„საპატრიარქოს უწყებანი“ 24 მაისს კონსტანტინოპოლში გამართულ პანორთოდოქსული სინოდის სხდომას აშუქებს, რომელმაც იერუსალიმის საპატრიარქოში წმინდა სინოდის მიერ პატრიარქ ირინეოსის გადაყენება და კორუფციული გარიგების გამო შექმნილი კრიზისული მდგომარეობა განიხილა. შეკრებას საქართველოს საპატრიარქოს დელეგაციაც ესწრებოდა. „საპატრიარქოს უწყებანი“ დელეგაციის ერთ-ერთ წევრთან, თბილისის საღვთისმეტყველო ინსტიტუტის პრორექტორ, დეკანოზ გიორგი ზვიადაძესთან ინტერვიუს ბეჭდავს.

კითხვაზე, თუ როგორ წარიმართა სინოდის სხდომა, მამა გიორგი პასუხობს: „სამწუხაროდ, სერბეთის, ბულგარეთის, ჩეხეთისა და სლოვაკიის ეკლესიის წარმომადგენლობამ კრებაში მონაწილეობა ვერ მიიღო. სხდომას არ ესწრებოდნენ ჟურნალისტები. აზრის გამოთქმის საშუალება ყველა ეკლესიის დელეგაციას მიეცა. კონსტანტინოპოლის პატრიარქმა იმ მიზეზის შესახებ ისაუბრა, რამაც ეს შეკრება განაპირობა. შემდეგ ალექსანდრიის პატრიარქმა ისაუბრა, ბოლოს კი - უნეტარესმა ირინეოსმა. როგორც დეკანოზი გიორგი აღნიშნავს, პატრიარქ ირინეოსის ზხრით, მისი ბრალეულობა დადასტურებული არ არის, და შესაბამისად, იგი იერუსალიმის პატრიარქად რჩება.“

კითხვაზე, როგორი იყო საქართველოს ეკლესიის პოზიცია, მამა გიორგი პასუხობს: „პატრიარქ ირინეოსის ბრალეულობის დამადასტურებელი არანაირი საბუთი წარმოდგენილი არ ყოფილა, ამიტომ საქართველოს დელეგაციამ მხარი კანონიკურობას, საეკლესიო სამართალს და საეკლესიო ღირსებას დაუჭირა, ანუ იმას, რომ ეს საკითხები უფრო გამოწვლილვით შესწავლილიყო და ამის შემდეგ გამართულიყო შეხვედრები, ამა თუ იმ საქციელის შესაფასებლად.“ („საპატრიარქოს უწყებანი“, №21. 2-8.06.05).

გლობალიზაციის პროცესზე და მის უარყოფით შედეგებზე კვლავ ამახვილებს ყურადღებას გაზეთი „აცხოვნე სული შენი“. გაზეთი ილაშქრებს პლასტიკური პირადობის მოწმობებისა და ე.წ. ბიომეტრული პასპორტების წინააღმდეგ. გაზეთის ინფორმაციით, ევროპისა და ამერიკის კვალდაკვალ ბიომეტრიული პასპორტები რუსეთშიც გაჩნდება: „ა.წ. გაზაფხულიდან რუსეთის ხელისუფლების ყველა წევრი და სახელმწიფო დუმის დეპუტატები ვალდებულნი არიან მიკროჩიპი არა მხოლოდ პირადობის მოწმობით ატარონ, არამედ საკუთარი ორგანიზმითაც. ეს ჩიპი შეიცავს არა მხოლოდ ყველანაირ მონაცემს პატრონის შესახებ, არამედ ყოველ წუთს გამოავლენს მის ადგილმდებარეობას“. (ინფორმაცია მომზადებულია გაზეთ „სობესედნიკის“ მასალების მიხედვით).

იქვე ქვეყნდება ინფორმაცია მართლმადიდებელთა მასობრივი ანტიგლობალისტური აქციების შესახებ უკრაინაში, რომლის შედეგად დიდი კონფერენცია იქნა მოწვეული. კონფერენციაში როგორც სასულიერო პირებმა, ასევე ჩვეულებრივმა მორწმუნეებმაც მონაწილეობა მიიღეს. „კონფერენციაზე ერთხმად აღიარეს, რომ ამჟამად მსოფლიოში მიმდინარე გლობალიზაციის პროცესი უშუალო კავშირშია აპოსტასიასთან, რომელიც ამზადებს ანტიქრისტეს გამეფებას. ამის ძირითადი ინსტრუმენტი კი მთელ მსოფლიოში ადამიანთა იძულებითი კოდიფიცირებაა“. („აცხოვნე სული შენი“ №5, 06.05).

ჟურნალი „კრიალოსანი“ ბეჭდავს სტატიას სათაურით „მამა პაისის წინასწარმეტყველებანი“. მამა პაისი წინასწარმეტყველებს: „რუსები დაიკავებენ თურქეთს, ეს უკანასკნელი კი გაქრება მსოფლიო რუკიდან. შუა აზია ომების ასპარეზი გახდება... ჩინელები მდინარე ევფრატსაც კი გადმოლახავენ 200.000.000 არმიით და იერუსალიმამდე მიაღწევენ. დაინგრევა ომარის ტაძარი და დაიწყება სოლომონის ტაძრის აღდგენითი სამუშაოები. საბერძნეთს დაუბრუნებენ კონსტანტინოპოლს.“ მამა პაისის თქმით, „ჩინეთის არმია უკვე 2000.000.000-ს შეადგენს, ანუ სწორედ იმ რიცხვს, რომელსაც აპოკალიფსში ახსენებს წმ. იოანე ღმრთისმეტყველი“ („კრიალოსანი“, №4, 06.05).

ჟურნალი „კრიალოსანი“ თავისი პუბლიკაციებით თანამედროვეობის ისეთ მტკივნეულ პრობლემას ეხმიანება, როგორიც არის ორსულობის შეწყვეტა - აბორტი. ჟურნალი აქვეყნებს ინტერვიუს რკინიგზის ქალთა კონსულტაციის ექიმ-გინეკოლოგ ქალბატონ მადონა სანიკიძესთან.

კითხვაზე, თუ რა მიზეზები განაპირობებენ დღეს საქართველოში აბორტის გაკეთებას, ქ-ნი მადონა პასუხობს: „აბორტის მიზეზს წარმოადგენს ძირითადად არასაკმარისი რწმენა ღმერთის მიმართ, არარელიგიურობა და კიდევ გარემო პირობები“, ანუ სხვადასხვა დაავადებები. ექიმი აბორტის მძიმე შეგეგებზე საუბრობს ქალთა ჯანმრთელობისთვის და ბოლოს გამოთქვამს სურვილს, რომ ქართველმა დედებმა რწმენით, ჭეშმარიტი მართლმადიდებლობით გადალახონ ეს მძიმე ცოდვა“ (კრიალოსანი“, №4, 06.05).

ჟურნალი ასევე აქვეყნებს ექიმი-მღვდლის, კონსტანტინე გიორგაძის პუბლიკაციას „უფალს მოსაკლავი შვილები არ ჰყავს“. ავტორის აზრით, „სიცოცხლის უფლება ყველა ადამიანზე ჩასახვის მომენტიდან ვრცელდება... ამ მიზეზით აბორტი შეიძლება განისაზღვროს, როგორც განზრახ მკვლელობა“. ექიმი თავის კოლეგებს მიმართავს: „ექიმო გინეკოლოგებო, ნუ გააკეთებთ აბორტებს, ნუ სცოდავთ! გონს მოეგეთ! ყველაფრისათვის პასუხს აგებთ საშინელი განკითხვის ჟამს...“ („კრიალოსანი“, №4, 06.05)

„თავისუფალი დრო ღმერთის არის და არა განცხრომისა“ - ამ სათაურით ჟურნალი „კრიალოსანი“ ბეჭდავს ინტერვიუს მამა დავითის ტაძრის წინამძღვართან, დეკანოზ ბასილ კიკვიძესთან. კითხვაზე, რას ურჩევდით ადამიანებს, რომლებიც არ თვლიან საჭიროდ დიდ საეკლესიო დღესასწაულებში მონაწილეობას, მამა ბასილი პასუხობს: „ვინც იძახის, მე ღმერთი მწამს, და ეკლესია არა და არ მინდა ზიარება, აღსარება, მე არ მინდა ჩვენს შორის ჩადგეს ვინმე, მას გარკვეულწილად დაბნელებული აქვს გონება და ვერ ხედავს ვერაფერს“. მამა ბასილის აზრით, არც ის არის სწორი ადამიანი მხოლოდ მოდის აყოლის გამო რომ დადიოდეს ტაძარში. „მორწმუნე მთელი თავისი ცხოვრებით უნდა ეკუთვნოდეს ღმერთს და თუ კი ოდნავ თავისუფალი დრო აქვს პირდაპირ ეკლესიაში უნდა ატარებდეს“ („კრიალოსანი, №5, 06.05).

საეკლესიო პრესა კვლავ აქტიურად განიხილავს თანამედროვე ქრისტიანის ქცევის და ჩაცმულობის საკითხებს.

ჟურნალი „კარიბჭე“ წმ. იოანე ღვთისმეტვყელის ტაძრის მღვდელთან, მამა კონსტანტინესთან ინტერვიუს აქვეყნებს. კითხვაზე, რა მნიშვნელობა აქვს ტანსაცმელს მორწმუნე ადამიანისათვის, მამა კონსტანტინე პასუხობს: „ტანსაცმელი შეიქმნა ადამისა და ევას დაცემის შემდეგ... წმიდა მამები ამბობენ, შემოსვისას ყოველთვის უნდა გვახსოვდეს მიზეზი ტანსაცმლის შექმნისაო. ეს მოქმედება დაცემას, სასუფევლიდან განდევნას უნდა გვახსენებდეს... უნდა მოვახერხოთ სამოსზე მიჯაჭვულები არ ვიყოთ“. მამა კონსტანტინე აფრთხილებს მორწმუნეებს ერიდონ სხეულის ზედმეტას გაშიშვლებას და მოუწოდებს მათ ზომიერებისკენ. „არც ის არის სწორი, ჩაცმისა და სამკაულის მეტი არაფერი გვახსოვდეს და არც ის, სუფთა ტანსაცმელზე, დაბანაზე უარი ვთქვათ“ („კარიბჭე“, №9, 06.05).