გიგინეიშვილი კონა
კონა გიგინეიშვილი – (დ. 6. მაისი 1902, ქუთაისი, – გ. 7. იანვარი 1976, თბილისი), ფილოლოგი, ენათმეცნიერი, ლექსიკოლოგი.
დაამთავრა ქუთაისის ქართული გიმნაზია (1920) და თსუ ფილოლოგიური ფაკულტეტი (1929). თსუ ასპირანტურის დამთავრების (1942) შემდეგ პედაგოგიური მოღვაწეობას ეწეოდა ბათუმის პედაგოგიურ ინსტიტუტში (1942-54), იყო ქართული ენის კათედრის გამგე. პარალელურად ლექციებს კითხულობდა ქუთაისის პედაგოგიურ, თბილისის თეატრალურ და უცხო ენათა ინსტიტუტებში. 1954–66 გიგინეიშვილი მუშაობდა ენათმეცნიერების ინსტიტუტის სამეცნიერო ტერმინოლოგიის განყოფილების მეცნიერ თანამშრომლად. 1966-იდან გარდაცვალებამდე – ქართული ენციკლოპედიის სალიტერატურო კონტროლის რედაქციაში უფროს სამეცნიერო რედაქტორად, აგრეთვე სატრანსკრიფციო ჯგუფის ხელმძღვანელად (1973-მდე). აქ მან დიდი წვლილი შეიტანა ენობრივი, ტერმინოლოგიური საკითხების გადაწყვეტაში, უცხოურ სახელთა ქართული დაწერილობის დადგენაში და სხვ. გიგინეიშვილის მიერ შედგენილი „ბერძნული და რომაული საკუთარი სახელების ორთოგრაფიული ლექსიკონი“ (გამოიცა 1985) აღიარებულია ნორმატიულ სახელმძღვანელოდ. დაუმთავრებელი დარჩა ბიბლიის ტერმინთა ქართულ-რუსულ-გერმანული პარალელური ლექსიკონი.
ნ. გიოშვილი
თხზულებები
- გიორგი ერისთავის კომედიების ენა.– „ბათუმის შოთა რუსთაველის სახ. პედ. ინ-ტის შრომები“, 1950, ტ. 1;
- ბრძანებითი კილო ძველ და ახალ ქართულში (ხელნაწერი; თეზისები გამოქვეყნდა).
