ელექტრონული სამუსიკო საკრავები
ელექტრონული სამუსიკო საკრავები – საკრავები, რომლებზეც მუსიკა ელექტრონული ენერგიის მეშვეობით სრულდება. მუსიკოსი-შემსრულებელი ელექტრონულ სამუსიკო საკრავებზე უკრავს ისევე როგორც ჩვეულებრივ საკრავებზე – კლავიატურის (ან გრიფის) პედლების და ა. შ. მეშვეობით. იგი ღებულობს ბგერის საჭირო სიმაღლეს, სიძლიერეს, ტემბრს, გამომსახველობას მაგრამ მას თითქმის არ ეხარჯება კუნთის ენერგია ბგერითი რხევის მისაღებად. ელექტრონული სამუსიკო საკრავები არის: „მრავალხმიანი“ – პედლების, რეგისტრების და მანუალების ჩვეულებრივი სისტემის მქონე ორგანოები, ადაპტირებული როიალი, პიანინო, ფისჰარმონია და „ერთხმიანი“ – ჩვეულებრივ, გრიფი-მანუალით, რომელზედაც შესაძლოა საკრავის მთელი დიაპაზონით შესრულდეს გლისანდო, რაც ხელს უწყობს ინტონირების თავისუფლებას, ვიბრატოს, პორტამენტოს და სხვ. შესრულებას. უდიდესი შესაძლებლობების გამო ელექტრონული სამუსიკო საკრავები განსაკუთრებით ძვირფასია გამოყენებითი, საილუსტრაციო, თეატრალური და კინომუსიკის სფეროში.