ერისთავი თორნიკე (1954 -2019)
NPLG Wiki Dictionaries გვერდიდან
ერისთავი თორნიკე – (1954 – 2019), პოეტი. დაიბადა ქუთაისში. 1980 წელს დაამთავრა ქუთაისის სახელმწიფო პედაგოგიური ინსტიტუტის ფიზიკა-მათემატიკის ფაკულტეტი. წლების მანძილზე ხელმძღვანელობდა გამომცემლობა „მოწამეთას“ (ქუთაისი), მისი რედაქტორობით არაერთი ავტორის წიგნი გამოიცა. მისი ლექსები იბეჭდებოდა ჟურნალ გაზეთებში. პირველი წიგნი „ნუტრია“ (მოთხრობა) გამოვიდა 1991 წელს, ლექსების პირველი კრებული „და ასე შემდეგ“ – 2003 წელს. შემდეგ გამოიცა მისი პოეტური კრებულები: „ოიდა ოვშალე” (2003) „და მაინც მიწა“ (2008.), „ათასმეერთე ფიქრი“ (2018).
- * * *
- ვზივარ და წარსულს ვიგონებ,
- ვზივარ და ფიქრებს მივდენი,
- რამდენზეც გული მიკვდება,
- ცრემლი არა მაქვს იმდენი.
- ერთიც ტიროდა წყლისპირას,
- მოყმეს სცვიოდა ცრემლები,
- ცრემლს როდი შერჩა ბოლომდე,
- გადინადირა ველები.
- მე მასთან მღილიც არა ვარ,
- არა ვარ კვალის დამჩენი,
- არადა, ახლა უფროა
- მამული გადასარჩენი.
- მრევლს თავის საფიქრალი აქვს,
- დარდიც არა აქვს აღარის,
- ხმა უდაბნოსა შინაა,
- ხმა დაფისა და ნაღარის.
- ვზივარ და წარსულს ვიგონებ,
- ვზივარ და ფიქრებს მივდენი,
- რამდენზეც გული მიკვდება,
- ცრემლი არა მაქვს იმდენი.
