გეინსბორო თომას
თომას გეინსბორო – (Thomas Gainsborough, 1727- 1788) XVIII საუკუნის ინგლისელი მხატვარი. გეინსბოროს სახელოსნო მდიდარ და ფეშენებელურ საკურორტო ქალაქ ბათში ჰქონდა. დამკვეთების გემოვნების საპასუხოდ, გეინსბორო არაფორმალურ, თავისუფალ პოზებში წარმოდგენილ ფიგურებსა და ბუნებრივ ლანდშაფტებს ხატავდა; იგი 1620-იანი წლების ინგლისისთვის კარგად ცნობილი ვან დეიკის ნამუშევრების მსგავს სურათებს ქმნიდა.
გეინსბოროს ადრეული დაუსრულებელი ტილო რობერთ ენდრიუსი და ფრენსის ქართერი, რომელიც მათი ქორწინების შემდეგ მალევეა შესრულებული, მდიდარ მიწათმფლობელსა და მის მეუღლეს საკუთარ მამულში, მდინარე სადბერისა და საფოლქის მთების ფონზე წარმოგვიდგენს. ახალგაზრდა ფრენსის ქართერი დეკორატიულ სკამზე გამართული ზის, ატლასის დახვეწილი მბრწყინავი კაბა სკამზე ფართოდაა გაშლილი (ხოხბის გამოსახულება კაბის კალთაზე დაუმთავრებელია). მისი მეუღლე კი, მხრის ქვეშ დაუდევრად ამოდებული სანადირო თოფითა და ფეხებთან გამოსახული ძაღლით, სკამს თავისუფლად დაყრდნობილი, მოშვებული დგას. ლადნშაფტს საკუთარ მიწა-წყალზე წყვილის მზრუნველობის კვალი ემჩნევა. წინა პლანზე გამოსახული ძნების რიგები და ნამჯა რობერტ ენდრიუსის მიერ მის მამულში წარმატებულად განვითარებულ სოფლის მეურნეობაზე მიანიშნებს; უკანა შორეულ პლანზე გამოსახულ მინდორზე კი, ცხვრები და ცხენები ბალახობენ. სურათის მნიშვნელობას წყვილის თავისუფალი პოზებით გადმოცემა, მათი მამულის ხედებისა და საკუთარი მიწა-წყლით ამაყი მეუღლეების ასახვა განაპირობებს, ისევე, როგორც მხატვრის მიერ გამოვლენილი დამოკიდებულება ბუნების - სილამაზისა და სიმდიდრის გულუხვი პირველწყაროს - მიმართ.
