გიორგი მწერალი და საბა ხახულელი
გიორგი მწერალი და საბა ხახულელი (XI ს.), სასულიერო პირები, წმინდანები. მოღვაწეობდნენ ხახულის მონასტერში. (ხსენ. დღე 19.12/01.01). გიორგი მთაწმიდლის მამის – იაკობის ძმები.
ღირსი გიორგი მწერალი და მისი ძმა საბა სავსენი იყვნენ საღმრთო მადლით. „ესენი მკჳდრ იყვნეს ხახულს ორითავე ცხორებითა შეზავებულად, რამეთუ სიმდიდრესა თანა საღმრთოჲსა მოქალაქობისასა ჴორციელიცა სიმდიდრე უხუებით აქუნდა“. როდესაც წმ. მამებმა ყრმა გიორგის სიკეთისა და ღმრთისმოშიშების შესახებ გაიგეს, მისი ხახულში მიყვანა ურჩიეს იაკობს. მანაც სიხარულით მიჰგვარა შვილი ღმერთშემოსილ ძმებს.
ღირსმა გიორგიმ და საბამ ყრმა გიორგი ლოცვა-კურთხევის მისაღებად მონასტერში დავანებულ წმინდა მამებს: მაკარი მმარხველს, ბასილი ბაგრატის ძეს, ილარიონ თუალელს და ანტონი მნათეს წარუდგინეს, შემდეგ იქვე, მონასტერში დატოვეს და ხელმძღვანელობდნენ მის აღზრდასა და სწავლა-განათლებას. იმ დროს დაბა ტვარწატაფში ცხოვრობდა დიდებული ფერის ჯოჯიკისძე, რომელსაც ცოლად ჰყავდა მეფე ბაგრატ III-ის ასული. მათ განიზრახეს გონიერი და სულიერ ცხოვრებაში გამოცდილი ბერის მიპატიჟება სასახლეში მასწავლებლად და სულიერი ცხოვრების საქმეთა გამრიგედ. მათი არჩევანი ღირს გიორგი მწერალზე შეჩერდა, რადგან „უგონიერესსა ვერვის ჰპოვებდნენ“. ვედრებით დაითანხმეს ღირსი მამა მონასტრიდან წასვლაზე.
გიორგი ხახულელმა ფერის ჯოჯიკისძის ოჯახში თან წაიყვანა ყრმა გიორგი. ერთი წლის შემდეგ ბიზანტიის იმპერატორმა ბასილიმ ცილი დასწამა ფერისს და თავი მოჰკვეთა. მისი მეუღლე სახლიკაცებით, რომელთა რიცხვში გიორგი მწერალი და ყრმა გიორგი მთაწმიდელიც იყვნენ, კონსტანტინოპოლს წაიყვანეს, სადაც თორმეტი წელი დაჰყვეს. შემდგომ კი კვლავ უკან დაბრუნდნენ.
ლიტერატურა
- ქართველ წმიდათა ცხოვრებანი, დეკანოზ ზაქარია მაჩიტაძის გამოც., თბ., 2007;
- ქართველ წმინდანთა ცხოვრებანი, თბ.-ათენი, 2003.
