გომიაშვილი ალექსანდრე
NPLG Wiki Dictionaries გვერდიდან
გომიაშვილი ალექსანდრე – (1911 –1997), ქართველი პოეტი. დაიბადა სტეფანწმინდაში. 1933 წელს დაამთავრა თსუ. 1938-1940 წლებში იყო ჟურნალ „მნათობის” პოეზიის განყოფილების გამგე; 1929 წელს ჟურნალ „ქართულ მწერლობაში” გამოქვეყნდა მისი პირველი ლექსი „მთის ბალადა”, 1931 წელს – პირველი პოეტური კრებული „ამხანაგმა მთამ აიღო სიტყვა”; ომის თემაზე დაწერილი აქვს ლექსები: „საქართველო, ხელი ხმალს იკარ!” (1943), „დასაწყისი განთიადისა” (1946), „მშვიდობის ჯარისკაცი” (1950); პოეტურ კრებულთაგან აღსანიშნავია: „ანდეზიტის სიმღერა” (1932), „ლექსები” (1933, 1937, 1978), „დარიალი” (1940), „ლექსები და ბალადები” (1960). დაკრძალულია დიდუბის პანთეონში.
- კავკასი
- სად დარიალი ხრავს მოგონებას
- და თერგი იბრძვის დაჭრილ ვეფხვივით,
- იმდენი თქმულა მასზე პოემა,
- რამდენიც არ აქვს კავკასს გრეხილი.-
- იღუნებიან „მთანი მაღალნი“,
- მოლოდინში რომ იდგნენ ზვიადად,
- ხევიდან მოდის ნაღმის ნაღარის
- ხმა, და მთა - გორი შეაზრიალა.
- მოხევეების მხრებზე ნაშენი
- აქ წარმოება სულ წინ მიდისო...
- ძველ მთას არა აქვს თავის საშველი,
- მოსჭერით კლდენი ანდეზიტისო!
- მოსჭერით კლდე და გულისფიცარი
- მოხუც ხევსურის სამშობლოისა,
- რა ვუყოთ მერე, კლდენი ქვისანი
- თუ ლაღუმების ხმაში მოისრა.
- მოსჭერით კლდენი! - ნაღმის ხმებია.
- გამოვიარეთ სნო და ქოსელი.
- ეს - ყაზბეგელი მოხევენია,
- ის კიდევ - ქვების მთლელი ოსები!
- მოხევეების მხრებზე ნაშენი
- აქ წარმოება სულ წინ მიდისო...
- ძველ მთას არა აქვს თავის საშველი,
- მოსჭერით კლდენი ანდეზიტისო!
- მოსჭერით კლდენი - გადაბუგული
- კავკასიონის თეთრი თეოსი!
- მოდის კლდეებში ნაღმის გუგუნით
- გამარჯვებული პრომეთეოსი.
