გუნდთი-ქალაქი

გუნდთი-ქალაქ-ი (ოს. Гундты-калак) – ნართული გადმოცემების ზოგიერთი ვარიანტის მიხედვით, ქალაქი, რომლის სანაპიროზე ხარის ტყავში გახვეული ურუზმაგი ზღვამ გამორიყა და რომელიც მოგვიანებით მოსულმა ნართებმა დაიპყრეს. თუ ვ. აბაევის მიერ ლინგვისტური და ისტორიული ანალიზით გაკეთებული დასკვნა ნართულ ეპოსში ბოსფორის მეფეზე დაცული ცნობის შესახებ მართებულია, მაშინ გუნდთი-ქალაქი ბოსფორის სამეფოს დედაქალაქი – პანტიკაპეი უნდა იყოს. ბოსფორის სამეფოსთან და მის დედაქალაქთან ოსთა წინაპრებს – სკვითურ-სარმატული მოდგმის ტომებს, ინტენსიური ურთიერთობა ჰქონდათ და სავსებით შესაძლებელია ეპოსის ადრეულ ვარიანტებში იგი სათანადოდ ასახულიყო („ქავთისარ-ხვიანდონ ალდარი“).

ლიტერატურა

• Нартовские сказания: Эпос осетинского народа. Книга 2. Владикавказ, 2004;
• Абаев В. И. Избранные работы. Т. I. Религия. Фольклор. Литература. Владикавказ, 1990.

წყარო

კავკასიის ხალხთა მითები და რიტუალები