ბაყ-ბაყ გუიმირი
ბაყ-ბაყ გუიმირი (ოს. Бахъ-Бахъ гуымиры) – ოსური დარეძანული თქმულებების პერსონაჟი, რომელსაც ფილონ-გუიმირი ცოლს სტაცებს. განრისხებული ბაყ-ბაყ გუიმირი მოძალადეს უსაფრდება და ერთი კვირის უძინარი და დაღლილი საფარში ისე ელოდება, რომ ხმლის წვერი, ჩაძინების შიშით, შუბლზე აქვს მიბჯენილი; როგორც კი ჩათვლემს, ხმლის წვერი ერჭობა და სისხლი ნაკადულივით მოსჩქეფს. შუაღამისას მწყურვალ ამრანს, მისირბისა და ბადრის წყლის ნაცვლად ბაყ-ბაყ გუიმირის სისხლის დალევა უწევთ; იმის გამო, რომ სასმელი მლაშე აღმოჩნდება, დაეჭვდებიან, დინებას აყვებიან და ბაყ-ბაყ გუიმირს მიადგებიან; ამრანი ეუბნება, რომ დაიძინოს და საჭირო დროს გააღვიძებს; გაღვიძება კი, ბაყ-ბაყ გუიმირის თქმით, ასეა შესაძლებელი: როცა ცაზე ნახევარმთვარე გამოანათებს (ასე ანათებდა ბაყ-ბაყის ცოლი), მისივე ხმალი სამჯერ უნდა ჩაარტყან. საბოლოოდ, იგი ფილონ გუიმირთან ბრძოლაში იღუპება.
ლიტერატურა
- «Амран». Даредзановские сказания у осетин. Перевод, обработка и комментарии В. И. Абаева. Предисловие и редакция академика Н. Я. Марра. М.-Л., 1932;
- Калоева Д. А. Даредзановские сказания у осетин (Исследование, тексты). Цхинвали, 1975.
