ბერბენკი (ქლიავის ჯიში)
ბერბენკი - (Burbank). ქლიავის ჯიში. გამოყვანილია ბერბენკის მიერ 1883 წელს იაპონიიდან მიღებული ქლიავის კურკის დათესვით. საქართველოში გვხვდება მხოლოდ საკოლექციო ნარგავებში.
ბერბენკი საინტერესოა მით, რომ ხე ძლიერ გამძლეა, მოსავლიანი და საღი. ნაყოფი შედარებით სხვა იაპონურ ქლიავის ჯიშებთან, საუკეთესო გემოსია. ხე ხასიათდება ბრტყელი გაშლილი ვარჯით. ფოთოლი განიერ-ლანცეტისებრია, ძალიან წააგავს ატმის ფოთოლს. ყვავილობა ადრეული ახასიათებს.
ნაყოფი მწიფდება ივლისის ბოლო რიცხვებში; ნაყოფი საშუალო ზომისაა (4X4,5 სმ.), მრგვალი ფორმის.
ნაყოფის კანი თხელია, მაგრამ მკვრივი. ძირითადი ფერი ყვითელია და დაფარულია წითელი შეფერვით. კანზე ემჩნევა მრავალი მსხვილი ყომრალი ფერის წერტილი.
ნაყოფის ხორცი მუქი ყვითელი ფერისაა, წვნიანი, ნაზი, მკვრივი, ტკბილი, სურნელოვანი. კურკა არ ეცლება ხორცს, წვრილია, მომრგვალო, ოვალური ფორმის. ნაყოფი კარგად იტანს ტრანსპორტს და დიდხანს ინახება.
