დრეპანიდოტენიოზი
დრეპანიდოტენიოზი - (drepanidotaeniosis; აღმძვრელის გვარის დასახელება Drepanidotaenia + ბერძნ. osis დაავადება) – შინაური და გარეული წყალმცურავი ფრინველის ჰელმინთოზი.
აღმძვრელები – Drepanidotaenia lanceolata და D.przewalski პარაზიტობენ წვრილ ნაწლავებში.
დრეპანიდოტენიოზისათვის დამახასიათებელია ნერვული სისტემის დაზიანება. მოზარდეულში დაავადება მწვავე ფორმით მიმდინარეობს. ჭუჭულები დასუსტებულები არიან. მათ აღენიშნებათ პროფუზური ფაღარათი, პროგრესირებადი სიგამხდრე, მოძრაობის კოორდინაციის დარღვევა. ისინი ტაატით დადიან, თავი უკან აქვთ გადაგდებული ან ქანქარასებრად ამოძრავებენ. ნერვულ მოვლენებს თან სდევს ჩონჩხის კუნთების დაძაბვა შემდგომი დამბლით, რაც სიკვდილით მთავრდება. უფროსი ასაკის ფრინველში დრეპანიდოტენიოზი ქრონიკული ფორმით მიმდინარეობს. აღინიშნება დამაუძლურებელი ფაღარათი, რის გამო ფრინველი ძლიერ გამხდარია.
