არდოტელი მურღვა

მურღვა არდოტელი

არდოტელი მურღვა – (1962), ქართველი პოეტი. ნამდვილი სახელი და გვარი – ნიკო ზვიადაური; დაიბადა სოფელ არდოტში (დუშეთი). 1980 წელს დაამთავრა ბარისახოს სკოლა-ინტერნატი, 1981-86 წლებში სწავლობდა თსუ-ს ფილოლოგიის ფაკულტეტზე. უნივერსიტეტის დასრულების შემდეგ, მუშაობდა ს. ჯანაშიას სახელობის სახელმწიფო მუზეუმის რელიგიის განყოფილებაში. 1991 წლიდან დაუბრუნდა მშობლიურ კუთხეს, ხევსურეთს და შატილის სკოლა-ინტერნატში ქართულ ენასა და ლიტერატურას ასწავლიდა. შემდგომ მის მიერვე არდოტში, საკუთარ სოფელში დაარსებული სკოლის გამგე-მასწავლებელი იყო. ამჟამად ნიკო ზვიადაური თავისი ქვეყნის მესაზღვრეა. იგი არის პოეტური ორდენის „მარად ახალი ქნარის” წევრი, გამოცემული აქვს ერთადერთი წიგნი – „თენების მთვარე” (1994 წ).

მურღვამ თქვა

მურღვამ თქვა, არდოტ გაზრდილმა,

სიყრმის დღეები მოვწვერე.

მთვარე, ცას დაკიდებული,

თხის ჯიქანივით მოვწველე.

დანდობა დაკარგულია,

უჟამო ჟამი წკრიალებს,

ქარქაშში ჩასძინებიათ

თეთრტარა ნაპერწკლიანებს.

ხანდიხან მოვა ოცნება,

ცეცხლივით ამაბრიალებს

ესეა წუთისოფელი –

წაღმა-უკუღმა ტრიალებს,

გულში რომ შავი ღამეა,

ნეტა ვინ გაამზიანებს,

სიკვდილი რას მოგვერევა

არაგველ-ალაზნიანებს.

ბევრ მწარე გამოვიარე,

სულში ვინ ხედავს იარებს...

„დარდი არც უნდა ახსენო,

თუ არვინ გაგიზიარებს”.

ესეა წუთისოფელი,

წაღმა-უკუღმა ტრიალებს.

როგორც ჰგონია საწუთროს,

ისე ვერ გამატიალებს.

წყარო

ქართველი პოეტები (ენციკლოპედია)