V ტომი მოიცავს ყველა ძირითად ბრძანებულებას, რომელიც ეხება 1991 წლის მანძილზე საქართველოს რესპუბლიკის ეკონომიკაში, სოფლის მეურნეობაში, მოსახლეობის სოციალურ უზრუნველყოფასა და ჯანდაცვაში განხორციელებულ ცვლილებებს, მიგრაციული პროცესების რეგულირების საკითხებსა თუ სხვადასხვა სახელმწიფო სტრუქტურების შექმნას, ზოგიერთი კანონის მიღებასა და გაუქმებას, პრეფექტებისა და მთავრობის წევრების დანიშვნას.

წიგნში აგრეთვე შეტანილია საკდესის (საკავშირო დეპეშათა სააგენტო) მიერ გამოქვეყნებული განცხადებები და მნიშვნელოვანი ინფორმაციები საქართველის პრეზიდენტის უცხოელ დელეგაციებთან და სხვადასხვა დარგის სპეციალისტებთან შეხვედრების შესახებ.

საქართველოს სახელმწიფოებრიობა, რომელიც საუკუნეთა სიღრმეში იღებს სათავეს, ქართველმა ერმა მე-19 საუკუნეში დაკარგა რუსეთის იმპერიის მიერ საქართველოს ანექსიისა და სახელმწიფოებრიობის გაუქმების შედეგად. ქართველი ხალხი არასოდეს შეჰგუებია თავისუფლების დაკარგვას. 1918 წლის 26 მაისის დამოუკიდებლობის აქტის გამოცხადებით აღდგა საქართველოს გაუქმებული სახელმწიფოებრიობა. შეიქმნა საქართველოს დემოკრატიული რესპუბლიკა მრავალპარტიულობის საფუძველზე არჩეული ხელისუფლების წარმომადგენლობითი ორგანოებითა და კონსტიტუციით.

1921 წლის თებერვალ-მარტში საბჭოთა რუსეთმა უხეშად დაარღვია საქართველო-რუსეთის 1920 წლის 7 მაისის სამშვიდობო ხელშეკრულება და შეიარაღებული აგრესიის გზით მოახდინა თავის მიერვე ცნობილი საქართველოს სახელმწიფოს ოკუპაცია, რასაც შემდგომში მოჰყვა მისი ფაქტობრივი ანექსია.

საქართველო საბჭოთა კავშირის შემადგენლობაში ნებაყოფლობით არ შესულა, ხოლო მისი სახელმწიფოებრიობა დღესაც არსებობს. დამოუკიდებლობის აქტი და კონსტიტუცია დღესაც იურიდიული ძალის მქონეა, ვინაიდან დემოკრატიული რესპუბლიკის მთავრობას კაპიტულაციაზე ხელი არ მოუწერია და განაგრძობდა მოღვაწეობას ემიგრაციაში.

საბჭოთა კავშირის შემადგენლობაში საქართველოს იძულებითი ყოფნის მთელი პერიოდი აღინიშნა სისხლიანი ტერორით და რეპრესიებით, რისი უკანასკნელი გამოვლინებაც იყო 1989 წლის 9 აპრილის ტრაგედია. ფარული ომი საქართველოს წინააღმდეგ დღესაც გრძელდება. მისი მიზანია დააბრკოლოს საქართველოს სწრაფვა თავისუფლებისა და დემოკრატიისაკენ.

1990 წლის 28 ოქტომბერს მრავალპარტიული დემოკრატიული გზით არჩეული საქართველოს რესპუბლიკის უზენაესი საბჭო, ეყრდნობა რა 1991 წლის 31 მარტის რეფერენდუმით გამოხატულ საქართველოს მოსახლეობის ერთსულოვან ნებას, საქვეყნოდ აცხადებს საქართველოს სახელმწიფოებრივი დამოუკიდებლობის აღდგენას საქართველოს დამოუკიდებლობის 1918 წლის 26 მაისის აქტის საფუძველზე.

საქართველოს სუვერენული რესპუბლიკის ტერიტორია ერთიანი და განუყოფელია. მის ტერიტორიაზე უზენაესია მხოლოდ საქართველოს რესპუბლიკის კონსტიტუცია და ხელისუფლება. ყოველი მოქმედება, მიმართული საქართველოს რესპუბლიკის ხელისუფლების უზენაესობის შეზღუდვის ან ტერიტორიული მთლიანობის დარღვევისაკენ, ჩაითვლება სუვერენული სახელმწიფოს საშინაო საქმეებში ჩარევად და აგრესიად, საერთაშორისო სამართლის ნორმების უხეშ დარღვევად.

საერთაშორისო სამართლის პრიმატი საქართველოს რესპუბლიკის კანონების მიმართ და მისი ნორმების პირდაპირი მოქმედება საქართველოს ტერიტორიაზე ცხადდება საქართველოს რესპუბლიკის ერთ-ერთ ძირითად კონსტიტუციურ პრინციპად.

საქართველოს რესპუბლიკა, ისწრაფვის რა დაიკავოს ღირსეული ადგილი მსოფლიოს სახელმწიფოთა თანამეგობრობაში, აღიარებს და თანაბრად უზრუნველყოფს საერთაშორისო სამართლით გათვალისწინებულ ადამიანის, ეროვნული, ეთნიკური, რელიგიური და ენობრივი ჯგუფების ყველა ძირითად უფლებასა და თავისუფლებას, როგორც ამას მოითხოვს გაერთიანებული ერების ორგანიზაციის წესდება, ადამიანის უფლებათა საყოველთაო დეკლარაცია, საერთაშორისო პაქტები და კონვენციები.

საქართველოს რესპუბლიკის სახელმწიფოებრივი დამოუკიდებლობის აღდგენა სრულად შეესაბამება გაერთიანებული ერების ორგანიზაციის წესდებას, ჰელსინკისა და ვენის აქტებს, რომლებიც აღიარებენ და განამტკიცებენ ყველა ხალხის უფლებას - დამოუკიდებლად განაგოს თავისი ქვეყნის პოლიტიკური ბედი.

საქართველოს რესპუბლიკის უზენაესი საბჭო იმედოვნებს, რომ სახელმწიფოთა საერთაშორისო თანამეგობრობა არ დარჩება გულგრილი ქართველი ხალხის კანონიერი და სამართლიანი ნაბიჯისადმი და აღიარებს საქართველოს აღორძინებულ სახელმწიფოებრივ დამოუკიდებლობას, რაც საქართველოს უშიშროების ერთ-ერთი ყველაზე მტკიცე გარანტია იქნება.

10 აპრილი, 1991 წელი.
თბილისი, მთავრობის სასახლე,
1991 წლის 9 აპრილი, 12 საათი და 30 წუთი.

საქართველოს სახელმწიფოებრივი დამოუკიდებლობის აღდგენის აქტი // საქართველოს რესპუბლიკა. - 1991. - 10 აპრილი. - №70 (90). - 1 გვ.

უკანასკნელ ხანს იმპერიის შემადგენლობაში მყოფმა ხალხებმა გააძლიერეს საპროტესტო პოლიტიკური საგაფიცვო მოძრაობა, რომელიც მიზნად ისახავს იმპერიული ცენტრალური ხელისუფლების გაუქმებას და სუვერენული, დემოკრატიული სახელმწიფოების ჩამოყალიბების პროცესის ხელშეწყობას. ამასთან დაკავშირებით, აგრეთვე სამაჩაბლოში შექმნილი ვითარებიდან გამომდინარე, ე.წ. ცენტრის იმპერიალისტური პოლიტიკის წინააღმდეგ მრგვალი მაგიდის პოლიტიკურმა ორგანიზაციებმა გამოაცხადეს გაფიცვები სატრანსპორტო საშუალებებისა და საკავშირო დაქვემდებარების საწარმოებებისა.

გამომდინარე იმ მოსაზრებიდან, რომ აღნიშნულ საპროტესტო აქციებს აქვს ერთი მიზანი: საქართველოს სრული, ფაქტობრივი დამოუკიდებლობის აღდგენა, იმპერიული სტრუქტურებისადმი დაქვემდებარებისა და დიქტატისაგან მისი გათავისუფლება, რაც წარმოადგენს უკანასკნელ წლებში ჩვენს ქვეყანაში მიმდინარე ეროვნული და სამოქალაქო დაუმორჩილებლობის პროცესის უშუალო გაგრძელებას, ვადგენ:

1. სამინისტროებმა, უწყებებმა, ადმინისტრაციულმა ორგანოებმა ყოველნაირად შეუწყონ ხელი მრგვალი მაგიდის პოლიტიკური ორგანიზაციების მიერ გამოცხადებულ საყოველთაო ეროვნულ და სამოქალაქო დაუმორჩილებლობას.

2. თანამდებობის პირთაგან შეიქმნას საკონსულტაციო და საკოორდინაციო საბჭოები, რომლებიც საგაფიცვო კომიტეტებთან ერთად სისტემურ ხასიათს მისცემენ დაუმორჩილებლობის მოძრაობას, რათა არ შეილახოს რესპუბლიკის ეკონომიკური ინტერესები.

3. შეიქმნას მასობრივი ინფორმაციის საშუალებების გაერთიანებული საბჭო, რომელიც უზენაესი საბჭოს პრესცენტრთან და პრეზიდენტის პრესის სამსახურთან ერთად უზრუნველყოფს სწორი და შემოწმებული ინფორმაციის გავრცელებას და საზღვარგარეთ გადაცემას საქართველოში მიმდინარე პროცესების შესახებ.

4. შეიქმნას საგანგებო საგაფიცვო ფონდი, რომელიც უზრუნველყოფს გაფიცულთა ყოველგვარ დახმარებას და უზრუნველყოფას.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 15 აპრილი.

ბრძანებულება : ეროვნული და სამოქალაქო დაუმორჩილებლობის პროცესის გაგრძელების შესახებ / გამსახურდია ზ. // საქართველოს რესპუბლიკა. - 1991. - 16 აპრილი. - № 71 (11385). - 1გვ.

ბრძანებულება : ეროვნული და სამოქალაქო დაუმორჩილებლობის პროცესის გაგრძელების შესახებ / გამსახურდია ზ. // თბილისი. - 1991. - 16 აპრილი. - №73 (93). - 1გვ.

მ. მ. ომანიძის საქართველოს რესპუბლიკის მთავრობის თავმჯდომარის პირველ მოადგილედ დანიშვნის შესახებ

დაინიშნოს მურმან მელიტონის ძე ომანიძე საქართველოს რესპუბლიკის მთავრობის თავმჯდომარის პირველ მოადგილედ.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 18 აპრილი.

ბრძანებულება : მ. მ. ომანიძის საქართველოს რესპუბლიკის მთავრობის თავმჯდომარის პირველ მოადგილედ დანიშვნის შესახებ / გამსახურდია ზ. // საქართველოს რესპუბლიკა. - 1991. - 19 აპრილი. - № 76 (96). - 1გვ.

ო. ვ. ქვილითაიას საქართველოს რესპუბლიკის მთავრობის თავმჯდომარის მოადგილედ დანიშვნის შესახებ

დაინიშნოს ოთარ ვლადიმერის ძე ქვილითაია საქართველოს რესპუბლიკის მთავრობის თავმჯდომარის მოადგილედ და გათავისუფლდეს საქართველოს რესპუბლიკის მთავრობის თავმჯდომარის პირველი მოადგილის თანამდებობიდან.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 18 აპრილი.

ბრძანებულება : ო. ვ. ქვილითაიას საქართველოს რესპუბლიკის მთავრობის თავმჯდომარის მოადგილედ დანიშვნის შესახებ / გამსახურდია ზ. // საქართველოს რესპუბლიკა. - 1991. - 19 აპრილი. - № 76 (96). - 1გვ.

რესპუბლიკაში პირველადი მოთხოვნილების საქონლის ფასების მოწესრიგების შესახებ

სსრ კავშირის პრეზიდენტისა და სსრ კავშირის მინისტრთა კაბინეტის გადაწყვეტილებებით სახალხო მოხმარების საქონლის საცალო ფასების თავსმოხვეულმა მომატებამ საქართველოს რესპუბლიკის მოსახლეობის სამართლიანი გულისწყრომა გამოიწვია. მდგომარეობა იმითაც მძიმდება, რომ ზოგიერთი პირველადი მოთხოვნილების საქონელზე საწარმოებისა (მწარმოებლებისა) და სავაჭრო ორგანიზაციებისათვის სახელშეკრულებო (თავისუფალი) ფასების დაწესების უფლების მიცემის შედეგად ფაქტობრივად უმართავი გახდა ფასწარმოქმნის პროცესები და უსინდისო პირებს საშუალება მიეცათ საკუთარი ანგარებითი მიზნებისათვის გამოეყენებინათ შექმნილი სიტუაცია.

პირველადი მოთხოვნილების საქონლის ფასწარმოქმნის საქმეში სათანადო წესრიგის დასამყარებლად:

1. დაწესდეს პირველადი მოთხოვნილების საქონელზე ერთიანი ფიქსირებული სახელმწიფო საცალო ფასები საქართველოს რესპუბლიკის ტერიტორიაზე განლაგებული სახელმწიფო და სამომხმარებლო კოოპერაციის ყველა სავაჭრო დ საზოგადოებრივი კვების ობიექტისათვის.

2. საქართველოს რესპუბლიკის ეკონომიკის სამინისტრომ საქართველოს რესპუბლიკის ვაჭრობის სამინისტროსთან, ცეკავშირის გამგეობასთან, რესპუბლიკის სამინისტროებთან და უწყებებთან, საწარმოებთან და ორგანიზაციებთან ერთად უმოკლეს ვადაში დააწესოს მტკიცე სახელმწიფო საცალო ფასები პირველადი მოთხოვნილების იმ საქონელზე, რომელიც მნიშვნელოვანწილად განსაზღვრავს ხალხის ცხოვრების დონეს.

3. საქართველოს რესპუბლიკის ვაჭრობის სამინისტრომ და ცეკავშირის გამგეობამ, სავაჭრო ქსელის მქონე სხვა სამინისტროებმა და უწყებებმა უზრუნველყონ საცალო ვაჭრობისა და საზოგადოებრივი კვების ობიექტებში საცალო ფასების (პრეისკურანტის) თვალსაჩინო ადგილას გამოკვრა.

4. აეკრძალოს რესპუბლიკის ტერიტორიაზე განლაგებულ სახელმწიფო და სამომხმარებლო კოოპერაციის ყველა სასოფლო-სამეურნეო, სამრეწველო, სავაჭრო და საზოგადოებრივი კვების საწარმოსა და ორგანიზაციას სახელშეკრულებო (თავისუფალი) ფასების დაწესება საქართველოს რესპუბლიკის ეკონომიკის სამინისტროსთან შეუთანხმებლად.

5. გაუქმდეს გაყიდვიდან 5-პროცენტიანი გადასახადი საქართველოში წარმოებულ და რესპუბლიკის ტერიტორიაზე სარეალიზაციო პირველადი მოთხოვნილების საქონელზე, ჟურნალ-გაზეთებზე, ზოგიერთი სახეობის მომსახურებაზე, მათ შორის ტაქსზე.

6. დაევალოს საქართველოს რესპუბლიკის ფინანსთა სამინისტროს დაუწესოს მკაცრი კონტროლი ფასების სფეროში სახელმწიფო დისციპლინის განუხრელ დაცვას.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 20 აპრილი.

ნუსხა

იმ სახეობათა საქონლისა, რომელზეც გავრცელდება ერთიანი სახელმწიფო ფიქსირებული ფასები ნაცვლად სახელშეკრულებო (თავისუფალი ფასებისა)

1. უალკოჰოლო სასმელები და მინერალური წყლები;

2. საკონდიტრო ნაწარმი;

3. თევზი და თევზეული;

4. ერბოშეზელილი პურფუნთუშეული, ორცხობილა;

5. ნაყინი;

6. საბლინე და საალადე ფქვილი;

7. ყოველგვარი ძეხვეული და შაშხი.

ბრძანებულება : რესპუბლიკაში პირველადი მოთხოვნილების საქონლის ფასების მოწესრიგების შესახებ / გამსახურდია ზ. // საქართველოს რესპუბლიკა. - 1991. - 23 აპრილი. - № 78 (98). - 1გვ.

ზ. ვ. მინდელის საქართველოს რესპუბლიკის ელექტროენერგეტიკის მინისტრად დანიშვნის შესახებ

დაინიშნოს ზურაბ ვიქტორის ძე მინდელი საქართველოს რესპუბლიკის ელექტროენერგეტიკის მინისტრად.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 23 აპრილი.

ბრძანებულება : ზ. ვ. მინდელის საქართველოს რესპუბლიკის ელექტროენერგეტიკის მინისტრად დანიშვნის შესახებ / გამსახურდია ზ. // საქართველოს რესპუბლიკა. - 1991. - 24 აპრილი. - № 79(99). - 1გვ.

საქართველოს რესპუბლიკის უზენაესი საბჭო ადგენს:

„საქართველოს რესპუბლიკის პრეზიდენტის არჩევნების შესახებ“ საქართველოს რესპუბლიკის 1991 წლის 18 აპრილის კანონის მე-2 მუხლის მესამე ნაწილი ჩამოყალიბდეს შემდეგი რედაქციით:

„არჩევნებში არ მონაწილეობენ ფსიქიკურად დაავადებული მოქალაქენი, რომლებიც სასამართლომ ქმედუუნაროდ ცნო, აგრეთვე ის პირნი, რომლებიც სასამართლოს განაჩენით თავისუფლების აღკვეთის ადგილას იმყოფებიან, ან რომელთა მიმართ სისხლის სამართლის საპროცესო კანონმდებლობით დადგენილი წესით შერჩეულია აღკვეთის ღონისძიება - დაპატიმრება“.

ეს კანონი ძალაშია მიღებისთანავე.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 23 აპრილი.

კანონი : „საქართველოს რესპუბლიკის პრეზიდენტის არჩევნების შესახებ“ საქართველოს რესპუბლიკის კანონში ცვლილების შეტანის თაობაზე // საქართველოს რესპუბლიკა. - 1991. - 24 აპრილი. - № 79 (99). - 1გვ.

ლ. ბ. გირგვლიანის დმანისის რაიონის პრეფექტად დანიშვნის შესახებ

დაინიშნოს ლერი ბესარიონის ძე გირგვლიანი დმანისის რაიონის პრეფექტად.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 23 აპრილი.

ბრძანებულება : ლ. ბ. გირგვლიანის დმანისის რაიონის პრეფექტად დანიშვნის შესახებ / გამსახურდია ზ. // საქართველოს რესპუბლიკა. - 1991. - 26 აპრილი. - № 81 (101). - 1 გვ.

ვ. მ. ალელიშვილის ახალქალაქის პრეფექტად დანიშვნის შესახებ

დაინიშნოს ვლადიმერ მარკოზის ძე ალელიშვილი ახალქალაქის პრეფექტად.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 26 აპრილი.

ბრძანებულება : ვ. მ. ალელიშვილის ახალქალაქის პრეფექტად დანიშვნის შესახებ / გამსახურდია ზ. // საქართველოს რესპუბლიკა. - 1991. - 27 აპრილი. - № 82 (102). - 1 გვ.

რღვევის პირას მისული საბჭოთა იმპერია გააფთრებული ეჭიდება ხელისუფლებას, ცდილობს ერთმანეთს წაჰკიდოს და დამღუპველ უფსკრულში გადაჩეხოს იმპერიის

ტყვე ხალხები, განსაკუთრებით კავკასიაში, სადაც მრავალი საუკუნეა გვერდიგვერდ ცხოვრობენ სხვადასხვა წარმომავლობისა და რელიგიის მაგრამ ერთმანეთთან სულიერად და ტრადიციულად მჭიდროდ დაკავშირებული ხალხები.

იმპერია, როგორც ცნობილია, ამაყ და თავისუფლებისმოყვარე კავკასიელთა დასამორჩილებლად ყოველთვის იყენებდა ე.წ. ეთნოკონფლიქტებს, ამასთანავე ეყრდნობოდა ადგილობრივ მცხოვრებლებს, თავისი ერის მოღალატეებს - კავკასიელ ხალხთა ჭეშმარიტ მტრებს. ასე იქმნებოდა და დღესაც იქმნება დაძაბულობის კერები, ზოგან უკვე იღვრება სისხლი, ზოგანაც ამჟამად მზადდება მკვიდრი მოსახლეობის გენოციდი.

იმპერია მასობრივი ინფორმაციის საშუალებებით ყოველმხრივ ცდილობს დაარწმუნოს მსოფლიო, თითქოს ცენტრის ჩარევის გარეშე კავკასიის „ველური და კაციჭამია ტომები“ ერთმანეთს მოსპობენ.

კრემლს უკვე შექმნილი „ეთნოკონფლიქტების“ ჯაჭვის მორიგ რგოლად კავკასიაში მიაჩნია, უწინარეს ყოვლისა, საქართველო და ჩეჩნეთ-ინგუშეთის ავტონომიური რესპუბლიკა. ამაზე აშკარად მეტყველებს შემდეგი ფაქტები:

1. საქართველოს ტერიტორიაზე, საბჭოთა რუსეთის მიერ საქართველოს ანექსიის შემდეგ 1921 წელს უკანონოდ შექმნილ ყოფილ ე.წ. „სამხრეთ ოსეთის ავტონომიურ ოლქში“, რომელიც ისტორიული შიდა ქართლი გახლავთ, რესპუბლიკის ხელისუფლებასთან შეუთანხმებლად შეყვანილია საბჭოთა კავშირის შინაგან საქმეთა სამინისტროს დიდძალი ჯარები, რომლებიც პროკომუნისტურად განწყობილ ოს ექსტრემისტებთან ერთად არბევენ, ხოცავენ და აპატიმრებენ ქართველ მოსახლეობას, ბევრია მოკლული და დაჭრილი; ქართველთა წინააღმდეგ იყენებენ ავტომატურ იარაღს, რაკეტებს, ნაღმებს, ხელყუმბარებსა და სხვ. დაპატიმრებულ ქართველებთან არ უშვებენ ადვოკატებს, საბჭოთა ჯარების მიერ შიდა ქართლში შექმნილი „ეროვნული ხსნის კომიტეტი“ თვითნებურად ნიშნავს „პროკურორს“ და სხვა თანამდებობის პირებს.

უხეშად ირღვევა ადამიანის უფლებები: 10 ქართული სოფელი საბჭოთა ჯარების მიერ მოქცეულია მძიმე ბლოკადაში, დაწყებულია შიმშილი, არ არის მედიკამენტები. რეგიონიდან მოდის ქართველ და ოს ლტოლვილთა უწყვეტი ნაკადი, რომელთა რიცხვიც 30 ათასს აჭარბებს. საბჭოთა კავშირის ცენტრალური საინფორმაციო საშუალებები აყალბებენ და ჩქმალავენ საქმის რეალურ ვითარებას, ყოველნაირად ხელს აფარებენ ჯარების და ექსტრემისტთა უკანონო მოქმედებას. ცენტრის მიზანია ქართველი მოსახლეობის გამოძევება რეგიონიდან და ამ ტერიტორიის შეერთება ჩრდილოეთ ოსეთთან.

2. ბოლო ორი წლის განმავლობაში საკავშირო ინფორმაციის საშუალებებით აქტიურად ინერგება შეხედულება ჩეჩენთა და ინგუშთა რუსოფობული განწყობის შესახებ, რაც თავის მხრივ ხელს უწყობს ე.წ. ველიკორუსული შოვინიზმის კიდევ უფრო გაღრმავებასა და გაშლას. ამ მიზნებით შეგნებულად ვრცელდება ჭორები, თითქოსდა ვაინახები (ჩეჩნები და ინგუშები) ამზადებდნენ თავდასხმებს რუსი ეროვნების მოსახლეობაზე.

მოსკოვსა და იმპერიის სხვა ქალაქებში იქმნება აგრეთვე აზრი, თითქოს იქ მცხოვრები ვაინახები ყბადაღებული „ჩეჩნური მაფიის“ წევრები და რეკეტიორები იყვნენ.

3. „ეთნოკონფლიქტის“ წინ, როგორ საქართველოს რესპუბლიკაში, კერძოდ, შიდა ქართლში (ყოფილი სამხრეთ ოსეთის ავტონომიური ოლქი), ასევე ვაინახთა წინააღმდეგაც დამსჯელი ომის მოსამზადებლად ცენტრი ინტენსიურად უპირისპირებს ერთმანეთს ვაინახებსა და მათ მეზობელ ხალხებს.

ა) თვით ცენტრალური პრესაც კი აღარ მალავს, რომ ბოლო ხანს ინტენსიურად იქმნება კავკასიაში მცხოვრებ კაზაკთა სამხედრო ფორმირებები და კულტურული აღორძინების მოტივით ხდება მათი შეიარაღება.

ბ) ჩეჩნეთ-ინგუშეთის ავტონომიური რესპუბლიკის მიმდებარე ვაინახთა ისტორიულ მიწაზე (შიდა ქართლის ანალოგია), რომლის 46 პროცენტი დღეს ჩრდილოეთ ოსეთის ასს რესპუბლიკაში შედის, საგანგებოდ მზადდება დიდი, სისხლიანი კონფლიქტი ინგუშ და ოს მოსახლეობას შორის (არის ცდა ასეთივე კონფლიქტის შექმნისა ჩეჩნეთ-დაღესტნის საზღვარზეც). ცენტრი ხელს უწყობს თავისი მორჩილი, ანგარებით შეპყრობილი ოსი ექსტრემისტების შეიარაღებას და სწორედ მათი მეშვეობით ცდილობს სამაგალითოდ დასაჯოს თავისუფლებისმოყვარე „ურჩი“ ვაინახები, ხელს უშლის აგრეთვე 1944 წელს შუა აზიაში უსამართლოდ დეპორტირებული ჩეჩნებისა და ინგუშების სამშობლოში დაბრუნებას, რაც კიდევ უფრო აღრმავებს და ამწვავებს დაპირისპირებულობას ვაინახებსა და ოსებს შორის. მის მიერვე ინსპირირებული „ეთნოკონფლიქტის“ თითქოსდა მოწესრიგების საბაბით კრემლს დიდი რაოდენიბით შეჰყავს საბჭოთა არმიის და შინაგანი ჯარების ნაწილები ვაინახთა მიწაზე, რათა რაც შეიძლება მალე შემოიღოს და განახორციელოს საპრეზიდენტო მმართველობა და ამით ჩაკლას უძველესი კულტურის მქონე ვაინახთა ამაყი სული, მათი სწრფვა დამოუკიდებლობისაკენ. სხვათა შორის, ამ ხალხმა ამ ერთი საუკუნის განმავლობაში უკვე ორჯერ იწვნია სამშობლოს დაკარგვის მთელი სიმწარე. როგორც ჩანს, აგონიაში მყოფი იმპერია ჩეჩნეთ-ინგუშეთში მესამედაც ამზადებს გაუგონარ სისხლიან ტერორსა და გენოციდს. უკვე დაიწყო შეტაკებები ინგუშებსა და ოსებს შორის, არის მსხვერპლი, უამრავი დაჭრილი. საბჭოთა ჯარები აქაც ოსი ექსტრემისტების მხარეზე არიან.

საქართველოს რესპუბლიკის უზენაესი საბჭოს სესია, რომელმაც საგანგებო სხდომაზე იმსჯელა შიდა ქართლსა და ჩეჩნეთ-ინგუშეთის ავტონომიურ რესპუბლიკაში შექმნილი საგანგებო ვითარების შესახებ, მიმართავს გაერთიანებული ერების ორგანიზაციას, მსოფლიოს ხალხებსა და პარლამენტებს დაგმონ იმპერიის ბოროტი ზრახვები, მხარი დაუჭირონ თავისუფლებისმოყვარე, დიდი კულტურული ტრადიციების მქონე ქართველებს, ამაყ ჩეჩნებსა და ინგუშებს, რათა თავიდან იქნეს აცილებული კრემლის მიერ დაგეგმილი საშინელი ტრაგედია.

იმედი მაქვს თქვენი მხარდაჭერისა და თანადგომისა, ამიტომ გთხოვთ, საქართველოსა და ჩრდილოეთ კავკასიაში გამოგზავნოთ ადამიანის უფლებათა დაცვის კომისიის ექსპერტები, რომლებიც შეისწავლიან ქართველების, ჩეჩნების, ინგუშებისა და სხვა ერების წარმომადგენელთა უფლებების უხეში დარღვევის ფაქტებს და დასახავენ ღონისძიებებს მათს აღსაკვეთად.

პატივისცემით,
საქართველოს რესპუბლიკის უზენაესი საბჭო
საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 27 აპრილი.

მიმართვა : გაერთიანებული ერების ორგანიზაციის გენერალურ მდივანს პერეს დე კუელიარს, მსოფლიოს ხალხებსა და პარლამენტებს / საქართველოს რესპუბლიკის უზენაესი საბჭო., გამსახურდია ზ. // საქართველოს რესპუბლიკა. - 1991. - 30 აპრილი. - № 83 (103). - 1,2 გვ.

საქართველოს რესპუბლიკის პრეზიდენტმა ბატონმა ზვიად გამსახურდიამ, რომელიც ღრმად შეშფოთებულია სამაჩაბლოს ტერიტორიაზე შექმნილი ვითარებით, სსრ კავშირის შინაგან საქმეთა სამინისტროს შინაგანი ჯარის ქვეგანაყოფებისა და მათი მხარდაჭერით წაქეზებული შეიარაღებული ტერორისტების მიერ ადამიანის უფლებათა მასობრივი დარღვევების გამო, მიმართა თხოვნით წითელი ჯვრის საერთაშორისო კომიტეტის პრეზიდენტს კორნელიუს სომარუგას გაუწიოს საჭირო დახმარება საქართველოს ამ რეგიონში გაჭირვებაში მყოფ ადამიანებს და გამოგზავნოს აქ თავისი წარმომადგენლები.

ასეთი ავტორიტეტიანი და ჰუმანური საერთაშორისო ორგანიზაციის პრეზიდენტის სახელზე გაგზავნილ წერილში, კერძოდ, ნათქვამია: „რამდენიმე თვის განმავლობაში სამაჩაბლოს (ყოფილი სამხრეთ ოსეთის) ტერიტორიაზე მიმდინარეობს გამოუცხადებელი ომი საქართველოს წინააღმდეგ, რომელიც ინსპირირებულია საბჭოთა მთავრობის მიერ. ამის შედეგად იღუპებიან ყოვლად უდანაშაულო ადამიანები. ქართული ეროვნების 20 ათასი კაცი, ისევე როგორც ოსები, იძულებული გახდა დაეტოვებინა მშობლიური კუთხე და ამით იქცა ლტოლვილად საკუთარ ქვეყანაში. საქართველოს უზენაესი საბჭო და მთავრობა ძალ-ღონეს არ იშურებენ, რათა თავიდან აიცილონ ძალადობის შემდგომი ესკალაცია, შეწყვიტონ სისხლის ღვრა რეგიონში“.

შემდეგ წერილში ნათქვამია, რომ სამაჩაბლოს ტერიტორიაზე სსრ კავშირის შინაგან საქმეთა სამინისტროს მექანიზებული და სპეციალური საჯარისო ნაწილების შეყვანასთან დაკავშირებით ვითარება კიდევ უფრო გართულდა. „გრძელდება უდანაშაულო ადამიანების - ქართული სოფლის მცხოვრებთა უსანქციო დაპატიმრება, მათ სასტიკად სცემენ, მრავალი მათგანი დააინვალიდეს, უარს ეუბნებიან ადვოკატის დაქირავების უფლებაზე. ვერტმფრინავების მეშვეობით სპობენ, წვავენ სოფლებს“.

ბატონი ზვიად გამსახურდია, რომელიც აღიარებს წითელი ჯვრის საერთაშორისო კომიტეტის ავტორიტეტს, გამოთქვამს რწმენას, რომ ამ ორგანიზაციის ოფიციალურ წარმომადგენელთა ვიზიტი საქართველოში ხელს შეუშლის სამაჩაბლოს ტერიტორიაზე წარმოქმნილი კონფლიქტის მშვიდობიან მოწესრიგებას. რესპუბლიკა აგრეთვე მწვავედ განიცდის მედიკამენტების უკმარისობას და დახმარების იმედი აქვს. „საქართველოს რესპუბლიკის უზენაეს საბჭოს, მის მთავრობას, ქართველ და ოს ხალხებს განსაკუთრებით სჭირდებათ თქვენი დახმარება“.

საქინფორმი.

საქართველოს პრეზიდენტის მიმართვა წითელი ჯვრის საერთაშორისო კომიტეტისადმი // საქართველოს რესპუბლიკა. - 1991. - 30 აპრილი. - № 83 (103). - 1,2 გვ.

საბჭო და მთავრობა ღრმა მწუხარებით იუწყებიან, რომ 1991 წლის 29 აპრილს საქართველოში მომხდარ ძლიერ მიწისძვრას მოჰყვა ადამიანთა მრავალრიცხოვანი მსხვერპლი.

საქართველოს რესპუბლიკის პრეზიდენტი, უზენაესი საბჭო და მთავრობა სამძიმარს უცხადებენ დაღუპულთა ოჯახებს და ახლობლებს.

1991 წლის 30 აპრილი.

საქართველოს რესპუბლიკის პრეზიდენტის, უზენაესი საბჭოსა და მთავრობისაგან // საქართველოს რესპუბლიკა. - 1991. - 1 მაისი. - №84 (104). - 1გვ.

საქართველოს რესპუბლიკის პრეზიდენტის, უზენაესი საბჭოსა და მთავრობისაგან // თბილისი. - 1991. - 1 მაისი. - №82 (11395). - 1გვ.

ქართველმა ხალხმა კარგად უწყის, რომ ეროვნული ძალმოსილება მხოლოდ უდიდესი ჭირსახდელის გავლით მიიღწევა. ბედმა არგუნა ჩვენს ქვეყანას განუწყვეტელი ბრძოლა ფიზიკური არსებობისა და სულიერი მხნეობის შესანარჩუნებლად.

დღეს მორიგი განსაცდელის წინაშე აღმოვჩნდით. დაუნდობელმა სტიქიამ შეიწირა ადამიანთა სიცოცხლე, უსახლკაროდ დატოვა მრავალი ქართველი, გააღრმავა ჩვენი იარები.

საქართველოს ხელისუფლება სამძიმარს უცხადებს დაღუპულთა ოჯახებს და მთელ ქართველ ხალხს და, თავის მხრივ, ყველაფერს იღონებს იმისათვის, რომ კატასტროფის ზონაში გატარდეს მაქსიმალურად ეფექტური ღონისძიებები, როგორც საკუთარი ძალებით, ასევე მსოფლიოს ქვეყნების ჰუმანიტარული დახმარების მეშვეობით.

გვწამს, რომ ჭირთათმენის ამ მძიმე ჟამს ქართველი ერი შესძლებს, შეინარჩუნოს სულის სიმტკიცე, გვერდით ამოუდგეს საქართველოს მთავრობას და მისთვის ჩვეული შეუპოვრობით დასძლიოს ეს დიდი განსაცდელი.

საქართველოს რესპუბლიკის პრეზიდენტი
ზვიად გამსახურდია
1991 წლის 30 აპრილი.

მიმართვა : ქართველი ხალხისადმი / გამსახურდია ზ. // საქართველოს რესპუბლიკა. - 1991. - 1მაისი. - №84 (104). - 1გვ.

მიმართვა : ქართველი ხალხისადმი / გამსახურდია ზ. // თბილისი. - 1991. - 1 მაისი. - №82 (11395). - 1გვ.

1991 წლის 29 აპრილს საქართველოში მომხდარმა ძლიერმა მიწისძვრამ განსაკუთრებით დააზარალა საჩხერის, ონის, ამბროლაურის, ჯავისა და ცაგერის რეგიონები (5.700 კვ. კმ. ტერიტორია 100.000-ზე მეტი მცხოვრებით).

პირველადი მონაცემებით, მიწისძვრის შედეგად დაინგრა საცხოვრებელი და სამეურნეო შენობების 85 პროცენტი. არის ადამიანთა მრავალრიცხოვანი მსხვერპლი, არიან დაშავებულები.

ზემოაღნიშნული რეგიონები ცხადდება სტიქიური უბედურების ზონად.

1991 წლის 30 აპრილი.

საქართველოს რესპუბლიკის პრეზიდენტის განცხადება // თბილისი. - 1991. - 1 მაისი. - № 82 (11395). - 1გვ.

საქართველოს რესპუბლიკის პრეზიდენტის განცხადება // საქართველოს რესპუბლიკა. - 1991. - 1 მაისი. - № 84 (104). - 1გვ.

თქვენთვის ცნობილია, რომ ამა წლის 24 აპრილს სსრ კავშირის უმაღლესი საბჭოს ეროვნებათა საბჭოს სხდომამ მიიღო დადგენილება, რომელშიც დასახულია შიდა ქართლში, კერძოდ კი ცხინვალსა და მის მიმდებარე რაიონებში მდგომარეობის პოლიტიკური გზით რეგულირებისა და ნორმალიზაციის რეალური საშუალებები. ეს გადაწყვეტილება მიიღეს ამ საკითხზე კონსტრუქციული მსჯელობის შემდეგ. სსრ კავშირის უმაღლესი საბჭოს, საქართველოს რესპუბლიკის უზენაესი საბჭოსა და რსფსრ უმაღლესი საბჭოს წევრთა შემადგენლობით შეიქმნება მუდმივი საპარლამენტთაშორისო კომისია, რომელსაც დავალებული აქვს რეგიონში მართლწესრიგის დაცვასთან დაკავშირებული ყველა საკითხის მოგვარება. საქართველოს რესპუბლიკის უზენაეს საბჭოს მიაჩნია, რომ ეს გადაწყვეტილება ყოფილი სამხრეთ ოსეთის ავტონომიური ოლქის ტერიტორიაზე კონფლიქტის სწრაფი ლიკვიდაციის რეალური გზაა.

სწორედ ამ დროს აღნიშნულ რეგიონში მყოფი სსრ კავშირის შიმაგან საქმეთა სამინისტროს ჯარები თავიანთი მოქმედებით იწვევენ ვითარების კიდევ უფრო მეტ დესტაბილიზაციას - თავს ესხმიან სოფლის უიარაღო მოსახლეობას, იტაცებენ მძევლებს. ცნობილია, რომ დღეისათვის დაპატიმრებულია ბევრი ქართველი, რომლებისთვისაც ოფიციალურად არავითარი ბრალდება არ წაუყენებიათ. დღეს, 27 აპრილს, დილის 5 საათსა და 30 წუთზე შვიდი ჯავშანტრანსპორტიორი შეიჭრა სოფელ ერედვში, ჯარისკაცებმა ჩაამტვრიეს კარ-ფანჯრები, შეცვივდნენ სახლებში, გაჩხრიკეს, დააკავეს და ცხინვალში წაიყვანეს ათი ადგილობრივი მცხოვრები, მათ შორის სამოცდაათი წლის ქალი. ათივე მძევლის გვარი დადგენილია. ადგილობრივი მცხოვრებლები აგებენ ბარიკადებს და კეტავენ სოფლისკენ მიმავალ გზას. წინა დღეს, 26 აპრილს, ცხინვალში, ბაგების ქუჩაზე ოსი ბანდიტები თავს დაესხნენ სიმონ ფარცხალაძის ოჯახს, ცეცხლსასროლი იარაღით მოკლეს ოჯახის დიასახლისი ზოია ფარცხალაძე-კობალაძე, - ოჯახის უფროსი სიმონ ფარცხალაძე კი მძიმედ დაჭრეს მუცლის არეში. ეს არ არის პირველი შემთხვევა, როდესაც სსრ კავშირის შინაგან საქმეთა სამინისტროს ჯარების მიმნებებლობით ბანდიტები არბევენ და ხოცავენ ქართველი ეროვნების პირებს.

საქართველოს რესპუბლიკისათვის კატეგორიულად მიუღებელია სსრ კავშირის შინაგან საქმეთა სამინისტროს ამა წლის 23 აპრილის ბრძანება, რომელიც ითვალისწინებს ყოფილი სამხრთ ოსეთის ავტონომიური ოლქის შინაგან საქმეთა ორგანოების სტრუქტურების აღდგენას, რაც არა მარტო სუვერენული საქართველოს, არამედ თვით სსრ კავშირის კონსტიტუციის უხეში დარღვევაა.

ზემონათქვამიდან გამომდინარე, საქართველოს რესპუბლიკის უზენაესი საბჭო კატეგორიულ პროტესტს აცხადებს შიდა ქართლში სსრ კავშირის შინაგან საქმეთა სამინისტროს ჯარების მოქმედების გამო, რაც ჩაშლით ემუქრება კონფლიქტის პოლიტიკური გზით გადაწყვეტის წარმატებით დაწყებულ საქმეს და დაბეჯითებით მოითხოვს:

1. დაუყოვნებლივ გაუქმდეს სსრ კავშირის შინაგან საქმეთა სამინისტროს 23 აპრილის ბრძანება.

2. დაევალოს სსრ კავშირის შინაგან საქმეთა სამინისტროს შიდა ქართლში მყოფი ჯარების ხელმძღვანელობას შეწყვიტოს ცალმხრივი ძალადური მოქმედებანი ქართველი მოსახლეობის მიმართ როგორც აღნიშნულ რეგიონში, ისე მის ფარგლებს გარეთ.

3. დაუყოვნებლივ გათავისუფლდეს ქ. ცხინვალსა და მიმდებარე რაიონებში დაკავებული ყველა პირი, რომლებიც პრაქტიკულად უკანონოდ არიან გამოყვანილი საქართველოს რესპუბლიკის იურისდიქციიდან, ან გადასცენ ისინი საქართველოს რესპუბლიკის შინაგან საქმეთა სამინისტროს და პროკურატურას.

4. დაევალოს სსრ კავშირის შინაგან საქმეთა სამინისტროს, რომ შიდა ქართლის რეგიონში მყოფი ჯარების ხელმძღვანელობამ მჭიდროდ ითანამშრომლოს საპარლამენტთაშორისო კომისიასთან.

საქართველოს რესპუბლიკის უზენაესი საბჭოს დავალებით
საქართველოს რესპუბლიკის პრეზიდენტი
ზვიად გამსახურდია.
თბილისი. 1991 წლის 27 აპრილი.

მიმართვა : სსრკ პრეზიდენტს მ. ს. გორბაჩოვს, სსრკ უმაღლესი საბჭოს თავმჯდომარეს ა. ი. ლუკიანოვს, სსრკ უმაღლესი საბჭოს ეროვნებათა საბჭოს თავმჯდომარეს რ. ნ. ნიშანოვს, სსრკ შინაგან საქმეთა მინისტრს ბ. კ. პუგოს / გამსახურდია ზ. // საქართველოს რესპუბლიკა. - 1991. - 1 მაისი. - №84 (104). - 1გვ.

სსრ კავშირის პრეზიდენტისა და კავშირის მინისტრთა კაბინეტის დადგენილებით რესპუბლიკებს თავსმოხვეული სახალხო მოხმარების საქონელზე საცალო ფასებისა და ტარიფების გადიდება გულისხმობდა აგრეთვე 1991 წლის 1 მაისიდან სახელმწიფო საქალაქო ტრანსპორტით (ავტობუსი, ტროლეიბუსი, ტრამვაი და სხვ.) მგზავრობის ღირებულების გადიდებასაც.

რესპუბლიკის მოსახლეობის ეკონომიკური მდგომარეობის სტაბილიზაციის უზრუნველსაყოფად:

გაუქმდეს სახელმწიფო საქალაქო მიწისზედა ტრანსპორტზე (ავტობუსი, ტროლეიბუსი, ტრამვაი და სხვ.) „სატრანსპორტო მომსახურების ტარიფების რეფორმის შესახებ“ საქართველოს რესპუბლიკის მთავრობის 1991 წლის 1 აპრილის №246 დადგენილებით დაწესებული გადიდებული ზღვრული ტარიფები;

კატეგორიულად აეკრძალოთ რესპუბლიკის სამინისტროებს, უწყებებს, სახელმწიფო და სამომხმარებლო კოოპერაციის საწარმოებს, ორგანიზაციებს პროდუქციასა და მომსახურებაზე საცალო ფასებისა და ტარიფების შეცვლა საქართველოს რესპუბლიკის პრეზიდენტის შესაბამის სამსახურთან შეუთანხმებლად.

ბრძანებულება ძალაშია გამოქვეყნებისთანავე.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 1მაისი.

ბრძანებულება : საქალაქო მიწისზედა ტრანსპორტით მგზავრობის ღირებულების შესახებ / გამსახურდია ზ. // საქართველოს რესპუბლიკა. - 1991. - 2 მაისი. - № 85 (105). - 1 გვ.

ჯავაში, კვაისაში, თამარაშენში, ხეითში, აჩაბეთში და ყოფილი სამხრეთ ოსეთის ავტონომიური ოლქის სხვა დასახლებულ პუნქტებში მიწისძვრის შედეგების ლიკვიდაციისა და დაზარალებულთათვის დახმარების გაწევის მიზნით საქართველოს რესპუბლიკის მთავრობა აპირებს გაგზავნოს იქ პროდუქტები, მედიკამენტები, საშენი მასალები და გაუწიოს სხვა ჰუმანიტარული დახმარება, მაგრამ ცხინვალში, ჯავასა და კვაისაში მომავალი გზა ჩაკეტილი აქვთ ოს ექსტრემისტებს, რომლებიც არ უშვებენ ავტოკოლონებს თბილისიდან. რაც იწვებს მათს თვითბლოკადას და ქართული სოფლების ბლოკადას. სსრ კავშირის შინაგან საქმეთა სამინისტროს შინაგანი ჯარები საკმარის ღონისძიებებს არ ახორციელებენ მდგომარეობის ნორმალიზაციისათვის.

მოვითხოვთ მიიღოთ სასწრაფო ღონისძიებანი დანიშნულებისამებრ ტვირთის მიტანის უზრუნველსაყოფად.

საქართველოს რესპუბლიკის პრეზიდენტი
ზ. გამსახურდია.
საქართველოს რესპუბლიკის მთავრობის თავმჯდომარე
თ. სიგუა
თბილისი, 1991 წლის 2 მაისი.

მიმართვა : სსრ კავშირის პრეზიდენტს ბატონ მ. ს. გორბაჩოვს, სსრ კავშირის შინაგან საქმეთა მინისტრს ბატონ ბ. კ. პუგოს // საქართველოს რესპუბლიკა. - 1991. - 2 მაისი. - №86 (106). - 1 გვ.

მიმართვა : სსრ კავშირის პრეზიდენტს ბატონ მ. ს. გორბაჩოვს, სსრ კავშირის შინაგან საქმეთა მინისტრს ბატონ ბ. კ. პუგოს // თბილისი. - 1991. - 2 მაისი. - № 83 (11396). - 1 გვ.

მიმართვა : სსრ კავშირის პრეზიდენტს ბატონ მ. ს. გორბაჩოვს, სსრ კავშირის შინაგან საქმეთა მინისტრს ბატონ ბ. კ. პუგოს // რესპუბლიკა. - 1991. - 7 მაისი. - № 17/50. - 10 გვ.

რესპუბლიკაში პურის საცალო ფასების მოწესრიგების შესახებ

სსრ კავშირის პრეზიდენტისა და სსრ კავშირის მინისტრთა კაბინეტის დადგენილებით სახალხო მოხმარების საგნების საცალო ფასების თავსმოხვეულმა მომატებამ საქართველოს რესპუბლიკის მოსახლეობის სამართლიანი უკმაყოფილება და გულისწყრომა გამოიწვია. მდგომარეობა იმითაც გამწვავდა, რომ პურის საცალო ფასები ცენტრის მიერ გადიდებული იქნა 3-ჯერ და რესპუბლიკის მცირეშემოსავლიან და მრავალშვილიან ოჯახებს პურის საჭირო ოდენობით შეძენის შესაძლებლობაც არ გააჩნია.

რესპუბლიკაში პურის საცალო ფასების მოწესრიგების მიზნით:

1. 1991 წლის 6 მაისიდან გაუქმდეს საქართველოს რესპუბლიკის ტერიტორიაზე სსრ კავშირის პრეზიდენტისა და სსრ კავშირის მინისტრთა კაბინეტის დადგენილება პურის საცალო ფასების გადიდების ნაწილში და აღდგენილ იქნეს 1991 წლის 2 აპრილამდე მოქმედი პურის საცალო ფასები.

2. საქართველოს რესპუბლიკის ეკონომიკის სამინისტრომ, საქართველოს რესპუბლიკის ვაჭრობის სამინისტრომ, ცეკავშირის გამგეობამ 6 მაისამდე უზრუნველყოს საცალო ვაჭრობისა და საზოგადოებრივი კვების ობიექტებში პურის 1991 წლის 2 აპრილამდე მოქმედი საცალო ფასების (პრეისკურანტის) თვალსაჩინო ადგილას გამოკვრა.

3. საქართველოს რესპუბლიკის ვაჭრობის სამინისტრომ, ცეკავშირის გამგეობამ სახელმწიფოებრივი წესრიგი დაამყარონ საცალო ქსელში პურით ვაჭრობაში არსებული ნეგატიური მოვლენების აღმოსაფხვრელად, განსაკუთრებით ფასდამახინჯებათა ლიკვიდაციის საქმეში.

4. საქართველოს რესპუბლიკის შინაგან საქმეთა სამინისტრომ მკაცრი კონტროლი დააწესოს პურის რესპუბლიკის ფარგლებს გატანის საწინააღმდეგოდ.

5. საქართველოს რესპუბლიკის ადგილობრივი თვითმმართველობის ორგანოებმა მკაცრი კონტროლი დააწესონ პურის სწორად ხარჯვის საქმეში, არ დაუშვან სოფლის მოსახლეობაში პურის პირუტყვის საკვებად გამოყენება.

6. საქართველოს რესპუბლიკის ფინანსთა სამინისტრომ გამონახოს დამატებითი ფინანსური რესურსები პურის საცალო ფასების შემცირებით გამოწვეული ზარალის დასაფარავად.

7. დაევალოს საქართველოს რესპუბლიკის ფინანსთა სამინისტროს დააწესოს მკაცრი კონტროლი პურის საცალო ფასების სწორად გამოყენების საქმეში.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 3 მაისი.

ბრძანებულება : რესპუბლიკაში პურის საცალო ფასების მოწესრიგების შესახებ / გამსახურდია ზ. // საქართველოს რესპუბლიკა. - 1991. - 4 მაისი. - № 87 (107). - 1 გვ.

საგარეუბნო და საქალაქთაშორისო ტრანსპორტით მგზავრობის ღირებულების შესახებ

„საქალაქო მიწისზედა ტრანსპორტით მგზავრობის ღირებულების შესახებ“ საქართველოს რესპუბლიკის პრეზიდენტის 1991 წლის 1 მაისის ბრძანებულების დამატებით ვადგენ:

გაუქმდეს სახელმწიფო საგარეუბნო და საქალაქთაშორისო მიმოსვლის ავტობუსებით (სარესპუბლიკათაშორისო მიმოსვლის ავტობუსების გარდა) მგზავრობის „სატრანსპორტო მომსახურების ტარიფების რეფორმის შესახებ“ საქართველოს რესპუბლიკის მთავრობის 1991 წლის 1 აპრილის № 246 დადგენილებით დაწესებული გადიდებული ზღვრული ტარიფები.

ბრძანებულება ძალაშია 1991 წლის 3 მაისიდან.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 3 მაისი.

ბრძანებულება : საგარეუბნო და საქალაქთაშორისო ტრანსპორტით მგზავრობის ღირებულების შესახებ / გამსახურდია ზ. // საქართველოს რესპუბლიკა. - 1991. - 4 მაისი. - № 87 (107). - 1 გვ.

სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების მუშაკთა შრომითი ანაზღაურების მოწესრიგების შესახებ

საცალო ფასების რეფორმისა და საბაზრო ურთიერთობაზე გადასვლის პირობებში სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების მუშაკთა სოციალური დაცვის გაძლიერებისა და მწარმოებელი დარგების მუშაკთა შრომის ანაზღაურების დონიდან მათი ხელფასების ჩამოყალიბებული ჩამორჩენის ლიკვიდაციის მიზნით:

1. 1991 წლის 1 მაისიდან დამტკიცდეს საქართველოს რესპუბლიკის სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების და ორგანიზაციების წამყვანი პროფესიების მუშაკთა ხელფასის ახალი განაკვეთები და თანამდებობრივი სარგოები სსრ კავშირის შრომისა და სოციალური საკითხების სახელმწიფო კომიტეტის 1991 წლის 20 მარტის № 70 დადგენილებით გათვალისწინებული პირობებისა და წესების დაცვით.

ამ დაწესებულებების სხვა მუშაკთა შრომის ანაზღაურება მოხდეს აღნიშნული დადგენილების შესაბამისად.

საქართველოს რესპუბლიკის მთავრობამ მითითებულ ღონისძიებათა დასაფინანსებლად გამოყოს სათანადო სახსრები.

2. საქართველოს რესპუბლიკის ეკონომიკის სამინისტრომ, საქართველოს რესპუბლიკის ფინანსთა სამინისტრომ, საქართველოს რესპუბლიის შრომის, სოციალური დაცვისა და დემოგრაფიის სამინისტრომ დაინტერესებულ სამინისტროებსა და უწყებებთან ერთად უზრუნველყონ ბრძანებულების პირველ მუხლში აღნიშნული ღონისძიებების შეუფერხებელი დაფინანსება.

3. სათანადო სამინისტროებმა და უწყებებმა, აფხაზეთის ასსრ და აჭარის ავტონომიური რესპუბლიკის მინისტრთა საბჭოებმა, სახელმწიფო ხელისუფლებისა და მმართველობის ადგილობრივმა ორგანოებმა უზრუნველყონ სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების შესაბამის მუშაკთა შრომის ანაზღაურება ახალი პირობებით.

4. საქართველოს რესპუბლიკის ფინანსთა სამინისტრომ, საქართველოს რესპუბლიკის შრომის, სოციალური დაცვისა და დემოგრაფიის სამინისტრომ შესაბამის სამინისტროებსა და უწყებებთან ერთად დააწესონ სისტემატური კონტროლი ამ ბრძანებულების შესრულებაზე.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 6 მაისი.

ბრძანებულება : სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების მუშაკთა შრომითი ანაზღაურების მოწესრიგების შესახებ / გამსახურდია ზ. // საქართველოს რესპუბლიკა. - 1991. - 7 მაისი. - № 88 (108). - 1 გვ.

ბრძანებულება : სახალხო განათლების, ჯანმრთელობის დაცვის, სოციალური უზრუნველყოფის, კულტურისა და საარქივო დაწესებულებების მუშაკთა შრომითი ანაზღაურების მოწესრიგების შესახებ / გამსახურდია ზ. // რესპუბლიკა. - 1991. - 7 მაისი. - №17/50. - 3 გვ.

მიწისძვრით დაზარალებულთა მატერიალური დახმარების შესახებ

1991 წლის 29 აპრილს მიწისძვრის შედეგად დაზარალებულთა მატერიალური დახმარების მიზნით:

1. „დაწესდეს ფულადი დახმარება შემდეგი ოდენობით: ოჯახებისათვის, მიწისძვრის შედეგად ადამიანთა მსხვერპლის შემთხვევაში, ოჯახის თითოეულ გარდაცვლილ წევრზე - 2000 მანეთი;

ყოველ მოქალაქეზე, რომელმაც მიიღო ტრავმა, - 500 მანეთი;

სახლისა და სხვა ნაგებობათა დანგრევის, ავეჯისა და სხვა ქონების განადგურების შემთხვევაში - ერთ ოჯახზე - 4000 მანეთი და ოჯახის ყოველ წევრზე დამატებით - 500 მანეთი;

საცხოვრებელი სახლის, სხვა ნაგებობათა და საოჯახო ქონების დაზიანებისას, რომელთა გამოყენება შესაძლებელია შეკეთების შემდეგ - ერთ ოჯახზე 1000 მანეთი;

საცხოვრებელი სახლისა და სხვა ნაგებობათა, აგრეთვე საოჯახო ქონების მცირედ დაზიანებისას - ერთ ოჯახზე 500 მანეთამდე.

საქართველოს რესპუბლიკის მთავრობამ განსაზღვროს აღნიშნულ დახმარებათა დაფინანსების წყაროები.

2. მოქალაქეებს მიწისძვრის შედეგად დანგრეულ შენობა-ნაგებობათა სადაზღვევო ღირებულება აუნაზღურდეთ 100 პროცენტით.

3. სტიქიური უბედურების ზონაში მცხოვრები მოქალაქეები 1991-1992 წლებში გათავისუფლდნენ სასოფლო-სამეურნეო და შენობის მფლობელთა გადასახადისა და მიწის გადასახადისაგან.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 6 მაისი.

ბრძანებულება : მიწისძვრით დაზარალებულთა მატერიალური დახმარების შესახებ / გამსახურდია ზ. // საქართველოს რესპუბლიკა. - 1991. - 7 მაისი. - № 88 (108). - 1 გვ.

ბრძანებულება : მიწისძვრით დაზარალებულთა მატერიალური დახმარების შესახებ / გამსახურდია ზ. // რესპუბლიკა. - 1991. - 7 მაისი. - №17/50. - 3 გვ.

სახსრების მიღების წყაროების შესახებ მოქალაქეთა მიერ დეკლარაციის წარდგენის გაუქმების თაობაზე

სსრ კავშირის მინისტრთა კაბინეტის დადგენილებით, საცალო ფასების მომატებასთან დაკავშირებით, აგრეთვე ინფლაციური პროცესებიდან და რესპუბლიკის მოსახლეობის ინტერესებიდან გამომდინარე:

შეჩერდეს საქართველოს რესპუბლიკის ტრეიტორიაზე „უშრომელ შემოსავლებთან ბრძოლის გაძლიერების ღონისძიებათა შესახებ“ სსრ კავშირის მინისტრთა საბჭოს 1986 წლის 15 მაისის №575 დადგენილების მე-10 პუნქტის მოქმედება და გაუქმდეს საქართველოს რესპუბლიკის ტერიტორიაზე ათი ათას მანეთზე მეტი თანხის გარიგებათა დადებისას, ოცი ათას მანეთზე მეტი ღირებულების საცხოვრებელი სახლის (აგარაკის) აშენებისას, აგრეთვე ადგილობრივი მმართველობის ორგანოებისა და პროკურატურის მოთხოვნით სახსრების მიღების წყაროების შესახებ დეკლარაციების წარმოდგენა.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 6 მაისი.

ბრძანებულება : სახსრების მიღების წყაროების შესახებ მოქალაქეთა მიერ დეკლარაციის წარდგენის გაუქმების თაობაზე / გამსახურდია ზ. // საქართველოს რესპუბლიკა. - 1991. - 7 მაისი. - № 88 (108). - 1 გვ.

როგორც ჩვენთვის ცნობილი გახდა, ა.წ. 6 მაისს ქ. ცხინვალში ყოფილ სამხრეთ ოსეთის ავტონომიური ოლქის სახალხო დეპუტატთა საოლქო საბჭოს უკანონოდ მოწვეულ სესიაზე მიღებულ იქნა დადგენილება ე.წ. „სამხრეთ ოსეთის საბჭოთა რესპუბლიკის“ გაუქმებისა და ავტონომიური ოლქის აღდგენის შესახებ, რომელიც თუმცა შედის საქართველოს რესპუბლიკის შემადგენლობაში, მაგრამ თურმე „ადმინისტრაციულად ექვემდებარება“ რუსეთის საბჭოთა ფედერაციული სოციალისტური რესპუბლიკის იურისდიქციას. და ეს ხდება მაშინ, როდესაც ა.წ. 24 აპრილს კონსტრუქციული მოლაპარაკების შედეგად საბჭოთა კავშირის უზენაესი საბჭოს ეროვნებათა საბჭოს დადგენილებით პარიტეტულ საწყისებზე იქმნება საბჭოთა კავშირის, რსფსრ-სა და საქართველოს რესპუბლიკის უზენაესი საბჭოს დეპუტატთა კომისია შიდა ქართლში მცხოვრები ოსი მოსახლეობის წარმომადგენლის მონაწილეობით.

ამ კომისიას ევალება შიდა ქართლში შეიარაღებული კონფლიქტის პოლიტიკური საშუალებით მოგვარება. გაჩნდა ამ რეგიონში საქართველოს რესპუბლიკის სუვერენიტეტის განმტკიცებისა და იქ მცხოვრები ოსი მოსახლეობის ეროვნულ-კულტურული ავტონომიის დაცვის რეალური პერსპექტივები.

ზემოაღნიშნულიდან გამომდინარე, არ შეიძლება პროვოკაციად არ შევაფასოთ ოსი სეპარატისტების მიერ გადადგმული ნაბიჯი, რომელთა მიზანია არა მარტო ხელი შეუშალონ დაწყებულ პოლიტიკურ პროცესს, არამედ პრაქტიკულად ჩაშალონ ეს წამოწყება, დაუპირისპირონ ერთმანეთს საქართველოს რესპუბლიკისა და რსფრსრ-ს იურისდიქცია ამ რეგიონში.

არ შეიძლება თქვენი ყურადღება არ მივაქციოთ იმ ფაქტს, რომ ეს სესია ჩატარდა ა. ჩეხოევის - საბჭოთა კავშირის სახალხო დეპუტატის ყოფილი სამხრეთ ოსეთის ავტონომიური ოლქიდან - თავმჯდომარეობით, თუ არაფერს ვიტყვით იმაზე, რომ ა. ჩეხოევი - საქართველოს კომპარტიის სამხრეთ ოსეთის საოლქო კომიტეტის ყოფილი პირველი მდივანი - გადაყენებული იყო თვით ოსი მოსახლეობის მიერ თანამდებობის ბოროტად გამოყენებისათვის, მას არ ჰქონდა უფლება სათავეში ჩასდგომოდა ოს ექსტრემისტთა ახალ პროვოკაციას, რადგანაც კარგად იცოდა, თუ რა მსჯელობა იყო ეროვნებათა საბჭოს სხდომაზე და რაზე შეთანხმდნენ დეპუტატები.

ამასთან დაკავშირებით, საქართველოს რესპუბლიკის უზენაესი საბჭოს პრეზიდიუმმა ა.წ. 7 მაისს თავისი დადგენილებით იურიდიული ძალის არმქონედ ცნო ე.წ. სამხრეთ ოსეთის ავტონომიური ოლქის საოლქო საბჭოს რეანიმაციის ცდა.

საქართველოს რესპუბლიკის უზენაესი საბჭოს პრეზიდიუმი დარწმუნებულია, რომ რუსეთის საბჭოთა ფედერაციული სოციალისტური რესპუბლიკის უზენაესი საბჭო და მისი თავმჯდომარე ოფიციალურად გაემიჯნებიან ოს ექსტრემისტთა პროვოკაციულ აქტს, რომელიც ყოვლად შეუთავსებელია ორ სუვერენულ რესპუბლიკას შორის წამოწყებულ ჭეშმარიტად თანასწორუფლებიან ურთიერთობასთან. ამ აქტის თქვენი მხრიდან რეაგირების გარეშე დატოვება შეფასდება როგორც მისი ფაქტობრივი აღიარება და საქართველოს რესპუბლიკის საშინაო საქმეებში ჩარევა.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 7 მაისი.

მიმართვა : რუსეთის საბჭოთა ფედერაციული სოციალისტური რესპუბლიკის უმაღლესი საბჭოს თავმჯდომარეს ბატონ ბ. ელცინს / გამსახურდია ზ. // საქართველოს რესპუბლიკა. - 1991. - 8 მაისი. - № 89 (109). - 2 გვ.

როგორც ჩვენთვის ცნობილი გახდა, ა.წ. 6 მაისს ქ. ცხინვალში ყოფილ სამხრეთ ოსეთის ავტონომიური ოლქის სახალხო დეპუტატთა საოლქო საბჭოს უკანონოდ მოწვეულ სესიაზე მიღებულ იქნა დადგენილება ე.წ. „სამხრეთ ოსეთის საბჭოთა რესპუბლიკის“ გაუქმებისა და ავტონომიური ოლქის აღდგენის შესახებ, რომელიც თუმცა შედის საქართველოს რესპუბლიკის შემადგენლობაში, მაგრამ თურმე „ადმინისტრაციულად ექვემდებარება“ რუსეთის საბჭოთა ფედერაციული სოციალისტური რესპუბლიკის იურისდიქციას. და ეს ხდება მაშინ, როდესაც ა.წ. 24 აპრილს კონსტრუქციული მოლაპარაკების შედეგად საბჭოთა კავშირის უზენაესი საბჭოს ეროვნებათა საბჭოს დადგენილებით პარიტეტულ საწყისებზე იქმნება საბჭოთა კავშირის, რსფსრ-სა და საქართველოს რესპუბლიკის უზენაესი საბჭოს დეპუტატთა კომისია შიდა ქართლში მცხოვრები ოსი მოსახლეობის წარმომადგენლის მონაწილეობით.

ამ კომისიას ევალება შიდა ქართლში შეიარაღებული კონფლიქტის პოლიტიკური საშუალებით მოგვარება. გაჩნდა ამ რეგიონში საქართველოს რესპუბლიკის სუვერენიტეტის განმტკიცებისა და იქ მცხოვრები ოსი მოსახლეობის ეროვნულ-კულტურული ავტონომიის დაცვის რეალური პერსპექტივები.

ზემოაღნიშნულიდან გამომდინარე, არ შეიძლება პროვოკაციად არ შევაფასოთ ოსი სეპარატისტების მიერ გადადგმული ნაბიჯი, რომელთა მიზანია არა მარტო ხელი შეუშალონ დაწყებულ პოლიტიკურ პროცესს, არამედ პრაქტიკულად ჩაშალონ ეს წამოწყება, დაუპირისპირონ ერთმანეთს საქართველოს რესპუბლიკისა და რსფრსრ-ს იურისდიქცია ამ რეგიონში.

არ შეიძლება თქვენი ყურადღება არ მივაქციოთ იმ ფაქტს, რომ ეს სესია ჩატარდა ა. ჩეხოევის - საბჭოთა კავშირის სახალხო დეპუტატის ყოფილი სამხრეთ ოსეთის ავტონომიური ოლქიდან - თავმჯდომარეობით, თუ არაფერს ვიტყვით იმაზე, რომ ა. ჩეხოევი - საქართველოს კომპარტიის სამხრეთ ოსეთის საოლქო კომიტეტის ყოფილი პირველი მდივანი - გადაყენებული იყო თვით ოსი მოსახლეობის მიერ თანამდებობის ბოროტად გამოყენებისათვის, მას არ ჰქონდა უფლება სათავეში ჩასდგომოდა ოს ექსტრემისტთა ახალ პროვოკაციას, რადგანაც კარგად იცოდა, თუ რა მსჯელობა იყო ეროვნებათა საბჭოს სხდომაზე და რაზე შეთანხმდნენ დეპუტატები.

ამასთან დაკავშირებით, საქართველოს რესპუბლიკის უზენაესი საბჭოს პრეზიდიუმმა ა.წ. 7 მაისს თავისი დადგენილებით იურიდიული ძალის არმქონედ ცნო ე.წ. სამხრეთ ოსეთის ავტონომიური ოლქის საოლქო საბჭოს რეანიმაციის ცდა.

საქართველოს რესპუბლიკის უზენაესი საბჭოს პრეზიდიუმი მოგმართავთ თქვენ, მიიღოთ სასწრაფო ზომები და ოფიციალურად მხარი დაუჭიროთ საქართველოს რესპუბლიკის უზენაესი საბჭოს პრეზიდიუმის დადგენილებას, დაგმოთ ოს სეპარატისტთა დესტრუქციული აქტი; წინააღმდეგ შემთხვევაში ეჭვქვეშ დგება საპარლამენტო კომისიის მუშაობა და კონფლიქტის მშვიდობიანი გზით მოგვარების პერსპექტივა.

დარწმუნებული ვართ, რომ ოსი სეპარატისტები ვერ შეძლებენ შიდა ქართლში მიმდინარე კონფლიქტის პოლიტიკური საშუალებებით მოწესრიგების ჩაშლას.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 7 მაისი.

მიმართვა : სსრ კავშირის პრეზიდენტს ბატონ მ. გორბაჩოვს, საბჭოთა კავშირის უზენაესი საბჭოს ეროვნებათა საბჭოს თავმჯდომარეს ბატონ რ. ნიშანოვს / გამსახურდია ზ. // საქართველოს რესპუბლიკა. - 1991. - 8 მაისი. - №89 (109). - 2 გვ.

14 მაისს საქართველოს რესპუბლიკის პრეზიდენტი ბატონიზვიად გამსახურდია შეხვდა ქართველი ებრაელი ეროვნების წარმომადგენლებს. მათთან ერთად იყო საქართველოში სტუმრად მყოფი ისრაელის პარლამენტის წევრი, ისრაელის ტრანსპორტის მინისტრის მოადგილე, ისრაელ-საქართველოს მეგობრობის ასოციაციის „დერეხის“ თავმჯდომარე, ჩვენი თანამემამულე ეფრაიმ გური.

გაიმართა გულთბილი, დაინტერესებული საუბარი ქართველთა და ებრაელთა ისტორიული ურთიერთობისა და მეგობრობის შესახებ. აღინიშნა, რომ იშვიათია ასეთი მრავალსაუკუნოვანი, გულწრფელი და უხინჯო დამოკიდებულება, რაც ოცდაექვსი საუკუნეა აკავშირებს ამ ორ ერს, საქართველო იშვიათი გამონაკლისია მსოფლიო ხალხების ისტორიაში, სადაც ებრაელობას არ განუცდია არავითარი ჩაგვრა, დამცირება, გენოციდი, პირიქით, წარმატებით ვითარდებოდა უმდიდრესი ტრადიციების მქონე ებრაული კულტურა. ამიტომ იყო ქართველი ებრაელობა მუდამ ქართველი ერის გვერდით, მის ლტოლვაში საქართველოს სრული დამოუკიდებლობისაკენ.

შეხვედრაზე სიტყვით გამოსულმა ქართველ ებრაელთა ინტელიგენციის წარმომადგენლებმა ხაზგასმით აღნიშნეს, რომ არაფერს არ დაიშურებენ, რათა ხორცი შეესხას მათი მოძმე ერის ამ კეთილშობილურ მიზანსა და მისწრაფებას, შემდგომშიც მათთვის ახლობელი, ორგანული იქნება ქართველი ხალხის მიზნები და ამოცანები, მისი ჭირის და ლხინის გაზიარება.

შეხვედრაზე დაისახა ორ ქვეყანას შორის მეცნიერული, კულტურული კონტაქტების შემდგომი გაძლიერების, ტექნიკურ კვლევათა გაფართოების პერსპექტივები ქართველ ებრაელ მეცნიერთა მდიდარი პოტენციალის გამოყენებით.

დაისვა საკითხი ორმაგი მოქალაქეობის შესახებ ქართველი ებრელებისათვის, რომლებიც ამჟამად ისრაელში ცხოვრობენ, მაგრამ საქართველოსთან დღემდე სისხლხორცეულად არიან დაკავშირებული. გამოითქვა მოსაზრება იმის თაობაზე, რომ სასურველია და ორმხრივ სასარგებლოა თბილისსა და თელ-ავივში გაიხსნას ვიცე-საკონსულოები. ითქვა იმის შესახებ, რომ გაეწიოს სახელმწიფო ზრუნვა ონში მიწისძვრის შედეგად დანგრეული სინაგოგის აღდგენას, რომელიც არა მარტო სასულიერო ცხოვრების ცენტრია, არამედ საქართველოში გამორჩეული კულტურის ძეგლიცაა.

მეტი ყურადღება დაეთმობა საქართველოში ქართველ ებრაელ მწერალთა ნაწარმოებების გამოცემის საქმეს. დაისახება ღონისძიებანი იმისათვის, რომ აღდგეს ქართველ ებრაელთა ცენტრი და ისტორიულ-ეთნოგრაფიული მუზეუმი თბილისში. ითქვა იმის შესახებაც, რომ გაიხსნას პირდაპირი ავიახაზი თბილისსა და თელ-ავივს შორის, კვირაში ერთი რეისის პერიოდულობით.

საქინფორმი.

ბატონი ზვიად გამსახურდია ესაუბრა ქართველი ებრაელი ეროვნების წარმომადენლებს // საქართველოს რეპუბლიკა. - 1991. - 15 მაისი. - № 94(114). - 1 გვ.

რკინიგზისა და საჰაერო ტრანსპორტით სტუდენტი და მოსწავლე ახალგაზრდობის მგზავრობაზე შეღავათების შესახებ

საცალო ფასების რეფორმასა და მოსახლეობის სოციალური დაცვის ღონისძიებებთან დაკავშირებით საქართველოს რესპუბლიკის ტერიტორიის ფარგლებში რკინიგზისა და საჰაერო ტრანსპორტით სტუდენტი და მოსწავლე ახალგაზრდობის მგზავრობაზე მოქმედი შეღავათები გავრცელდეს მთელი წლის განმავლობაში.

ბრძანებულება ძალაშია 1991 წლის 15 მაისიდან.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 15 მაისი.

ბრძანებულება : რკინიგზისა და საჰაერო ტრანსპორტით სტუდენტი და მოსწავლე ახალგაზრდობის მგზავრობაზე შეღავათების შესახებ / გამსახურდია ზ. // საქართველოს რესპუბლიკა. - 1991. - 16 მაისი. - № 95 (115). - 1 გვ.

13 მაისს ქ. გორში ჯარისკაცები გამოეკიდნენ ბავშვებს, რომლებიც ფეხბურთს თამაშობდნენ სამხედრო ქალაქის ტერიტორიაზე, შემდეგ კი ავტომატებით ცეცხლი დაუშინეს მათ, რის შედეგადაც მოკლულ იქნა 14 წლის ზაზა კაკაშვილი.

საქართველოს რესპუბლიკის ხელმძღვანელობა და ხალხი აღშოთებული არიან ამ გაუგონარი ბარბაროსობის აქტით, მოითხოვენ სასწრაფო გამოძიებას და დამნაშავე პირთა დასჯას, წინააღმდეგ შემთხვევაში მთელი მორალური და იურიდიული პასუხისმგებლობა დაგეკისრებათ თქვენ.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 16 მაისი.

მიმართვა : სსრკ თავდაცვის მინისტრს დ. იაზოვს ამიერკავკასიის სამხდრო ოლქის სარდალს ვ. პატრიკიევს / გამსახურდია ზ. // საქართველოს რესპუბლიკა. - 1991. - 17 მაისი. - № 96 (116). - 1 გვ.

სსრკ შინაგან საქმეთა სამინისტროს შინაგანი ჯარის ქ. ცხინვალში დისლოცირებული ერთ-ერთი ნაწილი, რომელიც ახორციელებდა „რეიდს“ ყოფილი სამხრეთ ოსეთის ავტონომიური ოლქის ფარგლებს გარეთ, 13 მაისს შეიჭრა გორის რაიონის სოფელ დისევში და შეკრებილ მცხოვრებთა თვალწინ ჩამოგლიჯა და შეურაცხყო სკოლის შენობაზე აღმართული ეროვნული დროშა.

თქვენდამი რწმუნებული ჯარის ნაწილები, რომლებიც არაერთგზის ავიწროებენ მშვიდობიან მოსახლეობას, სტაცებენ ქონებას, პირუტყვს და სჩადიან სხვა ძალადობას, ახლა უკვე მთელი ქართველი ხალხის თავმოყვარეობისა და ღირსების შეურაცხყოფამდე მივიდნენ.

მოვითხოვთ შეწყდეს სსრკ შინაგან საქმეთა სამინისტროს ძალთა მიერ უმსგავსობათა ჩადენა, პასუხი მოეთხოვოთ სამხედრო მოსამსახურეებს, რომლებსაც ბრალი მიუძღვით საზოგადოებრივი წესრიგისა და კანონიერების დარღვევაში.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 16 მაისი.

მიმართვა : სსრკ შინაგან საქმეთა მინისტრს ბ. პუგოს / გამსახურდია ზ. // საქართველოს რესპუბლიკა. - 1991. - 17 მაისი. - № 96 (116). - 1 გვ.

სსრ კავშირის შეიარაღებული ძალების რიგებიდან გასულ ქართველ სამხედრო მოსამსახურეთა შესახებ

რესპუბლიკის თავდაცვისუნარიანობის განსამტკიცებლად საბჭოთა არმიის, სამხედრო-საზღვაო ფლოტის, სასაზღვრო და შინაგანი ჯარების შემდგენლობიდან გასულ ქართველ სამხედრო მოსამსახურეთა გამოყენების მიზნით:

1. ეროვნულ გვარდიაში ჩარიცხვისას ქართველ ოფიცრებს, პროპორშჩიკებს, მიჩმანებსა და ზევადიანი სმსახურის სამხედრო მოსამსახურეებს სამხედრო სტაჟში ჩაეთვალოთ სრ კავშირის შეიარაღებული ძალების რიგებში სამსახურის წლები.

2. ვადიანი სამსახურის ის ქართველი სამხედრო მოსამსახურენი, რომლებმაც სსრ კავშირის შეიარაღებული ძალების რიგებში იმსახურეს ერთი წელი და მეტი, ჩაითვალონ ჯარმოხდილად, ხოლო მათ, ვინც ერთ წელზე ნაკლები იმსახურეს, საქართველოს რესპუბლიკის გამწვევი კომისია გამოიძახებს სასწავლო შეკრებებზე შესაბამის სპეციალობებში მოსამზადებლად.

3. პირველ და მეორე პუნქტებში აღნიშნულ პირებს მიეცეთ პასპორტები იმ საცხოვრებელ ადგილას მუდმივი ჩაწერით, საიდანაც გაიწვიეს სავალდებულო სამხედრო სამსახურში.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 21 მაისი.

ბრძანებულება : სსრ კავშირის შეიარაღებული ძალების რიგებიდან გასულ ქართველ სამხედრო მოსამსახურეთა შესახებ / გამსახურდია ზ. // საქართველოს რესპუბლიკა. - 1991. - 22 მაისი. - № 99-100 (120). - 1 გვ.

მოსახლეობისათვის სარეალიზაციო საქონელსა და მომსახურებაზე დაწესებული გაყიდვიდან 5-პროცენტიანი გადასახადის გაუქმების შესახებ

სსრ კავშირის პრეზიდენტის ბრძანებულებითა და სსრ კავშირის მინისტრთა კაბინეტის დადგენილებით თავსმოხვეულმა გაყიდვიდან 5-პროცენტიანი გადასახადის შემოღებამ მნიშვნელოვნად გააუარესა მოსახლეობის ეკონომიკური მდგომარეობა და გამოიწვია მისი სამართლიანი გულისწყრომა.

რესპუბლიკის მოსახლეობის ეკონომიკური მდგომარეობის გაუმჯობესების მიზნით 1991 წლის 23 მაისიდან რესპუბლიკის მთელ ტერიტორიაზე გაუქმდეს მოსახლეობისათვის სარეალიზაციო საქონელსა და მომსახურებაზე დაწესებული გაყიდვიდან 5-პროცენტიანი გადასახადი.

საქართველოს რესპუბლიკის პრეზიდენტი
ზვიად გამსახურდია
თბილისი. 1991 წლის 22 მაისი.

ბრძანებულება : მოსახლეობისათვის სარეალიზაციო საქონელსა და მომსახურებაზე დაწესებული გაყიდვიდან 5-პროცენტიანი გადასახადის გაუქმების შესახებ / გამსახურდია ზ. // საქართველოს რესპუბლიკა. - 1991. - 23 მაისი. - № 101 (121). - 1 გვ.

„საქართველოს რესპუბლიკის პრეზიდენტის არჩევნების შესახებ საქართველოს რესპუბლიკის კანონში დამატებების შეტანის თაობაზე“

საქართველოს რესპუბლიკის 1991 წლის 14 მაისის კანონის შესახებ საქართველოს რესპუბლიკის კონსტიტუციის 1214 მუხლის შესაბამისად:

1. საქართველოს რესპუბლიკის უზენაეს საბჭოს ხელახალი განხილვისათვის დაუბრუნდეს საქართველოს რესპუბლიკის 1991 წლის 14 მაისის კანონი „საქართველოს რესპუბლიკის პრეზიდენტის არჩევნების შესახებ საქართველოს რესპუბლიკის კანონში დამატების შეტანის თაობაზე“.

ამასთან ერთად, საქართველოს რესპუბლიკის უზენაესი საბჭოს წინაშე საკანონმდებლო ინიციატივის წესით დაისვას საკითხი, რათა საქართველოს რესპუბლიკის 1991 წლის 14 მაისის კანონი „საქართველოს რესპუბლიკის პრეზიდენტის არჩევნების შესახებ საქართველოს რესპუბლიკის კანონში დამატების შეტანის თაობაზე“ ჩამოყალიბდეს შემდეგი რედაქციით:

„საქართველოს რესპუბლიკის პრეზიდენტის არჩევნების შესახებ“ კანონში შეტანილ იქნეს შემდეგი დამატებანი და ცვლილებანი:

24-ე მუხლის მე-2 ნაწილს დაემატოს სიტყვები:

„... რომლის შესახებაც იგი გადაწყვეტილებას იღებს არჩევნების ჩატარებიდან არა უგვიანეს ორი დღისა“.

25-ე მუხლში: მესამე ნაწილს დაემატოს შემდგი ტექსტი:

„იმ უბნებში, რომლებშიც არჩევნები ბათილად იქნა ცნობილი თუ ამომრჩეველთა რიცხვი იმდენდ დიდია, რომ არჩევნებში მათ მონაწილეობას შეიძლებოდა გავლენა მოეხდინა არჩევნების ჩატარებულად ჩათვლაზე, არჩევნებში გამარჯვებულის გამოვლენაზე ან არჩევნების მეორე ტურში მონაწილე პრეზიდენტობის კანდიდატების გამოვლენაზე, ამ უბნებში ტარდება ხელახალი ხმის მიცემა არჩევნების დღეს ან ორი კვირის ვადაში“.

მე-4 ნაწილში სიტყვები „ორი კვირის“ შეიცვალოს სიტყვებით „სამი კვირის“;

მე-5 ნაწილს დაემატოს შემდეგი ტექსტი:

„საჩივრები არჩევნების ჩატარებისა და მისი შედეგების დადგენის კანონიერების თაობაზე ცენტრალურ საარჩევნო კომისიას შეიძლება წარედგინოს არჩევნების ჩატარებიდან არა უგვიანეს სამი დღისა. მათ შესახებ კომისია გადაწყვეტილებას იღებს არჩევნებიდან არა უგვიანეს ხუთი დღისა.

ცენტრალური საარჩევნო კომისიის გადაწყვეტილებისა და კომისიის მიერ საარჩევნო კანონის დარღვევის გამო საქართველოს რესპუბლიკის უზენაეს სასამართლოში საჩივრის შეტანის უფლება აქვთ პრეზიდენტობის კანდიდატს ან ცენტრალურ საარჩევნო კომისიაში მის პასუხისმგებელ წარმომადგენელს არჩევნების ჩატარებიდან არა უგვიანეს ექვსი დღისა.

სასამართლოს, რომელიც საქმეს განიხილავს, გადაწყვეტილება გამოაქვს არჩევნების დღიდან არა უგვიანეს ცხრა დღისა. აღნიშნული გადაწყვეტილება საბოლოოა და გასაჩივრებას არ ექვემდებარება.

ცენტრალური საარჩევნო კომისია დაუყოვნებლივ ასრულებს სასამართლოს გადაწყვეტილებას, ხოლო სასამართლოს გადაწყვეტილების მიღებამდე აჩერებს არჩევნების შედეგების დადგენას.

თუ პრეზიდენტობის კანდიდატს, მის პასუხისმგებელ წარმომადგენელს ცენტრალურ საარჩევნო კომისიაში, პრეზიდენტობის კანდიდატის ნდობით აღჭურვილი რომელიმე პირს ან საარჩევნო უბანში მის რომელიმე წარმომადგენელს დაუმტკიცდება არჩევნების დღეს ამომრჩეველთა ნებაზე კანონით დაუშვებელი ზემოქმედება, მაშინ შესაბამისი სასამართლოს გადაწყვეტილებით საარჩევნო კომისია გააუქმებს პრეზიდენტობის ამ კანდიდატისათვის მიცემული ხმების მთელ რაოდენობას ამ უბანში. იმ შემთხვევაში, როდესაც გაუქმებულ ხმათა რაოდენობას შეიძლებოდა გავლენა მოეხდინა არჩევნების ჩატარებულად ჩათვლაზე, არჩევნებში სხვა გამარჯვებული კანდიდატის გამოვლენაზე ან არჩევნების მეორე ტურში მონაწილე პრეზიდენტობის კანდიდატების გამოვლენაზე, შესაბამის უბნებში ტარდება ხელახალი ხმის მიცემა არჩევნების დღიდან ორი კვირის ვადაში“.

მე-6 ნაწილში რიცხვი „5“ შეიცვალოს რიცხვით „10“;

მე-8 ნაწილი ჩამოყალიბდეს შემდეგი რედაქციით: