განჯისკარელი ანტონ

ანტონ განჯისკარელი

განჯისკარელი ანტონ – (1869 – 1929), ნამდვილი სახელი და გვარი – ანტონ ხუდადოვი. სახალხო პოეტი, ძველი თბილისის აშუღური პოეზიის წარმომადგენელი. დაიბადა თბილისში. პროფესიით იყო მეთუნუქე. ყურადღება მიიქცია პოეტური ნიჭითა და ლექსებში პოლიტიკურ-მოქალაქეობრივი თემატიკით. ცნობილია თვითმპყრობლობის წინააღმდეგ დაწერილი მისი ლექსი „მაღლა ღმერთი შეგეწიოს, ძირს ხელმწიფე, მისი ტახტი!” 1892-1916 წლებში 25-ზე მეტი წიგნი აქვს გამოცემული, ამათში ყველაზე უფრო საინტერესოა: „უბის წიგნაკი” „დეკადენტი” და სხვადასხვა ლექსები, (1904 წ), „კინტოს გოდება და სხვა საოხუნჯო ლექსები ანტონ განჯისკარელისა”, 1907). სალიტერატურო კრიტიკადადებითად აფასებდა მის შემოქმედებას. იროდიონ ევდოშვილმა მას მიუძღვნა ლექსი „სახლების მხურავი”.

ჰოი, უფალო!...

ჰე, უფალო, ეს ქვეყანა

რისთვის შეჰქმენ, თუ არ გჭირდა?

რად განსახე ადამის ძე,

ამ ბოლო დროს თუ დამცირდა?

რად მიეცი აზრი დიდი,

თუ სიცოცხლე არად ღირდა?

ვინ გეხვეწა მათ გაჩენას?

მითხარ, თუ ვინ აგიხირდა?

თუ შეჰქმენ და გააჩინე,

რაღად გაჰყავ ათას გვარად,

ერთად რად არ დაამყოფე,

რომ ეცხოვრათ მეგობარად?

ზოგი მთაში რად არეკე,

სხვა დატოვე დაბლა, ბარად,

დღეს ერთმანეთს შეჰყურებენ

ერთურთის არ გასახარად.

რად მოჰგვარე მოციქულნი,

რომ ძმათ შორის შური სთესოს?

ერთ მხრივ მოსეს აგზავნიდი,

იქით მაჰმადს, აქ იესოს?

ნუთუ ლხინად მიგაჩნია,

რომ ძმამ ძმაზედ ხმალი ლესოს?

წყარო

ქართველი პოეტები (ენციკლოპედია)