ბაია

ბაია - Ranunculus polyanthemos L.

ქართლ., კახ., მესხ., ჯავახ., ზ.იმერ. – ცხვირისატეხელა, ქართლ., მოხ., ხევს., თუშ., ქიზ., რაჭ., იმერ., აჭარ. - წალიკა, მეგრ. – ბაიე, ბაია

ბაიები ბაიასებრთა ოჯახს წარმოადგენენ. საქართველოს მთასა და ბარში ორმოცდაათამდე სხვადასხვანაირი ბაია იზრდება. ზოგი მინდვრად გვხვდება, ზოგი — ტყეში, ხშირია ბაიები ჭაობიან ადგილებში, წყლის პირას, სათიბ-საძოვრებზე და პურეულის ნათესებშიც.

საქართველოში ფართოდაა გავრცელებული მრავალწლოვანი ბაია, გვხვდება ნატყევარ ადგილებში. მისი ღერო 20-80 სმ სიმაღლისაა, დატოტვილი. ფოთლები თათისებრ დაკვეთილია, ქვედა მათგანი გრძელყუნწიანია, ზედა ფოთოლი კი მჯდომარეა. ბაიები ერთიმეორისაგან განსხვავდებიან ფოთლისა და ნაყოფის აგებულებით, მიწისქვეშა ნაწილებით, ზოგი მათგანი ერთწლოვანია, ზოგი მრავალწლოვანი.

ჩვენში გავრცელებულ ყველა ბაიას ყვითელი ყვავილი აქვს. უმეტესობა გაზაფხულობით იწყებს ყვავილობას და საკმარისად დიდხანს ყვავის. ბაიას გვირგვინის ფურცლები წარმოადგენს სანექტრეებს. თითოეული სანექტრის (ფურცლის) ფუძე რომ დავათვალიეროთ, ადვილად შევამჩნევთ პატარა სათაფლე ფოსოს, რომელიც, მეტწილად, პაწაწინა ქერქლითაა მიფარებული. ყვავილში მრავალი მტვრიანა და ბუტკოა.

წყარო

ჩვენი ტყისა და მინდვრის ყვავილები ხეები და ბუჩქები