გვიმრუჭა
Fam. Aspleniaceae — ოჯ. გვიმრუჭასებრნი Asplenium septentrionale (L.) Hoffm. — გვიმრუჭა.
მრავალწლოვანი ბალახოვანი მცენარეა, პატარა ზომის გვიმრაა 15 (20) სმ სიმაღლის. ფოთლები ორმაგ-სამმაგ დიქოტომიურად დაყოფილია რამდენიმე (2-5) ვიწრო, ხაზურ ან ხაზურ ნიჩბისებრ სეგმენტებად, კიდეებზე მარტოული, იშვიათად დაშორიშორებული კბილებითაა, მრავალია. სორუსები — ხაზურია ან მოგრძო, მეორეული ძარღვების ცალ მხარეზე განლაგებული, მწიფდება VII-VIII.
იზრდება ტყის ქვედა სარტყლიდან ალპურ სარტყლამდე. ძირითადადა გვხვდება ციცაბო კლდოვან ფერდობებზე, დედა ქანების გამოსვლის ადგილზე და თხელ ძლიერ ქვიან ნიადაგებზე, შედარებით მშრალ, დაბალი ბონიტეტის ტყეებში (განსაკუთრებით მუხნარ, რცხილნარ, მუხნარ-იფნარ-რცხილნარ, ფიჭვნარ და ნაძვნარ ტყეებში), ბუჩქნარებით დაფარულ კლდეებსა და კლდოვან ადგილებზე. წარმოდგენილია ერთეული ეგზემპლარებისა და პატარა ჯგუფების სახით.
გვხვდება მთელ სამეგრელოში.
ფოთლის ნახარში გამოიყენებოდა ხალხურ მედიცინაში, როგორც ამოსახველებელი საშუალება (Ролловъ, 1908).