აბაშიძე რიზა
აბაშიძე რიზა ჰუსეინის ძე (1879 – 19??) – ქართველი მუსულმანი, რევოლუციონერი, ძმა და თანამოღვაწე ზია აბაშიძისა. საშუალო განათლება ტრაპიზონში და სტამბოლში მიიღო. შემდეგ შევიდა სტამბოლის სამედიცინო აკადემიაში. 1901 წელს ბათუმში დაბრუნდა, სადაც ძმასთან და ბიძაშვილებთან ერთად რევოლუციურ მუშაობაში ჩაება და მათთან ერთად იდევნებოდა.
ბათუმში მუსულმანთა სკოლებს ხელმძღვანელობდა, მედრესეების საერო სკოლებად გადაკეთება განიზრახა. არაბულის მაგიერ თათრულის სწავლა შემოიღო, რომ ქართულზე გადასვლა გაეადვილებინა. ამ გარემოებამ აჭარის მუდერისი აუმხედრა, რომელმაც მთავრობასთან დაასმინა. რევოლუციური მუშაობის გამო ტრაპიზონში გადახვეწილ რომანოვთან ერთად, სამეფო საგვარეულოს 300 წლისთავის გადახდის ჟამს, სამშობლოში დაბრუნდა. რუსეთის მთავრობამ შეიპყრო და 1913 წელს ნარიმის მხარეში ხუთი წლით გადაასახლა. ჩელიაბინის ციხეში იჯდა ალ. რიკოვთან და აკაკი კობახიძესთან ერთად. 1917 წლის რევოლუციის შემდეგ სამშობლოში დაბრუნდა. დროებითი მთავრობის დროს სოციალ-დემოკრატიული პარტიიდან ბათუმის საბჭოს წევრად იყო არჩეული.
1919-1920 წწ. გაზ. „სამუსლიმანო საქართველოში“ თანამშრომლობდა, სადაც თათრული და რუსული ენებიდან, აგრეთვე – ქართულიდან თათრულ ენაზე თარგმანებს აქვეყნებდა.
