ბაშნიხუ

ბაშნჷხუ (აფხ. Башныхә) — ნართულ თქმულებათა აფხაზური ვერსიის გმირი, რომელიც ზოგჯერ "გულკეთილის" ეპითეტით იხსენიება. იგი ხშირად მარტოდმარტო ლაშქრობს აღმოსავლეთის მხარეს, სადაც ნართების მტრები ცხოვრობენ; ავიწროებს მათ და აფართოებს ნართების მიწა-წყალს აღმოსავლეთის მიმართულებით. ბაშნიხუ დაუნდობლად მტრობს იმ ავკაცებს, რომლებიც ადამიანებს იტაცებენ, შემდეგ კი ყიდიან ან ცვლიან ცხენებზე. იგი თანაბრად სჯის გამყიდველსაც და მყიდველსაც. ნართი გმირი შვიდი გზის გასაყარზეა ჩასაფრებული და ასე ანთავისუფლებს დამტყვევებელთაგან ადამიანებს. ერთხელაც ნართქითიდან (ნართების სოფლიდან) წამოსხმული ტყვეები მოძალადეებისგან გაანთავისუფლა, მშობლიურ მიწას მიახლოებული მტერი ზღვისპირას მიიმწყვდია და იქ დააფიცა, რომ ეს მათი უკანასკნელი ავკაცობა იქნებოდა. როგორც ჩანს, ნართულ გადმოცემებში ეს ეპიზოდი შედარებით ახალია და ფეოდალური ხანის დასავლეთ საქართველოში გავრცელებულ ტყვეთა სყიდვის ინსტიტუტს უკავშირდება.

ლიტერატურა

Приключения нарта Сасрыквы и его девяноста девяти братьев. М., 1962; Сух., 1988.

წყარო

კავკასიის ხალხთა მითები და რიტუალები