„ხვალინდელი დღე“, 7-8.09.05.
რუბრიკა: „დედაეკლესია“
როგორ ადამიანს ეწოდება განათლებული

„...როგორ შეიძლება, - წერს უსახელო ავტორი, - განათლებულები ვუწოდოთ იმ ადამიანებს (თუნდაც იყვნენ მეცნიერ-გამომგონებლები, უცხო ენათა მცოდნენი და სხვადასხვა დარგის ხელმძღვანელნი), რომლებიც თავიანთ სიცოცხლეს აგრძელებენ მარადიული ჯოჯოხეთის სატანჯველში?“ ურწმუნო ადამიანს, სტატიის მიხედვით, არ შეიძლება ვუწოდოთ განათლებული, არამედ „მეცნიერი, სწავლული, წიგნიერი და ნებისმიერი სხვა საქები სიტყვა, მხოლოდ არა განათლებული“. თავისი მოსაზრების დასადასტურებლად ავტორი იმ მეცნიერებს ახსენებს, ვინც ევოლუციის თეორიას მიუძღვნეს თავიანთი დისერტაციები თუ სხვა ნაშრომები. „ჭეშმარიტების ფესვებით უნდა გაღვივდეს ყოველი ცოდნა... წინააღმდეგ შემთხვევაში მეცნიერს დიდი ცოდნით დიდი ბოროტების მოტანა შეუძლია.“

„ახალი თაობა“, 7.09.05.
შორენა კიწოწაშვილი
გამოიყენება თუ არა შუღლის ენა ქართულ მედიაში?

6 სექტემბერს სახალხო დამცველის ოფისში რელიგიათა საბჭოს მორიგი სხდომა გაიმართა. ამ დღეს საბჭოს კიდევ ერთი ახალი წევრი შეემატა - „საქართველოს მუსლიმანთა კონგრესი“, რომელმაც 5 სექტემბერს გაიარა რეგისტრაცია იუსტიციის სამინისტროში.

საბჭოს სხდომაზე განსაკუთრებული ყურადღება რელიგიური საკითხების მედიაში გაშუქების პრობლემას მიექცა. სხდომაზე დამსწრე არასამთავრობო ორგანიზაციების და რელიგიური კონფესიების წარმომადგენლები შეთანხმდნენ, რომ ქართულ პრესაში მართლმადიდებლობისაგან განსხვავებული კონფესიების მიმართ არაკორექტული და ხშირად ცილისწამებლური მასალები იბეჭდება. ცნობილმა რელიგიურმა დისიდენტმა, დეკანოზმა ბასილ კობახიძემ ქართული მედიის ენას ამ საკითხში „შუღლის ენა“ უწოდა.

„ახალი ვერსია“, 14-15.09.05.
თამარ ჩიბურდანიძე
გილოცავთ ახალ წელს

პუბლიკაცია ეძღვნება მართლმადიდებელი ეკლესიის მიერ ახალი წლის 1 სექტემბერს (ახალი სტილით - 14 სექტემბერს) აღნიშვნას. ამ ტრადიციის მიზეზების ასახსნელად გაზეთი ამაღლების ტაძრის წინამძღვარს, თბილისის სასულიერო აკადემიისა და სემინარიის ლიტურგიკის პედაგოგს, მღვდელ ბიძინა გუნიას ესაუბრა. საუბრიდან ვგებულობთ, რომ იმის თაობაზე თუ ვინ, რატომ და როდის დაამკვიდრა ეს წესი, მრავალი მოსაზრება არსებულა. (თარიღი ემთხვევა პირველი მსოფლიო კრების გახსნას; ამ დღეს მაცხოვარი ნაზარეთის სინაგოგაში შესულა და ესაია წინასწარმეტყველის სიტყვები წარმოუთქვამს; კონსტანტინე დიდმა ამ დღეს, 321 წელს, „გამანადგურებელი დარტყმა აგემა მაქსენტის“ (იგულისხმება მაქსენციუსი - რედ.), რითაც ქრისტიანობას გზა გაუხსნა და ა.შ.). ერთი სიტყვით, რესპონდენტის საუბრიდან შეიძლება ის დასკვნა გამოვიტანოთ, რომ მართლმადიდებელი ეკლესიისთვის ამ თარიღს საკრალური მნიშვნელობა ჰქონია.

„ახალი თაობა“, 17.09.05.
ინტერპრესნიუსი
მკალავიშვილი იეღოვას მოწმეთა შეკრების დარბევაში მონაწილეობას უარყოფს

თბილისის საოლქო სასამართლომ გლდანის ეპარქიის წინამძღვრის ბასილ მკალავიშვილის და და იმავე ეკლესიის სტიქაროსანის პეტრე ივანიძის საქმის განხილვა განაახლა. ვაკე-საბურთალოს სასამართლოს მიერ გამოტანილი განაჩენი, რომლის მიხედვითაც მკალავიშვილს 6 წლით, ივანიძეს კი 4-ით თავისუფლების აღკვეთა მიესაჯათ, ადვოკატებმა საოლქო სასამართლოში გაასაჩივრეს. ისინი მკალავიშვილის და ივანიშვილის ბრალდებების მოხსნას და მათ გათავისუფლებას მოითხოვენ. იეღოვას მოწმეების დარბევებში და მათი ლიტერატურის დაწვაში მონაწილეობას მკალავიშვილი კვლავინდებურად უარყოფს.

„ახალი თაობა“, 21.09.05.
მედიანიუსი
გურამ შარაძე იეღოველთა სექტის კონგრესის ჩატარებას აპროტესტებს

გურამ შარაძე „გვაფრთხილებს“ რომ, 23-25 სექტემბერს მარნეულში „იეღოველთა სექტა“ კონგრესის ჩატარებას გეგმავს. „ზუგდიდში წარმატებით ჩატარებული კონგრესის შემდეგ იეღოველები ნელ-ნელა დედაქალაქისკენ მოიწევენ“, - აცხადებს შარაძე და ხელისუფლებას მოუწოდებს „წინ აღუდგეს ამ უმსგავსოებას და ბოლო მოუღოს ქვეყანაში უცხოური დაჯგუფებების პარპაშს“.

მისი აზრით მართლმადიდებელ ეკლესიას კათოლიკური ორგანიზაციებიც დიდ საშიშროებას უქმნიან; მაგალითისთვის შარაძე სახელმწიფო სკოლებისთვის განკუთვნილ პროგრამას - „ვაშენოთ მომავალი“ ასახელებს. პროგრამას კათოლიკური დახმარების ფონდი ახორციელებდა, მაგრამ პატრიარქის ჩარევის შემდეგ პროგრამა შეჩერდა.

„ახალი თაობა“, 22.09.05.
თეა მარხვაიძე
კოკოითის პროვოკაციაზე რეაგირებას მოვახდენთ

სტატიაში, რომელიც სამხრეთ ოსეთის „დამოუკიდებლობის დღის“ აღნიშვნას ეხება, მოხსენიებულია საქართველოს კათოლიკოს-პატრიარქის, ილია მეორის მიერ მოსკოვისა და სრულიად რუსეთის პატრიარქის, ალექსი მეორისთვის გაგზავნილი წერილი. წერილში რუსული ეკლესიის წარმომადგენლების მხრიდან საეკლესიო სამართლის უხეშ დარღვევებზეა საუბარი: ოსეთის თვითგამოცხადებული რესპუბლიკის დამოუკიდებლობის დღის აღსანიშნავად ცხინვალში სტავროპოლისა და ვლადიკავკაზის ეპისკოპოსი თეოფანე ჩასულა; კანონიკური დარღვევებია აფხაზეთის ეპერქიაშიც... ილია მეორე მაინც იმედოვნებს, რომ ასეთ ფაქტებს ბოლო მოეღება და ერთმორწმუნე ერებს შორის ნდობა აღდგება.

„ქრონიკა“, 26.09-2.10.05.
ლევან ცალუღელაშვილი
რატომ ნათლავენ თბილისელ მიცვალებულებს მორმონები, რა მიზნით სთავაზობენ ახალგაზრდებს ინგლისური ენის შესწავლას, როდის ჰყავდათ მრავალი ცოლი და რა ინტერესები აქვთ საქართველოში

„მოგწონს თუ არა ეს თუ ის სექტა, - წერს ავტორი, - არავინ გეკითხება. კანონი და კონსტიტუცია მათ დიდი ხანია მწვანეს უნთებს... საქართველოში რელიგიური „პავილიონის“ დახლზე უკვე რწმენის ფართო არჩევანია. ამ „ბაზარზე“ მართლმადიდებელ ეკლესიას სერიოზული ადგილი უჭირავს, მაგრამ როგორ შეინარჩუნებს იგი პოზიციებს მომავალში?“

ასეთი შესავალი ავტორს იმისთვის დასჭირდა, რომ „მორიგ რელიგიურ მიმდინარეობაზე“ - ამჯერად მორმონებზე - ორიოდე „კეთილი“ სიტყვა თქვას მართლმადიდებელი ეკლესიის ინტერესების დასაცავად. წერილში ამ რელიგიის დამაარსებლის ბიოგრაფიაა მოყვანილი, თვით მორმონები კი უზარმაზარი ქონების და შესაძლებლობის ორგანიზაციის წევრებად არიან წარმოდგენილი. საერთოდ, სტატიის მთელი სულისკვეთება ისეთია, მკითხველს მოუნდება მორმონის დანახვაზე თავს გაქცევით უშველოს.

სტატიის ბოლოს საუბარი ჰუმანიტარული დახმარების „ბნელ“ წარმომავლობას ეხება. დახმარება საქართველოში სხვადასხვა რელიგიური დაჯგუფებებისაგან მოდის, რაც თურმე ქართველთა სულებს და მართლმადიდებელ ეკლესიას საფრთხეს უქმნის.

„რეზონანსი“, 27.09.05.
ეკა გულუა
მარნეულში ქართველ იეღოველთა 2-დღიანი კონგრესი ჩატარდა

სტატიაში წერია, რომ გურამ შარაძეს გაუვრცელებია ინფორმაცია იეღოვას მოწმეთა კონგრესის თაობაზე და მოსახლეობისთვის მოუწოდებია „ამ უმსგავსოებას წინ აღდგომოდა“. მიუხედავად ამისა, მარნეულში იეღოვას ქართველ მოწმეთა კონგრესს მშვიდად ჩაუვლია; ახლა კი აქ არაქართველი მოსახლეობის კონგრესის ჩასატარებლადაც ემზადებიან. მარნეულში ჩასული „რეზონანსის“ ჟურნალისტი მეორე კონგრესის მოსამზადებელ ეტაპს დასწრებია და გამგებელს და ადგილობრივ მოსახლეობას გასაუბრებია. პუბლიკაციის მიხედვით, იქაურ ქართველებს და აზერბაიჯანელებს „იეღოველები“ დიდად არ ეპიტნავებათ, მაგრამ მათ მიმართ აგრესიას არც ისე ბვევრი ავლენს. მარნეულის მართლმადიდებელი მოსახლეობა ამტკიცებს, რომ იეღოვას მოწმეები აქცენტს სოციალურად დაუცველ ფენებზე აკეთებენ, - სთავაზობენ ფულს, აწვდიან მედიკამენტებს, ხელს უწყობენ სამედიცინო დახმარების მიღებაში და ა. შ. ამ გზით ისინი ხალხს იბირებენ. როგორც ჟურნალისტი აღნიშნავს, ანტისექტანტური განწყობა განსაკუთრებით ქართულ სოფელ წერეთელში შეინიშნება: „იეღოვას ხსენებაზე მათი წარმომადგენელი ვეგონე და კინაღამ ჩამქოლეს“. გამგებელი ამირან შუბითიძე ჟურნალისტთან საქართველოს კოსტიტუციაში ჩადებულ აღმსარებლობის თავისუფლებაზე საუბრობს და აცხადებს, რომ ოფიციალური ფორმით მასახლეობას მისთვის იეღოვას მოწმეების წინააღმდეგ პროტესტით არ მიუმართავს, თუმცაღა სმენია, რომ მოსახლეობის მხრიდან პრეტენზიები მათ მიმართ მრავლადაა.