პროლოგი 100 ლექსის

რა საოცარი დასრულდა წლები!

მეფეთა წყება გაქრა, ვით ლანდი,

მოშორდნენ ტახტებს: ვილჰელმი, კარლოს,

ნიკოლოოზი და ფერდინანდი.

მაგრამ მწუხარედ მათზე კი არა,

სხვაზე იფიქრებს მარტიროლოგი:

იმ მრისხანე წელს პოეტი-მეფე -

გარდაიცვალა ალექსანდრ ბლოკი,

ჰანგების მეფე - დიდი სენ-სანსი

და დირიჟორი ნიკიში მძლავრი...

ეკლიან გზაზე დაეცა ბევრი,

მხოლოდ მე ერთი გადავრჩი მგზავრი,

რომ გამომევლო ჯერარსმენილი

ქარტეხილები ცეცხლთა ფენისა

და მომეტანა საქართველოში

სიმღერა ქვეყნის გადარჩენისა!

1921