ვენერას თმა
Fam. Polypodiaceae – ოჯ. ნამდვილი გვიმრები Adiantum capillus-veneris LL. – ვენერას თმა.
მრავალწლოვანი 15-35 სმ სიმაღლის ბალახოვანი მცენარეა. ფოთლები შიშველია, 2-4 ფრთისებრგანკვეთილი, მათი უკანასკნელი სეგმენტები თხელია, რომბული ან მარაოსებრი, ყუნწები წვრილია, შავი და პრიალა. სორუსები მოგრძო ან მომრგვალო მოყვანილობისაა, ფოთლის სეგმენტების ნაპირებზე ჯგუფ-ჯგუფად განლაგებული.
იზრდება ტყის ქვედა და შუა სარტყელში 100-1200 მ-მდე ტენიან, დაჩრდილულ ტყეებში (ჩანჩქერის შხეფების ან ცოტად თუ ბევრად მუდამ ჟონვადი წყლით დატენიანებულ ადგილებზე), ნაკადულების ან წყაროების მახლობლად, გამოქვაბულების, ჭების ტენიან ადგილებზე და სხვ.
ჩვეულებრივია კოლხეთის ტენიან, დაჩრდილულ ხეობებში, განსაკუთრებით კირქვიან კლდეებზე.
სამკურნალოდ ფესვები და ფოთლები გამოიყენება. შეიცავს ეთერზეთებს, ლიპიდებს, ფენოლკარბონულ მჟავებს, სტეროიდებს, მთრიმლავ ნივთიერებებს და ფლავონოიდებს.
მცენარის სამკურნალო ნაწილები ითვლება შესანიშნავ ანტისეპტიკურ, მატონიზირებელ და ჭრილობების შემახორცებელ საშუალებად, ეფექტურია სხვადასხვა ანთებითი პროცესების საწინააღმდეგოდ. მცენარე დამამშვიდებლად მოქმედებს მცირეწლოვანებზე, ხელს უწყობს მშვიდ ძილს.
ხალხურ მედიცინაში მისი ფოთლები გამოიყენებოდა ჩაის ან სიროფის სახით ხველების ან კატარის საწინააღმდეგოდ.
