„24 საათი“, 5.07.05.
„24 საათის“ ინფორმაცია
მწერლის ანათემა

„სულიერების, მეცნიერების და კულტურის აღორძინების და განვითარების“ საერთაშორისო საქველმოქმედო ფონდის აღმასრულებელი მდივნის, გიორგი ზვიადაძის განცხადებით, საქართველოს საპატრიარქო რომანისთვის „ჩვენი უცოდველობა, მამავ“ (გამომცემლობა „ოქტავა“, 2004 წ.) ახალგაზრდა ქართველი მწერალის, ზურაბ მესხის ანათემას აპირებს. რომანი შეულამაზებლად და გულახდილად მოგვითხრობს ახალგაზრდა ქალის ტრაგიკულ ბედზე და ჩვენი ცხოვრების მანკიერ მხარეებს ამხელს. რომანის გმირებს შორის მღვდლებიც არიან; მთავრი გმირი მღვდლის შვილია, მაგრამ საპატრიარქოს რისხვა ერთმა იმ უმნიშვნელო პერსონაჟმა დაიმსახურა, რომელიც რომანში სულ რამდენიმე წინადადებით მოიხსენიება: „ყოფილა ვინმე როენა თუაშვილი... ეკლესიის მთავრობაში ვიღაც გავლენიანი... ეს როენა თუაშვილი ყოფილა მღვდლების კაგებე, თუ რაღაც ეგეთი... ამ თუაშვილს მღვდლები და ეპისკოპოსები ფეხქვეშ ეგებიან თურმე, მიაქვთ საჩუქრები და რაღაცეები, რადგან მაგაზეა დამოკიდებული მათი კარიერა...“ ამ ლიტერატურულ გმირში პატრიარქის რეფერენტს და, ბევრის აზრით, ეკლესიის ყოვლისშემძლე მმართველს, შორენა თეთრუაშვილს თავი ამოუცვნია. „შორენა ძალიან გაბრაზებულა“ - უთქვამს, გაზეთის ცნობით, გიორგი ზვიადაძეს.

„ვერსია“, 8-10.07.05.
სოფო იმნაძე ქუთაისიდან
იეღოველები „დასავლეთ საქართველოს ცენტრს“ აშენებენ

ეს ცენტრი, სტატიის ავტორის ინფორმაციით, ქუთაისში იეღოველების მიერ შეძენილი ძველი სახლის ადგილზე უნდა მოეწყოს. „სექტანტებმა ე.წ. საოფისე ადგილი მიზანმიმართულად შეარჩიეს. ტაბიძის ქუჩა ქუთაისის ერთ-ერთი მჭიდროდ დასახლებული უბანია, აქვეა მე-2 საშუალო სკოლა, ბაღი და სამშობიარო სახლი“, - აღნიშნულია სტატიაში. გასულ კვირას ქუჩის მაცხოვრებლებმა მომავალ „ცენტრს“ ფანჯრები ჩაულეწეს და მის შესასვლელთან რკინის ჯვარი აღმართეს. გარდა ამისა უკვე შეგროვებულია 2000-მდე ხელმოწერა, რათა „სექტანტებს“ მშენებლობის უფლება არ მიეცეთ.

„ახალი თაობა“, 16.07.05.
შორენა კოკორაშვილი
იუსტიციის სამინისტროსა და საპატრიარქოს შორის ხელშეკრულება დაიდო

გაზეთის ინფორმაციით, 15 ივლისს კათოლიკოს-პატრიარქი ილია მეორე საპატრიარქოსთან არსებული რელიგიური საბჭოს წევრებს შეხვდა. შეხვედრაზე სხვა კონფესიებისადმი სტატუსის მინიჭების საკითხი განიხილეს, ისაუბრეს არმიაში და პენიტენციალურ დაწესებულებებში კაპელანის ინსტიტუტის შემოღების შესახებაც. საბჭომ განიხილა ინიციატივა, რომლის მიხედვითაც მსჯავრდებულებს სასჯელის მოხდა მონასტრებში შეეძლებათ. აქვე გაზეთში იუსტიციის მინისტრის კოტე კემულარიას სიტყვებია მოყვანილი, რომელიც მოწმობს, რომ საპატრიარქოს და იუსტიციის სამინისტროს შორის გაფორმებულა ხელშეკრულება, რომელიც, მინისტრის სიტყვებით, „ითვალისწინებს ალტერნატიული სასჯელის მოხდას ტაძრების მშენებლობაზე“.

„ახალი შვიდი დღე“, 15-21.07.05.
მარინე ჯანიაშვილი
სახალხო დამცველი და რელიგიური ექსტრემიზმის მსხვერპლნი

სახალხო დამცველის აპარატთან დაფუძნებულმა რელიგიათა საბჭომ, რომელიც ოცამდე რელიგიურ მიმდინარეობას აერთიანებს, 13 ივლისს ომბუდსმენის ოფისში პრესკონფერენცია გამართა. პრესკონფერენციაზე რელიგიურ ნიადაგზე ბოლო სამი თვის განმავლობაში მომხდარი თავდასხმების და რელიგიური უმცირესობების დისკრიმინაციის თაობაზე ომბუდსმენის ოფისში „ცხელი ხაზით“ შემოსული 12 განცხადება განიხილეს.

პუბლიკაციაში მოყვანილია შემდეგი ფაქტები:

20 აპრილს უცნობმა მამაკაცმა სიტყვიერი და ფიზიკური შეურაცხყოფა მიაყენა იეღოვას მოწმეებს - ლ. ცხოვრებაძეს და გ. პავლიაშვილს, რადგან ამ უკანასკნელებმა მისი დამოძღვრა სცადეს. დაზარალებულბის მიერ გამოძახებულმა საპატრულო პოლიციამ მათ თავისი მხრიდანაც მიაყენა სიტყვიერი შეურაცხყოფა, ხოლო მხარდაჭერით შეგულიანებულმა მამაკაცმა იეღოვას მოწმეებს ხელმეორედ სცემა. სახალხო დამცველის ოფისის თანასწორობისა და თავისუფლების სამმართველოს უფროსმა ბექა მინდიაშვილმა ინციდენტის გასარკვევად წერილით მიმართა თბილისის საპატრულო პოლიციის სამმართველოს უფროსს გიორგი გრიგალაშვილს, რომლის პასუხში ნათქვამია, რომ პოლიციის გამოძახება არ დასტურდება.

5 ივლისს ომბუდსმენის ოფისს მიმართა საერთშორისო ქრისტიანული საქველმოქმედო-ჰუმანიტარული კავშირის ხელმძღვანელმა, პროტესტანტული ეკლესიის ერთ-ერთი განშტოების „ღმერთის საელჩოს“ პასტორმა გიორგი ბარბაქაძემ. მის განცხადებაში ნათქვამია, რომ ივნისში საპატრულო პოლიციის თანამშრომელმა გიორგი შარაშენიძემ და მის მიერ გამოძახებულმა გლდანის პოლიციის სამმართველოს თანამშრომლებმა მას და მის თანამოძმეებს მუქარის გამოყენებით შეაწყვეტინეს ჰუმანიტარული აქცია - მოძრავი კინოპროექტორის საშუალებით ფილმ „იესოს“ ჩვენება მუხიანის დასახლებაში. სახალხო დამცველის აპარატის მიერ მიმდინარეობს ფაქტის შესწავლა.

3 მაისს სახალხო დამცველს განცხადებით მიმართა ბოლნისის რაიონის მკვიდრმა, იეღოვას მოწმემ ს. ხაჩატურიანმა. ის აცხადებდა, რომ გამწვევი კომისიის მიერ მოტყუებით იყო გაწვეული სავალდებულო სახედრო სამსახურში, მაშინ როდესაც მრწამსიდან გამომდინარე ალტერნატიულ სამხედრო სამსახურში წასვლას ითხოვდა. სახალხო დამცველის ჩარევის შემდეგ ხაჩატურიანი გადაყვანილი იქნა ალტერნატიულ სამსახურში.

პრესკონფერენციაზე სიტყვით გამოსულმა სახალხო დამცველმა ხაზი გაუსვა რელიგიური ექსტრემიზმის გამოვლენის ზრდის ტენდენციას და აღნიშნა, რომ მისი ოფისის რეკომენდაციების მიუხედავად, პოლიციამ და პროკურატურამ განცხადებების დიდი უმრავლესობა რეაგირების გარეშე დატოვა.

„ქრონიკა“, 18-24.07.05.
ლევან ცალუღელაშვილი
რატომ ურტყამენ და აგინებენ საქართველოში „იეღოველებს“ ყველაზე ხშირად

„რელიგიურ შეუწყნარებლობას და ექსტრემიზმს საქართველოში, როგორც ჩანს, ვერც ბასილი მკალავიშვილის დაპატიმრებამ უშველა და ვერც რელიგიური საბჭოების ხელმოწერებით გაჭრელებულმა მემორანდუმებმა. იეღოვას მოწმეებს ისევ გამეტებით ურტყამენ.“ - წერს შესავალში ჟურნალისტი და იმ პრესკონფერენციის შესახებ მსჯელობს, რომელიც სახალხო დამცველის ოფისში 13 ივლისს გაიმართა. მართალია, წერს პუბლიკაციის ავტორი, სახალხო დამცველის ინფორმაციით, ევანგელური ეკლესიის „სიცოცხლის სიტყვის“ მქადაგებლებს ია ჯინჭველაშვილს და გაიოზ შვანგირაძეს ზუგდიდის რაიონის სოფელ ზემო ორსაანტის გამგებელი დაემუქრა და ქადაგება აუკრძალა, მაგრამ ომბუდსმენის აპარატს „მხოლოდ იეღოველების ცემა-ტყეპის ფაქტები აქვს“. „იეღოველებისთვის ღონივრად მოქნეული მამაპაპური მუშტის“ ასახსნელად კი გაზეთი შეთქმულების საკმაოდ ჩახლართულ თეორიას გვთავაზობს: „წამებულების იმიჯი იეღოველებისთვის მომგებიანი იმიტომ არის, რომ ისინი ამ დროს თავს გოლგოთაზე მიმავალ ქრისტეს ადარებენ. არასამთავრობო ორგანიზაციები მათ დასაცავათ გრანტებს იჯიბავენ, სახალხო დამცველს მუშაობაში ეთვლება... ბასილი მკალავიშვილი ციხეშია, ვიღას „შესჩივლონ“ უსაქმურად დარჩენილმა „ინსტიტუტებმა“? გამოსავალი ერთადერთია: აცემინოს „იეღოვას მოწმემ“ თავი ვიღაცას, ვისაც ამ რელიგიურად აღტკინებულის მოსმენის ნერვები არა აქვს...“ „ქრონიკა“ აცხადებს, რომ მისი დაკვირვებით, ეს სქემა წარმატებით მუშაობს.

„ხვალინდელი დღე“, 21.07.05.
ნათია ინაური (ინტერპრესნიუსი)
ყველა რელიგიური მიმდინარეობა ერთმანეთს გაუთანაბრდება?

ჟურნალისტი ესაუბრება საქართველოს სახალხო დამცველს სოზარ სუბარს. საუბრის თემაა კანონპროექტი „სინდისის თავისუფლებისა და რელიგიური ორგანიზაციების შესახებ“, რომელიც ომბუდსმენის ოფისში მუშავდება და რომელსაც, როგორც გაზეთი ვარაუდობს, საზოგადოებაში უამრავი მოწინააღმდეგე ეყოლება, ვინაიდან ამ კანონპროექტის მიხედვით ყველა რელიგიური მიმდინარეობა, „იქნება ეს კანონიკური თუ ე.წ. სექტანტური“, მართლმადიდებელ ეკლესისას უთანაბრდება

სუბარის თანახმად, საკანონმდებლო ინიციატივა იმან განაპირობა, რომ საქართველოში მოქმედი რამოდენიმე ეკლესიისთვის, მათ შორის სომხური სამოციქულო და რომის კათოლიკური ეკლესიებისათვის, მიუღებელი აღმოჩნდა პარლამენტის იურიდიული კომიტეტის მიერ წარმოდგენილი სამოქალაქო კოდექსში შეტანილი ცვლილებები, რომლის მიხედვითაც ნებისმიერ რელიგიურ მიმდინარეობას შეეძლება რეგისტრაციაში გატარდეს კერძო სამართლის იურიდიული პირის სტატუსით. რელიგიური ორგანიზაციისათვის საჯარო პირის იურიდიული სტატუსის მისანიჭებლად კი ან სპეციალური კანონი უნდა მიიღონ, ან ხელშეკრულება გააფორმონ სახელმწიფოსთან. ომბუდსმენი არცერთ გზას არ გამორიცხავს. მისი სიტყვებით, თუ რელიგიური ორგანიზაციები ხელშეკრულების გზას აირჩევენ, მათთან ისეთი ხელშეკრულება, როგორიც მართლმადიდებელ ეკლესიასა და სახელმწიფოს შორის კონკორდატია, არ დაიდება. ის სხვა რანგის ხელშეკრულება იქნება, რომლის თანახმადაც სახელმწიფო აღიარებს ამა თუ იმ ეკლესიის სტატუსს და მის უფლებრივ მდგომარეობას. რაც შეეხება „სექტანტების“ მართლმადიდებლებთან გათანაბრებას, სახალხო დამცველი აცხადებს, რომ „კანონი სექტანტს და არა სექტანტს ვერ გამოჰყოფს, ანუ იგი ყველა რელიგიურ ჯგუფზე ერთნაირად ვრცელდება, და საქართველოში ყველას უფლებები თანაბრად უნდა იყოს დაცული“.

„რეზონანსი“, 22.07.05.
ხათუნა ომანიძე
თუ „იეღოველები“ დარჩებიან, აქ შეიძლება მკვლელობა მოხდეს

ქუთაისში უკიდურესად გამწვავდა კონფლიქტი რელიგიურ ნიადაგზე. გალაკტიონ ტაბიძის ქუჩის მაცხოვრებლები კატეგორიულად ეწინააღმდეგებიან „სექტანტების“ ფარულ ზრახვებს. ისინი დარწმუნებულნი არინ, რომ იეღოვას მოწმეებმა მათ ქუჩაზე ძველი სახლი ფარული მიზნით შეიძინეს და მისი რეკონსტრუქციის შემდეგ იქ მთელი დასავლეთ საქართველოს იეღოველთა ცენტრი ამოქმედდება. სახლის მეპატრონეები ამას უარყოფენ. საქმე, როგორც წერს ჟურნალისტი, ფიზიკურ შეხლა-შემოხლამდეც კი მივიდა - არა ერთი მუქარის შემდეგ ქუჩის მაცხოვრებლებმა იეღოველებს ქვები დაუშინეს და ერთ-ერთ მათგანს თავში მოახვედრეს. მომხდარზე საქმე ხულიგნობის მუხლით აღიძრა, მაგრამ რაიონის პროკურორის მოადგილის გოგიტა გოგლიჩიძის განცხადებით, დამნაშავის დადგენა ვერ ხერხდება. იეღოვას მოწმეთა ადვოკატის მანუჩარ ციმინტიას სიტყვებით კი, დაზარალებულებმა მოძალადის ვინაობა მშვენივრად იციან და მისი გვარი პროკურატურასაც დაუსახელეს.

ქალაქის არქიტექტურულმა სამსახურმა მიიღო გადაწყვეტილება იეღოვას მოწმეების მიერ შეძენილ სახლში უნებართვო სარემონტო სამუშაოების შეჩერების თაობაზე. დაცვის მხარე ამტკიცებს, რომ სახლის მფლობელები მხოლოდ სახურავის ფილებს ცვლიდნენ, რასაც, კანონის მიხედვით, არავითარი ნებართვა არ სჭირდება. თავისუფლების ინსტიტუტის წევრმა თეა თუთბერიძემ არქიტექტურის სამსახურის გადაწყვეტილებას დისკრიმინაციული უწოდა და გენერალური პროკურორის ჩარევით დაიმუქრა. ჯერჯერობით კი, წერს ჟურნალისტი, „ზედ იეღოველების სახლთან მეუფე კალისტრატეს კურთხევით დიდი რკინის ჯვარი დაიდგა“.

„ალია“, 23-25.07.05.
კავკას-პრესი
ბასილი მკალავიშვილის სააპელაციო სასამართლო განახლდა

საოლქო სასამრთლოში ბასილი მკალავიშვილისა და პეტრე ივანიძის სააპელაციო პროცესი განახლდა. მათი ადვოკატები აპროტესტებენ ვაკე-საბურთალოს სასამართლოს გადაწყვეტილებას, რომლის მიხედვითაც „ბაპტისტურ-ევანგელისტური ლიტერატურის განადგურებისათვის“ ბასილ მკალავიშვილს 7, ხოლო პეტრე ივანიძეს 6 წლით თავისუფლების აღკვეთა მიესაჯათ. სხდომაზე დაცვის მხარის ორი მოწმე დაკითხეს. სასამართლოს მორიგი სხდომა 29 ივლისს გაიმართება.

„ქრონიკა“, 25-31, 07.05.
რუბრიკა „რელიგია“
საქართველოში ქრისტიანულ ეკლესიათა ეკუმენური საბჭო მოქმედებს

რელიგიურმა საბჭომ, რომელიც საპატრიარქოში შეიქმნა, მუშობა დაიწყო, და მის პირველ შეხვედრაზე სომხურმა და კათოლიკურმა ეკლესიამ თავიანთ სტატუსთან დაკავშირებულ პრობლემებზე ისაუბრეს. „შეხვედრაზე ცნობილი გახდა, რომ საქართველოში ქრისტიანულ ეკლესიათა ეკუმენური საბჭო მოქმედებს, რომელიც საქართველოს ყველა კონფესიას აერთიანებს.“

„ქრონიკა“, 25-31, 07.05.
ლევან ცალუღელაშვილი

„მეუფე ნიკოლოზმა მეუფე ვაზგენს, სომხების ეპისკოპოსს, სატელეფონო საუბარში უთხრა, ჩვენ შორის სისხლია დაღვრილი და დიალოგზე ვერ წამოვალო“...

გაზეთი აღწერს ახალქალაქის რაიონის სოფელ სამსარაში 17 ივლისს მომხდარ ინციდენტს, რომლის დროსაც ადგილობრივი სომხები ფიზიკურად გაუსწოდნენ თბილისიდან საპატრიარქოს ინიციატივით ჩასულ ქართველ სტუდენტებს და მათ თანმხლებ ოთხ მონაზონს. რამოდენიმე ადამიანს, მათ შორის ორ მონაზონს, სამედიცინო დახმარებაც კი დასჭირდა. თვითმხილველები, წერს გაზეთი, აცხადებენ, რომ ნაცემთა შორის არიან სომეხი ახალგაზრდებიც, რომლებიც სტუმრების დაცვას შეეცადნენ.

პუბლიკაციაში მოყვანილია სახალხო დამცველის აპარატის წარმომადგენლის ბექა მინდიაშვილის მონათხრობი, საიდანაც ვიგებთ, რომ პირველ დღეს სოფლის მოსახლეობას კარგი შეხვედრა მოუწყვია ჩასულებისათვის, მაგრამ მეორე დღეს, როდესაც სტუმრებს სოფლის პატარა ძველ ეკლესიაში, რომლის კუთვნილებაც დღემდე სომხური და ქართული ეკლესიების დავის საგანია, რელიგიური რიტუალის ჩატარება უცდიათ, მოსახლეობა შეწინააღმდეგებია. საპასუხოდ თბილისელმა სტუდენტებმა ეკლესიის თავზე ქართული დროშა აღმართეს, რასაც უკვე ცემა-ტყეპა მოჰყვა.

მინდიაშვილის თანახმად, ახალქალაქის გამგებელმა არაფერი იცოდა საპატრიარქოს მიერ მოწყობილი რელიგიური დატვირთვის მქონე ექსპედიციის შესახებ. მართალია, ასეთი ლაშქრობების მიმართ ადგილობრივი მოსახლეობის ნეგატიური დამოკიდებულება პროგნოზირებადი იყო, მაგრამ მხარის ეპარქიის მეთაურმა მეუფე ნიკოლოზმა გამგეობას ექსპედიციის თაობაზე არაფერი შეატყობინა, ასევე არაფერი შეატყობინა სომეხ სასულიერო პირებს, რომლებთანაც საერთოდ არავითარი კონტაქტი არ აქვს; მეტიც, როდესაც მას სომხური ეკლესიის ეპარქიის მეთაური ვაზგენი დაუკავშირდა ტელეფონით, სავარაუდოდ იმისთვის, რომ კონფლიქტი ერთად დაერეგულირებინათ, მეუფე ნიკოლოზმა უპასუხა: ჩვენ შორის სისხლია(?) და ამის გამო დიალოგზე ვერ წამოვალო. ეს ამბავი მეუფე ნიკოლოზმა თვითონ მოუთხრო სახალხო დამცველს და ბექა მინდიაშვილს.

„ქრონიკამ“ სცადა მასთან ინტერვიუ, მაგრამ კატეგორიული უარი მიიღო. მოგვიანებით სომხური ეპარქიის მეთაურმა, ვაზგენ მირზახანიანმა ქართველ ხალხს და სამღვდელოებას საჯაროდ მოუხადა ბოდიში მომხდარის გამო.

„ხვალინდელი დღე“, 26.07.05.
ინტერპრესნიუსი
გიორგი ანდრიაძე მკვლელობების სერიაზე საუბრობს

საპატრიარქოს ყოფილი საპარლამენტო მდივანი, ამჟამად არასამთავრობო ორგანიზაცია „ნაციონალური ლობის“ ხელმძღვანელი, გიორგი ანდრიაძე ვარაუდობს, რომ საქართველოს ეკლესიაზე შეტევის მორიგ რაუნდს შეიძლება წინ „უბედურ შემთხვევათა“ სერია უსწრებდეს, რომლთა მსხვერპლი რამდენიმე ადამიანი გახდება, მათ შორის თვით ანდრიაძეც. ამის საფუძველს ანდრიაძეს ის ჭორები აძლევს, რომელიც მჭიდროდ უკავშირდება წიგნს - „ჩვენი უცოდველობა, მამავ“, რომლის ირგვლივ, ანდრიაძის თქმით, ხელოვნური აჟიოტაჟია ატეხილი - ეს წიგნი ამზადებს საზოგადოებას, რათა იგი გაგებით შეხვდეს „საეკლესიო თემასთან დაკავშირებული პირების პიკანტურ ადგილებსა და გარემოებებში უბედური შემთხვევით გარდაცვალებას. ამით კი დამკვეთნი ორ კურდღელს დაიჭერენ - ადამიანსაც მოიშორებენ და სახელსაც შეულახავენ“.

„საქართველოს რესპუბლიკა“, 28.07.05.
ლია ჭიღლაძე
მიაყრიან ახლა ბავშვებს სექტანტურ ლიტერატურას

ჟურნალისტს მოჰყავს თავისუფლების ინსტიტუტის წევრის გორგი მელაძის განცხადება იმის თაობაზე, რომ სახელმწიფო სკოლების ბიბლიოთეკებში შეიძლება ნებისმიერი სახის ლიტერატურა შევიდეს, მათ შორის რელიგიურიც, ოღონდ ყველანაირი რელიგიის შესახებ ლიტერატურა თანაბარი უფლებით უნდა სარგებლობდეს. რელიგიური სიმბოლიკა არ უნდა გამოფინონ. მასწავლებელს, როგორც სახელმწიფოს წარმომადგენელს, ჯვრის ან სხვა რელიგიური სიმბოლოს გამოსაჩენ ადგილას ტარება უნდა აეკრძალოს და ა.შ. და ამ განცხადებაზე კომენტარს საპატრიარქოს სასწავლო კომიტეტის თამჯდომარეს, მამა გიორგი გამრეკელს სთხოვს.

მამა გიორგის მიაჩნია, რომ სასკოლო ბიბლიოთეკაში ლიტერატურა მკაცრად უნდა შეირჩეს სასკოლო პროგრამების შესაბამისად. სკოლებში „სწავლა-განათლების და არა თვითნებობის გარემო უნდა შეიქმნას“. იგი თვლის, რომ მთავარი დამკვეთი სკოლაში მშობელია და ზემოხსენებული მიდგომა მშობლის უფლებების დარღვევადაც მიაჩნია. რაც შეეხება რელიგიური სიმბოლოების ტარებას, პროტოპრესვიტერის სიტყვებით, ეს „აღმასრებლობის გულწრფელი აღიარებაა... თუკი ყველას აუკრძალავენ ნიშნის ტარებას, მაშინ ჩვენ ვაიძულებთ, რომ ათეისტური გამოსახულება ატარონ, ანუ ურწმუნოება. ეს რა, არ არის ათეიზმის პროპაგანდა?“

ჟურნალისტის შეკითხვაზე, მისაღებია თუ არა ზოგადი განათლების კანონის ის პუნქტი, რომელიც კრძალავს ცენზურას სკოლის ბიბლიოთეკაში, მამა გიორგი პასუხობს: „ნუ გვაშინებენ სიტყვა ცენზურით, თუ ცენზურის უკან დგას პედაგოგის გულისხმიერი პოზიცია... ის ცენზორი კი არ იქნება, არამედ წინამძღოლი წიგნის სამყაროში.“ მამა გიორგის უკვირს, რატომ უნდა მოქმედებდეს განათლების სამინისტრო თავისუფლების ინსტიტუტის დიქტატის ქვეშ და არ ისმენდეს ეკლესიის შეგონებას. იგი იმედს არ კარგავს, რომ საპარტრიარქოსა და სამინისტროს შორის ურთიერთგაგება მიიღწევა.

მიმდინარე თვის რელიგიურ პრესაში წინა თვეებისაგან განსხვავებული ტენდენციები არ შეინიშნება.