აბაშიძე ასლანბეგ
აბაშიძე, ასლანბეგ იბრაჰიმის ძე, (1877 - 1924, მარტი), რევოლუციონერი, პოლიტემიგრანტი, წითელი რაზმის ერთი მეთაურთაგანი, ძმა მემედბეგ აბაშიძისა. სამხედრო სწავლა დაამთავრა სტამბოლში და დაახლ. 1900 წელს სამშობლოში დაბრუნდა. რევოლუციურ მუშაობას შეუდგა სოციალ-დემოკრატიულ პარტიაში, იყო სოციალ-დემოკრატიული წითელი რაზმის უფროსთაგანი, მონაწილეობა მიიღო ბათომის რევოლუციურ გამოსვლებში. მკვლელი-ტერორისტი იოსებ ბრეგვაძე შეიფარა, შემდეგ ორი კაცით ბათომიდან გაიყვანა და თვითონ რევოლუციონერთა მხარეს გადავიდა.
1) 1905 წელს თავისი რაზმით განაიარაღა ბათუმის საოლქო სასამართლოს სტრაჟნიკები, საოლქო საწყობი გააღო, საიდანაც გამოიტანა თოფები, თან გაიყოლია სტრაჟნიკები და ბათომის შეიარაღებული აჯანყებაში მათაც მიაღებინა მონაწილეობა. 2) მოაწყო დენიკინელი გენერალ ნათიევის და მისი ადიუტანტის მოკვლის საქმე, რომელნიც სამეფო წყობილების აღდგენისათვის ბათომში მოხალისეთა ჯარს ადგენდნენ და ამ მკვლელობის მონაწილეთაგანი დაჭრილი ილია მიქაია წაიყვანა ტფილისს სამკურნალოდ. 3) სამუსლიმანო საქართველოს კომიტეტში სათავეში ედგა საქართველოს განთავისუფლების მიზნით შემდგარ ათასეულს, რომელიც ოზურგეთში იმყოფებოდა.
რევოლუციური მუშაობისთვის ორ წელიწადს ციხეში იჯდა, შემდეგ სამუდამოდ გადასახლებული იყო ციმბირს. ციმბირიდან ოსმალეთს გაიქცა, რევოლუციის შემდეგ კი საქართველოში დაბრუნდა.
1923 წელს მისი ძმები და აბაშიძენი შეიპყრეს, ასლანბეგის დასაჭერადაც მივიდნენ. ასლანბეგმა შესაპყრობად მისულთ უთხრა, დამაცადეთ, ახლავე ჩამოვალო. სახლის ჭერში ავიდა, ბანიდან გაიქცა და ოსმალეთს გადაიხვეწა.
