ახვლედიანი ერლომ

ერლომ ახვლედიანი

ახვლედიანი ერლომ – (1933 – 2012), მწერალი, პოეტი, სცენარისტი. დაიბადა თბილისში. დაამთავრა თბილისის სახელმწიფო უნივერსიტეტი 1957 წელს და უმაღლესი სასცენარო კურსები მოსკოვში 1964 წელს. მუშაობდა კულტურის ძეგლთა დაცვის საზოგადოებაში ინსპექტორად (1959-1960), საქართველოს ტელე-რადიო კომიტეტში მხატვრული ტელეფილმების უფროს რედაქტორად (1967-1968), იყო სტუდია „ქართულ ფილმთან” არსებული მწერალთა შემოქმედებითი გაერთიანების წევრი (1971- 1972), სატელევიზიო ფილმების სტუდიის უფროსი რედაქტორი (1979-1987), თეატრალური ინსტიტუტის სასცენო ჯგუფის პედაგოგ-ხელმძღვანელი (1982-1987, 1995-1999). მისი ნაწარმოებები თარგმნილია და გამოქვეყნებულია რუსულ, სომხურ, ჩეხურ, გერმანულ, უნგრულ და არაბულ ენებზე. არის ათეულობით ფილმის სცენარის ავტორი.

საღამო

როგორ დამღალა ხეტიალმა,

ფიქრმა, წუხილმა.

როგორ დამღალა ყველა სურვილმა.

ვდგავარ და ვხედავ.

როგორ მიდის ნისლში წარსული

ეს დღეც მას გაჰყვა

(რა უბრალოდ მიდიან დღენი...).

წავიჩოქები მე ჩემს წინაშე:

რას მოველოდი ამა სოფლად,

რას მოველოდი?!

ნუთუ ეს იყო ყველაფერი,

ნუთუ ეს იყო?!

ნუთუ ამისთვის დავიბადე,

ნუთუ ამისთვის?!

ვიდგე და ვჭვრეტდე, როგორ მიდის

ნისლში წარსული?

ეს დღეც გავიდა...

წყარო

ქართველი პოეტები (ენციკლოპედია)