ევანგელური ეკლესია "სიცოცხლის სიტყვა"

ევანგელური ეკლესია „სიცოცხლის სიტყვა“ - („Word of Life“) დაარსდა 1983 წლის 24 მაისს შვედეთში (ქ. უპსალა). მისი ფუძემდებელია ამავე ქვეყნის მკვიდრი, ულფ ეკმანი (Ulf Ekman). თავდაპირველად ეკლესიას მხოლოდ ოცი წევრი ჰყავდა, მაგრამ, დღესდღეობით, ყოველ კვირა დღეს შვედეთში ამ ეკლესიის ღვთისმსახურებაზე 2 000-მდე ადამიანი იკრიბება.

„სიცოცხლის სიტყვამ“ მიმდევრები გაიჩინა მრავალ ქვეყანაში: ინგლისში, გერმანიაში, ნორვეგიაში, პოლონეთში, ჩეხეთში, ბალტიის ქვეყნებში, საბჭოთა კავშირის დაშლის შედეგად წარმოშობილ ყველა სახელმწიფოში: თურქეთში, ავღანეთში, ისრაელში, სინგაპურში, ინდოეთში, ჩინეთსა და აშშ-ში.

ისტორია

1970-იან წლებში უპსალაში სტუდენტთა ჯგუფმა ბიბლიის შემსწავლელთა წრე ჩამოაყალიბა. წრის წევრების მიზანია, იმავდროულად, საკუთარ მეგობართა ევანგელიზაციაც იყო. ამ ჯგუფის ერთ-ერთი წევრი გახლდათ ულფ ეკმანიც. იგი გულმოდგინედ სწავლობს თეოლოგიას, აქტიურად მოღვაწეობს ჯგუფის სამეცნიერო საქმიანობაში. ამის შედეგად ეკმანი უპსალის უნივერსიტეტის ერთ-ერთი წამყვანი სპეციალისტი ხდება თეოლოგიის დარგში.

ულფ ეკმანი საკუთარი სიმამრის მეშვეობით გებულობს ამერიკაში დაწყებული რწმენის აღორძინების მოძრაობის შესახებ. იგი მიემგზავრება ოკლაჰომას შტატში, ტულსას ბიბლიურ ცენტრში. იქ ერთ წელიწადს მოღვაწეობს, რის შემდეგაც შვედეთში ბრუნდება. როგორც თავად აცხადებს, იმ ხანებში მიიღო მან ღვთის დავალება: „გაავრცელე რწმენის სიტყვა ადამიანებს შორის, მიუთითე მათ ამ სულიერ იარაღზე, ასწავლე როგორ გამოიყენონ იგი და გაგზავნე ისინი ღვთის სახელით სულიერ ბრძოლაში გასამარჯვებლად“. ამის შედეგად 1983 წლის გაზაფხულზე დაფუძნდა ეკლესია „სიცოცხლის სიტყვა“, იმავე წლის შემოდგომაზე ამ ეკლესიასთან ჩამოყალიბდა ბიბლიური სკოლაც, ხოლო 1994 წელს უნივერსიტეტიც გაიხსნა („Livets Ord University“).

1985 წლიდან მორწმუნეთა მისიონერული ჯგუფები ქ. უპსალიდან რეგულარულად ჩამოდიოდნენ საბჭოთა კავშირში. მისიონერთა უპირველესი მიზანი იყო ლოცვა „რკინის ფარდის“ დასამსხვრევად, რომელიც დიდ დაბრკოლებას წარმოადგენდა ამ ტერიტორიაზე სახარების და საერთოდ რელიგიური ლიტერატურის თავისუფლად შემოტანისა და გავრცელების საქმეში. ამ მისიონერულმა ჯგუფებმა ბევრი გააკეთეს საამისოდ: 1985-1989 წლების განმავლობაში მათ გაავრცელეს უამრავი ბიბლია და სხვადასხვა რელიგიური წიგნი, შექმნეს მლოცველთა ჯგუფები, მოაწყვეს პირველი კონფერენციები...

1989 წელს პასტორი ულფ ეკმანი სერიოზულ ძალისხმევას მიმართავს (ფინანსური მხარდაჭერის ჩათვლით) საბჭოთა კავშირში ქრისტიანული მოძრაობის დაწყებისათვის სახელწოდებით „რუსეთის შიდა მისია“ („The Russia Inland Mission“). ეკმანის ერთ-ერთი პირველი ნაბიჯი ამ კუთხით იყო ახალგაზრდა რუსი პასტორებისა და სამლოცველო ჯგუფების ლიდერებისათვის 100 ვიდეომაგნიტოფონისა და სხვა სახის აპარატურის გადაცემა. ამგვარმა ტექნიკურმა მხარდაჭერამ შეუწყო ხელი „სიცოცხლის სიტყვის“ მქადაგებლების საქმიანობას: ისინი 1990-იან წლებში უამრავი სემინარისა და კონფერენციის მოწყობას ახერხებენ.

1993 წელს მოსკოვში გამოჩნდა ამ ეკლესიის პირველი მისიონერი, უვე სვემბერგი. მან თავდაპირველად ხუთკაციანი ჯგუფი ჩამოაყალიბა, რომელიც ნელნელა იზრდებოდა. მისი ძალისხმევით გაიხსნა აგრეთვე ბიბლიური სკოლა, რომელიც დიდი ბრძოლის შემდეგ რეგისტრაციაში გაატარეს. 1994 წელს სკოლამ სწავლის მსურველთა პირველი ნაკადი მიიღო (530 სტუდენტი საბჭოთა კავშირის სხვადასხვა კუთხიდან).

მოსკოვის ამ ბიბლიური ცენტრის უნიკალურობას ის განაპირობებს, რომ სხვა სამისიონერო ბაზებისგან განსხვავებით, მას არანაირი ფინანსური დახმარება არ მიუღია საზღვარგარეთიდან. თავისი დაფუძნებისთანავე მხოლოდ მორწმუნეთა შემოწირულობებით არსებობს.

მოძღვრება

„სიცოცხლის სიტყვის“ დოქტრინა ისეთივეა, როგორიც ევანგელურ-ორმოცდაათიანელთა ეკლესიისა, ხოლო ღვთისმსახურება თითქმის არაფრით განსხვავდება სხვა ტრადიციულ პროტესტანტულ ეკლესიათა ღვთისმსახურებისგან. ევანგელური ეკლესია „სიცოცხლის სიტყვა“ აღიარებს მხოლოდ ნათლობის, ზიარებისა და ქორწინების საიდუმლოებებს.

ეკლესია „სიცოცხლის სიტყვა“ აღიარებს წმ. სამებას და ქრისტეს ღვთაებრიობას, არ კრძალავს ინტერკონფესიურ ქორწინებებს. ღვთისმსახურება შედგება ლოცვა-გალობების, წმ. წერილის კითხვაგანმარტებისა და ქადაგებისაგან.

„სიცოცხლის სიტყვა“ საქართველოში

ევანგელური ეკლესია „სიცოცხლის სიტყვა“ საქართველოში 1995 წელს დაფუძნდა მამუკა ჯებისაშვილის ხელმძღვანელობით.

მანამდე, 1991 წელს, ეკლესიის მომავალი დამფუძნებელი ლატვიაში მიემგზავრება ქ. ელგავის თეოლოგიურ ინსტიტუტში სასწავლებლად - პირველ არადენომინაციურ და ინტერკონფესიურ სასწავლებელში ყოფილი საბჭოთა კავშირის ტერიტორიაზე.

ინსტიტუტის დამთავრების შემდეგ, 1992 წელს, ის თბილისში ბრუნდება, სადაც მონაწილეობს სახარებისეულად მორწმუნე ქრისტიანთა (ორმოცდაათიანელთა) ეკლესიასთან ბიბლიური კოლეჯის დაარსებაში და რამდენიმე წელიწადს მასწავლებლად მუშაობს იქ.

1995 წელს ეკლესიის დასაფუძნებლად მიემართება ქარელის რაიონის სოფელ კეხიჯვარში. პასტორ მამუკას სიტყვით, იგი რეგიონში იმიტომ წავიდა, რომ იქ განსაკუთრებული სულიერი და ეკონომიკური კრიზისი იყო. თავისი მისია მან იმაში დაინახა, რომ რწმენის სიტყვა გაევრცელებინა ხალხში და მისი მეშვეობით დახმარებოდა ადამიანებს გასაჭირის დაძლევაში.

მისი შრომის შედეგად ქარელის რაიონის სოფელ კეხიჯვარში ჩამოყალიბდა კარგად ორგანიზებული ეკლესია, რომელიც დღესაც არსებობს.

1997 წლის ივლისში იგი თბილისში ბრუნდება. 1997 წლის 7 სექტემბერს შედგა დედაქალაქში მისი პირველი ღვთისმსახურება. მიუხედავად იმისა, რომ საქართველოში პირველი ევანგელური ეკლესია „სიცოცხლის სიტყვა“ ქარელის რაიონში დაფუძნდა, ამ ეკლესიის ცენტრი თბილისშია. რეგიონებში არსებობს 14 საკრებულო: ბათუმის, ქობულეთის, ზუგდიდის, გორის, გურჯაანის, თელავისა და ა.შ.

ეკლესიას საქართველოში ათასამდე მიმდევარი ჰყავს (ცნობისათვის: იგივე ეკლესია აზერბაიჯანში ათას ხუთას წევრს მოიცავს, ხოლო სომხეთში - რვა ათასს).

საქართველოს ევანგელურ ეკლესია „სიცოცხლის სიტყვას“ ქალი პასტორებიც ემსახურებიან, რომელთაგან ზოგიერთი რეგიონებში მოღვაწეობს. ეკლესიაში ფუნქციონირებს „სულიერი საბჭო“, რომლის წევრებიც მხოლოდ პასტორები არიან. საბჭო სამ თვეში ერთხელ იკრიბება სხვადასხვა საეკლესიო და სოციალური საკითხების გადასაწყვეტად.

განსაკუთრებული აღნიშვნის ღირსია ამ ეკლესიის სოციალური აქტივობა. ეკლესიას გახსნილი აქვს უფასო სასადილოები თბილისში (კერძოდ, გლდანში), ბათუმსა და ზუგდიდში. ეს სასადილოები მხოლოდ მზრუნველობა მოკლებულ ბავშვებს ემსახურება. ეკლესიის წევრები მარტოხელა მოხუცებსაც ეხმარებიან - ოჯახებში მიაქვთ მათთან პროდუქტი ჰუმანიტარული დახმარების სახით.

უნდა აღინიშნოს ამ ეკლესიის სპეციფიკური დამოკიდებულების შესახებ ებრაელებისადმი, რომელთა მიმართ განსაკუთრებულ მზრუნველობას იჩენენ. სხვადასხვა სახის სოციალური თანადგომის გარდა, ეკლესიის ხელმძღვანელობა აქტიურად ეხმარება იმ ებრაელებს, რომლებსაც სამშობლოში დაბრუნება სურთ. პასტორი მამუკა ჯებისაშვილი: „ჩვენ, ქრისტიანები დიდ ვალში ვართ ებრაელი ერის მიმართ. შემთხვევითი არ უნდა იყოს ის, რომ სწორედ მათ წიაღში ინება ღმერთმა ამ ქვეყნად მოსვლა“.

საქართველოს ევანგელური ეკლესია „სიცოცხლის სიტყვა“ აქტიურად ზრუნავს საკუთარი მრევლის სულიერინტელექტუალურ განვითარებაზე. ეკლესიასთან ფუნქციონირებს ორწლიანი საღვთისმეტყველო სკოლა, სადაც პირველი წელი ბიბლიურ დისციპლინებს ეთმობა, ხოლო მეორე წელს მისიონერული თეოლოგია ისწავლება. აღნიშნულ სასწავლებელში ჩასარიცხად დაბრკოლებას არ წარმოადგენს ადამიანის განსხვავებული ქრისტიანული რწმენა.

დავით თინიკაშვილი

წყარო

რელიგიები საქართველოში