ეიმერია
ეიმერია –(Eimeria; გერმანელი მეცნიერის თ.ეიმერის პატივსაცემად), უმარტივესების გვარი; მიეკუთვნება Eimeriidae-ს ოჯახს, Sporozoa-ს კლასს, Apicomplexa-ს ტიპს.
ეიმერიები პარაზიტობენ მრავალი სახეობის ცხოველისა და ფრინველის ნაწლავის ეპითელურ უჯრედებში, ასევე, ბატის თირკმელებში, ბოცვრის ღვიძლში. მათ ახასიათებთ სპეციფიკურობა მასპინძლის სახეობისა და ბინადრობის ადგილის მიმართ.
ეიმერიებს განვითარების რთული ციკლი აქვთ. მასპინძლის ორგანიზმში ისინი განვითარების მეროგონიისა და გამეტოგონიის სტადიებს გადიან. გარემოში გამოიყოფიან ფეკალთან ერთად მოუმწიფებელი ოოცისტების სახით. ხელშემწყობი პირობების შემთხვევაში ოოცისტებში მიმდინარეობს სპორულირების პროცესი და ისინი ინვაზიურ სტადიას 1-4 დღის განმავლობაში აღწევენ.
ცხოველების ორგანიზმში რამდენიმე სახეობის ეიმერია პარაზიტობს. მაგ. ხბოს ორგანიზმში პარაზიტობს 10-ზე მეტი სახეობა, რომელთაგან განსაკუთრებით პათოგენურებია – Eimeria zuernii და E.bovis; ცხვრის ორგანიზმში – რვა სახეობა, მათგან ძალზე პათოგენურებია – E.arloingi და E.ninaekohljakimovae; ქათმის ორგანიზმში – 10 სახეობა, რომელთაგან ფართოდ გავრცელებული სახეობებია – E.tenella და E.acervulina.
