ბედიანის ღვთისმშობლის მიძინების მონასტერი
ბედიანის ღვთისმშობლის მიძინების მონასტერი– მდებარეობს დაბა ბედიანში (წალკის მუნიციპალიტეტი, წალკის ეპარქია), ქ. წალკიდან 30 კმ-ზე, მდ. ხრამის მარჯვენა ნაპირზე. მონასტერი ბედიანში არსებობდა შუა საუკუნეებიდან. აღდგა 1990-იან წლებში. ახლად აღორძინებულ სავანეში მონაზვნები გადაიყვანეს თბილისის ფერისცვალების დედათა მონასტრიდან. 1999 წლის სექტემბერში ბედიანში დასახლდნენ წმ. გიორგი მთაწმინდლის დედათა მონასტერთან არსებული ბავშვთა ცენტრის აღსაზრდელები და მათი პედაგოგ-აღმზრდელები. მონასტრის მონაზვნებსა და მორჩილებს იმთავითვე მჭიდრო ურთიერთობა ჰქონდათ ბავშვებთან, რომელთა პირველ ნაკადს მონასტერმა უმასპინძლა და მათზე მზრუნველობა იკისრა.
მონასტრის ღვთისმშობლის შობის სახელზე აგებული ტაძარი განვითარებული შუა საუკუნეების ძეგლია. ეკლესიას ერთი აქცენტირებული შესასვლელი აქვს სამხრეთის მხრიდან. ორნამენტაცია ძუნწი და მარტივია. ლავგარდანი უბრალო და სადაა. სახურავი ახალია. შიდა სივრცე სტრუქტურის მიხედვით სამ ნავად არის დაყოფილი. შუა სივრცე მაღალი და აზიდულია. ნახევარწრიული აფსიდა ვიწრო და ღრმაა. ტაძარზე განირჩევა სხვადასხვა დროის სამშენებლო წყობა და მასალა. ქვედა ფენა უფრო მუქი ფერისაა და ამოყვანილია კარგად გათლილი წახნაგოვანი ქვებით, შუა ფენიდან წყობა ოდნავ არეულია და გამოყენებულია კირხსნარი. დარღვეულია სარკმელთა წყობის განლაგებაც. ტაძრის თავდაპირველი სახე. დაკარგულია. ეკლესიის ეზოში მონაზონთა სენაკებია განთავსებული.
მონასტერში ამჟამად 5 მონაზონი და რამდენიმე მორჩილია. მონასტრის წინამძღვარია მონაზონი ანტონინა (რუხაძე).
გ. მაჩურიშვილი
