ბუბაქარი
NPLG Wiki Dictionaries გვერდიდან
ბუბაქარი – დავით გარეჯელის „ცხოვრებაში“ მოხსენიებული დიდებულთ რუსთავის მკვიდრი „ბარბაროზი“, რომელმაც დავით გარეჯელის მოსაკლავად აღმართა მახვილი, მაგრამ ხელი გაუშეშდა, ხოლო დავითის ლოცვით ისევ განიკურნა. ამის შემდეგ ირწმუნა ბუბაქარმა დავითის წმინდანობა, მისი სასწაულმოქმედება და თავისი ოჯახის წევრებითურთ მიიღო ქრისტიანობა (VI ს.). ბუბაქარმა საკუთარი ხარჯითა და მუშახელით „შეუქმნა ეკლესიაჲ სალოცველად ძმათა“, რომელიც შემდგომში ილარიონ ქართველს გაუფართოებია (IX ს.) და „რომელსა შინა სამხრით კერძო ეკლესიასა მას შექმნა ლუსკუმაჲ შუენიერი, რომელსა შინა დაკრძალულ არიან ნაწილნი წმიდისა მამისა ჩუენისა დავითისნი“ (ძეგლ. I, 236).
ლიტერატურა
საქართველოს მართლმადიდებელი ეკლესიის ენციკლოპედიური ლექსიკონი, ე. გაბიძაშვილის რედ., თბ., 2007.
