

ბ) გადასახადებს, რომლებზედაც გავრცელდება საგადასახადო დეკლარაციის/გაანგარიშების წარდგენის გადავადება;

გ) პროცედურებს, რომელთა საშუალებითაც გადასახადის გადამხდელები ამ მუხლის საფუძველზე შეძლებენ საგადასახადო დეკლარაციის/გაანგარიშების წარდგენის გადავადების მოთხოვნას და გადავადების უფლების მინიჭების შესახებ გადაწყვეტილების გასაჩივრებას.

მუხლი 79³. განსაკუთრებული პირობების მოქმედებისას გადასახადის გადახდის გადავადება

1. განსაკუთრებული პირობების მოქმედებისას საქართველოს ფინანსთა მინისტრი უფლებამოსილია გადაავადოს ცალკეული გადასახადის მიხედვით გადასახადის გადახდა.

2. ცალკეული გადასახადის მიხედვით გადასახადის გადახდის გადავადების შესახებ გადაწყვეტილების მიღების შემთხვევაში საქართველოს ფინანსთა მინისტრის ამ კოდექსის 79¹ მუხლის პირველი ნაწილით განსაზღვრული ბრძანება უნდა ითვალისწინებდეს გადასახადის გადახდის გადავადების წესს, ფორმას, და პროცედურებს. ბრძანება უნდა მოიცავდეს:

ა) იმ გადასახადის გადამხდელთა განსაზღვრის პირობებს, რომლებიც აკმაყოფილებენ გადასახადის გადახდის გადავადების კრიტერიუმებს;

ბ) გადასახადებს, რომლებზედაც გავრცელდება გადასახადის გადახდის გადავადება;

გ) პროცედურებს, რომელთა საშუალებითაც გადასახადის გადამხდელები ამ მუხლის საფუძველზე შეძლებენ გადასახადის გადახდის გადავადების მოთხოვნას და გადავადების უფლების მინიჭების შესახებ გადაწყვეტილების გასაჩივრებას.

მუხლი 79⁴. განსაკუთრებული პირობების მოქმედებისას მიმდინარე გადასახდელების გადახდის ვალდებულების გადავადება

საქართველოს ფინანსთა მინისტრს ამ კოდექსის 79¹ მუხლის პირველი ნაწილით განსაზღვრული ბრძანებით უფლება აქვს მიიღოს გადაწყვეტილება საქართველოს საგადასახადო კოდექსით დადგენილი მიმდინარე გადასახდელების გადახდის ვალდებულების გადავადების შესახებ. ამ შემთხვევაში ბრძანება უნდა მოიცავდეს:

ა) გადასახადებს (მოგების, საშემოსავლო ან/და ქონების), რომლებზედაც გავრცელდება მიმდინარე გადასახდელების გადახდის ვალდებულების გადავადება;

ბ) პროცედურებს, რომელთა საშუალებითაც გადასახადის გადამხდელები ამ მუხლის საფუძველზე შეძლებენ მიმდინარე გადასახდელების გადახდის ვალდებულების შეჩერების მოთხოვნას და შეჩერების უფლების მინიჭების შესახებ გადაწყვეტილების გასაჩივრებას.

მუხლი 79⁵. განსაკუთრებული პირობების მოქმედებისას განადგურებული და დაზიანებული ქონების ჩამოწერის უფლება

1. განსაკუთრებული პირობების მოქმედებისას პირს (გადასახადის გადამხდელს) უფლება აქვს საქართველოს ფინანსთა სამინისტროს დავების განხილვის საბჭოს გადაწყვეტილების საფუძველზე გამოქვითოს:

ა) საომარი მოქმედებების შედეგად განადგურებული და დაზიანებული ფასეულობა, რომელმაც დაკარგა ღირებულება ან რომელსაც შეუმცირდა ღირებულება - შემცირებული ღირებულების ოდენობით;

ბ) ოკუპირებულ ტერიტორიებზე არსებული აქტივების ღირებულება, ხოლო თუ პირი იბრუნებს შესაძლებლობას, ამ აქტივების მიმართ განახორციელოს მესაკუთრის ან/და მოსარგებლის უფლებამოსილება, იგი ვალდებულია აქტივების ღირებულება შეიტანოს თავის ერთობლივ შემოსავალში.

2. აქტივების ჩამოწერის შესახებ გადასახადის გადამხდელი საქართველოს ფინანსთა სამინისტროში წარადგენს განცხადებას საქართველოს ფინანსთა მინისტრის მიერ დადგენილი ფორმით.”.

17. მე-80 მუხლის მე-4 ნაწილს დაემატოს შემდეგი შინაარსის „გ“ ქვეპუნქტი:

„გ) ამ კოდექსის 86-ე მუხლის შესაბამისად მესამე პირის მფლობელობაში არსებულ ქონებაზე გადახდევინების მიქცევის შესახებ გადაწყვეტილების მიღება;“.

18. 84-ე მუხლის მე-3 ნაწილი ჩამოყალიბდეს შემდეგი რედაქციით:

„3. ლიცენზირებული ფასიანი ქაღალდების ცენტრალური დეპოზიტარის ან საბროკერო კომპანიის, როგორც გადამხდელის, მიმართ ამ მუხლით განსაზღვრულ ღონისძიებათა გამოყენებისას დაუშვებელია აღნიშნულ ღონისძიებათა მიმართვა იმ აქტივებზე, რომლებიც არ არის მათი საკუთრება და მიეკუთვნება მათი კლიენტების აქტივებს (კერძოდ, ნომინალურ მფლობელობაში მყოფ ფასიან ქაღალდებს და ფულად სახსრებს). კლიენტების ამგვარი აქტივები უნდა აღირიცხებოდეს საკუთარი აქტივებისაგან განცალკევებულად, საქართველოს კანონმდებლობის შესაბამისად.“.

19. 85-ე მუხლის:

ა) 3¹ ნაწილის „ბ“ ქვეპუნქტი ამოღებულ იქნეს;

ბ) 3² ნაწილის შემდეგ დაემატოს შემდეგი შინაარსის 3³ ნაწილი:

„3³. იმ შემთხვევაში, თუ მარეგისტრირებელ ორგანოსა და საქართველოს ფინანსთა სამინისტროს შემოსავლების სამსახურს შორის დადებულია ხელშეკრულება ინფორმაციის (მათ შორის, საგადასახადო გირავნობის/იპოთეკის უფლების რეგისტრაციის) ელექტრონულად გაცვლის შესახებ, დასაშვებია ამ კოდექსით გათვალისწინებული მოთხოვნები განხორციელდეს ელექტრონულ-ტექნოლოგიური საშუალებების გამოყენებით. ასეთ შემთხვევაში ელექტრონულ დოკუმენტზე (საგადასახადო გირავნობის/იპოთეკის უფლების წარმოშობის ან გაუქმების შესახებ შეტყობინებაზე) ნებისმიერ ელექტრონულ ხელმოწერას ამ პირებისათვის აქვს მატერიალურ დოკუმენტზე პირადი ხელმოწერის თანაბარი იურიდიული ძალა.“;

გ) მე-9 ნაწილი ჩამოყალიბდეს შემდეგი რედაქციით:

„9. იმ ქონებაზე, რომელზედაც ვრცელდება საგადასახადო გირავნობის/იპოთეკის უფლება, საგადასახადო ორგანოს უფლება აქვს გააუქმოს საგადასახადო გირავნობა/იპოთეკა, თუ:

ა) საგადასახადო ორგანო ქონების სანაცვლოდ მიიღებს ამონაგებ თანხას;

ბ) საგადასახადო ორგანო მიიღებს საბანკო ან საფინანსო გარანტიას ამ კოდექსის 841 მუხლით გათვალისწინებულ შემთხვევაში;

გ) საქართველოს ფინანსთა მინისტრის გადაწყვეტილებით, ასეთი ქმედება სახელმწიფო ინტერესია.“;

დ) მე-10 და მე-11 ნაწილები ამოღებულ იქნეს.

20. 86-ე მუხლი ჩამოყალიბდეს შემდეგი რედაქციით:

„მუხლი 86. მესამე პირის მფლობელობაში არსებულ ქონებაზე გადახდევინების მიქცევა

1. თუ სასამართლოს გადაწყვეტილებით დადგენილია ან მესამე პირის მიერ აღიარებულია, რომ გადასახადის გადამხდელის/საგადასახადო აგენტის ან სხვა ვალდებული პირის ქონება ან ქონებრივი უფლებები რაიმე ფორმით მესამე პირის დროებით მფლობელობაშია, გადასახადის გადამხდელის თანხმობით ან მისი თანხმობის გარეშე, თუ გადასახადის გადამხდელის ქონება იმდენად მცირეა, რომ საგადასახადო ორგანოს მიერ საგადასახადო ვალდებულების შესრულების უზრუნველყოფის სხვა ღონისძიებების განხორციელება ვერ უზრუნველყოფს აღიარებული საგადასახადო დავალიანების დაფარვას, საგადასახადო ორგანოს უფლება აქვს მიიღოს გადაწყვეტილება მესამე პირის მფლობელობაში არსებულ ქონებაზე გადახდევინების მიქცევის შესახებ და მესამე პირს წარუდგინოს „საგადასახადო მოთხოვნა“.

2. „საგადასახადო მოთხოვნაში“ უნდა აღინიშნოს:

ა) საგადასახადო ორგანოს დასახელება და მისამართი;

ბ) მესამე პირის რეკვიზიტები (სახელი და გვარი/დასახელება, მისამართი);

გ) გადასახადის გადამხდელის რეკვიზიტები (სახელი და გვარი/დასახელება, მისამართი);

დ) მისი წარდგენის საფუძველი, საგადასახადო კანონმდებლობის აქტის ის ნორმა, რომლის თანახმადაც მოხდა ამ მოთხოვნის წარდგენა;

ე) მისი შინაარსი (მათ შორის, გადასახადის გადამხდელის მიმართ მესამე პირის დავალიანების ოდენობა, მესამე პირისაგან მოთხოვნილი თანხის ოდენობა და მესამე პირის მფლობელობაში არსებული ის ქონება, რომელიც არის გადასახადის გადამხდელის საკუთრება, ამ მოთხოვნის შესრულების ვადა და გადახდის წესი);

ვ) მისი მიღებისას მესამე პირის უფლებები და ვალდებულებები (მათ შორის, ამ მოთხოვნის გასაჩივრების წესი);

ზ) მისი შესრულების უზრუნველყოფის ღონისძიებები, რომლებიც ხორციელდება მესამე პირის მიმართ ამ მოთხოვნის შეუსრულებლობის შემთხვევაში.

3. „საგადასახადო მოთხოვნას“ უნდა დაერთოს გადასახადის გადამხდელის თანხმობა, გარდა იმ შემთხვევისა, როდესაც გადასახადის გადამხდელის ქონება იმდენად მცირეა, რომ საგადასახადო ორგანოს მიერ საგადასახადო ვალდებულების შესრულების უზრუნველყოფის სხვა ღონისძიებების განხორციელება ვერ უზრუნველყოფს აღიარებული საგადასახადო დავალიანების დაფარვას.

4. მოთხოვნის სრულად ან ნაწილობრივ შესრულებისთანავე გადასახადის გადამხდელის საგადასახადო ვალდებულება შესაბამისად უქმდება ან მცირდება.

5. მესამე პირის მიერ „საგადასახადო მოთხოვნის“ მიღებიდან 20 კალენდარული დღის ვადაში მისი შეუსრულებლობის შემთხვევაში საგადასახადო ორგანოს უფლება აქვს ამ პირის მიმართ განახორციელოს ამ კოდექსის 84-ე მუხლის პირველი ნაწილის „ე“ და „ვ“ ქვეპუნქტებით გათვალისწინებული საგადასახადო ვალდებულების შესრულების უზრუნველყოფის ღონისძიებები.

6. მესამე პირის მიმართ საგადასახადო ვალდებულების შესრულების უზრუნველყოფის ღონისძიებების განხორციელების რიგითობას ირჩევს საგადასახადო ორგანო.“.

21. 87-ე მუხლის:

ა) მე-3 ნაწილის შემდეგ დაემატოს შემდეგი შინაარსის 3¹ ნაწილი:

„3¹. იმ შემთხვევაში, თუ საქართველოს ფინანსთა სამინისტროს შემოსავლების სამსახურსა და მარეგისტრირებელ ორგანოს ან/და საბანკო დაწესებულებას შორის დადებულია ხელშეკრულება ინფორმაციის (მათ შორის, ქონებაზე ყადაღის დადების) ელექტრონულად გაცვლის შესახებ, დასაშვებია ამ კოდექსით გათვალისწინებული მოთხოვნები განხორციელდეს ელექტრონულ-ტექნოლოგიური საშუალებების გამოყენებით. ასეთ შემთხვევაში ელექტრონულ დოკუმენტზე (ქონებაზე ყადაღის დადების ბრძანება) ნებისმიერ ელექტრონულ ხელმოწერას ამ პირებისათვის აქვს მატერიალურ დოკუმენტზე პირადი ხელმოწერის თანაბარი იურიდიული ძალა.“;

ბ) მე-9 ნაწილი ჩამოყალიბდეს შემდეგი რედაქციით:

„9. ფასიან ქაღალდებს ან/და ფასიან ნივთებს შესანახად საქართველოს კანონმდებლობით დადგენილი წესით ამოიღებს საგადასახადო ორგანოს წარმომადგენელი, თუ არსებობს ყადაღადადებული ნივთების ხელყოფის საშიშროება. თუ ეს ნივთები მოვალესთან რჩება, მაშინ ყადაღის დადება ხდება დალუქვით.“.

22. 89-ე მუხლის:

ა) პირველი-მე-3 ნაწილები ჩამოყალიბდეს შემდეგი რედაქციით:

„1. თუ გადასახადის გადამხდელი/საგადასახადო აგენტი ან სხვა ვალდებული პირი არ შეასრულებს საგადასახადო ვალდებულებას მისი შესრულებისათვის საგადასახადო კანონმდებლობით დადგენილ ვადებში, მაშინ საგადასახადო ორგანოს უფლება აქვს აღიარებული საგადასახადო დავალიანების ფარგლებში მისი საბანკო ანგარიშებიდან (გარდა საანაბრო (ვადიანი) ანგარიშებისა) საინკასო დავალებით ჩამოწეროს გადასახადის, საურავისა და ჯარიმის თანხები და ჩარიცხოს ისინი შესაბამის ბიუჯეტში.

2. გადაწყვეტილებას გადასახადის გადამხდელის/საგადასახადო აგენტის ან სხვა ვალდებული პირის საბანკო ანგარიშიდან გადასახადის, საურავისა და ჯარიმის თანხების ჩამოწერის შესახებ იღებს საგადასახადო ორგანოს უფროსი/მოადგილე ბრძანებით, რომელიც წარედგინება გადასახადისგადამხდელს/საგადასახადო აგენტს ან სხვა ვალდებულ პირს.

3. საინკასო დავალება გადასახადის, საურავისა და ჯარიმის თანხების შესაბამის ბიუჯეტში ჩარიცხვის შესახებ წარედგინება იმ საბანკო დაწესებულებას, რომელშიც მოვალეს გახსნილი აქვს საბანკო ანგარიში. საბანკო დაწესებულება ვალდებულია უპირობოდ შეასრულოს საგადასახადო ორგანოს საინკასო დავალება.“;

ბ) მე-3 ნაწილის შემდეგ დაემატოს შემდეგი შინაარსის 3¹ ნაწილი:

„3¹. იმ შემთხვევაში, თუ საბანკო დაწესებულებასა და საქართველოს ფინანსთა სამინისტროს შემოსავლების სამსახურს შორის დადებულია ხელშეკრულება ინფორმაციის (მათ შორის, საინკასო დავალების) ელექტრონულად გაცვლის შესახებ, დასაშვებია ამ კოდექსით გათვალისწინებული მოთხოვნები განხორციელდეს ელექტრონულ-ტექნოლოგიური საშუალებების გამოყენებით. ასეთ შემთხვევაში ელექტრონულ დოკუმენტზე (საინკასო დავალებაზე) ნებისმიერ ელექტრონულ ხელმოწერას ამ პირებისათვის აქვს მატერიალურ დოკუმენტზე პირადი ხელმოწერის თანაბარი იურიდიული ძალა.“;

გ) მე-4 და მე-5 ნაწილები ჩამოყალიბდეს შემდეგი რედაქციით:

„4. საგადასახადო ორგანოს საინკასო დავალებაში მიეთითება გადასახადის გადამხდელის/საგადასახადო აგენტის ან სხვა ვალდებული პირის საიდენტიფიკაციო ნომერი და გადასარიცხი თანხის ოდენობა, აგრეთვე საგადასახადო ორგანოში შესაბამისი ინფორმაციის არსებობის შემთხვევაში ის საბანკო ანგარიშები, რომლებიდანაც უნდა განხორციელდეს გადასახადის, საურავისა და ჯარიმის თანხების გადარიცხვა. ამასთანავე, თუ საბანკო დაწესებულებასთან დადებულია ამ კოდექსის 103-ე მუხლის პირველი ნაწილის „ე“ ქვეპუნქტით გათვალისწინებული ხელშეკრულება, მაშინ საგადასახადო ორგანოს საინკასო დავალებაში მიეთითება ერთ-ერთი საბანკო ანგარიში ან/და გადასახადის გადამხდელის საიდენტიფიკაციო ნომერი.

5. საინკასო დავალების საბანკო დაწესებულებაში წარდგენის შემდეგ გადასახადის გადამხდელის აღიარებული საგადასახადო დავალიანების გაზრდის ან შემცირების შემთხვევაში საგადასახადო ორგანო უფლებამოსილია საინკასო დავალებაში მოახდინოს გადასახადის თანხის ან/და ან გარიშსწორების ანგარიშის კორექტირება იმ დროისათვის არსებული საგადასახადო დავალიანების ფარგლებში.“.

23. 95-ე მუხლის მე-8 ნაწილი ჩამოყალიბდეს შემდეგი რედაქციით:

„8. ამ მუხლის მე-7 ნაწილით გათვალისწინებულ შემთხვევაში ითვლება, რომ გადასახადის გადამხდელმა განახორციელა საგადასახადო ანგარიშგება, რომლის მიხედვით მისი შემოსავლები, ხარჯები და საგადასახადო აგენტის ფუნქციის შესრულებასთან დაკავშირებული საგადასახადო ვალდებულებები შესაბამისი პერიოდების მიხედვით ნულის ტოლია. ამასთანავე, თუ დეკლარირება შემდგომში განხორციელდება აღნიშნული პერიოდების მიხედვით, იგი ჩაითვლება დაგვიანებით წარდგენილ საგადასახადო დეკლარაციად.“.

24. 97-ე მუხლს დაემატოს შემდეგი შინაარსის მე-3 ნაწილი:

„3. იმ პერიოდზე ან საკითხზე, რომელზედაც უკვე განხორციელდა საგადასახადო შემოწმება, პირის მიერ შესწორებული საგადასახადო დეკლარაციის წარდგენის შემთხვევაში საგადასახადო ორგანოს უფლება აქვს შეამციროს ან გაზარდოს ამ პირის საგადასახადო ვალდებულება. აღნიშნულის შესახებ საგადასახადო ორგანოს უფროსი/მოადგილე გამოსცემს მოტივირებულ ბრძანებას. პირს უფლება აქვს გაასაჩივროს ეს გადაწყვეტილება ამ კოდექსით დადგენილი წესით.“.

25. 99-ე მუხლის მე-2 ნაწილს დაემატოს შემდეგი შინაარსის „თ“ ქვეპუნქტი:

„თ) საქართველოს საბაჟო კოდექსის XIV¹ თავით გათვალისწინებული შემთხვევებისა.“.

26. მე-100 მუხლი ჩამოყალიბდეს შემდეგი რედაქციით:

„მუხლი 100. გადასახადის გადამხდელად აღრიცხვა და საიდენტიფიკაციო ნომრის მინიჭება

1. საწარმო/ორგანიზაცია ვალდებულია ამ კოდექსით გათვალისწინებული ეკონომიკური საქმიანობის დაწყებამდე განცხადებით მიმართოს საგადასახადო ორგანოს საიდენტიფიკაციო ნომრის მინიჭების მიზნით.

2. საქართველოს მოქალაქე ფიზიკური პირი (მათ შორის, მეწარმე ფიზიკური პირი) ვალდებულია ამ კოდექსით გათვალისწინებული ეკონომიკური საქმიანობის დაწყებამდე, გარდა ისეთი ეკონომიკური საქმიანობისა, რომლის შედეგად მიღებული შემოსავალი ამ კოდექსის მიხედვით იბეგრება წყაროსთან ან განთავისუფლებულია დაბეგვრისაგან, განცხადებით მიმართოს საგადასახადო ორგანოს საიდენტიფიკაციო ნომრის მინიჭების მიზნით.

3. საქართველოს მოქალაქე ფიზიკური პირი (გარდა მეწარმე ფიზიკური პირისა) უფლებამოსილია საქართველოში გადასახადის გადახდის ან/და დეკლარირების ვალდებულების დადგომისას, საგადასახადო ორგანოში საგადასახადო აღრიცხვის პროცედურების გავლის გარეშეც, მოქალაქის პირადობის მოწმობაში აღნიშნული პირადი ნომერი (საიდენტიფიკაციო ნომერი) მიუთითოს წარმოშობილი საგადასახადო და საბაჟო ვალდებულებების დეკლარირებისას და საბანკო დაწესებულებებში გადასახადის გადახდისას. ამ ფიზიკური პირის საგადასახადო აღრიცხვა (ფიქსირება) ხდება მისი საგადასახადო დეკლარაციის ან/და ბანკში წარდგენილი, გადასახადის გადახდის დამადასტურებელი საგადასახადო დავალების მონაცემების საფუძველზე.

4. საქართველოს მოქალაქეობის არმქონე ფიზიკური პირი ან უცხოური საწარმო, რომელსაც ამ კოდექსის 29-ე მუხლის თანახმად არ წარმოეშობა მუდმივი დაწესებულება საქართველოში, ვალდებულია ამ კოდექსით გათვალისწინებული გადასახადის გადახდის ან/და დეკლარირების ვალდებულების დადგომამდე განცხადებით მიმართოს საგადასახადო ორგანოს საიდენტიფიკაციო ნომრის მინიჭების მიზნით.

5. საქართველოს მოქალაქე ფიზიკურ პირს (მათ შორის, მეწარმე ფიზიკურ პირს) საიდენტიფიკაციო ნომრად მიენიჭება ამავე პირის მოქალაქის პირადობის მოწმობაში აღნიშნული პირადი ნომერი.

6. საქართველოს მოქალაქეობის არმქონე ფიზიკური პირის საიდენტიფიკაციო ნომერია საგადასახადო ორგანოს მიერ მინიჭებული 9-ნიშნა საიდენტიფიკაციო ნომერი.

7. საიდენტიფიკაციო ნომერი მუდმივია და მისი შეცვლა (გარდა შეცდომით მინიჭებულისა) ან გამეორება აკრძალულია, თუ საქართველოს კანონმდებლობით სხვა რამ არ არის გათვალისწინებული.

8. საწარმოს/ორგანიზაციის სახელმწიფო ან/და საგადასახადო რეგისტრაცია (აღრიცხვა) ხორციელდება ადგილსამყოფლის (იურიდიული მისამართის) მიხედვით, ხოლო ფიზიკური პირისა (მათ შორის, მეწარმე ფიზიკური პირისა) - მის მიერ განცხადებული საცხოვრებლის/საქმიანობის ადგილის მიხედვით.

9. საგადასახადო ორგანო ვალდებულია გადასახადის გადამხდელს (გარდა „მეწარმეთა შესახებ“ საქართველოს კანონით გათვალისწინებული საწარმოს, უცხო ქვეყნის ფილიალისა (მუდმივი დაწესებულებისა), საქართველოს სამოქალაქო კოდექსით განსაზღვრული არასამეწარმეო (არაკომერციული) იურიდიული პირისა და უცხო ქვეყნის არასამეწარმეო (არაკომერციული) იურიდიული პირის ფილიალისა, რომელთა საიდენტიფიკაციო ნომრის მინიჭების წესი და ვადები დადგენილია იმავე კანონებით) განცხადების წარდგენიდან 3 სამუშაო დღის ვადაში მიანიჭოს საიდენტიფიკაციო ნომერი და ამავე ვადაში გადასცეს მას საქართველოს ფინანსთა მინისტრის მიერ დადგენილი ფორმის გადასახადის გადამხდელის მოწმობა.

10. საგადასახადო ორგანოში გადასახადის გადამხდელის საგადასახადო რეგისტრაციისათვის საჭირო დოკუმენტების ფორმებს, გადასახადის გადამხდელის საიდენტიფიკაციო ნომრის მინიჭებისა და გამოყენების პირობებსა და წესებს ადგენს საქართველოს ფინანსთა მინისტრი.

11. გადასახადის გადამხდელი ვალდებულია გადასახადის გადამხდელის საიდენტიფიკაციო ნომერი მიუთითოს საგადასახადო დეკლარაციაში, საგადასახადო და საბაჟო ორგანოებთან მიმოწერისას და საქართველოს საგადასახადო და საბაჟო კანონმდებლობებით დადგენილ სხვა დოკუმენტებში.

12. საგადასახადო ორგანო ამ კოდექსის 130-ე მუხლით გათვალისწინებული საგადასახადო სამართალდარღვევის აღმოჩენისას ვალდებულია საქართველოს ფინანსთა მინისტრის მიერ განსაზღვრული წესით უზრუნველყოს პირის სახელმწიფო ან/და საგადასახადო რეგისტრაცია (აღრიცხვა).“.

27. 101-ე მუხლი ამოღებულ იქნეს.

28. 102-ე მუხლის პირველი ნაწილი ჩამოყალიბდეს შემდეგი რედაქციით:

„1. საგადასახადო ორგანოს უფლებამოსილ თანამდებობის პირს, საგადასახადო ორგანოს უფროსის/მოადგილის წერილობითი ბრძანების საფუძველზე, უფლება აქვს მოითხოვოს გადასახადის გადამხდელისაგან/საგადასახადო აგენტისაგან ან მისი წარმომადგენლისაგან სააღრიცხვო დოკუმენტაციის ან/და დაბეგვრასთან დაკავშირებული ინფორმაციის წარდგენა. ამასთანავე, ამ კოდექსის XV თავით გათვალისწინებულ შემთხვევებში გადასახადის გადამხდელის საქმიანობაზე დაკვირვების საგადასახადო კონტროლის მიზნით სააღრიცხვო დოკუმენტაციის ან/და დაბეგვრასთან დაკავშირებული ინფორმაციის წარდგენა ხდება საგადასახადო ორგანოს უფროსის/მოადგილის წერილობითი ბრძანების გარეშე.“.

29. 103-ე მუხლის პირველი ნაწილის:

ა) „ე“ ქვეპუნქტი ჩამოყალიბდეს შემდეგი რედაქციით:

„ე) საქართველოს ფინანსთა სამინისტროს შემოსავლების სამსახურთან დადებული ხელშეკრულების საფუძველზე და ამავე ხელშეკრულებით გათვალისწინებული ვადისა და პირობების დაცვით აცნობოს მხოლოდ ამ ნაწილის „ბ“ და „გ“ ქვეპუნქტებით გათვალისწინებული პირების ყველა ანგარიშის გახსნის ან/და დახურვის შესახებ და საგადასახადო ორგანოს მიერ ამ პირების საიდენტიფიკაციო ნომრებზე გამოწერილი საინკასო დავალება ან დადებული ყადაღა ავტომატურად გაავრცელოს ბანკში არსებულ მათ ყველა ანგარიშზე;“;

ბ) „ე“ ქვეპუნქტის შემდეგ დაემატოს შემდეგი შინაარსის „ვ“ ქვეპუნქტი:

„ვ) საქართველოს ფინანსთა სამინისტროს შემოსავლების სამსახურის მიერ მოთხოვნის შემთხვევაში მიაწოდოს მას ინფორმაცია ამ ნაწილის „ა“ და „ბ“ ქვეპუნქტებით გათვალისწინებულ პირებზე, მათ მიერ ანგარიშის გახსნის ან დახურვის შესახებ. შემოსავლების სამსახურს აღნიშნული ინფორმაციის მოთხოვნის უფლება აქვს ამ კოდექსით გათვალისწინებული ხანდაზმულობის ვადის ფარგლებში, რომელიც აითვლება ანგარიშის გახსნიდან/დახურვიდან, ხოლო სხვა შემთხვევაში ინფორმაცია შესაძლებელია გამოთხოვილ იქნეს სასამართლოს გადაწყვეტილების საფუძველზე.“.

30. 106-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. გადასახადის გადამხდელის საქმიანობაზე დაკვირვების საგადასახადო კონტროლის პროცედურები ტარდება საგადასახადო ორგანოს უფლებამოსილი პირის (პირების) მიერ, საგადასახადო ორგანოს უფროსის/მოადგილის მოტივირებული ბრძანებით, გადასახადის გადამხდელისთვის ამის თაობაზე წინასწარ შეტყობინების გარეშე. ბრძანებაში უნდა მიეთითოს აღნიშნული პროცედურების ჩატარების პერიოდი (მათი დაწყებისა და დასრულების ვადები), სააღრიცხვო დოკუმენტაცია ან/და დაბეგვრასთან დაკავშირებული ინფორმაცია, რომელიც საჭიროა პროცედურების ჩასატარებლად, და პროცედურების ჩამტარებელი საგადასახადო ორგანოს უფლებამოსილ პირთა ჩამონათვალი.“;

ბ) მე-5 ნაწილის შემდეგ დაემატოს შემდეგი შინაარსის მე-6 ნაწილი:

„6. ამ თავით გათვალისწინებული საგადასახადო კონტროლის პროცედურების ჩატარების წესის შესახებ ინსტრუქციებს ამტკიცებს საქართველოს ფინანსთა მინისტრი.“.

31. 108-ე მუხლი ჩამოყალიბდეს შემდეგი რედაქციით:

„მუხლი 108. საქონლის/მომსახურების საკონტროლო შესყიდვა

1. საქონლის/მომსახურების საკონტროლო შესყიდვის მიზანია გადასახადის გადამხდელის მიერ საქონლის მიწოდებით ან/და მომსახურების გაწევით მიღებული შემოსავლების რეალური მოცულობის დადგენა ან/და საქართველოს კანონმდებლობის დარღვევის ფაქტების გამოვლენა და შესაბამისი ღონისძიებების განხორციელება.

2. საგადასახადო ორგანოს უფლება აქვს განახორციელოს გადასახადის გადამხდელისაგან საქონლის/მომსახურების საკონტროლო შესყიდვა ან/და დაადგინოს საქონლის/მომსახურების ფასი საკონტროლო შესყიდვის შეთავაზებით (მისი გასაღების ან მოხმარების მიზნის გარეშე).

3. საგადასახადო ორგანოს უფლებამოსილი პირი გადასახადის გადამხდელისაგან საქონლის/მომსახურების საკონტროლო შესყიდვის ან/და საკონტროლო შესყიდვის შეთავაზების პროცედურის განხორციელებისას გამოდის, როგორც ფსევდომომხმარებელი, და ამ მიზნით, საქართველოს ფინანსთა მინისტრის მიერ დამტკიცებული წესის შესაბამისად, საქართველოს ფინანსთა სამინისტროს შემოსავლების სამსახურის უფროსის/მოადგილის ან რეგიონული ცენტრის (საგადასახადო ორგანოს) უფროსის გადაწყვეტილებით შესაძლებელია საგადასახადო ორგანოს უფლებამოსილ პირზე გადასახადის გადამხდელის ან/და დღგ-ის გადამხდელის ფსევდომოწმობების გაცემა.

4. საგადასახადო ორგანოს უფლება აქვს გადასახადის გადამხდელისაგან საქონლის/მომსახურების საკონტროლო შესყიდვის ან/და საკონტროლო შესყიდვის შეთავაზების პროცედურის განხორციელებისას გამოიყენოს პროცედურის დაფიქსირების ტექნიკური საშუალებები.

5. თუ საკონტროლო შესყიდვით შესყიდული საქონელი არ ტოვებს სავაჭრო ობიექტის ტერიტორიას და მისი სახე და შეფუთვა არ დაზიანებულა, მაშინ საკონტროლო შესყიდვის ოქმის საფუძველზე ოპერაცია ექვემდებარება გაუქმებას (შესყიდული საქონელი უბრუნდება გამყიდველს, ხოლო გადახდილი ფული - მყიდველს).

6. ამ მუხლის მე-5 ნაწილით გათვალისწინებული ვალდებულების შეუსრულებლობა გამოიწვევს გადასახადის გადამხდელის დაჯარიმებას. ამასთანავე, გადასახადის გადამხდელის მიერ დაუბრუნებელი თანხის ამოღების მიზნით აღნიშნული გადამხდელის მიმართ ხორციელდება ამ კოდექსის XI თავით გათვალისწინებული საგადასახადო ვალდებულების შესრულების უზრუნველყოფის ღონისძიებები საკონტროლო შესყიდვის მოცულობით.“.

32. 110-ე მუხლი ჩამოყალიბდეს შემდეგი რედაქციით:

„მუხლი 110. ინვენტარიზაცია

1. საგადასახადო ორგანოს უფროსს უფლება აქვს სასამართლოს გადაწყვეტილების გარეშე გამოსცეს აქციზური საქონლის მფლობელი პირის სასაქონლო-მატერიალური ფასეულობის ინვენტარიზაციის ჩატარების ბრძანება (საგადასახადო ორგანოს უფროსს უფლება აქვს არააქციზური საქონლის მფლობელი პირის სასაქონლო-მატერიალური ფასეულობის ინვენტარიზაციის ჩატარების ბრძანება გამოსცეს კალენდარული წლის განმავლობაში არა უმეტეს 2-ჯერ, ხოლო მე-3-ჯერ ინვენტარიზაცია შესაძლებელია ჩატარდეს საქართველოს ფინანსთა სამინისტროს შემოსავლების სამსახურის უფროსის/მოადგილის ბრძანებით). გადასახადის გადამხდელის ხელმძღვანელმა (დირექტორმა) ინვენტარიზაციის გონივრულ ვადაში ჩატარების მიზნით, ბრძანების ჩაბარებიდან 2 სამუშაო დღის ვადაში უნდა შექმნას საინვენტარიზაციო კომისია. საინვენტარიზაციო კომისიაში შეყვანილი უნდა იქნენ ის პირები, რომლებიც კარგად იცნობენ საინვენტარიზაციო ქონებას, იციან მისი ფასი და პირველადი აღრიცხვა, აგრეთვე საგადასახადო ორგანოს მოთხოვნის შემთხვევაში საგადასახადო ორგანოს თანამშრომლები ან/და მის მიერ მოწვეული სპეციალისტები. საინვენტარიზაციო კომისია ვალდებულია სრულად და დროულად აღრიცხოს სასაქონლო-მატერიალური ფასეულობები წარმოებისა და შენახვის ადგილზე, შეუდაროს აღრიცხვის შედეგები ბუღალტრული აღრიცხვის შესაბამის მონაცემებს და ყოველივე ეს შეიტანოს სასაქონლო - მატერიალური ფასეულობების აღწერის ოქმში.

2. საგადასახადო ორგანოს უფროსს უფლება აქვს ინვენტარიზაციის ჩატარების ბრძანებით თავად შექმნას საინვენტარიზაციო კომისია და განსაზღვროს მისი შემადგენლობა, აგრეთვე, აუცილებლობის შემთხვევაში, მათ შორის, ამ მუხლის პირველი ნაწილით დადგენილ ვადაში საინვენტარიზაციო კომისიის შექმნის თაობაზე გადასახადის გადამხდელის ხელმძღვანელის (დირექტორის) მიერ ბრძანების გამოუცემლობისას, გამოსცეს საინვენტარიზაციო კომისიის შექმნის ბრძანება. ამ ნაწილის შესაბამისად საინვენტარიზაციო კომისიის შემადგენლობის განსაზღვრისას გათვალისწინებული უნდა იქნეს მასში გადამხდელის წარმომადგენლის/წარმომადგენლების შეყვანა.“.

33. 110¹ მუხლი ჩამოყალიბდეს შემდეგი რედაქციით:

მუხლი 110¹. საკონტროლო-სალარო აპარატების გამოყენების წესების დაცვის კონტროლი. საგადასახადო ორგანოს უფლებამოსილ პირებს უფლება აქვთ სასამართლოს გადაწყვეტილების გარეშე, საქართველოს ფინანსთა მინისტრის მიერ დადგენილი წესით განახორციელონ საგადასახადო ორგანოს სამოქმედო ტერიტორიაზე არსებულ ადმინისტრაციულ-ტერიტორიულ ფარგლებში საკონტროლო-სალარო აპარატების გამოყენების წესების დაცვის კონტროლი.“.

34. 113-ე მუხლის:

ა) მე-9 ნაწილი ჩამოყალიბდეს შემდეგი რედაქციით:

„9. საგადასახადო შემოწმების ჯგუფი ვალდებულია გადასახადის გადამხდელს წარუდგინოს აღნიშნული ჯგუფის წევრთა პირადობის დამადასტურებელი მოწმობები, საგადასახადო ორგანოს უფროსის/მოადგილის ბრძანება საგადასახადო შემოწმების ჯგუფის შექმნის შესახებ, შემოწმების პროგრამა და გადასახადის გადამხდელის უფლებათა განმარტებითი ბარათი. გადასახადის გადამხდელს აგრეთვე უნდა წარედგინოს: საკონტროლო გასვლითი საგადასახადო შემოწმებისას (გარდა ამ კოდექსის 99-ე მუხლის მე-2 ნაწილის „ე“ და „ვ“ ქვეპუნქტებით გათვალისწინებული შემთხვევებისა) - მოსამართლის ბრძანება საკონტროლო გასვლითი საგადასახადო შემოწმების დანიშვნის შესახებ, ხოლო გეგმური გასვლითი საგადასახადო შემოწმებისას და ამ კოდექსის 99-ე მუხლის მე-2 ნაწილის „ე“ და „ვ“ ქვეპუნქტებით გათვალისწინებული საკონტროლო გასვლითი საგადასახადო შემოწმებისას - საგადასახადო ორგანოს უფროსის/მოადგილის ბრძანება შესაბამისი გასვლითი საგადასახადო შემოწმების დანიშვნის შესახებ.“;

ბ) მე-11 ნაწილის შემდეგ დაემატოს შემდეგი შინაარსის მე-12 ნაწილი:

„12. თუ დაწყებული საგადასახადო შემოწმების გაგრძელება ვერ ხერხდება დაუძლეველი ძალის, ექსპერტის დასკვნის ან სხვა ხელის შემშლელი გარემოების გამო, საგადასახადო ორგანოს უფროსი/მოადგილე იღებს მოტივირებულ გადაწყვეტილებას საგადასახადო შემოწმების შეჩერების შესახებ. საგადასახადო შემოწმების ვადის დინება შეჩერდება საგადასახადო შემოწმების შეჩერებით. ვადის დინების შეჩერება დაიწყება იმ გარემოების წარმოშობის დღიდან, რომელიც გახდა საგადასახადო შემოწმების შეჩერების საფუძველი. საგადასახადო ორგანოს უფროსის/მოადგილის გადაწყვეტილებით საგადასახადო შემოწმება განახლდება დაუძლეველი ძალის ან სხვა ხელის შემშლელი გარემოების აღმოფხვრისთანავე, რომელიც გახდა საგადასახადო შემოწმების შეჩერების საფუძველი. საგადასახადო შემოწმების ვადის დინება განახლდება აღნიშნული შემოწმების გაგრძელების დღიდან. საგადასახადო შემოწმების შეჩერებისა და განახლების ბრძანება ეგზავნება გადამხდელს.“.

35. 116-ე მუხლის პირველი ნაწილი ჩამოყალიბდეს შემდეგი რედაქციით:

„1. საჭიროების შემთხვევაში, ადმინისტრირების ღონისძიებათა გატარების დროს შეიძლება დაინიშნოს ექსპერტიზა.“.

36. 119-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. საგადასახადო სამართალდარღვევის გამოვლენისას (გარდა საგადასახადო შემოწმებისას გამოვლენილი სამართალდარღვევებისა) და ამ კოდექსით გათვალისწინებულ შემთხვევებში, საგადასახადო ორგანოში ან სამართალდარღვევის აღმოჩენის ადგილზე საგადასახადო ორგანოს უფლებამოსილი პირი ადგენს საგადასახადო სამართალდარღვევის ოქმს სახელმწიფო ენაზე.“;

ბ) მე-4 ნაწილი ჩამოყალიბდეს შემდეგი რედაქციით:

„4. ოქმს ხელს აწერენ საგადასახადო ორგანოს უფლებამოსილი პირი და გადასახადის გადამხდელი ან მისი წარმომადგენელი (მათი ადგილზე ყოფნის შემთხვევაში), აგრეთვე მოწვეული სპეციალისტი ან სხვა პირი, თუ ისინი მონაწილეობენ საგადასახადო კონტროლის პროცედურებში. გადასახადის გადამხდელის ან მისი წარმომადგენლის მიერ ოქმის ხელმოწერაზე უარის თქმის ან მათი ადგილზე არყოფნის შემთხვევაში ოქმში კეთდება შესაბამისი ჩანაწერი.“.

37. 120-ე მუხლის პირველი ნაწილის „ი“ ქვეპუნქტი ჩამოყალიბდეს შემდეგი რედაქციით:

„ი) შემოწმების შედეგების შემოწმების პროგრამის თითოეული პუნქტის მიხედვით - გადასახადის გადამხდელის მიმართ მოთხოვნებისა და ვალდებულებების წარმოშობის ზუსტი თარიღები (თუ მათი დადგენა შესაძლებელია), გადასახადის ოდენობა და ჯარიმების გაანგარიშება, ჯამურად გადასახდელი ან მისაღები თანხა, იმ დოკუმენტების რეკვიზიტები (საჭიროების შემთხვევაში - ასლები), რომლებითაც დასტურდება ამ მოთხოვნებისა და ვალდებულებების წარმოშობა, აქტის დანართების შინაარსი;“.

38. 122-ე მუხლის მე-2 ნაწილს დაემატოს შემდეგი შინაარსის „ვ“ ქვეპუნქტი:

„ვ) საქართველოს ეკონომიკური განვითარების სამინისტროს სახელმწიფო საქვეუწყებო დაწესებულებას - სტატისტიკის დეპარტამენტს - საქართველოს ფინანსთა და ეკონომიკური განვითარების მინისტრების ერთობლივი ბრძანების შესაბამისად.“.

39. 123-ე მუხლი ჩამოყალიბდეს შემდეგი რედაქციით:

„მუხლი 123. საგადასახადო სამართალდარღვევის ცნება საგადასახადო სამართალდარღვევად ითვლება პირის მართლსაწინააღმდეგო ქმედება (მოქმედება ან უმოქმედობა), რომლისთვისაც ამ კოდექსით გათვალისწინებულია პასუხისმგებლობა.“.

40. 124-ე მუხლს დაემატოს შემდეგი შინაარსის 2¹ ნაწილი:

„2¹. საგადასახადო დეკლარაციის/გაანგარიშების მიხედვით არასწორად ნაჩვენები ინფორმაციის გამო ამ კარით გათვალისწინებული ჯარიმა არ დაეკისრება პირს, რომელმაც საგადასახადო ორგანოს წარუდგინა შესწორებული საგადასახადო დეკლარაცია/გაანგარიშება საგადასახადო შემოწმების ჩატარების შესახებ სასამართლოს ან საგადასახადო ორგანოს შესაბამისი გადაწყვეტილების/შეტყობინების ჩაბარებამდე ან საგადასახადო სამართალდარღვევის ოქმის შედგენამდე.“.

41. 125-ე მუხლი ჩამოყალიბდეს შემდეგი რედაქციით:

„მუხლი 125. საგადასახადო სამართალდარღვევისათვის პასუხისმგებლობის ზოგადი პრინციპები

1. საგადასახადო სამართალდარღვევისათვის პირს შეიძლება დაეკისროს პასუხისმგებლობა მხოლოდ ამ კოდექსით დადგენილი საფუძვლით და წესით.

2. პირს არ შეიძლება განმეორებით დაეკისროს პასუხისმგებლობა ერთი და იმავე საგადასახადო სამართალდარღვევისათვის.

3. საგადასახადო სამართალდარღვევისათვის საწარმოს/ორგანიზაციის მიმართ საგადასახადო სანქციის გამოყენება შესაბამისი საფუძვლების არსებობისას არ ათავისუფლებს მის თანამდებობის პირებს საქართველოს კანონმდებლობით გათვალისწინებული ადმინისტრაციული, სისხლისსამართლებრივი ან სხვა სახის პასუხისმგებლობისაგან.

4. საგადასახადო სამართალდარღვევისათვის პირის მიმართ საგადასახადო სანქციის გამოყენება არ ათავისუფლებს მას კუთვნილი გადასახადების გადახდის ვალდებულებისაგან.

5. საგადასახადო სამართალდარღვევისათვის სანქციის შეფარდების დროს, თუ კანონით გაუქმებულია ან შემსუბუქებულია პასუხისმგებლობა ასეთი სამართალდარღვევის ჩადენისათვის, მოქმედებს ახალი კანონით დადგენილი ნორმა, ხოლო თუ შემოღებულია ან დამძიმებულია პასუხისმგებლობა - გამოიყენება სამართალდარღვევის ჩადენის მომენტისათვის არსებული ნორმა.

6. ამ კარით დადგენილი პასუხისმგებლობა არ დაეკისრება პირს, თუ საგადასახადო სამართალდარღვევა გამოწვეულია დაუძლეველი ძალის პირობების მოქმედების შედეგად.

7. დაუძლეველი ძალის პირობებად ითვლება ისეთი საგანგებო ან განსაკუთრებული გარემოებები, რომლებიც შეუძლებელს ხდის ამ კოდექსით დადგენილ ვალდებულებათა შესრულებას და რომელთა დადგომა არ არის დამოკიდებული პირის ნებაზე, მათ შორის:

ა) სტიქიური უბედურებები (მიწისძვრა, წყალდიდობა, მეწყერი, ზვავი, ხანძარი და სხვა);

ბ) საგარეო ვაჭრობის შეზღუდვა, საგანგებო/საომარი მდგომარეობის გამოცხადება, აგრეთვე სახელმწიფო ორგანოების სხვა გადაწყვეტილებები;

გ) მასობრივი არეულობა, გაფიცვა.“.

42. 126-ე მუხლის მე-3 ნაწილი ჩამოყალიბდეს შემდეგი რედაქციით:

„3. რამდენიმე საგადასახადო სამართალდარღვევის გამოვლენისას საგადასახადო სანქცია გამოიყენება თითოეული სამართალდარღვევისათვის ცალ-ცალკე. ამასთანავე, უფრო მკაცრი სანქცია არ შთანთქავს ნაკლებად მკაცრ სანქციას.“.

43. 127-ე მუხლი ჩამოყალიბდეს შემდეგი რედაქციით:

„მუხლი 127. საგადასახადო სამართალდარღვევის საქმის წარმოება

1. საგადასახადო სამართალდარღვევათა საქმეებს აწარმოებენ, განიხილავენ და შესაბამის გადაწყვეტილებებს იღებენ საგადასახადო ორგანოები თავიანთი კომპეტენციის ფარგლებში.

2. საგადასახადო სამართალდარღვევის გამოვლენისას დგება საგადასახადო სამართალდარღვევის ოქმი.

3. საგადასახადო სამართალდარღვევის ოქმში აღინიშნება:

ა) ოქმის დასახელება;

ბ) ოქმის შედგენის თარიღი, დრო და ადგილი;

გ) ოქმის შემდგენი პირის (პირების) თანამდებობა, სახელი და გვარი;

დ) სამართალდამრღვევი პირის დასახელება, საიდენტიფიკაციო ნომერი (მისი არსებობის შემთხვევაში), ან სახელი და გვარი, პირადი ნომერი);

ე) საგადასახადო სამართალდარღვევის შინაარსი.

4. თუ ჯარიმის დარიცხვისათვის საჭიროა გაანგარიშება, საგადასახადო სამართალდარღვევის ოქმის შემდგენი პირი ადგენს ცნობას ჯარიმის თანხის გამოანგარიშების თაობაზე, რომელიც ოქმის განუყოფელი ნაწილია.

5. საგადასახადო სამართალდარღვევის ოქმი გასაცნობად წარედგინება სამართალდამრღვევ პირს. მას უფლება აქვს წარმოადგინოს განმარტებები და შენიშვნები, რომლებიც აისახება ოქმში ან დაერთვება მას.

6. საგადასახადო სამართალდარღვევის ოქმს ხელს აწერენ: საგადასახადო ორგანოს უფლებამოსილი პირი, სამართალდამრღვევი პირი ან მისი წარმომადგენელი, აგრეთვე მოწმეები მათი არსებობის შემთხვევაში.

7. თუ სამართალდამრღვევი პირი ხელს არ აწერს საგადასახადო სამართალდარღვევის ოქმს, ოქმში კეთდება შესაბამისი ჩანაწერი.

8. საგადასახადო სამართალდარღვევის ოქმის ერთი ეგზემპლარი ბარდება სამართალდამრღვევ პირს.

9. საგადასახადო შემოწმებისას გამოვლენილი საგადასახადო სამართალდარღვევა ფიქსირდება საგადასახადო შემოწმების აქტში (ამ შემთხვევაში არ დგება საგადასახადო სამართალდარღვევის ოქმი).

10. საგადასახადო სამართალდარღვევის საქმეზე საგადასახადო ორგანოს უფლებამოსილი პირი ადგენს:

ა) განეკუთვნება თუ არა საქმე შესაბამისი საგადასახადო ორგანოს კომპეტენციას;

ბ) გამოთხოვილია ან/და მიღებულია თუ არა პირისაგან დამატებითი დოკუმენტები;

გ) შედგენილია თუ არა საგადასახადო სამართალდარღვევის ოქმი ამ მუხლის მოთხოვნების შესაბამისად;

დ) ჩადენილია თუ არა პირის მიერ საგადასახადო სამართალდარღვევა;

ე) ექვემდებარება თუ არა პირი ამ კოდექსით გათვალისწინებულ პასუხისმგებლობას.

11. თუ საგადასახადო სამართალდარღვევის ოქმში არ ფიქსირდება ამ მუხლის მე-3 ნაწილით გათვალისწინებული რომელიმე მონაცემი ან ოქმი შედგენილია კანონის დარღვევით, საგადასახადო ორგანოს უფლებამოსილი თანამდებობის პირი გამოსცემს ბრძანებას საგადასახადო სამართალდარღვევის საქმის შეწყვეტის შესახებ. ამ შემთხვევაში პირს სანქცია არ დაეკისრება.

12. საგადასახადო სამართალდარღვევის ოქმის შედგენიდან არა უგვიანეს 30 კალენდარული დღისა საგადასახადო ორგანოს უფლებამოსილი თანამდებობის პირი საგადასახადო სამართალდარღვევის საქმეზე გამოსცემს ბრძანებას, რომელიც დადგენილი წესით უნდა ჩაბარდეს ადრესატს. საგადასახადო სამართალდარღვევის ოქმის შედგენიდან 30 კალენდარული დღის გასვლის შემდეგ გამოცემული ბრძანება ბათილია.

13. საგადასახადო სამართალდარღვევათა საქმეების წარმოების, განხილვისა და შესაბამისი გადაწყვეტილებების მიღების წესებს განსაზღვრავს საქართველოს ფინანსთა მინისტრი.“.

44. 129-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. თუ გადასახადის თანხა არ არის გადახდილი საგადასახადო კანონმდებლობით დადგენილ ვადაში, პირი ვალდებულია გადაიხადოს შესაბამისი საურავი.“;

ბ) მე-4 და მე-5 ნაწილები ჩამოყალიბდეს შემდეგი რედაქციით:

„4. პირის გადახდისუუნარობის შესახებ განცხადების წარმოებაში მიღების თაობაზე სასამართლო გადაწყვეტილების, აგრეთვე გაკოტრების საქმის წარმოების დაწყების, რეაბილიტაციის შესახებ გადაწყვეტილების/განჩინების კანონიერ ძალაში შესვლიდან ან საქართველოს საფინანსო ზედამხედველობის სააგენტოს მიერ კომერციული ბანკისათვის საქმიანობის ლიცენზიის ჩამორთმევიდან შესაბამისი რეჟიმის დასრულებამდე, აღნიშნული რეჟიმების დაწყებამდე არსებულ ვადაგადაცილებულ საგადასახადო დავალიანებებს საურავი არ დაერიცხება.

5. საურავი შეადგენს საგადასახადო დავალიანების 0,07 პროცენტს ყოველი ვადაგადაცილებული კალენდარული დღისათვის. გადასახადის გადახდის ვადის გადაცილების შემთხვევაში გადასახადის გადახდის დღე ითვლება ვადაგადაცილებულ დღედ.“;

გ) მე-5 ნაწილის შემდეგ დაემატოს შემდეგი შინაარსის მე-6 ნაწილი:

„6. ამ კოდექსის მე-80 მუხლის მე-4 ნაწილის „ა“ ქვეპუნქტით გათვალისწინებულ შემთხვევებში, თუ პირს „საგადასახადო მოთხოვნა“ ჩაბარდა გადასახადის გადახდის ვადის დადგომის შემდეგ, საურავის დარიცხვა განხორციელდება „საგადასახადო მოთხოვნის“ ჩაბარების დღის შემდეგ მე-15 კალენდარული დღიდან.“.

45. 130-ე- 138-ე მუხლები ჩამოყალიბდეს შემდეგი რედაქციით:

„მუხლი 130. საგადასახადო ორგანოში გადასახადის გადამხდელად აღრიცხვის წესის დარღვევა

პირის მიერ საგადასახადო ორგანოში გადასახადის გადამხდელად აღრიცხვის საქართველოს კანონმდებლობით დადგენილი წესის დარღვევა, -

იწვევს პირის დაჯარიმებას 200 ლარის ოდენობით.

მუხლი 131. საგადასახადო დეკლარაციის/გაანგარიშების წარდგენის ვადის დარღვევა

1. პირის მიერ საგადასახადო ორგანოში საგადასახადო დეკლარაციის/გაანგარიშების წარდგენისათვის საქართველოს საგადასახადო კანონმდებლობით დადგენილი ვადის დარღვევა, -

იწვევს პირის დაჯარიმებას ამ დეკლარაციის/გაანგარიშების საფუძველზე გადასახდელად დასარიცხი გადასახადის თანხის 5 პროცენტის ოდენობით ყოველ დაგვიანებულ სრულ (არასრულ) თვეზე. ამასთანავე, მთელ დაგვიანებულ პერიოდზე გამოანგარიშებული სანქციის ჯამური თანხა არ უნდა აღემატებოდეს გადასახდელად დასარიცხი გადასახადის თანხის 60 პროცენტს.

2. ამ მუხლის პირველი ნაწილის მიხედვით გამოანგარიშებული სანქციის ჯამური თანხა არ უნდა იყოს 200 ლარზე ნაკლები.

3. თუ საგადასახადო დეკლარაციის/გაანგარიშების საფუძველზე გადასახდელად დასარიცხი გადასახადის თანხა ნულის ტოლია, პირს ამ მუხლით გათვალისწინებული ჯარიმა არ დაეკისრება.

მუხლი 132. საგადასახადო დეკლარაციაში/გაანგარიშებაში გადასახადის შემცირება

1. პირის მიერ საგადასახადო დეკლარაციაში/გაანგარიშებაში გადასახადის თანხის 50 პროცენტამდე შემცირება, -

იწვევს პირის დაჯარიმებას შემცირებული გადასახადის თანხის 50 პროცენტის ოდენობით.

2. პირის მიერ საგადასახადო დეკლარაციაში/გაანგარიშებაში გადასახადის თანხის 50 პროცენტით ან მეტი ოდენობით შემცირება, -

იწვევს პირის დაჯარიმებას შემცირებული გადასახადის თანხის 75 პროცენტის ოდენობით.

3. პირის მიერ საგადასახადო დეკლარაციაში/გაანგარიშებაში გადასახადის თანხის 25 000 ლარზე მეტით შემცირება განიხილება გადასახადისაგან დიდი ოდენობით თავის არიდებად და იწვევს პასუხისმგებლობას საქართველოს სისხლის სამართლის კანონმდებლობის შესაბამისად.

მუხლი 133. სათამაშო ბიზნესის საქმიანობის წესების დარღვევა

პირის საქმიანობა სათამაშო ბიზნესის მოსაკრებლის გადახდის ნიშნის გარეშე ან სათამაშო ბიზნესის მოსაკრებლის გადახდის ობიექტის დალუქვის გარეშე, თუ ასეთი ვალდებულება დადგენილია კანონით, -

იწვევს პირის დაჯარიმებას ამ ობიექტის მიხედვით კუთვნილი გადასახდელი თანხის 100 პროცენტის ოდენობით, მაგრამ არანაკლებ 1000 ლარისა.

მუხლი 134. გადახდის წყაროსთან გადასახადის თანხის დაუკავებლობა

საგადასახადო აგენტის მიერ გადახდის წყაროსთან გადასახადის თანხის დაუკავებლობა ან/და დაკავებული გადასახადის თანხის ბიუჯეტში არასრულად გადახდა, -

იწვევს საგადასახადო აგენტის დაჯარიმებას დაუკავებელი/გადასახდელი გადასახადის თანხის 10 პროცენტის ოდენობით.

მუხლი 135. საგადასახადო ორგანოს უფლებამოსილი პირისათვის წინააღმდეგობის გაწევა

1. პირის გადასახადის გადამხდელის საქმიანობაზე დაკვირვებისას საგადასახადო ორგანოს უფლებამოსილი პირისათვის წინააღმდეგობის გაწევა, -

იწვევს პირის დაჯარიმებას 200 ლარის ოდენობით.

2. ამ მუხლის პირველი ნაწილით განსაზღვრული ქმედება, ჩადენილი განმეორებით საგადასახადო სამართალდარღვევის გამოვლენიდან 12 თვის განმავლობაში, -

იწვევს პირის დაჯარიმებას ყოველ შემდგომ განმეორებაზე 1000 ლარის ოდენობით.

მუხლი 136. ყადაღადადებული ქონების მფლობელობის, სარგებლობის ან/და განკარგვის წესის დარღვევა პირის მიერ ყადაღადადებული ქონების მფლობელობის, სარგებლობის ან/და განკარგვის ამ კოდექსით დადგენილი წესის დარღვევა, -

იწვევს პირის დაჯარიმებას 3 000 ლარის ოდენობით.

მუხლი 137. საგადასახადო ორგანოსათვის ინფორმაციის წარუდგენლობა

1. საგადასახადო ორგანოს მიერ ამ კოდექსით დადგენილი წესით მოთხოვნის შემთხვევაში სააღრიცხვო დოკუმენტაციის ან/და დაბეგვრასთან დაკავშირებული ინფორმაციის, აგრეთვე ქონების ნუსხის მითითებულ ვადაში წარუდგენლობა, -

იწვევს პირის დაჯარიმებას 200 ლარის ოდენობით.

2. ამ მუხლის პირველი ნაწილით განსაზღვრული ქმედება, ჩადენილი განმეორებით საგადასახადო სამართალდარღვევის გამოვლენიდან 12 თვის განმავლობაში, -

იწვევს პირის დაჯარიმებას ყოველ შემდგომ განმეორებაზე 1000 ლარის ოდენობით.

მუხლი 138. გადასახადის უკანონო ჩათვლა უსაქონლო ოპერაციის ან ფიქტიური გარიგების შედეგად პირის მიერ შესაბამისი საგადასახადო ანაგარიშ-ფაქტურით ან ყალბი საგადასახადო ანაგარიშ-ფაქტურით/საბაჟო დოკუმენტით ჩათვლის განხორციელება, -

იწვევს პირის დაჯარიმებას ჩათვლილი გადასახადის თანხის 200 პროცენტის ოდენობით.“.

46. 140-ე მუხლი ჩამოყალიბდეს შემდეგი რედაქციით:

„მუხლი 140. დღგ-ისათვის გათვალისწინებული მოთხოვნების დარღვევა

1. დღგ-ის გადამხდელად რეგისტრაციის გარეშე საქმიანობა, -

იწვევს პირის დაჯარიმებას რეგისტრაციის გარეშე საქმიანობის პერიოდში ბიუჯეტში გადასახდელი დღგ-ის თანხის 100 პროცენტის ოდენობით.

2. პირის მიერ დღგ-ის საგადასახადო ანგარიშ-ფაქტურის შევსების დადგენილი წესის დარღვევა, რამაც გამოიწვია დღგ-ის თანხის შემცირება ან ჩასათვლელი დღგ-ის თანხის გაზრდა, -

იწვევს პირის დაჯარიმებას შემცირებული ან ჩასათვლელად გაზრდილი დღგ-ის თანხის 100 პროცენტის ოდენობით.

3. საქონლის/მომსახურების მიმწოდებლის მიერ მყიდველის მოთხოვნისას მასზე საგადასახადო ანგარიშ-ფაქტურის გაუცემლობა, -

იწვევს პირის დაჯარიმებას დღგ-ით დასაბეგრი ოპერაციის მიხედვით დღგ-ის თანხის 100 პროცენტის ოდენობით.

4. საგადასახადო ანგარიშ- ფაქტურის არასრული შევსება (გარდა ამ მუხლის მე-2 და მე-5 ნაწილებით გათვალისწინებული შემთხვევებისა), თუ შესაბამის ველში ჩასაწერი ინფორმაცია არსებობს, -

იწვევს პირის დაჯარიმებას 200 ლარის ოდენობით.

5. ამ მუხლის მე-2 ნაწილით გათვალისწინებული ქმედება, თუ ამას საფუძვლად უდევს ფიქტიური გარიგება/უსაქონლო ოპერაცია ან ყალბი საგადასახადო ანგარიშ-ფაქტურა, - იწვევს საგადასახადო ანგარიშ-ფაქტურის გამომწერი/გამცემი პირის დაჯარიმებას საგადასახადო ანგარიშ-ფაქტურაში მითითებული დღგ-ის თანხის 200 პროცენტის ოდენობით.“.

47. 142¹ მუხლი ჩამოყალიბდეს შემდეგი რედაქციით:

„მუხლი 142¹. საერთაშორისო ფინანსური კომპანიის მიერ საქართველოში არსებული წყაროდან ფინანსური ოპერაციების განხორციელების ან/და ფინანსური მომსახურების გაწევის შედეგად მიღებული შემოსავლის ნებადართული ნორმის გადამეტება.

საერთაშორისო ფინანსური კომპანიის მიერ საქართველოში არსებული წყაროდან ფინანსური ოპერაციების განხორციელების ან/და ფინანსური მომსახურების გაწევის შედეგად მიღებული შემოსავლის გადამეტება ერთობლივი შემოსავლის 10 პროცენტზე, -

იწვევს დაჯარიმებას გადამეტებული თანხის 100 პროცენტის ოდენობით.“.

48. კოდექსს დაემატოს შემდეგი შინაარსის 142² მუხლი:

„მუხლი 142². ფასიანი ქაღალდების ემიტენტის მიერ საფონდო ბირჟისათვის არასწორი ინფორმაციის მიწოდება

ფასიანი ქაღალდების ემიტენტის მიერ ამ კოდექსის 168-ე, 172-ე, 195-ე და 196-ე მუხლების დებულებების გათვალისწინებით საფონდო ბირჟისათვის არასწორი ინფორმაციის მიწოდება იწვევს ემიტენტის დაჯარიმებას არასწორი ინფორმაციის საფუძველზე პირის მიერ ამ კოდექსის 168-ე, 172-ე, 195-ე და 196-ე მუხლების დებულებების გამოყენებით მიღებული საგადასახადო შეღავათის თანხის 150 პროცენტის ოდენობით.“.

49. 143-ე მუხლი ჩამოყალიბდეს შემდეგი რედაქციით:

„მუხლი 143. დოკუმენტების გარეშე საქონლის ტრანსპორტირება და აღურიცხველობა

1. ეკონომიკური საქმიანობისათვის საქონლის (გარდა სოფლის მეურნეობის პირველადი (სამრეწველო გადამუშავებამდე - სასაქონლო კოდის შეცვლამდე) პროდუქციისა, აგრეთვე რეგულარული ან უწყვეტი წესით მიწოდებული საქონლისა (ელექტრო - ან თბოენერგია, გაზი, წყალი)) სასაქონლო ზედნადების (შესაბამის შემთხვევებში - გამარტივებული ზედნადების) გარეშე ტრანსპორტირებისას, ხოლო საქართველოს საბაჟო ტერიტორიაზე საქონლის შემოტანისას - საქართველოს საბაჟო კანონმდებლობით გათვალისწინებული დოკუმენტების გარეშე ტრანსპორტირებისას, პირი ჯარიმდება შესაბამისად სასაქონლო ზედნადების გარეშე ტრანსპორტირებული ან საქართველოს საბაჟო ტერიტორიაზე იმპორტირებული საქონლის საბაზრო ღირებულებით დღგ-ის გარეშე (ხოლო აქციზური საქონლის შემთხვევაში - აქციზისა და დღგ-ის გარეშე). ამასთანავე, საგადასახადო ორგანოებს უფლება აქვთ სასამართლოს გადაწყვეტილების გარეშე ყადაღა დაადონ აღნიშნულ საქონელს. ამ მუხლით გათვალისწინებული ყადაღის დადების წესი და პირობები განისაზღვრება საქართველოს ფინანსთა მინისტრის ბრძანებით.

2. სამეურნეო ოპერაციის დასრულებიდან არა უგვიანეს 30 კალენდარული დღისა ბუღალტრულ ჩანაწერებში აღურიცხველი ან/და სასაქონლო ზედნადების გარეშე საქონლის, ხოლო სხვა ქვეყნიდან საქართველოს საბაჟო ტერიტორიაზე შემოტანისას - საქართველოს საბაჟო კანონმდებლობით გათვალისწინებული დოკუმენტების გარეშე საქონლის გამოვლენის შემთხვევაში, პირს გადახდება ბუღალტრულ ჩანაწერებში აღურიცხველი ან/და სასაქონლო ზედნადების გარეშე ან საქართველოს საბაჟო კანონმდებლობით გათვალისწინებული დოკუმენტების გარეშე გამოვლენილი საქონლის საბაზრო ღირებულებით დღგ-ის გარეშე (ხოლო აქციზური საქონლის შემთხვევაში - აქციზისა და დღგ-ის გარეშე). აღნიშნული სანქცია არ გამოიყენება იმ შემთხვევაში, თუ ბუღალტრულ ჩანაწერებში აღურიცხველ საქონელზე არსებობს საქართველოს საბაჟო კანონმდებლობით გათვალისწინებული დოკუმენტები ან საგადასახადო ანგარიშ - ფაქტურა.

3. ამ მუხლის პირველი და მე-2 ნაწილებით გათვალისწინებული სანქციები გამოიყენება იმ შემთხვევაშიც, თუ სასაქონლო ზედნადებში არ არის მითითებული:

ა) დოკუმენტის შედგენის თარიღი და ნომერი;

ბ) სამეურნეო ოპერაციის მონაწილე მხარეთა დასახელება, საიდენტიფიკაციო ნომერი (მისი არსებობის შემთხვევაში), ან სახელი და გვარი, პირადი ნომერი;

გ) საქონლის დასახელება და რაოდენობა.

4. საქონლის დანაკლისი განიხილება მისი აღმოჩენის მომენტში საბაზრო ფასებით (აქციზისა და დღგ-ის გარეშე) განხორციელებულ მიწოდებად და გადასახადებით დაიბეგრება ამ კოდექსით დადგენილი წესით.”.

50. 146-ე მუხლის:

ა) მე-3 და მე-4 ნაწილები ჩამოყალიბდეს შემდეგი რედაქციით:

„3. თუ პირმა დავის გადაწყვეტის ფორმად აირჩია მისი გადაწყვეტა საქართველოს ფინანსთა სამინისტროს სისტემაში განხილვის წესით, მას უფლება აქვს, დავის გადაწყვეტის ნებისმიერ ეტაპზე მიღებული გადაწყვეტილება კანონით დადგენილი წესით გაასაჩივროს სასამართლოში იმავე ვადაში, რომელშიც მას უფლება აქვს, გადაწყვეტილება გაასაჩივროს საქართველოს ფინანსთა სამინისტროს სისტემაში, მიუხედავად იმისა, მითითებულია თუ არა ამის თაობაზე საქართველოს ფინანსთა სამინისტროს სისტემაში შეტანილ საჩივარში.

4. თუ პირი დავას იწყებს ან დავას აგრძელებს სასამართლოში გასაჩივრებით, იგი ვალდებულია ამის თაობაზე წინასწარ აცნობოს საგადასახადო ორგანოს წერილობითი შეტყობინებით.“;

ბ) მე-8 ნაწილი ჩამოყალიბდეს შემდეგი რედაქციით:

„8. პირის საჩივარი მთლიანად ან ნაწილობრივ არ განიხილება, თუ:

ა) არსებობს სასამართლოს გადაწყვეტილება ან განჩინება იმავე დავის საგანზე მოსარჩელის მიერ სარჩელზე უარის თქმის, მოპასუხის მიერ სარჩელის ცნობის ან მხარეთა მორიგების დამტკიცების შესახებ;

ბ) სასამართლოს წარმოებაშია საქმე იმავე მხარეებს შორის დავაზე, იმავე საგანზე და იმავე საფუძვლით;

გ) არსებობს საქართველოს ფინანსთა სამინისტროს შემოსავლების სამსახურის გადაწყვეტილება შემოსავლების სამსახურში იმავე პირის მიმართ იმავე საგანზე საჩივრის არგანხილვის თაობაზე ან საბჭოს გადაწყვეტილება საბჭოზე საჩივრის არგანხილვის შესახებ;

დ) მიმდინარეობს საგადასახადო დავა იმავე საგანზე იმავე პირის საჩივართან დაკავშირებით;

ე) საჩივარი შეიტანა ქმედუუნარო პირმა;

ვ) საჩივარი შეიტანა არაუფლებამოსილმა პირმა;

ზ) არ არსებობს დავის დაწყების ფორმალური საფუძვლები;

თ) გასულია საჩივრის შეტანის კანონით დადგენილი ვადა;

ი) საჩივრის ხარვეზი არ გამოსწორდა ამ კოდექსით დადგენილი წესით;

კ) გასაჩივრებულ „საგადასახადო მოთხოვნაში“ ასახულია აღიარებული გადასახადები და საგადასახადო ვალდებულებები. საჩივარი არ განიხილება ასეთი თანხების ნაწილში.“;

გ) მე-11 ნაწილი ჩამოყალიბდეს შემდეგი რედაქციით:

„11. თუ საჩივარი არ აკმაყოფილებს ამ კოდექსის 147-ე მუხლის მე-3 და მე-4 ნაწილებისა და 149-ე მუხლის (გარდა 149-ე მუხლის პირველი ნაწილის „დ“ ქვეპუნქტისა) მოთხოვნებს, აგრეთვე საჩივარს არ ერთვის გასაჩივრებული „საგადასახადო მოთხოვნა“, საგადასახადო ორგანოს შესაგებელი, წერილობითი შეტყობინება (ასეთის არსებობის შემთხვევაში) ან საგადასახადო/საბაჟო ორგანოს მიერ გამოცემული სხვა ინდივიდუალური ადმინისტრაციულ-სამართლებრივი აქტი, შემოწმების აქტი (ასეთის არსებობის შემთხვევაში) და გასაჩივრებული აქტების მომჩივნისთვის ჩაბარების დამადასტურებელი დოკუმენტი, ან საჩივარი ხელმოუწერელია, მომჩივანს წერილობით მიეთითება მათ შესახებ და ხარვეზების გამოსასწორებლად მიეცემა არანაკლებ 5 კალენდარული დღისა. ამ პერიოდში დავის განხილვა ჩერდება. თუ ხარვეზი აღმოჩნდა დავის განხილვის მიზნით ჩატარებულ სხდომაზე და შესაძლებელია მისი დაუყოვნებლივ გამოსწორება, დავის განმხილველი ორგანოს თანხმობით ხარვეზი შეიძლება გამოსწორდეს სხდომის მიმდინარეობისას.“.

51. 147-ე მუხლის:

ა) მე-2 ნაწილი ჩამოყალიბდეს შემდეგი რედაქციით:

„2. თუ პირი უარს აცხადებს „საგადასახადო მოთხოვნის“ შესრულებაზე ან არ ეთანხმება ამ კოდექსის 145-ე მუხლის მე-2 ნაწილის „გ“ ქვეპუნქტით გათვალისწინებულ ინდივიდუალურ ადმინისტრაციულ-სამართლებრივ აქტს, იგი ვალდებულია, „საგადასახადო მოთხოვნის“/ინდივიდუალური ადმინისტრაციულ-სამართლებრივი აქტის მიღებიდან 20 კალენდარული დღის ვადაში, ამ კოდექსის 44-ე მუხლით დადგენილი წესით საქართველოს ფინანსთა სამინისტროს შემოსავლების სამსახურს ინდივიდუალური ადმინისტრაციულ- სამართლებრივი აქტის გამომცემი საგადასახადო ორგანოს მეშვეობით გაუგზავნოს წერილობითი საჩივარი, თუ დავის გადაწყვეტის ფორმად ირჩევს მის გადაწყვეტას საქართველოს ფინანსთა სამინისტროს სისტემაში განხილვის წესით, ან საგადასახადო ორგანოს გაუგზავნოს წერილობითი შეტყობინება, თუ დავის გადაწყვეტის ფორმად ირჩევს მის გადაწყვეტას სასამართლოს მიერ.“;

ბ) მე-5 და მე-6 ნაწილები ჩამოყალიბდეს შემდეგი რედაქციით:

„5. საგადასახადო დავის დაწყების თარიღად ითვლება:

ა) საგადასახადო ორგანოს მიერ პირისათვის ამ მუხლის პირველ ნაწილში აღნიშნული შესაგებლის გაგზავნის თარიღი, ხოლო შესაგებლის გაუგზავნელობის შემთხვევაში - მისი გაგზავნის ვადის ბოლო დღე;

ბ) პირის მიერ საქართველოს ფინანსთა სამინისტროს შემოსავლების სამსახურისათვის ამ მუხლის მე-2 ნაწილში აღნიშნული საჩივრის ან შეტყობინების გაგზავნის თარიღი.

6. ამ მუხლის მე-2 ნაწილით დადგენილი ვალდებულების შეუსრულებლობა მიიჩნევა პირის მიერ „საგადასახადო მოთხოვნის“ ან ამ კოდექსის 145-ე მუხლის მე-2 ნაწილის „გ“ ქვეპუნქტით გათვალისწინებული ინდივიდუალური ადმინისტრაციულ- სამართლებრივი აქტის აღიარებად, იგი აღსასრულებლად მიიქცევა და „საგადასახადო მოთხოვნასა“ და აღნიშნულ აქტზე ვადისა და ამ მუხლის მე-2 ნაწილით დადგენილი მოთხოვნების დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო.“.

52. 149-ე და 150-ე მუხლები ჩამოყალიბდეს შემდეგი რედაქციით:

„მუხლი 149. პირის საჩივარი და შეტყობინება

1. პირის საჩივარში უნდა აღინიშნოს:

ა) უფლებამოსილი ორგანოს (საქართველოს ფინანსთა სამინისტროს შემოსავლების სამსახურის, საბჭოს) დასახელება;

ბ) პირის ვინაობა (სახელი და გვარი, დასახელება), გადასახადის გადამხდელის საიდენტიფიკაციო ნომერი (ასეთის არსებობის შემთხვევაში), მისამართი და საკონტაქტო საშუალებები (ტელეფონი, ფაქსი, ელექტრონული ფოსტა (ასეთის არსებობის შემთხვევაში));

გ) გასაჩივრებული გადაწყვეტილების („საგადასახადო მოთხოვნის“, შესაგებლის, საგადასახადო ორგანოს უარის) გამომცემი საგადასახადო ორგანოს დასახელება, ამ გადაწყვეტილების მომჩივნისთვის ჩაბარების თარიღი და მოთხოვნის საგანი;

დ) „საგადასახადო მოთხოვნის“ შესრულებაზე უარის სამართლებრივი და ფაქტობრივი საფუძვლები, ხოლო სხვა გადაწყვეტილების შემთხვევაში - მისი გაუქმების სამართლებრივი და ფაქტობრივი საფუძვლები;

ე) მისთვის დართულ მტკიცებულებათა ჩამონათვალი, რომლებიც უნდა ემთხვეოდეს დართულ მტკიცებულებებს.

2. ამ კოდექსის 147-ე მუხლის მე-2 ნაწილში აღნიშნული წერილობით შეტყობინებაში უნდა აღინიშნოს:

ა) საგადასახადო ორგანოს დასახელება;

ბ) პირის ვინაობა (სახელი და გვარი, დასახელება), გადასახადის გადამხდელის საიდენტიფიკაციო ნომერი (ასეთის არსებობის შემთხვევაში), მისამართი და საკონტაქტო საშუალებები (ტელეფონი, ფაქსი, ელექტრონული ფოსტა (ასეთის არსებობის შემთხვევაში));

გ) გასაჩივრებული ადმინისტრაციული აქტის მიღების (ჩაბარების) თარიღი, რაც დასტურდება შესაბამისი მტკიცებულებით, და მოთხოვნის საგანი.

მუხლი 150. „საგადასახადო მოთხოვნის“ შესრულების უზრუნველყოფა

1. პირი თავის მიერ „საგადასახადო მოთხოვნის“ გასაჩივრების შემთხვევაში ვალდებულია, „საგადასახადო მოთხოვნის“ მიღებიდან 20 კალენდარული დღის ვადაში, „საგადასახადო მოთხოვნის“ შესრულების უზრუნველსაყოფად, საგადასახადო ორგანოს წარუდგინოს საბანკო გარანტია ან/და ბანკში სადეპოზიტო ანგარიშზე სათანადო თანხის შეტანის ცნობა (პირს ამ თანხის განკარგვის უფლება არა აქვს ბანკისათვის შესაბამისი საგადასახადო ორგანოს მიერ წერილობითი ნებართვის გაცემის გარეშე) ან/და ფინანსური რისკების დაზღვევის პოლისი ან/და თავისი ქონება საგადასახადო გირავნობით/იპოთეკით დასატვირთად. წარდგენილი უზრუნველყოფის გარანტიების საერთო ღირებულება არ უნდა იყოს გადასახადის გადამხდელის სადავო საგადასახადო დავალიანებაზე ნაკლები. საგადასახადო ორგანო საჯარო რეესტრს რეგისტრაციისათვის უგზავნის საგადასახადო გირავნობის/იპოთეკის შეტყობინებას. საჯარო რეესტრი ვალდებულია, შეტყობინების მიღებიდან არა უგვიანეს მე-2 დღისა რეგისტრაციაში გაატაროს ეს უფლება. აღნიშნული ვალდებულება არ წარმოიშობა, თუ პირის ქონება დატვირთულია საგადასახადო გირავნობით/იპოთეკით და იგი საკმარისია სადავო საგადასახადო ვალდებულების უზრუნველსაყოფად.

2. თუ პირი ამ მუხლის პირველ ნაწილში მითითებულ ვადაში საგადასახადო ორგანოს არ წარუდგენს იმავე ნაწილში აღნიშნულ უზრუნველყოფის გარანტიებს, საგადასახადო ორგანოს უფლება აქვს, დაუყოვნებლივ, სასამართლოს გადაწყვეტილების გარეშე გამოიყენოს „საგადასახადო მოთხოვნის“ შესრულების უზრუნველყოფის ქვემოთ ჩამოთვლილი ღონისძიებები (სადავო საგადასახადო დავალიანების მოცულობის ფარგლებში, ხოლო თუ წარდგენილია ნაწილობრივი უზრუნველყოფის გარანტია, - იმ ფარგლებში, რაც საკმარისია სადავო საგადასახადო დავალიანების მოცულობის შესავსებად):

ა) ყადაღა დაადოს მის საბანკო ანგარიშებს;

ბ) ყადაღა დაადოს მის ნებისმიერი სახის ქონებას (მათ შორის, მოძრავ, უძრავ და არამატერიალურ ქონებას).

3. თუ საგადასახადო დავა გადაწყდება პირის სასარგებლოდ, მაშინ გაუქმდება მის მიერ წარდგენილი უზრუნველყოფის გარანტიები და საგადასახადო ორგანოს მიერ დადებული ყადაღა ჩაითვლება მოხსნილად, ხოლო საგადასახადო გირავნობის/იპოთეკის უფლება - გაუქმებულად.

4. თუ საგადასახადო დავა არ გადაწყდება პირის სასარგებლოდ, მაშინ მას სადავო საგადასახადო ვალდებულების წარმოშობის დღიდან დაეკისრება სადავო გადასახადისა და შესაბამისი საგადასახადო სანქციების თანხის გადახდა.“.

53. 151-ე მუხლის პირველი ნაწილის „ა“ ქვეპუნქტი ჩამოყალიბდეს შემდეგი რედაქციით:

„ა) პირის ვინაობა (სახელი და გვარი, დასახელება), გადასახადის გადამხდელის საიდენტიფიკაციო ნომერი (ასეთის არსებობის შემთხვევაში), მისამართი;“.

54. 152-ე მუხლის პირველი და მე-2 ნაწილები ჩამოყალიბდეს შემდეგი რედაქციით:

„1. პირს უფლება აქვს საგადასახადო ორგანოსაგან შესაგებლის მიღებიდან 20 კალენდარული დღის ვადაში, ხოლო ამ კოდექსის 147-ე მუხლის პირველი ნაწილით განსაზღვრულ ვადაში მისი მიუღებლობის შემთხვევაში - ამ ვადის ამოწურვიდან 20 კალენდარული დღის ვადაში დავა გააგრძელოს ამ კოდექსით გათვალისწინებული ფორმით.

2. დავის სასამართლოში გაგრძელების შემთხვევაში პირი ვალდებულია ამის შესახებ აცნობოს საგადასახადო ორ განოს იმავე ვადაში, რა ვადაშიც მას აქვს დავის გაგრძელების უფლება.“.

55. 153-ე მუხლის მე-2 ნაწილი ჩამოყალიბდეს შემდეგი რედაქციით:

„2. საქართველოს ფინანსთა სამინისტროს სისტემაში საგადასახადო დავა განიხილება და წყდება ამ კოდექსით დადგენილი წესით. სისტემაში მიღებული გადაწყვეტილება შეიძლება გასაჩივრდეს მხოლოდ პირის მიერ, ამ კოდექსის 146-ე მუხლისა და სხვა მოთხოვნების გათვალისწინებით.“.

56. 154-ე და 155-ე მუხლები ჩამოყალიბდეს შემდეგი რედაქციით:

„მუხლი 154. საგადასახადო ორგანოს ვალდებულება საჩივრის ან „გადასახადის გადამხდელის მოთხოვნის“ მიღებისას

1. საგადასახადო ორგანოს უფროსი/მოადგილე ვალდებულია, პირის საჩივარი მიღებიდან 3 კალენდარული დღის ვადაში, თანდართულ მასალებთან ერთად გაუგზავნოს საქართველოს ფინანსთა სამინისტროს შემოსავლების სამსახურს.

2. თუ საგადასახადო ორგანო „გადასახადის გადამხდელის მოთხოვნის“ მიღებიდან 15 კალენდარული დღის ვადაში არ მიიღებს შესაბამის გადაწყვეტილებას და პირს არ გაუგზავნის მას, ეს ნიშნავს „გადასახადის გადამხდელის მოთხოვნის“ შესრულებაზე უარის თქმას.

მუხლი 155. საგადასახადო ორგანოს გადაწყვეტილების გასაჩივრება

1. პირს უფლება აქვს, „საგადასახადო მოთხოვნა“ ან ამ კოდექსის 145-ე მუხლის მე-2 ნაწილის „გ“ ქვეპუნქტით გათვალისწინებული ინდივიდუალური ადმინისტრაციულ- სამართლებრივი აქტი მიღებიდან 20 კალენდარული დღის ვადაში, ხოლო ამ კოდექსის 147-ე მუხლის პირველ ნაწილში აღნიშნულ შემთხვევაში - საგადასახადო ორგანოს შესაგებელი მიღებიდან 20 კალენდარული დღის ვადაში და იმავე ნაწილით განსაზღვრულ ვადაში შესაგებლის გაუგზავნელობისას საგადასახადო ორგანოს უარი ამ ვადის ამოწურვიდან 20 კალენდარული დღის ვადაში გაასაჩივროს:

ა) გასაჩივრებული გადაწყვეტილების გამომცემი საგადასახადო ორგანოს მეშვეობით საქართველოს ფინანსთა სამინისტროს შემოსავლების სამსახურში. მან წარდგენილ საჩივარს უნდა დაურთოს დამატებითი მტკიცებულებები (მათი არსებობის შემთხვევაში);

ბ) სასამართლოში.

2. თუ ამ მუხლის პირველ ნაწილში მითითებული გასაჩივრების ვადები შესაძლებელია აითვალოს სხვადასხვა თარიღიდან, უპირატესობა ენიჭება პირის მიერ შესაგებლის მიღების თარიღს, მიუხედავად იმისა, დროულად გააგზავნა თუ არა შესაგებელი საგადასახადო ორგანომ.

3. თუ პირი ამ მუხლის პირველი და მე-2 ნაწილებით დადგენილ ვადებში არ გაასაჩივრებს (მათ შორის, სასამართლოში):

ა) საგადასახადო ორგანოს „საგადასახადო მოთხოვნას“ ან შესაგებელს, „საგადასახადო მოთხოვნა“ აღიარებულად ჩაითვლება, აღსასრულებლად მიიქცევა და „საგადასახადო მოთხოვნაზე“ ვადის დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო, „გადასახადის გადამხდელის მოთხოვნა“ გაუქმებულად ჩაითვლება და საქართველოს ფინანსთა სამინისტროს სისტემაში უარზე ვადის დაუცველად შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო;

ბ) საგადასახადო ორგანოს უარს, „გადასახადის გადამხდელის მოთხოვნა“ გაუქმებულად ჩაითვლება და უარზე ვადის დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო;

გ) ამ კოდექსის 145-ე მუხლის მე-2 ნაწილის „გ“ ქვეპუნქტით გათვალისწინებულ ინდივიდუალურ ადმინისტრაციულ- სამართლებრივ აქტს, ეს მიიჩნევა ინდივიდუალური ადმინისტრაციულ- სამართლებრივი აქტის აღიარებად და აღნიშნულ აქტზე ვადის დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო.“.

57. 156-ე მუხლის:

ა) პირველი ნაწილი ჩამოყალიბდეს შემდეგი რედაქციით:

„1. საქართველოს ფინანსთა სამინისტროს შემოსავლების სამსახური ვალდებულია, ამ კოდექსის 155-ე მუხლის პირველ ნაწილში აღნიშნული საჩივრის მიღებიდან 20 კალენდარული დღის ვადაში განიხილოს იგი, მიიღოს შესაბამისი გადაწყვეტილება და არა უგვიანეს გადაწყვეტილების მიღებიდან მე-3 სამუშაო დღისა გაუგზავნოს იგი მომჩივანს და იმ საგადასახადო ორგანოს, რომლის გადაწყვეტილებაც იყო გასაჩივრებული. თუ საქართველოს ფინანსთა სამინისტროს შემოსავლების სამსახური დაასკვნის, რომ სათანადოდ არ არის გამოკვლეული საქმისათვის არსებითი მნიშვნელობის მქონე გარემოებები, იგი უფლებამოსილია, გასაჩივრებული გადაწყვეტილების გამომცემ საგადასახადო ორგანოს დაავალოს, განმეორებით განიხილოს და შეისწავლოს მხოლოდ სადავო საკითხი საქართველოს ფინანსთა სამინისტროს შემოსავლების სამსახურის მიერ მითითებულ ვადაში, რომელიც არ შეიძლება იყოს 30 სამუშაო დღეზე მეტი. აღნიშნულ პერიოდში დავის განხილვა ჩერდება. ამ ვადის გაგრძელება შეიძლება სამჯერ, ვადის თითოეული გაგრძელებისას - არა უმეტეს 15 სამუშაო დღით.“;

ბ) მე-7 და მე-8 ნაწილები ჩამოყალიბდეს შემდეგი რედაქციით:

„7. საჩივრის ნაწილობრივ დაკმაყოფილების ან მის დაკმაყოფილებაზე უარის თქმის შესახებ გადაწყვეტილების მიღების შემთხვევაში საქართველოს ფინანსთა სამინისტროს შემოსავლების სამსახური ვალდებულია, გადაწყვეტილების ძალაში შესვლიდან არა უგვიანეს 3 სამუშაო დღისა პირს გადაწყვეტილებასთან ერთად გაუგზავნოს შესწორებული „საგადასახადო მოთხოვნა“ (თუ მოხდა მისი შესწორება).

8. თუ საქართველოს ფინანსთა სამინისტროს შემოსავლების სამსახური ამ მუხლის პირველი ნაწილით დადგენილ ვადაში არ მიიღებს იმავე ნაწილში აღნიშნულ გადაწყვეტილებას ან პირს არ გაუგზავნის მას, ეს ნიშნავს საჩივრის დაკმაყოფილებაზე უარის თქმას.“.

58. 157-ე მუხლი ჩამოყალიბდეს შემდეგი რედაქციით:

„მუხლი 157. საქართველოს ფინანსთა სამინისტროს შემოსავლების სამსახურის გადაწყვეტილების გასაჩივრება

1. პირს უფლება აქვს, ამ კოდექსის 156-ე მუხლის მე-4 ნაწილის „ბ“ და „გ“ ქვეპუნქტებით განსაზღვრულ შემთხვევებში საქართველოს ფინანსთა სამინისტროს შემოსავლების სამსახურის გადაწყვეტილება მიღებიდან 5 კალენდარული დღის ვადაში და საქართველოს ფინანსთა სამინისტროს შემოსავლების სამსახურის უარი, თუ მან ამ კოდექსის 156-ე მუხლის პირველი ნაწილით განსაზღვრულ ვადაში არ მიიღო ეს გადაწყვეტილება, ამ ვადის ამოწურვიდან 5 კალენდარული დღის ვადაში გაასაჩივროს:

ა) საქართველოს ფინანსთა სამინისტროს შემოსავლების სამსახურის მეშვეობით საბჭოში. მან წარდგენილ საჩივარს უნდა დაურთოს ამავე სამსახურისათვის წარდგენილი ყველა მასალის ასლები და დამატებითი მტკიცებულებები (მათი არსებობის შემთხვევაში);

ბ) სასამართლოში (ასეთ შემთხვევაში მოპასუხეა ამ კოდექსის 147-ე ან 151-ე მუხლში აღნიშნული საგადასახადო ორგანო).

2. თუ ამ მუხლის პირველ ნაწილში მითითებული გასაჩივრების ვადები შესაძლებელია აითვალოს სხვადასხვა თარიღიდან, უპირატესობა ენიჭება პირის მიერ გადაწყვეტილების მიღების თარიღს, მიუხედავად იმისა, დროულად გააგზავნა თუ არა გადაწყვეტილება საქართველოს ფინანსთა სამინისტროს შემოსავლების სამსახურმა.

3. საქართველოს ფინანსთა სამინისტროს შემოსავლების სამსახური ვალდებულია, პირის საჩივარი მიღებიდან 3 კალენდარული დღის ვადაში, თანდართულ მასალებთან ერთად გაუგზავნოს საბჭოს.

4. თუ პირი ამ მუხლის პირველი ნაწილით დადგენილ ვადაში არ გაასაჩივრებს (მათ შორის, სასამართლოში):

ა) საქართველოს ფინანსთა სამინისტროს შემოსავლების სამსახურის გადაწყვეტილებას, იგი აღიარებულად ჩაითვლება, აღსასრულებლად მიიქცევა და გადაწყვეტილებაზე ვადის დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო;

ბ) საქართველოს ფინანსთა სამინისტროს შემოსავლების სამსახურის უარს, საჩივარი გაუქმებულად ჩაითვლება, გასაჩივრებული გადაწყვეტილება აღსასრულებლად მიიქცევა და უარზე ვადის დაუცველად საქართველოს ფინანსთა სამინისტროს სისტემაში შეტანილი საჩივარი განუხილველი რჩება, ხოლო სასამართლოში შეტანილ სარჩელზე წყდება საქმის წარმოება დასაშვებობის მოთხოვნების დარღვევის გამო.“.

59. 158-ე მუხლის მე-2 ნაწილი ჩამოყალიბდეს შემდეგი რედაქციით:

„2. საბჭო დავას თავის სხდომაზე იხილავს საჩივრის მიღებიდან 20 კალენდარული დღის ვადაში, თუ ამ მუხლით სხვა რამ არ არის გათვალისწინებული. აღნიშნულ ვადაში საბჭოს აპარატს უფლება აქვს ჩაატაროს მოსამზადებელი სხდომა/სხდომები. თუ საბჭო დაასკვნის, რომ სათანადოდ არ არის გამოკვლეული საქმისათვის არსებითი მნიშვნელობის მქონე გარემოებები, იგი უფლებამოსილია, გასაჩივრებული გადაწყვეტილების გამომცემ საგადასახადო ორგანოს დაავალოს, განმეორებით განიხილოს და შეისწავლოს მხოლოდ სადავო საკითხი საბჭოს მიერ მითითებულ ვადაში, რომელიც არ შეიძლება იყოს 30 სამუშაო დღეზე მეტი. აღნიშნულ პერიოდში დავის განხილვა ჩერდება. ამ ვადის გაგრძელება შეიძლება სამჯერ, ვადის თითოეული გაგრძელებისას - არა უმეტეს 15 სამუშაო დღით.“.

60. 159-ე მუხლის:

ა) პირველ ნაწილს დაემატოს შემდეგი შინაარსის „დ“ ქვეპუნქტი:

„დ) საჩივარი განუხილველი დატოვოს.“;

ბ) მე-5 ნაწილის შემდეგ დაემატოს შემდეგი შინაარსის მე-6 ნაწილი:

„6. გადასახადის გადამხდელმა/საგადასახადო აგენტმა ან სხვა ვალდებულმა პირმა (წარმომადგენელმა) საბჭოს მიერ დავის განხილვის დროს მიღებული გადაწყვეტილება შეიძლება გაასაჩივროს მხოლოდ ამ მუხლის პირველი ნაწილით გათვალისწინებულ გადაწყვეტილებასთან ერთად, თუ არსებობს პირის კანონიერი ინტერესი.“.

61. 160-ე მუხლის მე-3 ნაწილი ჩამოყალიბდეს შემდეგი რედაქციით:

„3. პირს უფლება აქვს, ამ მუხლის პირველ და მე-2 ნაწილებში მითითებული ვადების დაუცველად სასამართლოში შეტანილ სარჩელზე შეწყვიტოს საქმის წარმოება დასაშვებობის მოთხოვნების დარღვევის გამო.“.

62. 161-ე მუხლი ჩამოყალიბდეს შემდეგი რედაქციით:

„მუხლი 161. სასამართლოს მიერ საგადასახადო დავის განხილვა

პირმა „საგადასახადო მოთხოვნა“, საგადასახადო ორგანოს, საქართველოს ფინანსთა სამინისტროს შემოსავლების სამსახურის, საბჭოს გადაწყვეტილება შეიძლება გაასაჩივროს სასამართლოში ამ კოდექსით დადგენილ ვადაში და დადგენილი წესით. სასამართლოში შეტანილი სარჩელი განიხილება და გადაწყვეტილება მიიღება საქართველოს ადმინისტრაციული საპროცესო კანონმდებლობით დადგენილი წესით.“.

63. 168-ე მუხლის:

ა) პირველი ნაწილის:

ა.ა) „ვ“ ქვეპუნქტი ჩამოყალიბდეს შემდეგი რედაქციით:

„ვ) ფიზიკური პირის მიერ:

ვ.ა) 2 წელზე მეტი ვადით საკუთრებაში არსებული საცხოვრებელი ბინის (სახლის) მასზე დამაგრებული მიწით რეალიზაციით მიღებული ნამეტი. აღნიშნული 2-წლიანი ვადა აითვლება საქართველოს საჯარო რეესტრში საკუთრების უფლების რეგისტრაციის მიზნით წარდგენილი (წარსადგენი) საკუთრების უფლების დამადასტურებელი დოკუმენტის შედგენის თარიღის მიხედვით, ხოლო „რეალიზაციით მიღებული ნამეტი“ იანგარიშება, როგორც სხვაობა საცხოვრებელი ბინის (სახლის) მასზე დამაგრებული მიწით რეალიზაციის ფასსა და მასზე საკუთრების უფლების წარმოშობისას მისი შეძენის ფასს შორის, გარდა საკუთრების უფლების უსასყიდლოდ მიღებისა (სახელმწიფო პრივატიზებისას, ჩუქებით ან მემკვიდრეობით მიღებისას ან სხვა შემთხვევებში), როდესაც ნამეტი იანგარიშება, როგორც სხვაობა უსასყიდლოდ მიღებული საცხოვრებელი ბინის (სახლის) მასზე დამაგრებული მიწით რეალიზაციის ფასსა და მიღების მომენტში მის საბაზრო ფასს შორის;

ვ.ბ) საკუთრების უფლების რეგისტრაციიდან 6 თვეზე მეტი ვადით საკუთრებაში არსებული ავტოსატრანსპორტო საშუალების რეალიზაციით მიღებული ნამეტი;

ვ.გ) 2 წელზე მეტი ვადით საკუთრებაში არსებული აქტივების რეალიზაციით მიღებული ნამეტი, გარდა ეკონომიკურ საქმიანობაში გამოყენებული აქტივებისა ან/და ამ ქვეპუნქტის „ვ.ა“ და „ვ.ბ“ ქვეპუნქტებით გათვალისწინებული შემთხვევებისა. აღნიშნული 2-წლიანი ვადა უძრავი ქონების რეალიზაციის შემთხვევაში აითვლება საჯარო რეესტრში საკუთრების უფლების რეგისტრაციის მიზნით წარდგენილი (წარსადგენი) საკუთრების უფლების დამადასტურებელი დოკუმენტის შედგენის თარიღის მიხედვით, ხოლო „რეალიზაციით მიღებული ნამეტი“ იანგარიშება, როგორც სხვაობა ქონების რეალიზაციის ფასსა და მასზე საკუთრების უფლების წარმოშობისას მისი შეძენის ფასს შორის, გარდა საკუთრების უფლების უსასყიდლოდ მიღებისა (სახელმწიფო ქონების პრივატიზებისას, ქონების ჩუქებით ან მემკვიდრეობით მიღებისას ან სხვა შემთხვევებში), როდესაც ნამეტი იანგარიშება, როგორც სხვაობა უსასყიდლოდ მიღებული ქონების რეალიზაციის ფასსა და მიღების მომენტში მის საბაზრო ფასს შორის;“;

ა.ბ) „ვ“ ქვეპუნქტის შემდეგ დაემატოს შემდეგი შინაარსის „ვ¹“ ქვეპუნქტი:

„ვ¹) საწარმოს ლიკვიდაციის ან კაპიტალის შემცირების გზით ამ საწარმოს პარტნიორ ფიზიკურ პირზე წილის სანაცვლოდ უძრავი ქონების საკუთრებაში გადაცემით მიღებული ნამეტი, თუ საწარმოს წილზე ფიზიკური პირის საკუთრების უფლების წარმოშობიდან გასულია 2 წელზე მეტი. ამ შემთხვევაში საკუთრების 2-წლიანი ვადა იანგარიშება ფიზიკური პირის მიერ ამ საწარმოში შესაბამისი წილის შეძენის დღიდან, ხოლო წილის სხვადასხვა დროს შეძენის შემთხვევაში 2-წლიანი ვადა იანგარიშება შესაბამისი წილის შეძენის თარიღიდან;“;

ა.გ) „პ“ ქვეპუნქტი ჩამოყალიბდეს შემდეგი რედაქციით:

„პ) ფიზიკური პირის (I რიგის მემკვიდრის) მიერ ჯამურად მის და მამკვიდრებლის საკუთრებაში 2 წელზე მეტი ვადით არსებული მატერიალური აქტივების რეალიზაციით მიღებული ნამეტი. აღნიშნული 2-წლიანი ვადა და „რეალიზაციით მიღებული ნამეტი“უძრავი ქონების რეალიზაციის შემთხვევაში იანგარიშება ამ ნაწილის „ვ“ ქვეპუნქტის „ვ.გ“ქვეპუნქტით გათვალისწინებული წესით;“;

ა.დ) „რ“ ქვეპუნქტი ჩამოყალიბდეს შემდეგი რედაქციით:

„რ) „ფასიანი ქაღალდების ბაზრის შესახებ“ საქართველოს კანონით განსაზღვრული იმ საჯარო ან სასესხო ფასიანი ქაღალდის რეალიზაციით მიღებული ნამეტი შემოსავალი, რომელიც სავაჭროდ დაშვებულია საფონდო ბირჟის ლისტინგში და რომლის თავისუფალი ბრუნვის კოეფიციენტი საანგარიშო წლის წინა წლის 31 დეკემბრის და საანგარიშო წლის 31 დეკემბრის მდგომარეობით, ფასიანი ქაღალდების ემიტენტის მიერ საფონდო ბირჟისათვის მიწოდებული ინფორმაციით, აღემატება 25 პროცენტს;“;

ბ) მე-4 ნაწილი ჩამოყალიბდეს შემდეგი რედაქციით:

„4. თუ ამ მუხლის მე-2 და მე-3 ნაწილებით გათვალისწინებულ შემთხვევებში საშემოსავლო გადასახადის გადამხდელს წარმოექმნება ერთზე მეტი შეღავათის უფლება, მასზე გავრცელდება მათგან ერთი, უმაღლესი შეღავათი. ამასთანავე, საგადასახადო წლის მიხედვით დაქირავებულ პირს გადახდის წყაროდან მიღებულ შემოსავლებზე შეღავათის გამოყენების უფლება აქვს მხოლოდ ერთი დამქირავებლიდან მიღებული შემოსავლების მიხედვით. გადახდის წყაროდან მიღებულ შემოსავლებზე შეღავათის გამოყენების მიზნით დაქირავებული ვალდებულია, საქართველოს ფინანსთა სამინისტროს მიერ დადგენილი წესით დამქირავებელს წარუდგინოს საგადასახადო ორგანოს მიერ გაცემული ცნობა. ერთზე მეტი სამუშაო ადგილის არსებობის შემთხვევაში გადახდის წყაროს, სადაც უნდა გავრცელდეს შეღავათი, განსაზღვრავს დაქირავებული.“.

64. 172-ე მუხლის:

ა) „ი“ ქვეპუნქტი ჩამოყალიბდეს შემდეგი რედაქციით:

„ი) საერთაშორისო ფინანსური კომპანიის მიერ ფინანსური ოპერაციებიდან ან/და ფინანსური მომსახურებიდან ან/და საქართველოს არარეზიდენტის მიერ გამოშვებული ფასიანი ქაღალდების რეალიზაციიდან მიღებული მოგება;“;

ბ) „ლ“ ქვეპუნქტი ჩამოყალიბდეს შემდეგი რედაქციით:

„ლ) „ფასიანი ქაღალდების ბაზრის შესახებ“ საქართველოს კანონით განსაზღვრული იმ საჯარო ან სასესხო ფასიანი ქაღალდის რეალიზაციით მიღებული მოგება, რომელიც სავაჭროდ დაშვებულია საფონდო ბირჟის ლისტინგში და რომლის თავისუფალი ბრუნვის კოეფიციენტი საანგარიშო წლის წინა წლის 31 დეკემბრის და საანგარიშო წლის 31 დეკემბრის მდგომარეობით, ფასიანი ქაღალდების ემიტენტის მიერ საფონდო ბირჟისათვის მიწოდებული ინფორმაციით, აღემატება 25 პროცენტს;“;

გ) „ჟ“ ქვეპუნქტის შემდეგ დაემატოს შემდეგი შინაარსის „რ“ ქვეპუნქტი:

„რ) საინვესტიციო ფონდის მიერ ფინანსური ინსტრუმენტების მიწოდებით ან/და ფინანსური ოპერაციებიდან ან/და ფინანსური მომსახურებიდან მიღებული მოგება, თუ საინვესტიციო ფონდი არის საერთაშორისო ფინანსური კომპანია.“.

65. 174-ე მუხლის მე-2 ნაწილის „თ“ ქვეპუნქტი ჩამოყალიბდეს შემდეგი რედაქციით:

„თ) დამქირავებლის მიერ დაქირავებულისათვის სიცოცხლისა და ჯანმრთელობის დაზღვევის შემთხვევაში ან საპენსიო დაზღვევის ხელშეკრულების მიხედვით სადაზღვევო პრემიის ან სხვა თანხის გადახდისას - დამქირავებლის მიერ გადახდილი სადაზღვევო პრემიის ან სხვა თანხის მოცულობა;“.

66. 175-ე მუხლი ჩამოყალიბდეს შემდეგი რედაქციით:

„მუხლი 175. ეკონომიკური საქმიანობით მიღებული შემოსავლები, რომლებიც დაკავშირებული არ არის დაქირავებით მუშაობასთან ეკონომიკური საქმიანობით მიღებულ შემოსავლებს მიეკუთვნება:

ა) საქონლის/მომსახურების მიწოდებით მიღებული შემოსავლები (მათ შორის, საქონლის/მომსახურების უსასყიდლოდ მიწოდებისას ამ საქონლის/მომსახურების საბაზრო ფასი);

ბ) აქტივების რეალიზაციით მიღებული ნამეტი შემოსავალი;

გ) ეკონომიკური საქმიანობის შეზღუდვის ან/და საწარმოს დახურვის შედეგად მიღებული შემოსავლები;

დ) ძირითად საშუალებათა რეალიზაციით მიღებული თანხები, რომლებიც შემოსავალში შეიტანება ამ კოდექსის 183-ე მუხლის მე-7 ნაწილის მიხედვით;

ე) კომპენსირებული გამოქვითვები ამ კოდექსის 209-ე მუხლის მიხედვით;

ვ) პროცენტების სახით მიღებული შემოსავლები, გარდა ფიზიკური პირის მიერ ბანკებსა და სხვა საკრედიტო დაწესებულებებში დეპოზიტებსა და ანაბრებზე ფულადი სახსრების განთავსებიდან პროცენტის სახით მიღებული შემოსავლებისა;

ზ) დივიდენდები;

თ) როიალტი;

ი) ვალების ჩამოწერით მიღებული შემოსავლები;

კ) ლიზინგით, უზუფრუქტით, იჯარით, ქირით ან სხვა ამგვარი ფორმით გაცემული ქონებიდან მიღებული შემოსავლები;

ლ) სხვა ეკონომიკური საქმიანობით მიღებული შემოსავალი.“.

67. 176-ე მუხლის პირველ ნაწილს დაემატოს შემდეგი შინაარსის „გ“ ქვეპუნქტი:

„გ) ჯანმრთელობის დაზღვევის ხელშეკრულების საფუძველზე სადაზღვევო შემთხვევის დადგომისას მზღვეველის მიერ დაზღვეული ფიზიკური პირისათვის გადახდილი სადაზღვევო ანაზღაურებისა.“.

68. 177-ე მუხლი ჩამოყალიბდეს შემდეგი რედაქციით:

„მუხლი 177. შემოსავლის მიღებასთან დაკავშირებული ხარჯები

1. ერთობლივი შემოსავლიდან გამოიქვითება ყველა დოკუმენტურად დადასტურებული ხარჯი, რომელიც დაკავშირებულია მის მიღებასთან, გარდა:

ა) ამ კოდექსის 211-ე მუხლის მიხედვით ძირითად საშუალებათა შეძენის, დადგმისა და სხვა კაპიტალიზებადი ხარჯებისა, როდესაც არ არსებობს ამ კოდექსის 183-ე მუხლის მე-13 ნაწილით გათვალისწინებული შემთხვევები;

ბ) იმ ხარჯებისა, რომლებიც, ამ კოდექსის 178-ე მუხლისა და ამ თავის სხვა დებულებათა თანახმად, გამოქვითვას არ ექვემდებარება.

2. გადასახადის გადამხდელს უფლება აქვს გამოქვითოს მისთვის საქონლის/მომსახურების უსასყიდლოდ მიწოდების შედეგად წარმოშობილი სარგებლის ერთობლივი შემოსავლიდან ამ კოდექსით განსაზღვრული შეზღუდვების გათვალისწინებით.

3. საგადასახადო წლის განმავლობაში ფიზიკური პირის მიერ აქტივის რეალიზაციით მიღებული ზარალის კომპენსაცია ხდება იმავე სახის აქტივის რეალიზაციით მიღებული ნამეტით. ამასთანავე, თუ ზარალის კომპენსაცია იმავე წელს შეუძლებელია, ზარალი მომდევნო წელს არ გადაიტანება.“.

69. 178-ე მუხლის:

ა) „ბ“ ქვეპუნქტი ჩამოყალიბდეს შემდეგი რედაქციით:

„ბ) გართობაზე გაწეული ხარჯები. აღნიშნული მოთხოვნა არ გამოიყენება იმ გადასახადის გადამხდელის მიმართ, რომელიც ეწევა გართობითი ხასიათის ეკონომიკურ საქმიანობას, თუ ხარჯები გაწეულია ასეთი საქმიანობის ფარგლებში;“;

ბ) „დ“ ქვეპუნქტის შემდეგ დაემატოს შემდეგი შინაარსის „ე“ ქვეპუნქტი:

„ე) იმ საქონელზე/მომსახურებაზე გაწეული ხარჯი, რომელიც მოგების გადასახადის მიზნებისათვის არ ითვლება მიწოდებად, გარდა ამ კოდექსის მე-20 მუხლის მე-4 ნაწილის „ბ“ ქვეპუნქტით გათვალისწინებული შემთხვევისა.“.

(დასასრული შემდეგ ნომერში)

ენდეთ „ბიოკოდექსს“

იგი მომხმარებელს პროდუქციის ხარისხის ვარგისიანობის
განსაზღვრაში ეხმარება

საქართველოს სამომხმარებლო ბაზარზე არსებული კარაქის ნიმუშების ახლახან ჩატარებულმა კვლევამ მოსახლეობაში დიდი ინტერესი და ვნებათაღელვა გამოიწვია. უამრავი მოქალაქე ცდილობს, კვლევის შესახებ ყველაზე სრულყოფილი ინფორმაცია მოიძიოს, კარაქის შეძენისას თავადაც გაითვალისწინოს და ახლობლებსაც რჩევით დაეხმაროს. ჩვენმა ჟურნალმა გაითვალისწინა საზოგადოების ასეთი ინტერესი, ამიტომ გადავწყვიტეთ, კვლევის შედეგებიც გამოვაქვეყნოთ და ის ორგანიზაციაც გაგაცნოთ, რომელიც მომხმარებლის ინტერესების დაცვასაც ცდილობს და კეთილსინდისიერი მეწარმისაც.

შპს „ბიოკოდექსი“ ხუთი თვის წინათ საქართველოს სამომხმარებლო ბაზარზე პროდუქციის ხარისხიანობისა და შესაბამისობის დასადგენად შეიქმნა. ამა თუ იმ სახის პროდუქტის - სამედიცინო პრეპარატის, სამშენებლო მასალისა თუ კვების პროდუქტის ვარგისიანობას საქართველოს, გერმანიის, ნიდერლანდებისა და ლიტვის შესაბამისი ორგანოების მიერ აღიარებული ის ლაბორატორიები გასცემენ, რომლებთანაც ორგანიზაციას ურთიერთთანამშრომლობის მემორანდუმი აქვს გაფორმებული. საგულისხმოა, რომ გაცემული სერთიფიკატი ამ დასავლურ ქვეყნებშიც იმოქმედებს, მათი რიცხვი კი თანდათანობით გაიზრდება. თავად „ბიოკოდექსმა“ აკრედიტაცია სახელმწიფო აკრედიტაციის ცენტრში გაიარა და შესაბამისობის სერთიფიკატის გაცემის უფლება მოიპოვა.

გიორგი ბარამიძე, „ბიოკოდექსის“ მენეჯერი: საქართველოს სამომხმარებლო ბაზარი ანარქიულ მდგომარეობაში იმყოფება. როგორც შემოტანილი, ასევე ადგილობრივი წარმოების პროდუქციის დიდი ნაწილი საკმაოდ უხარისხოა. ის კეთილსინდისიერი მეწარმე, რომელსაც ბაზარზე ხარისხიანი პროდუქტის შემოტანა სურს, იჩაგრება და პრობლემები ექმნება კონკურენტუნარიანი გარემოს არარსებობის გამო. როდესაც სახელმწიფო მიუშვებს ბერკეტებს და მომხმარებელს ბიზნესთან პირისპირ დატოვებს, ამ დროს ირკვევა ერთი მნიშვნელოვანი რამ: აქვს თუ არა თავად მომხმარებელს ხარისხიანი პროდუქციის მიღების სურვილი. თუ მას ეს პრეტენზია არ გააჩნია, ე. ი. სახელმწიფოს განვითარების სათანადო დონისთვის არ მიუღწევია. მომხმარებელთა ფედერაციის ხელთ არსებულმა ინფორმაციამ და საზოგადოების სხვადასხვა ფენებში ჩატარებულმა კვლევებმა დაგვარწმუნა, რომ ქართველი მომხმარებელი ხარისხიანი პროდუქციის მიღებაზე სერიოზულ პრეტენზიას აცხადებს. მისთვის აუცილებელია, ჰქონდეს არჩევანის საშუალება ხარისხიან და უხარისხო პროდუქციას შორის. „ბიოკოდექსის“ შექმნაც სწორედ ამ ფაქტმა გადაგვაწყვეტინა.

ასე შეიქმნა სტრუქტურა, რომელიც თანამშრომლობს დამოუკიდებელ ექსპერტებსა და ლაბორატორიებთან საქართველოში და მის ფარგლებს გარეთ. „ბიოკოდექსის“ მიერ გაცემული შესაბამისობის ნიშანი კეთილსინდისიერ მეწარმეს ქართულ, თუ უცხოურ ბაზარზე მწვანე შუქს აუნთებს, მომხმარებლისთვის კი „ბიოკოდექსის“ ნიშნიანი პროდუქცია ხარისხიანისა და სანდოს სინონიმი გახდება. ორგანიზაცია თანამშრომლობს იურიდიულ კომპანიასთან, რომელიც თავიდან ბოლომდე აკონტროლებს ამ ჯაჭვს და თავისი ადვოკატურით იცავს მეწარმესაც, ლაბორატორიასაც და მომხმარებელსაც. „ბიოკოდექსთან“ არსებული მედია- ცენტრი ორგანიზაციის საქენდეთ მიანობის შესახებ დაწვრილებით ინფორმაციას აწვდის მედია- საშუალებებს, მისი მეშვეობით კი - მომხმარებელს.

გიორგი ბარამიძე კატეგორიულად უარყოფს გავრცელებულ მოსაზრებას, თითქოს კომპანია „ბიოკოდექსი“ საქართველოს სამომხმარებლო ბაზარზე გამოჩენილი ახალი მაკონტროლებელი ორგანოა. გიორგი ბარამიძე: „ბიოკოდექსმა“ იკისრა უზარმაზარი პასუხისმგებლობა მომხმარებლისა და მეწარმის წინაშე. არაკეთილსინდისიერი მეწარმის მიმართ ლოიალური ვერანაირად ვერ ვიქნებით. კარაქის კვლევამაც დაგვანახა, რომ სხვაგვარად მოქცევის უფლება არ გვაქვს. ამ კვლევას ყავისა და მაიონეზის ვარგისიანობის შესწავლა უძღოდა წინ. მომავალშიც არ გავჩერდებით: ახლა პურს ვიკვლევთ, შემდეგ კი ხორცპროდუქტებზე გადავალთ... მომხმარებელს პირობა მივეცით, რომ წელს 100-მდე დასახელების პროდუქტს შევისწავლით. პროდუქტების კატეგორიას მომხმარებელთა ფედერაციაში შესული მოთხოვნების შესაბამისად ვადგენთ. სხვათა შორის, პროდუქცია სამ სხვადასხვა ლაბორატორიაში გამოვიკვლიეთ და სხვადასხვა ექსპერტის (მათ შორის უცხოელის) დასკვნებს დავეყრდენით, მაგრამ მაინც ერთი და იგივე შედეგები მივიღეთ. საგულისხმოა, რომ უხარისხო კარაქის მწარმოებლებიდან უმრავლესობის მისამართების დადგენაც კი ვერ მოხერხდა. სავარაუდოდ, ამ საკითხით, ალბათ, სამართალდამცველებიც დაკავდებიან.

„ბიოკოდექსის“ სერტიფიკატის მიღების სურვილი უკვე რამდენიმე ქართულმა და უცხოურმა კომპანიამ, მათ შორის, გერმანულმა „დიოლერმაც“ გამოთქვა. კომპანია „ყაზბეგის“ პრეზიდენტმა გოგი თოფაძემ კი, რომელსაც გიორგი ბარამიძე ქართული ბიზნესის პატრიარქად მიიჩნევს, გადაწყვიტა ყველა იმ პროდუქტის სერტიფიცირება, რომელიც მას უცხოურ ბაზარზე გააქვს.

ხშირია შემთხვევა, როდესაც ესა თუ ის კომპანია თავიდან მაღალი ხარისხის პროდუქტს უშვებს, შემდეგ კი პროდუქციის ხარისხი თანდათანობით უარესდება. მსგავსი ფაქტების თავიდან ასაცილებლად „ბიოკოდექსი“ უკვე სერტიფიცირებულ პროდუქციაზე მუდმივ მონიტორინგს განახორციელებს. ხანდახან ხომ მეწარმე უდანაშაულოა და უხარისხო პროდუქცია, უბრალოდ, მაღაზიაში გამორთული მაცივრის შედეგია... მონიტორინგი კი ყველა პროცესს საგულდაგულოდ გააკონტროლებს.

ახლა კი კარაქის კვლევის შედეგებს გთავაზობთ:

კომპანია „ბიოკოდექსმა“ და საქართველოს მომხმარებელთა ფედერაციამ 26 დასახელების 72- და 82-პროცენტიანი კარაქის ლაბორატორიული ანალიზის შედეგები გამოაქვეყნა.

თბილისში თევდორე მღვდლის ქუჩის მიმდებარე ტერიტორისა და ჰიპერმარკეტ „გუდვილში“ შესყიდული ნიმუშები მიკრობიოლოგიური და ქიმიური ანალიზის ჩასატარებლად ორ ლაბორატორიას გადაეგზავნა.

დადებითად შეფასდა:

„სამგორი“; „ეკოფუდი“; „ენისევსკოე'; „მიდნაით სან“; „სანტე ტრადიციული“; „სანტე“; „ოლდენბერგი“; „ვალიო“; „ქიმი“; „ანჩორი“; „პრეზიდენტი“; „ჩვენი ფერმერი“; „ბარნელი“; „რუსთავი ლ“; „გურჯაანი“.

განსაკუთრებით კარგი შედეგები აჩვენა „სამგორის“, „ეკოფუდის“, „ვალიოსა“ და „ბარნელის“ ლაბორატორიულმა ანალიზებმა.

უარყოფითად შეფასდა:

„კრემლიოვსკოე'; „რუსთავი“; „რუსთავი ნამდვილი“; „რუსთავი +X“; „რუსთავი 63“; „რუსთავი +1“; „მოსკოვური“; „კოდა“; „ქალაქური“; „დიდუბის კარაქი“.

რაც შეეხება „დაჩას“, მცენარეული წარმოშობის გამო, მისი ლაბორატორიული ანალიზი ამჯერად არ ჩატარებულა.

P.S. ჟურნალი „ბიზნესი და კანონმდებლობა“ „ბიოკოდექსის“ მიერ ჩატარებული კვლევების შედეგებს მომავალშიც გაგაცნობთ.

ეკა ჯიმშელაძე

ბიზნეს-პალიტრა

ჟურნალ „ბიზნესი და კანონმდებლობის“
წამყვანი რედაქტორი

ეკა ჯიმშელაძე

„გუდვილი“ HACCP-ის მეთოდოლოგიას ნერგავს

კომპანია „გუდვილმა“ ეკონომიკის საკითხებზე მომუშავე ჟურნალისტებისთვის მედია- ტური მოაწყო და მედიის წარმომადგენლებს საქართველოში პირველად საცალო გაყიდვებში HACCP-ის სისტემის დანერგვის პრეცედენტის შესახებ ინფორმაცია მიაწოდა და კომპანიაში დანერგილი ISO 9001:2008 სტანდარტის საკითხებზე ისაუბრა.

HACCP-ის ფარგლებში „გუდვილმა“ დანერგა საერთაშორისო სტანდარტების შესაბამისი ინტეგრირებული სისტემა, რომელიც მომხმარებლებისთვის კომპანიის მიერ წარმოებული და მიწოდებული პროდუქტისა და მომსახურების მაღალი ხარისხისა და ჯანმრთელობისთვის უვნებლობის გარანტიაა.

საგულისხმოა, რომ 2010 წლის ბოლოსთვის საქართველოში მოქმედი კვების პროდუქტების მწარმოებელი ყველა კომპანიისთვის აუცილებელი გახდება ამ სისტემის დანერგვა. „გუდვილმა“ გადაწყვიტა, არ ეღალატა ნოვატორი კომპანიის იმიჯისთვის და სისტემა ერთ-ერთმა პირველმა ნებაყოფლობით დანერგა. ამით კომპანია შეუერთდა საერთაშორისო თანამეგობრობაში მიღებულ სლოგანს: „Safer food - better business,“ რაც უვნებელ სურსათსა და კომპანიის მომსახურებით სულ უფრო მეტად კმაყოფილ მეტ კლიენტს ნიშნავს.

როგორც „გუდვილის“ გენერალურმა დირექტორმა ნუგზარ მაღულარიამ მედია - ტურის ფარგლებში გამართულ პრესკონფერენციაზე განაცხადა, კომპანიისთვის მთავარი სერტიფიკატის მიღება კი არა, მომხმარებლის ნდობის გაზრდაა. ახალი სისტემა იმ ორ ახალ ობიექტშიც დაინერგება, რომელთა გახსნასაც „გუდვილი“ წლის ბოლომდე გეგმავს. მათგან ერთ-ერთი, რომლის ფართობი 240 კვადრატული მეტრია, ახლად აშენებულ კომპლექს „პიქსელში“ განთავსდება და, სავარაუდოდ, ორიოდე თვეში გაიხსნება. ამ დროისათვის „გუდვილში“ 600 ადამიანია დასაქმებული, ახალი ობიექტების ამოქმედების შემდეგ კი მათი რიცხვი 1 000-ს მიაღწევს. ქუთაისისა და ბათუმის ჰიპერმარკეტებს რეკონსტრუქცია ჩაუტარდება, თუმცა, კომპანია ამ ქალაქებში სამომავლოდ ახალი ობიექტების გახსნასაც არ გამორიცხავს.

ამ დროისთვის „გუდვილი“ 60 დასახელების ხორცის პროდუქციასა და დელიკატესს, 200 დასახელების საკონდიტრო ნაწარმსა და 250 დასახელების კულინარიულ პროდუქციას აწარმოებს. რეალიზაციის შარშანდელმა მაჩვენებელმა 52 მილიონი ლარი შეადგინა. კომპანიას უშუალო კავშირი აქვს 600-მდე მომწოდებელთან. ოთხი წლის განმავლობაში „გუდვილის“ ქსელში 83 ათასზე მეტი დასახელების პროდუქცია გაიყიდა. ამ დროისათვის კი ასორტიმენტი 50 ათასი დასახელების საქონელს ითვლის.

„გუდვილის“ მომხმარებელს, პროდუქციის ხარისხის შესაბამისად, საუკეთესო არჩევანს ვთავაზობთ. მყიდველი ჩვენთან, სურვილისა და შესაძლებლობის გათვალისწინებით, ცნობილი ბრენდების პროდუქციასაც შეარჩევს და იაფფასიან საქონელსაც შეიძენს. საქართველოში ბევრი სუპერმარკეტია, მაგრამ ჰიპერმარკეტი ერთი გახლავთ, ასე რომ, პირდაპირი კონკურენცია არც არსებობს. რაც შეეხება წარმოებას, ხორცის პროდუქტების მიმართულებით ჩვენ დავიკავეთ ნიშა, რომელიც საქართველოში აქამდე ცარიელი იყო. გენმოდიფიცირებისგან თავისუფალი, კონსერვანტების გარეშე ახალი ხორცისაგან დამზადებული პროდუქციის წარმოებით ჯანსაღი ცხოვრების სტიმულირებას შევუწყობთ ხელს,“ - აცხადებს ნუგზარ მაღულარია.

კომპანიამ საკუთარი პროდუქციის წარმოება თითოეული სფეროს საუკეთესო სპეციალისტებს მიანდო: ხორცის გადამუშავება - ავსტრიელებს, კონსერვების წარმოება - გერმანელებს, საკონდიტრო საქმე კი - ფრანგ ბულანჟერებს. მომხმარებელი შეამჩნევდა, რომ „გუდვილში“ დამზადებული პროდუქცია არც ერთ სხვა სავაჭრო ობიექტში არ იყიდება. ამის მიზეზი კი ის გახლავთ, რომ კომპანია ფალსიფიცირებას უფრთხის და სახელის გატეხას ერიდება.

ცნობისათვის: HACCP-ის (Hazard Analysis - Critical Control Points-საფრთხის ანალიზი - კრიტიკული საკონტროლო წერტილები) სისტემა პირველად გასული საუკუნის 60-იან წლებში აშშ-ის აერონავტიკისა და კოსმოსის ნაციონალური სააგენტოს (NASA) მიერ მთვარის პროგრამაში მონაწილე ასტრონავტებისთვის საკვების დამზადების მიზნით გამოიყენეს. 80- იანი წლებიდან HACCP ფართოდ გავრცელდა მთელს მსოფლიოში და დღეს გამოიყენება, როგორც სურსათის უვნებლობის და სტანდარტების სფეროში მოქმედი უმნიშვნელოვანესი საერთაშორისო ორგანიზაციის - „კოდექს ალიმენტარიუსის კომისიის“ ძირითადი სახელმძღვანელო სისტემა.

HACCP-ის სისტემის დანერგვა ნიშნავს, რომ წარმოების მთლიანი ციკლის განმავლობაში - ნედლეულის შესყიდვიდან მზა პროდუქციის რეალიზაციამდე, თითოეულ ეტაპზე ხორციელდება მოსალოდნელი რისკების განსაზღვრა, ანალიზდება ამ რისკებიდან მოსალოდნელი მიკრობიოლოგიური, ფიზიკური თუ ქიმიური საფრთხის ალბათობა და მიიღება ზომები მათი პრევენციის ან დასაშვებ დონემდე შემცირების მიზნით.

„ეივონი“ საქართველოშია

კოსმეტიკურმა კომპანია „ეივონმა“ საქართველოს წარმომადგენლობის ოფიციალურად გახსნა სასტუმრო „ქორთიარდ მარიოტში“ გამართული ორდღიანი გრანდიოზული პრეზენტაციით აღნიშნა. კომპანიის ისტორია, რომელიც დღეისათვის მსოფლიოს 100-ზე მეტი ქვეყნის მანდილოსნებს ხელმისაწვდომ ფასად ხარისხიან პროდუქციასაც სთავაზობს და დასაქმებასაც, 1886 წელს აშშ-ში დაიწყო. ინგლისური ლიტერატურის პირდაპირი გაყიდვების აგენტი, შემდგომში კი კომპანია „ეივონის“ დამფუძნებელი დევიდ მაკკონელი კარდაკარ დადიოდა და წიგნებს ავრცელებდა, სანამ წიგნების გაყიდვიდან სუნამოების რეალიზაციაზე არ გადავიდა. კომპანია სწრაფად გაიზარდა, „ეივონის“ პირველი წარმომადგენელი ქალბატონი - სახელად ელბი კი აშშ-ის ისტორიაში ერთ-ერთი პირველი დასაქმებული ქალის სახელით შევიდა.

დღეისათვის „ეივონი“ ერთ-ერთი ლიდერი კომპანიაა კოსმეტიკური პროდუქციის პირდაპირი გაყიდვების ბაზარზე. კომპანიის გაყიდვების წარმომადგენელთა რიცხვმა 5 მილიონს გადააჭარბა, გასული წლის შემოსავალმა კი 10,6 მილიარდი დოლარი შეადგინა.

რაც შეეხება საქართველოს, „ეივონ კოსმეტიკს საქართველოს“ მარკეტინგის სამსახურის კოორდინატორის, ნუცა სოსებაშვილის ინფორმაციით, კომპანიამ ოთხი ოფისი თბილისში გახსნა, თითო - თითო კი - ბათუმში, ქუთაისში, რუსთავში, ქუთაისში, თელავში, ზუგდიდსა და გორში. პრეზენტაციის დღემდე კომპანიას 200 წარმომადგენელი ჰყავდა, თუმცა, მანდილოსნებმა შესაშური აქტიურობა გამოიჩინეს და „ეივონთან“ თანამშრომლობის სურვილი ღონისძიების მიმდინარეობისასვე ოფიციალურად დააფიქსირეს. კომპანიის პრეზიდენტმა ლორენ ბოდონმა პრესკონფერენციისას აღნიშნა კიდეც: კავკასიის ქვეყნებიდან პირველად საქართველოში შემოსვლა იმიტომ გადავწყვიტეთ, რომ, გამოკვლევების თანახმად, ქართველი ქალბატონები ბიზნესის განვითარების კუთხით ყველაზე აქტიურები და ინტელექტუალურები არიანო...

„ეივონის“ პროდუქცია გერმანიაში, პოლონეთსა და რუსეთში მდებარე ფაბრიკებში მზადდება. საქართველოში წარმოების ამოქმედება არ იგეგმება, თუმცა, კომპანია ჩვენს ქვეყანაში უზარმაზარი საწყობის გახსნას აპირებს. უკვე მოქმედებს ქართულენოვანი ვებ-გვერდი, სადაც დაწვრილებით შეგიძლიათ გაეცნოთ „ეივონის“ პროდუქციასაც და დასაქმების პირობებსაც: www.avon.ge

საგულისხმოა, რომ ისეთმა ცნობილმა სამოდელო სახლებმა, როგორებიცაა: კრისტიან ლაკრუა და ემანუელ უნგარო, ექსკლუზიურად „ეივონისთვის“ სუნამოები შექმნეს. 2007 წელს კომპანიის სახე ჰოლივუდის ვარსკვლავი რიზ უიზერსპუნი გახდა.

„ორიფლეიმ - საქართველოს“ საქმიანობა წარმატებულად შეფასდა

კომპანია „ორიფლეიმის“ მფლობელები თბილისს საგანგებო ვიზიტით ესტუმრნენ და ჟურნალისტებს „ორიფლეიმ კავკასიის“ ხელმძღვანელებთან ერთად სამომავლო გეგმები და კომპანიის მიზნები გააცნეს. კომპანიის აღმასრულებელი საბჭოს წევრმა ალექსანდრე აფ იოკნიკმა, უფროსმა აღმასრულებელმა დირექტორმა მაგნუს ბრენსტრომმა, დსთ-ს ბალტიისპირეთის მიმართულების გენერალურმა დირექტორმა იოხან როზენბერგმა და კავკასიისა და მონღოლეთის მიმართულების მმართველმა დირექტორმა იური მიხაილიუკმა განსაკუთრებული აქცენტი მსოფლიო ეკონომიკურ კრიზისზე და ამ კრიზისის პერიოდში კომპანიის სტრატეგიასა და სამოქმედო გეგმებზე გაამახვილეს.

კომპანიის ხელმძღვანელებმა „ორიფლეიმ საქართველოს“ საქმიანობა საკმაოდ წარმატებულად შეაფასეს და განაცხადეს, რომ ეს იმ თანმიმდევრული მუშაობის შედეგია, რომელსაც ხელმძღვანელი, თუ რიგითი თანამშრომელი კეთილსინდისიერად ასრულებს. დღითიდღე იზრდება სილამაზის კონსულტანტების რიცხვიც, როგორც მათ „ორიფლეიმში“ ეძახიან. მაგნუს ბრენსტრომმა თბილისს ამიერკავკასიის დედაქალაქიც კი უწოდა: „აქ ჩავდეთ იმ მასშტაბის ინვესტიცია, რომლის განხორციელებასაც დიდი ხნის მანძილზე ვგეგმავდით და ეს კაპიტალდაბანდება მთელ ამიერკავკასიაზეა გათვლილი“ - განმარტა მან.

„ორიფლეიმის“ ქსელი მსოფლიოს 61 ქვეყანას მოიცავს. 2008 წელს კომპანიის გაყიდვების მოცულობამ მთელი მსოფლიოს მასშტაბით 1,3 მილიარდი ევრო შეადგინა, რაც წინა წლის მაჩვენებელს 43 პროცენტით აღემატება. საქართველოში, სომხეთსა და აზერბაიჯანში ზრდის დადებითი მაჩვენებელმა 50 პროცენტს აღწევს.

კომპანიაში იმედოვნებენ, რომ უმძლავრესი ეკონომიკური კრიზისის მიუხედავად, რომელმაც, ფაქტობრივად, ბიზნესის ყველა სფეროს პრობლემები შეუქმნა, 2009 წელს „ორიფლეიმმა“ 10 პროცენტიანი ზრდა უნდა აჩვენოს. „ჩვენ ვყიდით სილამაზეს, სილამაზე კი არის ის, რაც ნებისმიერ ადამიანს ნებისმიერ დროს აუცილებლად სჭირდება“, - აცხადებენ „ორიფლეიმში“ და ხაზგასმით აღნიშნავენ, რომ კომპანია ეხმარება უმუშევრებს, რათა მათ ადვილად დაძლიონ ეკონომიკური კრიზისი.

უზნაძის ქუჩაზე ახალი სერვის - ცენტრის საზეიმო გახსნის შემდეგ ღონისძიების მონაწილეებმა შოთა რუსთაველის სახელობის სახელმწიფო აკადემიური თეატრის დარბაზში გადაინაცვლეს, სადაც ტოპ-მენეჯერების საპრეზენტაციო გამოსვლებსა და რეგიონული ლიდერების წარმატების ისტორიებს 800-მდე ადამიანი გაეცნო.

ღონისძიება გასულ წელს აქცია „შეაგროვე ლიდერთა მოსავალი“ - ს დროს დაწურული, უკვე კარგად დაღვინებული ყურძნის წვენის დაგემოვნებით დასრულდა.

„მაქსიმალმა“ მომხმარებელს უკაბელო ინტერნეტ- მომსახურება

შესთავაზა კომპანია „მაქსიმალმა“ მომხმარებელს WiMAX-ტექნოლოგიაზე დაფუძნებული მე-4 თაობის უკაბელო ინტერნეტ - მომსახურება შესთავაზა. ახალი ტექნოლოგია მცირე ზომის უკაბელო USB მოდემის საშუალებით ინტერნეტის მიღებას გულისხმობს. მე-4 თაობის უკაბელო ინტერნეტის მიღება დღეისათვის „მაქსიმალის“ დაფარვის ზონაში - თბილისში, წყნეთში, რუსთავში, ფოთსა და ბათუმშია შესაძლებელი.

როგორც კომპანიის აღმასრულებელმა დირექტორმა თეიმურაზ ღოღობერიძემ სასტუმრო „შერატონ მეტეხი - პალასში“ გამართულ პრესკონფერენციაზე განმარტა, „მაქსიმალის“ მე-4 თაობის ინტერნეტის ჩართვა ძალიან მარტივია: მომხმარებელი მიიღებს უკაბელო USB მოდემს, რომელიც პორტატული კომპიუტერებისთვის ძალიან მოსახერხებელია. 2009 წლის განმავლობაში „მაქსიმალის“ დაფარვის ზონა გაფართოვდება და მომსახურება საქართველოს ხვა ქალაქებსა თუ კურორტებზეც ხელმისაწვდომი გახდება.

უკაბელო ინტერნეტის ჩართვის მსურველებმა თბილისში მეტეხის ქუჩის №22-ში მდებარე ოფისს უნდა მიაკითხონ, ბათუმში კი - მომხმარებლებს გამსახურდიას ქუჩის №38-ში მოემსახურებიან.

რაც შეეხება მომსახურების ღირებულებას, ის საკმაოდ ხელმისაწვდომია: ყოველთვიური სააბონენტო გადასახადი 35 ლარიდან იწყება.

„მაქსიმალის“ WiMAX-ტექნოლოგიაზე დაფუძნებული ინტერნეტი გახლავთ უკაბელო ინტერნეტი IEEE 802.16e სტანდარტით, რომელიც 2,3 გიგაჰერც ლიცენზირებულ სიხშირეზე ოპერირებს და მაღალსიჩქარიანი უკაბელო ინტერნეტ - კავშირის პორტაბელურ და ფიქსირებულ ვარიანტებს უზრუნველყოფს.

„მაქსიმალი“ შპს „ვიტელ ჰოლდინგსის“ შვილობილი კომპანიის - შპს „ვიტელ ჯორჯიას“ სავაჭრო ნიშანია. კორპორაცია „ვიტელ ჰოლდინგსი“ სატელეკომუნიკაციო სფეროში მონაცემთა გადაცემის, ხმისა და მობილური სერვისების პროვაიდერი უმსხვილესი მრავალპროფილიანი მოთამაშეა.

„ტყუპების ძველი მარანი“ დღეგრძელობის ელექსირს ასხამს

„ტყუპების ძველმა მარანმა“ სასტუმრო „ძველი მარნის“ პრეზენტაცია და ქვევრის გახსნის ცერემონიალი ერთდროულად გამართა. წინაპრების ფუძეზე, სოფელ ნაფარეულში ტყუპმა ძმებმა გია და გელა გამტკიცულაშვილებმა მამაპაპისეული მარანი აღადგინეს, ვენახები გააშენეს და ქვევრები ჩაყარეს. შატოს ტიპის მეურნეობის სტუმარს შეუძლია მარანი, ღვინის საცავი, ვენახი, საუკუნოვანი საწნახელი დაათვალიეროს, ჩურჩხელები ამოავლოს, თონეში პური ჩააკრას, მწვადი შეწვას... ახალი სასტუმრო და საკონფერენციო დარბაზი ღვინის ტურის ფარგლებში ჩამოსულ უცხოელ და ქართველ ტურისტებს უმასპინძლებს. კომფორტული სასტუმრო, რომლის აშენებაც 200 ათასი ლარი დაჯდა, 24 სტუმარზეა გათვლილი. ნომრის ფასი, დილის საუზმის ჩათვლით, 50-დან 100 ლარამდე მერყეობს. სამომავლოდ ძმებს ხელოვნური ტბის შექმნაც აქვთ გადაწყვეტილი.

ღონისძიებაზე მოწვეულმა სტუმრებმა „მრავალჟამიერის“ ფონზე მოხდილი ქვევრიდან ახლადამოღებული ცოცხალი ღვინო დააგემოვნეს და ღვინის ტურიზმის პერსპექტივებზე ისაუბრეს. ქვევრის მოხდა ისეთივე სადღესასწაულო რიტუალი გახლავთ, როგორც რთველი ან მოსავლის დაბინავება. დაწურული ყურძენი ქვევრში მარტამდე რჩება და ამ პერიოდში ბუნებრივ ფილტრაციას განიცდის. ძველი ტრადიციის თანახმად, ქვევრის მოხდა აუცილებლად სავსე მთვარეს უნდა დაემთხვეს.

ქვევრის ცოცხალი ღვინო „ტევანის“ სახელწოდებით კომპანია „ნიკორას“ საფირმო მაღაზიათა ქსელში იყიდება. ძველი კახური ტრადიციების დაცვით დაყენებული ღვინო დიდი რაოდენობით ტანინს შეიცავს და პოპულარობითაც სარგებლობს. იაპონიაში საქართველოს ეროვნული კულტურის ცენტრის ხელმძღვანელმა დავით ზარიძემ აღნიშნა, რომ იაპონელები აღაფრთოვანა ქვევრის ღვინის ნიმუშის ანალიზმა და მათ ამ შესანიშნავ სასმელს დღეგრძელობის ელექსირი უწოდეს. ამომავალი მზის ქვეყანაში ხომ ეკოლოგიურად სუფთა პროდუქციაზე განსაკუთრებით დიდი მოთხოვნაა... ამჟამად „ტევანის“ იაპონიასა და ბალტიისპირეთში ექსპორტის შესახებ მოლაპარაკებები მიმდინარეობს.

„ტყუპების ღვინის მარანმა“ ვებ-გვერდიც აამოქმედა, რომლის მისამართია: www.twinsoldcellar. ge

„ენერგოავტობუსი“ გვაფრთხილებს და დახმარებასაც გვთავაზობს კომპანია

„BP“-სა და მისი პარტნიორების ახალი პროექტი მოსახლეობას ენერგიისა და ფულის დაზოგვაში დაეხმარება. საუბარია ენერგოეფექტურობის საკითხებზე საინფორმაციო კამპანიის წარმართვასა და ენერგოეფექტური პროდუქციის შეძენაში ოჯახებისთვის ხელშეწყობაზე. პროექტი BP-ს, აშშ-ის საერთაშორისო განვითარების სააგენტოს (USAID), „Winrock International“-ის, ევროპის რეკონსტ რუქციისა და განვითარების ბანკის (EBRD) და ეუთო-ს ქართველი ექსპერტებისა და საქართველოში მოქმედი ბანკების თანამშრომლობის შედეგია და საქართველოში ენერგოეფექტური ტექნოლოგიების დანერგვის სტიმულირებას ისახავს მიზნად.

პროგრამა ორი კომპონენტისგან შედგება. პირველი კომპონენტის ფარგლებში მოსახლეობას მიეწოდება ინფორმაცია მათი ოჯახების ენერგომოხმარების დონის შემცირების სხვადასხვა საშუალებებისა და ენერგოეფექტურ მოწყობილობებში ინვესტირების შესაძლებლობების შესახებ. პროგრამის ამ კომპონენტს ახორციელებს ადგილობრივი არასამთავრობო ორგანიზაცია - საქართველოს ენერგოეფექტურობის ცენტრი, რომელიც ამ მიზნით პრაქტიკული თვალსაჩინოების მეთოდს იყენებს.

ენერგიის დაზოგვის საკითხებზე მოსახლეობის ყურადღების მისაზიდად იმოძრავებს საინფორმაციო და სადემონსტრაციო სატრანსპორტო საშუალება, ე. წ. „ენერგოავტობუსი“. „ექსპოჯორჯიის“ საგამოფენო ცენტრიდან, სადაც ახალი პროექტის პრეზენტაცია გაიმართა, „ენერგოავტობუსი“ თბილისის სხვადასხვა უბნებისაკენ გაემართა, დედაქალაქის მოვლის შემდეგ კი საქართველოს სოფლებსა და ქალაქებს ეწვევა. „ენერგოავტობუსთან“ ერთად იმოგზაურებენ პროექტის ორგანიზატორები, რომლებიც ადგილობრივ მოსახლეობას ჩაუტარებენ კონსულტაციებს საოჯახო მეურნეობებთან ალტერნატიული ენერგიის ისეთი წყაროებისა და ენერგოეფექტური ტექნოლოგიების შესახებ, როგორიცაა: ბიოგაზის დანადგარი, მიკროჰესი, მზის ბატარეების პანელი, ქარის გენერატორი, ნახერხზე მომუშავე გამათბობელი, საიზოლაციო სამუშაოები და სხვა.

პროგრამის მეორე კომპონენტი გულისხმობს შეღავათიანი კრედიტების გაცემას იმ ოჯახებზე, რომლებიც ენერგოეფექტურ ტექნოლოგიებში ინვესტირების სურვილს გამოთქვამენ. BP-ისა და მისი პარტნიორების მიერ გამოყოფილი გრანტების მეშვეობით ოჯახები ენერგოეფექტური პროდუქციისა და დანადგარების შეძენას შეძლებენ. ბანკების ადგილობრივი ფილიალების მეშვეობით გაიცემა EBRD-ის მიერ პროგრამის ფარგლებში გამოყოფილი სესხები.

BP-ის გენერალური მენეჯერი საქართველოში ნილ დანი იმედს გამოთქვამს, რომ ახალი ინიციატივა დაეხმარება საქართველოს მოსახლეობას ენერგიის დამზოგველ ტექნოლოგიებზე მეტი ცოდნის შეძენაში, მათი დანერგვა კი სასიკეთოდ აისახება მათი ოჯახების შემოსავალზე, ქვეყნის ეკოლოგიასა და მთლიანად ეკონომიკაზე.

ნომინანტების დაჯილდოება

საქართველოს სავაჭრო - სამრეწველო პალატამ მცირე და საშუალო ბიზნესის სფეროში წლის საუკეთესო კომპანიები გამოავლინა. კონკურსში 500-მდე ქართული კომპანია მონაწილეობდა. გამარჯვებულები საქართველოს სავაჭრო - სამრეწველო პალატასთან შექმნილმა ბიზნესმენების, ეკონომიკის ექსპერტებისა და მასმედიის წარმომადგენლებისაგან შემდგარმა კომისიამ ოთხ ნომინაციაში გამოავლინა.

ნომინაციაში „საუკეთესო ფერმერი ან აგროფირმა“ გაიმარჯვა მეცხოველეობის ფერმამ შპს „კახაბერი - 2005“. ფერმაში წარმოებული რძის პროდუქცია, უმთავრესად, ბათუმსა და ხელვაჩაურის რაიონს მიეწოდება. ფერმის ბრუნვის მოცულობა, 2007 წელთან შედარებით, 2008 წელს 25 პროცენტით გაიზარდა, ხოლო წარმოების გასაფართოვებლად და წარმოებული პროდუქციის ხარისხის გასაუმჯობესებლად განხორციელებული ინვესტიციის მოცულობამ 85 000 ლარი შეადგინა.

საუკეთესო ექსპორტიორის წოდება მზესუმზირის ნედლეულის გადამამუშავებელ საწარმო შპს „ბათოილს“ მიენიჭა, რომლის ექსპორტის მოცულობა 2008 წელს წინა წელთან შედარებით 20 პროცენტით გაიზარდა. საწარმოს მიერ წარმოებული მთავარი პროდუქტია მზესუმზი რის ზეთი „მზიური“. სამომავლოდ მაიონეზის, ხალვის, მარგარინისა და კეტჩუპის წარმოებაც იგეგმება.

ნომინაციაში „საუკეთესო მცირე საწარმო ან ინდივიდუალური მეწარმე“ საუკეთესო აღმოჩნდა ღვინის მწარმოებელი კომანია შპს „ღვინისა და ვენახების ქართული კარტელი - ვინო - ტერა“. კომპანიის ბრუნვის მოცულობა 2008 წელს, წინა წელთან შედარებით, 157 პროცენტით გაიზარდა.

„საუკეთესო საშუალო საწარმოდ“ კი კომისიამ სამკერვალო ფაბრიკა შპს „უნი სტილი“ მიიჩნია, რომლის ძირითადი საქმიანობა სხვადასხვა სახის უნიფორმის კერვა გახლავთ.

„სახალხო ბანკი“ პილოტურ პროექტს გვთავაზობს

„სახალხო ბანკი“ „VISA საერთაშორისო საგადასახადო სისტემასთან ერთად“ მომხმარებელს შესთავაზებს ინოვაციურ პროდუქტს _ მესამე თაობის საერთაშორისო საგადასახადო ბარათს - „VISA PayWave Card“-ს „CEMEA რეგიონში“, რომელიც ცენტრალურ და აღმოსავლეთ ევროპას, შუა აზიას და აფრიკის ქვეყნებს მოიცავს. VISA payWave 2005 წლიდან ფუნქციონირებს და მასში მსოფლიოს 50 მსხვილი საბანკო ინსტიტუტია ჩართული. უკვე გამოშვებულია რამდენიმე მილიონი ბარათი მთელი მსოფლიოს მასშტაბით. უკონტაქტო ბარათით გადახდა აშშ-ის, კანადის, ინგლისის, საფრანგეთის, ესპანეთის, იტალიის, იაპონიის, ტაივანის, სამხრეთ კორეისა და სხვა ქვეყნების 65 000-ზე მეტ სავაჭრო თუ მომსახურების წერტილშია შესაძლებელი.

„სახალხო ბანკი“ პილოტურ პროექტში თავისი კლიენტი სტუდენტებისა და პედაგოგების ჩართვას გეგმავს, რომლებიც ბარათებით საერთაშორისო მასშტაბით ისარგებლებენ.

მესამე თაობის საერთაშორისო საგადასახადო VISA ბარათი აღჭურვილია მაგნიტური ზოლით, ასევე კონტაქტიანი და უკონტაქტო ჩიპით და მომხმარებელს სამივე ინსტრუმენტის გამოყენების შესაძლებლობას აძლევს. ერთი საბანკო ბარათით შესაძლებელია ხელფასის, პენსიისა თუ დახმარების აღება ბანკომატების მეშვეობით, ასევე საქართველოში და საზღვარგარეთ მდებარე სავაჭრო ობიექტებში სარგებლობა.

„Global Finance“-ის ჯილდო „საქართველოს ბანკმა“ დაისაკუთრა

სააქციო საზოგადოება „საქართველოს ბანკმა“ Global Finance-ის ჯილდო „2009 წლის საუკეთესო ბანკი საქართველოში“ მიიღო. Global Finance - წამყვანი საერთაშორისო გამოცემა გლობალური კაპიტალის ბაზრების შესახებ ყოველწლიურად აქვეყნებს განვითარებადი ბაზრების საუკეთესო ბანკების სიას აზიის რეგიონში, 20 ქვეყნის მასშტაბით. გამოცემა აჯილდოებს ბანკებს, რომელთაც აღენიშნებათ თვალსაჩინო მიღწევები აქტივების ზრდის, შემოსავლიანობისა და სტრატეგიული კავშირების თვალსაზრისით და მომსახურების მაღალი ხარისხით, კონკურენტული ფასებითა და პროდუქტების ინოვაციით გამოირჩევიან. საუკეთესო ბანკების დასახელებაში მონაწილეობენ როგორც Global Finance-ის რედაქტორები, ასევე საფინანსო ინდუსტრიის ანალისტები, კორპორაციული აღმასრულებლები და საბანკო სფეროს კონსულტანტები. Global Finance-ი უკვე მეორე წელია, რაც „საქართველოს ბანკს” საქართველოში წლის საუკეთესო ბანკად ასახელებს.

„კლაასმა“ კლასი საქართველოშიც აჩვენა

CLAAS ACADEMY-მ და საქართველოს აგრარულმა უნივერსიტეტმა შპს „მსოფლიო ტექნიკასთან“ ერთად გამართეს საერთაშორისო საინფორმაციო სემინარი თემაზე: „აგროსამრეწველო კომპლექსის სპეციალისტთა მომზადების თანამედროვე მეთოდიკები“.

კომპანია CLAAS ACADEMY-ს მსოფლიო მასშტაბით სოფლის მეურნეობის დარგში მომუშავე სპეციალისტების მომზადებისა და გადამზადების მდიდარი მრავალწლიანი გამოცდილება გააჩნია და სწავლებისათვის საჭირო უახლეს საინფორმაციო ტექნიკურ და მულტიმედიურ ბაზასაც ფლობს. აქედან გამომდინარე, სემინარის მონაწილეებს მსოფლიოში ყველაზე თანამედროვე სასოფლო - სამეურნეო ტექნიკაზე და სწავლების მეთოდიკაზე უნიკალური ინფორმაციის მიღების საშუალება მიეცათ.

სემინარის დღის წესრიგში იყო CLAAS ACADEMY-ის სწავლების ისეთი თანამედროვე მეთოდების გაცნობა, როგორიცაა: მიწათმოქმედებასა და მემცენარეობაში გამოყენებული ნავიგაციის თანამედროვე სისტემები Telematics, AGRO SCOUT, OUTBACK-S, მოსავლიანობის რუკების შედგენა, ზუსტი მიწათმოქმედებისა და მოსავლიანობის დაგეგმვა და პროცესირება, რომელიც ფირმა „AGROCOM“-მა შეიმუშავა. ასევე, სემინარის ფარგლებში ფირმების - „GRIMME“-სა და „LEMKEN“-ის ტექნიკისა და ტექნოლოგიების პრეზენტაციაც გაიმართა. შეხვედრის მონაწილეებმა ერთმანეთს სოფლის მეურნეობის დარგში სპეციალისტთა მომზადების გამოცდილება გაუზიარეს და განათლების სფეროში თანამშრომლობის პერსპექტივებიც განიხილეს.

ზვიად ბრეგვაძე: შპს „მსოფლიო ტექნიკა,“ სამეთვალყურეო საბჭოს თავმჯდომარე: სემინარის მიზანია, წამყვანმა ევროპულმა ფირმებმა გამოცდილება გაუზიარონ ქართველ პროფესორ - მასწავლებლებსა და ფერმერებს. ხაზგასმით აღვნიშნავ, რომ ჩვენთვის მთავარი ტექნიკის რეკლამა არ გახლავთ. ძალიან მნიშვნელოვანია, ქართველმა სტუდენტებმა და სკოლის მოსწავლეებმა გაიგონ, როგორ სწავლობენ თანამედროვე ახალგაზრდები ევროპაში. ჩვენს პროფესორ - მასწავლებლებს კი სწავლების ამ მეთოდებზე გადართვაში შევუწყოთ ხელი. ევროპელი პარტნიორები გამზადებულ სრულყოფილ მასალას გადმოგვცემენ, ქართველმა მეცნიერებმა მხოლოდ უნდა გადმოაქართულონ და სათანადოდ მოარგონ ქართულ რეალობას. ფერმერებს ვურჩევდი, ტექნიკის ყიდვამდე კარგად დაფიქრდნენ და ყოველი დეტალი გულდასმით აწონ-დაწონონ. დაფიქრება კი მხოლოდ მაშინ მოიტანს სარგებელს, როდესაც ამომწურავ ინფორმაციას ფლობ. სემინარის ასეთი ფორმატი საგანგებოდ შევარჩიეთ: დაინტერესებული პირი პირველ დღეს ინფორმაციას მიიღებს, რათა მეორე დღეს ტექნიკის დათვალიერებისას კონკრეტული შეკითხვებით მიმართოს სპეციალისტებს.

CLAAS ის ფირმაა, რომელიც განსაკუთრებულ ყურადღებას უთმობს მეცნიერებას და მის განვითარებაზე ყოველდღიურად 300 000 ევროს ხარჯავს. პროგრესისკენ ამგვარად მსწრაფი ორგანიზაციის გვერდით დგომაზე მხოლოდ ოცნება თუ შეიძლებოდა. საგულისხმოა, რომ მათ ზოგიერთი პროექტი გვერდზე გადადეს და საქართველოს მიმართულება პრიორიტეტულად მიიჩნიეს.

ზოგიერთი პოტენციური კონკურენტი მხოლოდ ახლა შემოდის ბაზარზე და მათგან ჯერჯერობით მხოლოდ დაპირებები და სურვილები მოდის, ჩვენი საქმიანობის შედეგები კი უკვე ხელშესახებია.

„მსოფლიო ტექნიკამ“ შეიძინა კარტოფილის მოწევისთვის საჭირო ტექნიკის სრული კომპლექტი, რომელსაც ჯერ ვიზუალურად გაეცნობიან სტუდენტები. ისინი კი უშუალოდ დაესწრებიან თესვის, მოვლის, მოსავლის მოწევის პროცესს, ხოლო შემოდგომაზე კი სავაჭრო ორგნიზაციებთან კონტრაქტების გაფორმებასაც დაესწრებიან. რაც ყველაზე ნიშანდობლივია, შეიგრძნობენ, რა ეფექტის მიღება შეიძლება შრომის შედეგად. მომავალ წელს კი, მიღებული გამოცდილების საფუძველზე გაანალიზდება, სად იყო დაშვებული შეცდომა... ასეთი სტუდენტი შინ თუ გარეთ მიწის პრობლემებზე იმსჯელებს და იკამათებს, თავისი მომავალი დანიშნულების დეტალებზე იფიქრებს... ჩვენი ქვეყნის სახელწოდებიდან გამომდინარე, უნდა ვცდილობდეთ, ტყუილუბრალოდ კი არ შევაწუხოთ ქართული მიწა, არამედ, მისგან მაქსიმალური სარგებლის მიღება შევძლოთ. ამისთვის კი ცოდნის მიღებაა საჭირო.

სერგეი ბუტოვი, CLAAS-ის წარმომადგენელი: შესაძლოა, ვინმემ იფიქროს, რომ CLAAS-ი სტუდენტებს ასწავლის და თავის მანქანებზე უამბობს... გადავხედოთ წარსულს: ქარხანა - საწარმოები და უნივერსიტეტები ყოველთვის თანამშრომლობდნენ, რადგან ქარხანას კვალიფიცირებული სპეციალისტები სჭირდება, უნივერსიტეტს კი - თანამედროვე ტექნიკა, რომელსაც ქარხანა უშვებს და რომელზეც უმაღლესი სასწავლებელი ასწავლის იმ კვალიფიცირებულ სპეციალისტს. თუკი გვინდა, რომ ჩვენმა სტუდენტებმა რაღაც განსაკუთრებული შექმნან, ყველაფერ თანამედროვეს უნდა გაეცნონ, ასე რომ, კომპანიის მოგება მინიმალურია ქვეყნისთვის მოტანილ სარგებელთან შედარებით.

იურიდიული კონსულტაცია

შემოსულ კითხვებს პასუხობს ჟურნალ „ბიზნესი და კანონმდებლობის“ ექსპერტი შრომისა და სოციალური დაცვის საკითხებში, ქალბატონი ირინე ღლონტი.

კითხვა: - მეორე თვეა - საავტომობილო კატასტროფის შედეგად ვიმყოფები საავადმყოფო ფურცელზე. ვფიქრობ, არასწორად მიხდიან ბიულეტენის თანხას. მინდა საკუთარი თვალით წავიკითხო და დავრწმუნდე, რომ ჩემი დაწესებულების ადმინისტრაციის გადაწყვეტილება სწორია. გთხოვთ, მაცნობოთ, რომელი საკანონმდებლო აქტით რეგულირდება დროებითი შრომისუუნარობის გამო დახმარების დანიშვნა და გაცემა?

პასუხი: - „დროებითი შრომისუუნარობის გამო დახმარების დანიშვნისა და გაცემის წესი“ დამტკიცებულია საქართველოს შრომის, ჯანმრთელობისა და სოციალური დაცვის მინისტრის 2007 წლის 15 თებერვლის №4816 ბრძანებით - „საქართველოს 2007 წლის სახელმწიფო ბიუჯეტის შესახებ“ კანონის საფუძველზე და ძალაშია 2007 წლის 1 იანვრიდან.

კითხვა: - როგორი წესით მოხდება დროებითი შრომისუუნარობის გამო დახმარების ანაზღაურების გამო ათვლა, როდესაც დასაქმებული ანაზღაურების გარეშე შვებულებაში ყოფნის დროს გახდა ავად?

პასუხი: - მსგავს შემთხვევაში დროებითი შრომისუუნარობის გამო დახმარების ანაზღაურება მოხდება იმ დღიდან, როცა დასაქმებული (მოსამსახურე) უნდა შედგომოდა მუშაობას. თუ დროებითი შრომისუნარიანობა სამუშაოდან განთავისუფლებაზე დავის დროს დადგა, სამუშაოზე აღდგენის შემთხვევაში დროებითი შრომისუუნარობის გამო დახმარების ანაზღაურების ათვლა დაიწყება სამსახურში აღდგენის დღიდან.

კითხვა: - მოხდება თუ არა დროებითი შრომისუუნარობის გამო დახმარების ანაზღაურება, როდესაც პიროვნება ხელშეკრულებით არის მიღებული სამუშაოზე?

პასუხი: - ვადიანი ხელშეკრულების შემთხვევაში დამსაქმებელი დროებითი შრომისუუნარობის გამო დახმარებას ანაზღაურებს მხოლოდ ხელშეკრულების მოქმედების ვადაში.

კითხვა: - დასაქმებულთა რომელ კატეგორიას არ მიეცემა დახმარება დროებითი შრომისუუნარობის გამო?

პასუხი: - დროებითი შრომისუუნარობის გამო დახმარება არ მიეცემათ: პირებს, რომლებმაც ტრავმა მიიღეს დანაშაულებრივი ქმედების გამო, ან განზრახ აყენებენ ზიანს თავიანთ ჯანმრთელობას, მკურნალი ექიმის მიერ დაწესებული რეჟიმის დარღვევისას; თუ დროებითი შრომისუუნარობა გამოწვეულია დაავადებით ან ტრავმით, რომლის უშუალო მიზეზია არაფხიზელი მდგომარეობა (ალკოჰოლური, ნარკოტიკული და სხვა ფსიქოაქტიური ნივთებით თრობა); კანონით დადგენილი წესით სამსახურიდან გადაყენების ან სასამართლოს გადაწყვეტილებით იძულებით მკურნალობის ან სასამართლო - სამედიცინო ექსპერტიზაზე ყოფნის დროს.

კითხვა: - რომელი პერიოდის გამომუშავებიდან გამოიანგარიშება მოსამსახურის შვებულება შრომისუუნარობის გამო?

პასუხი: - მოსამსახურისთვის გასაცემი დროებითი შრომისუუნარობის გამო დახმარების ოდენობის გაანგარიშების ბაზას წარმოადგენს მისი თანამდებობრივი სარგო.

კითხვა: - როგორი წესით მოხდება დროებითი შრომისუუნარობის გამო დახმარების ოდენობის გაანგარიშება, თუ მოსამსახურეს ავადმყოფობის პერიოდში შეეცვალა თანამდებობის სარგო?

პასუხი: - ასეთ შემთხვევაში დახმარების ოდენობა გამოიანგარიშება ძველი თანამდებობრივი სარგოს მიხედვით, ხოლო თანამდებობრივი სარგო შეცვლის დღიდან ახალი თანამდებობრივი სარგოს მიხედვით.

კითხვა: - რა წარმოადგენს დასაქმებულისთვის გასაცემი დროებითი შრომისუუნარობის გამო დახმარების ოდენობის გაანგარიშების ბაზას?

პასუხი: - კანონის თანახმად, დასაქმებულისთვის გასაცემი დროებითი შრომისუუნარობის გამო დახმარების ოდენობის გაანგარიშების ბაზას წარმოადგენს შრომითი ხელშეკრულებით განსაზღვრული შრომის ანაზღაურება, მაგრამ თუ მისი ოდენობა ხელშეკრულებით არ არის განსაზღვრული შრომისუუნარობის დადგომამდე უკანასკნელი 3 თვის განმავლობაში დარიცხული შრომის ანაზღაურების მიხედვით გაანგარიშებული საშუალო თვიური შრომის ანაზღაურება, ასევე უკანასკნელი 3 თვის განმავლობაში დარიცხული შრომის ანაზღაურების მიხედვით გაანგარიშებული თვიური შრომის ანაზღაურება წარმოადგენს გამომუშავებაზე დამოკიდებულ დასაქმებულთა დროებითი შრომისუუნარობის გამო დახმარების ოდენობის გაანგარიშების ბაზას.

კითხვა: - როგორ გადაწყდება ბიულეტენის ანაზღაურების საკითხი, როცა დასაქმებულს არ გააჩნია ბოლო დაწესებულებაში მუშაობის 3 თვის სტაჟი?

პასუხი: - თუ დასაქმებულებს არ გააჩნიათ მოცემული დამსაქმებელთა 3 თვის მუშაობის სტაჟი ან უკანასკნელი 3 თვის განმავლობაში არ მომხდარა შრომის ანაზღაურების დარიცხვა, საშუალო თვიური შრომის ანაზღაურება გამოითვლება მოცემულ დამსაქმებელთან შესაბამისი პროფესიისა და კვალიფიკაციის დასაქმებულისთვის გადახდილი საშუალო თვიური შრომის ანაზღაურებიდან.

კითხვა: - რა თანხები არ მიიღება მხედველობაში დროებითი შრომისუუნარობის გამო დახმარების ოდენობის გამოანგარიშებისას?

პასუხი: - ამ შემთხვევაში მხედველობაში არ მიიღება: ერთდროული სახის დახმარებები, პრემიები და მატერიალური ჯილდოები. ზეგანაკვეთური ანაზღაურება, დანამატები, ერთჯერადი სამუშაოს ანაზღაურება, რომელიც არ წარმოადგენს ძირითადი სამუშაოსთვის მიღებულ გასამრჯელოს.

კითხვა:- გთხოვთ, კონკრეტულად აგვიხსნათ, როგორ განისაზღვრება შრომისუუნარობის გამო დახმარების საერთო თანხა?

პასუხი: - დროებითი შრომისუუნარობის გამო დახმარების საერთო თანხა განისაზღვრება შეჯამებულად საავადმყოფო ფურცლებში მითითებულ თვეებში (ყველა თვეში ცალ-ცალკე). საშუალო დღიური ხელფასის (თანამდებობრივი სარგოს, შრომის ანაზღაურების) გამრავლებით მოცემულ თვეში შრომისუუნარობის გამო გაცდენილ სამუშაო დღეთა რიცხვზე. საშუალო დღიური ხელფასის გამოთვლა ხდება საშუალო თვიური შრომის ანაზღაურების გაყოფით. შრომისუუნარობის თვის სამუშაო დღეთა რიცხვზე. საყურადღებოა, რომ ერთდროულად რამდენიმე დამსაქმებელთან მუშაობის შემთხვევაში დროებითი შრომისუუნარობის გამო დახმარება გაიცემა - ყველა დამსაქმებელთან ცალ-ცალკე.

კითხვა: - პრაქტიკულად, რა უნდა გააკეთოს ავადმყოფმა (ან მისმა პატრონმა) დროებითი შრომისუუნარობის გამო დახმარების მისაღებად?

პასუხი: - დროებითი შრომისუუნარობის გამო დახმარების მისაღებად დამსაქმებელი (მოსამსახურე) წარუდგენს დამსაქმებელს (დაწესებულებას) დროებითი შრომისუუნარობის დამადასტურებელ საბუთს (საავადმყოფო ფურცელს). დამსაქმებელი, დაწესებულება ვალდებულია საავადმყოფო ფურცლის წარდგენიდან 10 დღის განმავლობაში ან აანაზღაუროს დროებითი შრომისუუნარობის გამო დახმარება, ან წერილობითი შეტყობინება გაუგზავნოს დასაქმებულ მოსამსახურეს, - რატომ ეუბნება უარს დახმარების გაცემაზე.

კითხვა: - რა შემთხვევაში არ გაიცემა დახმარება დროებითი შრომისუუნარობის გამო. (უფრო კონკრეტულად, არის თუ არა დაწესებული გარკვეული ვადა ბიულეტენის წარდგენისთვის?)

პასუხი: - დროებითი შრომისუუნარობის გამო დახმარება არ გაეცემა დამსაქმებლისთვის (დაწესებულებისთვის) დროებითი შრომისუუნარობის დამადასტურებელი საბუთის (საავადმყოფო ფურცლის) დახურვიდან 3 თვის შემდეგ წარდგენის შემთხვევაში.

კითხვა: - ვმუშაობ სახელმწიფო დაწესებულებაში, გამიწვიეს სარევიზიო სამსახურში. როცა დავბრუნდი მიუღებელი ხელფასი აღარ მომცეს. მეუბნებიან, კოდექსში არ წერიაო. სწორია ასეთი მოქმედება?

პასუხი: - საქართველოს შრომის კოდექსში (როცა იგი ძალაში შევიდა) ნამდვილად არ იყო შეტანილი სარევიზიო სამსახურში გაწვევის შემთხვევაში დასაქმებულისთვის შრომის ანაზღაურების გაცემა. მოქმედი შრომის კოდექსი ძალაში შევიდა 2006 წლის 4 ივნისიდან, ეს ცვლილება კი მასში შეტანილი იქნა 2006 წლის 27 დეკემბრიდან. ასე რომ, თქვენ დღეისათვის მოქმედი შრომის კოდექსის 36-ე მუხლის მე-4 პუნქტის შესაბამისად, შრომის ანაზღაურება სარევიზიო შეკრებაზე ყოფნის პერიოდში უნდა მოგეცეთ.

კითხვა: - გთხოვთ, გასაგებად აგვიხსნათ, რა არის სავალდებულო წილი?

პასუხი: - სავალდებულო წილი არის ის წილი, რომელიც მამკვიდრებელს (სამკვიდროს დამტოვებლის) შვილებს, მშობლებს და მეუღლეს (ე.ი პირველი რიგის მემკვიდრეებს) ანდერძის შინაარსის მიუხედავად, ეკუთვნის. იგი შეადგენს იმ წილის ნახევარს, რომელიც თითოეულ მათგანს კანონით მემკვიდრეობის დროს უნდა მიეღო, მამკვიდრებლის ანდერძი სხვის სასარგებლოდ რომ არ დაეწერა.

კითხვა: - გადადის თუ არა სავალდებულო წილის მოთხოვნის უფლება მემკვიდრეობით?

პასუხი: - სავალდებულო წილის მოთხოვნის უფლება წარმოიშობა სამკვიდროს გახსნის მომენტიდან და ასეთი მოთხოვნის უფლება გადადის მემკვიდრეობით.

კითხვა: - რა შემთხვევაში შეიძლება შვილს ჩამოერთვას სავალდებულო წილი?

პასუხი: - შვილისთვის სავალდებულო წილის მიღების უფლება შეიძლება ჩამოერთვას მხოლოდ იმ საფუძვლების არსებობისას, რომლებიც იწვევენ მემკვიდრეობის უფლების ჩამორთმევას. აღნიშნული კი, მხოლოდ სასამართლოს წესით რეგულირდება.

კითხვა: - გთხოვთ, განგვიმარტოთ, სამკვიდროს გახსნის დღიდან რამდენ დღეში ეძლევათ სამკვიდრო მოწობა?

პასუხი: - საქართველოს სამოქალაქო კოდექსის 1500-ე მუხლის შესაბამისად, სამკვიდრო მოწმობა ეძლევათ მემკვიდრეებს სამკვიდროს გახსნის დღიდან 6 თვის გასვლის შემდეგ, ნებისმიერ დროს.

კითხვა: - ვინაიდან დედის სიკვდილის შემდეგ გადავწყვიტე, საზღვარგარეთ წავიდე დროებით საცხოვრებლად და სამუშაოდ, შეიძლება სამკვიდრო მოწმობა დაუყოვნებლივ მომცენ? გაცნობებთ, რომ მამა გარდაცვლილი მყავს, დედას კი ჩემს გარდა შვილი არ ჰყოლია.

პასუხი: - დაუყოვნებლივ არა, მაგრამ 6 თვეზე ადრე სამკვიდრო მოწმობის გაცემა შეიძლება იმ შემთხვევაში, თუ სანოტარო ორგანოს მოეპოვება ცნობა, რომ მოწმობის მთხოვნელი პირის გარდა, მამკვიდრებელს სხვა მემკვიდრე არ ჰყოლია.

კითხვა: - ვარ 60 წლის. 10 დღის წინ დამენიშნა პენსია. მინდა ვიმუშაო მაღაზიაში გამყიდველად. აღნიშნულზე მივიღე მისი მფლობელის ნებართვა. მაინტერესებს, მომეცემა თუ არა პენსია მუშაობის პერიოდში?

პასუხი: - კერძო სტრუქტურაში მუშაობის პერიოდში პენსიის გაცემის შეწყვეტა მოქმედი კანონით არ არის გათვალისწინებული. ასე რომ პენსიაც მოგეცემათ და ხელფასიც.

კითხვა: - ვარ 60 წლის, ვმუშაობ საჯარო სამსახურში, შეიძლება დავინიშნო პენსია და მივიღო მუშაობის პერიოდში?

პასუხი: - მოქმედი კანონის შესაბამისად, საჯარო სამსახური ფინანსდება სახელმწიფო ბიუჯეტიდან და მასში მუშაობის გაგრძელების შემთხვევაში პენსია არ მოგეცემათ.

კითხვა: - ვარ 61 წლის, ვცხოვრობ დედაქალაქში, ჩაწერილი ვარ ქუთაისში. დედაქალაქში პენსიის დანიშვნაზე უარი მითხრეს. გთხოვთ, განგვიმარტოთ, რატომ არ შეიძლება, პენსია, რომელიც კერძო სექტორში მუშაობის გაგრძელების შემთხვევაში მეკუთვნის, თბილისში დამენიშნოს?

პასუხი: - თუ თქვენ თბილისში საცხოვრებლად არ ხართ რეგისტრირებული, პენსიის დედაქალაქში დანიშვნისათვის არ არსებობს კანონიერი საფუძველი, ვინაიდან პენსია ინიშნება საცხოვრებლად ჩაწერის ან რეგისტრაციის ადგილის მიხედვით.

კითხვა: - გასულ წელს მოვყევი ავარიაში, რის გამოც გავხდი პირველი ჯგუფის ინვალიდი. ვინაიდან მოთავსებული ვიყავი საავადმყოფოში, 2 თვის განმავლობაში პენსია ვერ მივიღე. შემიწყდება პენსია?

პასუხი: - არ შეგიწყდებათ და არც შეგიჩერდებათ, თუ პენსიის ბოლო მიღების შემდეგ არაუგვიანეს 6 თვის განმავლობაში მიმართავთ მის მისაღებად.

კითხვა: - ვარ მძიმე ავადმყოფი, მინდა დავიდგინო შრომის უნარის შეზღუდვის სტატუსი. ვის მივმართო?

პასუხი: - შრომის უნარის შეზღუდვის სტატუსის განსაზღვრის საკითხზე გირჩევთ, მიმართოთ თქვენი უბნის პოლიკლინიკას. აქვე გაცნობებთ, რომ პენსია მხოლოდ მკვეთრად ან მნიშვნელოვნად გამოხატულ შრომისუნარშეზღუდულ პირებს ენიშნებათ.

კითხვა: - 2008 წლის კუთვნილი შვებულება არ მომცეს, სამუშაოს ნორმალური მსვლელობისთვის ასეა საჭიროო, მეუბნებიან სამსახურში. წინა წლის შვებულებაც 2008 წელში მქონდა გადმოტანილი. რამდენად კანონიერია ეს?

პასუხი: - ეს კანონის დარღვევაა. ვინაიდან მოქმედი შრომის კოდექსის თანახმად, აკრძალულია ანაზღაურებადი შვებულების გადატანა ზედიზედ 2 წლის განმავლობაში.